བོད་ནང་མེར་བསྲེགས། འཛམ་གླིང་གི་ཆག་སྒོ།

པོལ་མུནིས་བརྩམས། རིག་འཛིན་ལྷུན་གྲུབ་ཀྱིས་བསྒྱུར།

ཕྱི་ལོ་ ༢༠༠༩ ཟླ་ ༢ པའི་ནང་རྔ་པ་ཀིརྟི་དགོན་པར་སྨོན་ལམ་ཚོགས་མི་ཆོག་པའི་བཙན་བཀའ་བཏང་སྟབས། བཟོད་ཐབས་བྲལ་བའི་གནས་སྟངས་འོག་དགོན་པ་དེའི་དགེ་འདུན་པ་ཀྲ་བྷེ་ལགས་ཀྱིས་རང་གི་ལུས་ལ་ས་སྣུམ་ཤོས་ཏེ། ལམ་གྱི་བཞི་མདོར་ཕྱིན་ནས་རང་ཉིད་མེ་ལ་སྒྲོན་ཞིང་། ལག་ཏུ་བོད་ཀྱི་རྒྱལ་དར་དང་༧གོང་ས་ཏཱ་ལའི་བླ་མའི་སྐུ་པར་འཁྱེར་ཡོད། ས་གནས་དེའི་དྲག་ཆས་དམག་མི་མང་པོས་གང་བྱུང་མེ་མདའ་རྒྱག་བཞིན་བཙན་འཁྱེར་བྱས། ཁོང་གསོན་པོར་གནས་ཡོད་ཀྱང་གང་དུ་ཡོད་མེད་ཤེས་རྟོགས་ཐུབ་མེད། བོད་རིགས་སྙན་ངག་པ་དང་དཔྱད་བརྗོད་པ་ཚེ་རིང་འོད་ཟེར་ལགས་ཀྱིས་རང་ཉིད་ཀྱི་དྲ་ཚིགས་ཐོག འདས་པའི་མི་ལོ་བཞི་ལྷག་རིང་ཁྱོན་བོད་མི་ ༡༢༦ ཙམ་གྱིས་རང་ལུས་མེར་བསྲེགས་གནང་སྟེ། རྒྱ་ནག་གི་དབང་བསྒྱུར་ལ་འདོད་པ་མེད་པའི་རྣམ་འགྱུར་བསྟན་པ་ཟིན་ཐོར་བཀོད་ཡོད། མེར་བསྲེགས་གཅིག་དེབ་དཔར་བསྐྲུན་ཟིན་རྗེས་ཐོན་ཡོད། ཉེ་ཆར་ཁོ་མོས་བརྩམས་པའི་དེབ་ ༼ བོད་ནང་མེར་བསྲེགས། འཛམ་གླིང་གི་ཆག་སྒོ༽ ཞེས་པའི་ནང་ཡིད་སྐྱོ་བའི་ཡོ་ལངས་འདིའི་རྒྱབ་ལྗོངས་ཀྱི་གནད་དོན་མང་པོ་ཞིག་ཞིབ་ཅིང་ཕྲ་བར་འགྲེལ་བཤད་བསྐྱོན་ཡོད།

ཧྥ་རན་སའི་སྐད་ཐོག་ཡིག་འབྲུ་ཁྲི་བཞི་ཅན་གྱི་དེབ་༼དབྱིན་སྐད་དང་རྒྱ་སྐད་ཐོག་རྗེས་སུ་ཐོན་ངེས་༽དེ་ནི། འདི་ལོའི་ཕྱི་ཟླ་ལྔ་པ་དྲུག་པའི་ནང་བྲིས་པ་ཞིག་རེད། འོད་ཟེར་ལགས་ཀྱིས་རང་ལུས་མེར་བསྲེགས་ཀྱི་རྣམ་གྲངས་དང་། རང་སྲེག་བྱེད་པའི་རྒྱུ་མཚན། མཐའ་མའི་ཞལ་ཆེམས་རྣམས་ཆེད་བཀོད་བྱས་ཡོད། རྒྱ་ནག་གཞུང་གིས་འགྲེལ་བཤད་རྒྱག་སྟངས་ནི། རང་ལུས་མེར་བསྲེགས་ཀྱིས་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་འགྲིག་གི་མེད་པ་མི་མཚོན་ཟེར་ཞིང་། རྒྱ་གཞུང་གིས་ཕྱོགས་ཡོངས་ནས་དོན་རྐྱེན་འདི་དང་འབྲེལ་བའི་སྐོར་གླེང་སློང་བྱེད་པར་དགག་བྱ་ཤུགས་ཆེན་བྱེད་ཀྱི་ཡོད་པ་མ་ཟད། རྒྱལ་ཁབ་བདེ་སྲུང་ལྷན་ཁང་གིས་འོད་ཟེར་ལགས་ལ་དོན་རྐྱེན་དང་འབྲེལ་བའི་སྐོར་དེབ་སོགས་གང་ཡང་འབྲི་མི་ཆོག་པའི་ཉེན་བརྡ་བཏང་ཡོད་ཀྱང་། ཁོ་མོས་བློ་སྟོབས་ཆེན་པོས་ཉེན་བརྡ་དེ་དག་ལ་ཞེད་སྣང་བྱེད་ཀྱི་མེད།

རྒྱ་ནག་གི་བརྒྱུད་ལམ་ཁག་ཏུ་རང་ལུས་མེར་བསྲེགས་གནང་མཁན་རྣམས་ནི། ནག་ཉེས་ཅན་དང་ར་བཟི་བ། རྒྱན་འགུག་ཤོ་རྒྱག་མཁན། སེམས་ཁམས་བདེ་བོ་མེད་པ། གཞང་འཚོང་མ་སོགས་ཡིན་རབས་བཤད་ཡོད་ཅིང་། ཏཱ་ལའི་རུ་ཚོགས་ཀྱིས་ངན་སྐུལ་བྱས་ཚུལ་སོགས་བརྗོད། དེར་འོད་ཟེར་ལགས་ཀྱིས་ཁོང་ཁྲོ་ཆེན་པོས་རང་ལུས་མེར་བསྲེགས་གནང་མཁན་རྣམས་ནི། བོད་མི་ཚོས་དཔའ་བོར་བརྩི་ཞིང་། ཁོང་རྣམས་ཀྱི་སྐུ་པར་གུས་བཀུར་ཆེན་པོས་ཁྱིམ་ཚང་དང་དགོན་པའི་ནང་སྒྲིག་བཤོམ་བྱེད་པ་དང་། བསྟོད་བསྔགས་ཀྱི་གླུ་དབྱངས་འབུལ་གྱི་ཡོད་ཟེར།

རང་ལུས་མེར་བསྲེགས་ཀྱིས་བོད་སྤྱི་ཚོགས་ཧྲིལ་པོ་མཚོན་གྱི་ཡོད། འོད་ཟེར་ལགས་ཀྱི་ཟིན་ཐོའི་ནང་དོན་རྐྱེན་ ༡༢༥ ལས་མི་གྲངས་ ༡༠༤ མེར་བསྲེགས་ཀྱིས་འདས་ཡོད་པ་དང་། ༢༠༠༩ ལོར་དོན་རྐྱེན་ ༡ དང་། ༢༠༡༡ ལོར་ ༡༤ ། ༢༠༡༢ ལོར་ ༨༦ ། ད་ལོར་ ༢༥ བྱུང་པ་ལས་གཅིག་དེབ་དཔར་བསྐྲུན་ཟིན་རྗེས་བྱུང་ཡོད། ལོ་ན་རྒན་ཤོས་ལོ་ ༦༤ དང་། ཆུང་ཤོས་ལོ་ ༡༦ ཡིན་པ་དང་། ཆ་སྙོམས་ཀྱི་ལོ་ཚད་ནི་ ༢༦ ཆགས་ཀྱི་ཡོད། སྐྱེ་པ་ ༡༠༦ དང་། བུད་མེད་ ༡༨ བྱུང་ཡོད་པའི་ཁྲོད་ ༢༡ ནི་བུ་ཕྲུག་གི་ཕ་ཡིན་ཞིང་། ༡༠ ནི་ཨ་མ་ཡིན། སེར་མོ་པ་ ༤༢ ལས་༣ ནི་བླ་མའམ་སྤྲུལ་སྐུ་ཡིན། དེ་བཞིན་འབྲོག་པ་ ༦༣ དང་། ངལ་རྩོལ་པ་ ༣ དང་། ཤིང་བཟོ་པ་ ༡ དང་། རྩོམ་པ་པོ་༡ དང་། ལྷ་བྲིས་པ་ ༡ དང་། རླངས་འཁོར་ཁ་ལོ་པ་ ༡ དང་། ཤིང་ནགས་སྲུང་སྐྱོབ་ལས་བྱེད་ ༡ ། སྔོན་མ་ཏང་ཡོན་ཡིན་པ་ ༡ ། འབྲིང་རིམ་སློབ་གྲྭའི་སློབ་ཕྲུག་བུ་མོ་ ༢ དང་བུ་ ༣ བཅས་བྱུང་ཡོད། དེབ་ཀྱི་ལེ་ཚན་གལ་ཆེན་ཞིག་ནི་འོད་ཟེར་ལགས་ཀྱིས་ཕྱོགས་བསྡུས་གནང་པའི་ཞལ་ཆེམས་ ༤༦ ཐོག་དབྱེ་ཞིབ་གནང་ཡོད་ཅིང་། དེ་དག་གིས་རང་བསྲེགས་ཀྱི་ཀུན་སློང་ཁ་གསལ་གཏིང་གསལ་བསྟན་ཡོད།

ཞལ་ཆེམས་དག་ལས་འགའ་ཞིག་ལ་ཚིག་འབྲུ་ཁ་ཤས་ལས་མེད། དེ་དག་གི་ནང་ལག་བྲིས་སྒྲ་བཅུག་བྱས་པ། གྲོགས་པོ་དང་སྤུན་ཉེ་དག་ལ་བཤད་པའི་སྐད་ཆ་བཅས་ཚུད་ཡོད། རང་ལུས་མེར་བསྲེགས་དོན་རྐྱེན་དངོས་སུ་མཐོང་མཁན་ཚོར་གཞིགས་ན། རང་ལུས་མེར་བསྲེགས་གནང་མཁན་ ༥༠ ལྷག་གིས་རང་ལུས་མེར་བསྲེགས་གནང་སྐབས་ཆབ་སྲིད་འབོད་ཚིག་བསྒྲགས་ཡོད། དཔེར་ན། ༧གོང་ས་ཏཱ་ལའི་བླ་བོད་ལ་ཕེབས་བཅུག་དགོས་ཞེས་པ་དང་། བོད་ལ་རང་དབང་དགོས་ཞེས་པ། བོད་རང་བཙན་ཡིན་ཞེས་པ་སོགས་འབོད་སྒྲ་བསྒྲགས་ཡོད། རྒྱ་གཞུང་གིས་རང་སྲེག་དོན་རྐྱེན་ནི། ཏཱ་ལའི་བླ་མས་བརྒྱུད་སྐུལ་བྱས་ཏེ་བོད་རྒྱ་ནག་དང་ཁ་བྲལ་གཏོང་ཐབས་ཤིག་ཡིན་པའི་ཉེས་འཛུགས་བྱེད་ཀྱི་ཡོད།

འོད་ཟེར་ལགས་ཀྱིས་གསུངས་དོན། རང་ལུས་མེར་བསྲེགས་ནི་རྒྱ་ནག་གིས་ལོ་མང་རིང་བོད་མིའི་ཆོས་དད་རང་དབང་དང་། ཆབ་སྲིད་རང་དབང་སོགས་ལ་ཚད་ལས་བརྒལ་པའི་བཀག་སྡོམ་བྱས་པའི་ཉེར་ལེན་ལས་བྱུང་པ་ཞིག་རེད་ཟེར། དགོན་པའི་མཐའ་ཡོངས་རྫོགས་སྐོར་སྲུང་པས་སྐོར་པ་དང་། བཙན་དབང་གིས་རྒྱལ་གཅེས་ཆོས་གཅེས་སློབ་གསོ་སྤྲོད་པ། དགེ་འདུན་པ་ཚོར་བཙན་དབང་གིས་༧གོང་ས་ཏཱ་ལའི་བླ་མར་མཚན་སྨད་ཞུ་བཅུག་པ། དགོན་པའི་སྒྲིག་ཁོངས་ནས་ཕྱིར་འཕུད་གཏོང་པ། འཛིན་བཟུང་བཀག་ཉར་བྱེད་པ། འབྲོག་པ་རྣམས་བཙན་དབང་འོག་འཚོ་རྟེན་བསྒྱུར་བཅོས་གཏོང་པ། ཁོར་ཡུག་ཆགས་འཇིག་སྲུང་སྐྱོབ་དགོས་པ་མངོན་གསལ་དོད་པོས་མཐོང་པ་བཅས་ལ་ཐུག་ཡོད་པ་ནན་བརྗོད་བྱས་ཡོད། དེ་བཞིན། དགོན་པ་ཚང་མར་རྒྱ་དར་བསྒྲེང་བཅུག་པ་དང་། ཏང་གི་མགོ་ཁྲིད་ཚོའི་པར་སྒྲིག་བཤོམ་བྱེད་དགོས་ཤིང་། སྒམ་དང་སྒོ་རེ་རེར་སྔོག་བཤེར་བྱས་ཏེ་གུས་བཀུར་ཅན་གྱི་བོད་པའི་ཆོས་ཕྱོགས་ཀྱི་དབུ་ཁྲིད་རྣམ་པའི་སྐུ་པར་བཙན་འཕྲོག་བྱེད་ཀྱི་ཡོད་པ་རེད་ཟེར།

འོད་ཟེར་ལགས་ལྷ་སར་བཞུགས་སྐབས། དུས་རྟག་ཏུ་བདེ་སྲུང་ཚན་པས་རྗེས་དེད་གཏོང་པ་དང་། མཚམས་རེར་ཁོ་མོ་པེ་ཅིན་དུ་རང་གི་སྡོད་གནས་སུ་དོ་དམ་བཀག་ཉར་བྱེད་ཀྱི་ཡོད། ཁོ་མོས་བརྗོད་པར། རྒྱ་ནག་གཞུང་གིས་བོད་མི་ཚོའི་ཉིན་རེའི་འཚོ་བར་སོ་ལྟ་དང་སྟངས་འཛིན་བྱེད་ཀྱི་ཡོད་པ་ཟེར། དམར་ཤོག་དཔོན་རིགས་ཚོས་རང་ལུས་མེར་བསྲེགས་ནི་ནང་ཆོས་ཀྱི་ལྟ་སྤྱོད་དང་འགལ་ཡོད་པའི་སྐྱོན་བརྗོད་བྱེད་ཀྱི་ཡོད་མོད། ༼ ༡༩༦༣ ལོར་ཝེ་ཏི་ནམ་དུ་གྲྭ་བ་ཞིག་གིས་རྒྱལ་ཁབ་ནང་ཨ་རིའི་ཐེ་བྱུས་ལ་ངོ་རྒོལ་གྱིས་རང་ལུས་མེར་བསྲེགས་བཏང་བར་རྒྱ་ནག་གིས་བསྔགས་བརྗོད་བྱས་པ་བརྗེད་པ་རེད་དམ།༽ འོད་ཟེར་ལགས་ཀྱིས་དེ་སྔོན་དོན་རྐྱེན་དེར་སྐུལ་སློང་བྱས་པའི་ཉེས་འཛུགས་རག་པར་དོགས་ཏེ་གླེང་སློང་བྱེད་རྒྱུར་ཡིད་གཟབ་བྱས་མོད། དོན་རྐྱེན་བྱུང་ཚད་གྲངས་འབོར་མང་དུ་འགྲོ་བཞིན་ཡོད་སྟབས། ཁོ་མོར་སྐད་ཆ་ཤུགས་ཆེ་ཙམ་བཤད་རྒྱུའི་སྤོབས་པ་བྱིན་སོང་ཟེར། ཁོ་མོས་རང་ལུས་མེར་བསྲེགས་ནི་འཚེ་མེད་ཞི་བའི་རང་བཞིན་ཡིན་པར་རྗོད་ཀྱི་ཡོད་ཅིང་། ཆེས་མཐའ་མཇུག་གི་ཞལ་ཆེམས་གང་ཞིག་གིས་ཀྱང་གཞན་ལ་གནོད་འཚེ་སྐོར་བརྗོད་མེད་པ་ནི་དེབ་ཀྱི་རྒྱབ་ཤ་ནས་གསལ་སྟོན་བྱས་ཡོད།

ཧྥ་རན་སིའི་དཔེ་དེབ་དཔར་སྐྲུན་པ་ཨིན་ཌི་ཇན་གྱིས་འོད་ཟེར་ལགས་སུ་དེབ་ཅིག་བྲི་དགོས་པའི་སྐུལ་མ་བྱས་རྗེས། ཁོ་མོས་སྙན་གྲགས་ཅན་གྱི་སྒྱུ་རྩལ་པ་ཨེ་ཝེ་ཝེ་ལགས་སུ་དེབ་ཀྱི་རྒྱབ་ཤ་ཇུས་འགོད་ལ་འབོད་སྐུལ་ཞུས་ཤིང་། རྒྱབ་ཤ་དཀར་པོའི་ཐོག་ལི་ཁྲི་མདོག་ཅན་གྱི་མེ་ལྕེའི་ཚོན་མདོག་དང་མཉམ་དུ་རང་ལུས་མེར་བསྲེགས་གནང་མཁན་རྣམས་ཀྱི་མཚན་བཀོད་ཡོད། སྒྱུ་རྩལ་འབུར་འཐོན་རང་བཞིན་གྱི་མེ་ལྕེ་དེས་འཚེ་པ་མེད་པ་མཚོན་པ་ལས། དེ་ནི་མི་རྣམས་ལ་འཇིགས་སྣང་སྐྱེས་པ་ཞིག་མིན་ཞེས་དང་། དེབ་ཀྱི་རྒྱབ་ཤའི་མཚོན་དོན་དེས། ཚེ་སྲོག་བློས་གཏོང་གནང་མཁན་རྣམས་ལ་ཁ་བཏགས་ལྟ་བུའི་ལེགས་གསོལ་ཞིག་མཚོན་ཡོད་ཟེར།

ཁོ་མོས་རྒྱ་གཞུང་གིས་རང་ལུས་མེར་བསྲེགས་ཀྱི་རྒྱབ་ལྗོངས་རྒྱུ་མཚན་ལ་བསམ་གཞིག་བྱེད་རྒྱུ་ལས་ལྡོག་སྟེ། བཙན་གནོན་ཤུགས་ཆེན་བྱེད་ཀྱི་ཡོད་པ་རེད་ཟེར། དོན་རྐྱེན་གྱི་འགན་འཁུར་ནི་སྲིད་གཞུང་ལ་ཡོད་པ་མའོ་ཙེ་ཏུང་གི་སྐད་ཆ་ཞིག་ལུང་འདྲེན་གནང་དོན། གང་དུ་གཉའ་གནོན་ཡོད་པ་དེར་ངོ་རྒོལ་ཡོད་ཅེས་དང་། མི་རྣམས་ཀྱིས་རང་ལུས་མེར་བསྲེགས་ནི་ངོ་རྒོལ་ཞིག་ཡིན་པ་ངེས་པར་དུ་ཤེས་དགོས། ཇི་སྲིད་རྒྱུ་རྐྱེན་ཐག་གཅོད་མ་བྱས་བར་དུ་ངོ་རྒོལ་མུ་མཐུད་ངེས་རེད་ཟེར། ངོ་རྒོལ་བྱེད་མཁན་ཚོའི་ཐོག་རྒྱ་གཞུང་གི་ཉེན་རྟོག་པ་དང་དམག་མི་ཚོས་བཙན་གནོན་དང་དྲག་སྤྱོད་བྱེད་ཀྱི་ཡོད་པ་དེས་མི་མང་གི་ངོ་རྒོལ་དེ་བས་རྣོ་ངར་ཆེ་རུ་གཏོང་དགོས་ཐུག་གི་ཡོད་པ་རེད་ཟེར།

སྲིད་གཞུང་གིས་ངོ་རྒོལ་པ་ཚོར་གཉའ་གནོན་དྲག་སྤྱོད་ཁོ་ན་སྤེལ་གྱི་ཡོད་པ་ཁོ་མོས་ལྷ་ས་ནས་ཕྲན་ལ་ཁ་པར་ཐོག་བརྗོད་བྱུང་། སྙིང་སྟོབས་ཅན་གྱི་བོད་མི་ཚོས་མཐར་ཐུག་གི་གདམ་ཀ་ནི་རང་ལུས་མེར་བསྲེགས་རེད་ཅེས་ཟེར། ཉེན་རྟོག་པས་རང་ལུས་མེར་བསྲེགས་གནང་མཁན་ཚོའི་གྲོགས་པོ་དང་། སྤུན་ཉེ་རྣམས་ལ་བྱ་ར་བྱེད་ཅིང་བཙོན་འཇུག་བཀག་ཉར་བྱེད་ཀྱི་ཡོད་པ་ལས། གཅིག་ནི་ཚེ་བཙོན་དུ་བཅུག་ཡོད་འདུག གཞན་རྣམས་ལ་གནས་ཚུལ་ཕྱིར་གཏོང་བྱས་པའི་ཉེས་ཆད་གཏོང་གི་ཡོད། དེ་འདྲའི་གཉའ་གནོན་འོག་རང་ལུས་མེར་བསྲེགས་གནས་ཚུལ་ཕྱིར་བསྒྲགས་འགྲོ་པར་ཉིན་དང་ཟླ་བ་འགོར་གྱི་ཡོད་པ་རེད་ཟེར། བོད་ས་ཁུལ་ཁག་ཏུ་རང་ལུས་མེར་བསྲེགས་བྱུང་པའི་གྲངས་ཚད་ནི། ཤེས་རྟོགས་བྱུང་པ་ལས་མང་པ་བྱུང་ཡོད་ངེས་རེད་ཟེར། ཁོ་མོས་བོད་མི་རྣམས་ཀྱིས་རང་ལུས་མེར་བསྲེགས་གནང་པ་ནི། རྒྱལ་སྤྱིས་རྒྱབ་སྐྱོར་ཐོབ་ཆེད་ཙམ་མིན་པར། བོད་མི་རྣམས་གཉིད་ལས་སད་ཆེད་དང་། རྒྱ་གཞུང་གི་མགོ་གཙོ་ཚོས་སྲིད་ཇུས་ལ་བསྒྱུར་བཅོས་གཏོང་རྒྱུར་གནོན་ཤུགས་སྤྲོད་ཆེད་རེད་ཟེར། འོན་ཀྱང་། རྒྱལ་སྤྱིའི་ལྟ་སྟངས་ལ་ཁོ་མོས་བློ་ཕམ་ཚད་མེད་གནང་གི་ཡོད། ཁོ་མོས་དོན་རྐྱེན་ཞིག་བགྲང་དོན། ཕྱི་ལོ་ ༡༩༦༣ ལོར་སའེ་གོན་སྲང་ལམ་དུ་ཝིཏ་ནམ་གྲྭ་བ་ཐིཀ་ཀོན་ཌའུ་ཞེས་པས་རང་ལུས་མེར་བསྲེགས་གནང་པར་བརྟེན་ཏེ། རྒྱལ་སྤྱིས་ལྷོ་ཝིཏ་ནམ་སྲིད་གཞུང་གི་ནང་ཆོས་ཀྱི་ལྟ་སྤྱོད་དང་མི་མཐུན་པའི་སྲིད་ཇུས་ལ་ངོ་རྒོལ་ཆེན་པོ་བྱས་ཡོད་ཟེར།

རང་སྲེག་གནང་མཁན་ཉུང་ཉུང་ཞིག་ནས་མགོ་བཙུགས་ཏེ་ད་ཆ་ ༡༢༠ ལྷག་བརྒལ་ཟིན་ཡང་། རྒྱལ་སྤྱིའི་སྤྱི་ཚོགས་ཀྱིས་གང་ཡང་མི་སྨྲ་པར་ཁུ་སིམ་མེར་བསྡད་ཡོད་པ་རེད། ཁུ་སིམ་དེས་མི་རྣམ་བློ་ཕམ་བཅུག་ཡོད་པ་རེད་ཟེར། ༡༩༨༦ ལོར་འཛམ་གླིང་ཞི་བདེའི་གཟེགས་རྟགས་བཞེས་མཁན་གྱིས་ས་ཁུལ་ཞིག་ཏུ་མི་རྣམས་དཀའ་སྡུག་མྱོང་བཞིན་པར་འཛམ་གླིང་གིས་སྣང་མེད་གཏོང་པའི་དུས་ཚིགས་སྐོར་གསུངས་པ་ཞིག་འོད་ཟེར་ལགས་ཀྱིས་ལུང་འདྲེན་གནང་དོན། འདི་ནི་དངོས་བདེན་ཡིན་སྲིད་དམ། འདི་ནི་དུས་རབས་ཉི་ཤུ་པ་ཡིན་པ་ལས་དུས་རབས་བར་མ་མིན། སུས་དེ་ལྟ་བུའི་ནག་ཉེས་བྱེད་བཅུག་པ་རེད་དམ། འཛམ་གླིང་ཇི་ལྟར་ཁུ་སིམ་མེར་འདུག་ཐུབ་བམ། ཞེས་གསུངས་ཡོད་པ་རེད་ཟེར། འཛམ་གླིང་གི་དཔལ་འབྱོར་ཉམས་རྒུད་དང་རྒྱ་ནག་གི་དཔལ་འབྱོར་ཤུགས་རྐྱེན་ཇེ་ཆེར་སོང་པར་བརྟེན། རང་ལུས་མེར་བསྲེགས་དོན་རྐྱེན་ནི་ཡ་ང་བའི་བདེན་དོན་ཞིག་ཏུ་གྱུར། ཁོ་མོས་རྒྱལ་ཁབ་ཚང་མར་སོ་སོའི་ཁེ་སང་ཆེན་པོ་རེ་ཡོད་སྟབས། འགྲོ་བ་མིའི་ཐོབ་ཐང་ལ་གཡོལ་གྱི་ཡོད་པ་རེད། རྒྱལ་སྤྱིས་གནོན་ཤུགས་ཀྱིས་བོད་ཐོག་རྒྱའི་གཉའ་གནོན་མཚམས་འཇོག་ཡོང་ངེས་རེད་ཅེས་སོགས་བརྗོད་འདུག