རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བརྒྱད་པ་དེ་ཁ་སང་དབུ་འཛུཊ་གནང་ཡོད་པ་དང་། ཉིན་བཞིའི་རིང་གི་ཚོགས་འདུའི་ཐོག་བོད་དོན་འཐབ་རྩོད་ཀྱི་གནས་བབ་དང་རང་ལུས་མེར་བསྲེཊ་སོགས་ཀྱི་ཐོག་བགྲོ་གླེང་གནང་འཆར་ཡོད་འདུག
1.jpg)
ཁ་སང་སྔ་དྲོའི་ཆུ་ཚོད་ ༡༠ པའི་ཐོག བྷ་རོ་ཌ་སློབ་ཕྲུག་མཐུན་ཚོགས་དང་ས་གནས་གཞོན་ནུའི་གོ་སྒྲིག་འོག རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བརྒྱད་པ་དེ་རྒྱ་གར་བྱང་ཕྱོཊ་གྷོ་ཇི་ར་ཊི་ (Gujurat) མངའ་སྡེའི་གྲོང་ཁྱེར་བྷ་རོ་ཌར་ (Baroda) རུ་ཚོགས་ཡོད་པ་དང་། ཚོགས་འདུ་དབུ་འབྱེད་ཐོག་མངའ་སྡེའི་དཔལ་འབྱོར་བློན་ཆེན་ཟུར་པ་སེན་ཏཱ་མེ་ཧ་ཏཱ་ལགས་དང་བོད་དོན་རྒྱབ་སྐྱོར་བ་ཌོག་ཊར་བྷེ་ཀར་ལགས། གཞོན་ནུའི་ཚོགས་གཙོ་བསྟན་འཛིན་འཇིགས་མེད་ལགས་བཅས་དང་། གཞན། རྒྱ་གར་མཐོ་སློབ་ཁག་གི་བོད་པའི་སློབ་ཕྲུག་གཙོས་ཏཱ་ལའི་བླ་མ་མཐོ་སློབ་དང་ཝར་ན། སཱ་ར། ནོར་གླིང་། ཤེས་རབ་དགའ་ཚལ་སློབ་གླིང་བཅས་ཀྱི་ཁྱོན་སློབ་ཁག་ ༡༠ ནས་སློབ་མ་ ༤༠ ཙམ་མཉམ་ཞུགས་གནང་ཡོད་འདུག
སྐུ་མགྲོན་གཙོ་བོ་ལགས་ཀྱིས་བོད་དོན་རྒྱབ་སྐྱོར་བ་ཌོག་ཊར་ནེ་ནི་ལགས་དང་བོད་རིགས་ན་གཞོན་རྡོ་རྗེ་ཚེ་བརྟན་ལགས་གཉིས་ལ་བོད་རིགས་མཐོ་རིམ་སློབ་མའི་གཟེངས་བསྟོད་བྱ་དགའ་ཕུལ་རྗེས། ཁོང་གིས་གཏམ་བཤད་གནང་བར། བོད་རིགས་ན་གཞོན་ཚོས་བོད་ཀྱི་རྩ་དོན་འཐབ་རྩོད་རྒྱུན་གནས་སླད། མུ་མཐུད་ནས་འབད་བརྩོན་དང་མདུན་སྐྱོད་བྱ་རྒྱུ་གལ་ཆེན་ཡིན་པ་མ་ཟད། བོད་མི་ཚོས་སོ་སོ་གནས་སྡོད་བྱེད་སའི་ས་གནས་མི་མང་དང་མཉམ་དུ་འབྲེལ་འདྲིས་བྱས་ཏེ། ཕན་ཚུན་མཉམ་འབྲེལ་ཐོག་བོད་དོན་ལ་རྒྱབ་སྐྱོར་ཐོབ་ཐབས་བྱ་དགོས་པ་དང་། དྲང་བདེན་དང་རང་དབང་འཐབ་རྩོད་ཆེད་མུ་མཐུད་སྤོབས་པ་ཆེར་སྐྱེད་ཀྱིས་འབད་བརྩོན་ཞུ་རྒྱུ་གལ་ཆེན་ཡིན་ཚུལ་དང་། ཌོག་ཊར་བྷས་ཀར་ལགས་ནས་བོད་མི་ཚོས་རྒྱལ་ཁབ་སླར་གསོའི་ཆེད། རང་བཙན་ཞེས་པའི་ཚིག་རྩ་ཆེན་འདི་མི་བརྗེད་པར་སྔར་ལས་ལྷག་པའི་འབད་བརྩོན་གནང་རྒྱུ་གལ་ཆེན་ཡིན་པའི་གཏམ་བཤད་སོགས་གནང་ཡོད་འདུག
ཚོགས་ཆེན་འདིའི་དམིགས་ཡུལ་གཙོ་བོ་བོད་རིགས་མཐོ་རིམ་སློབ་མ་ཕན་ཚུན་འབྲེལ་ལམ་དམ་ཟབ་ཡོང་ཆེད་དང་། བོད་ཀྱི་ན་གཞོན་ཚོས་རང་ངོ་རང་ཤེས་དང་རང་འགན་རང་འཁུར་གྱི་བསམ་བློ་སྐྲུན་ཐབས་སོགས་ཡིན་འདུག ཉིན་ ༤ རིང་གི་བརྗོད་གཞི་གཙོ་བོ་དག་ནི། དང་པོ། བོད་ཀྱི་རྩ་དོན་འཐབ་རྩོད་ཀྱི་གནས་བབ་དང་འབྲེལ་བའི་སྐོར་དང་། གཉིས་པ། རང་ལུས་མེར་བསྲེགས་གནད་དོན་ཐོག་གོ་བསྡུར། གསུམ་པ། བོད་རིགས་མཐོ་རིམ་སློབ་མའི་ཚོགས་ཆེན་གྱི་གྲོས་ཆོད་ཁག་ལ་བསྐྱར་ཞིབ་དང་མ་འོངས་ལས་དོན་ཇི་དགེའི་སྐོར། བཞི་བ། ཚོགས་ཆེན་སྲ་བརྟན་དང་རྒྱུན་གནས་ཡོང་ཐབས་སྐོར། ལྔ་བ། མཐོ་རིམ་སློབ་མའི་འོས་འགན་དང་མདུན་ལམ་ཤེས་ཡོན་བཅས་ཀྱི་ཐོག་གོ་བསྡུར། དྲུག་པ། མགོ་ཁྲིད་ནུས་པ་གོང་འཕེལ་གཏོང་ཕྱོགས་བཅས་ཀྱི་ཐོག་བགྲོ་གླེང་གོ་བསྡུར་གནང་རྗེས་གྲོས་ཆོད་གཏན་འབེབས་བྱ་འཆར་ཡོད་འདུག
ཚོགས་འདུའི་ཐོག་བོད་མིའི་སྒྲིག་འཛུཊ་ཤེས་རིག་ལས་ཁུངས་ཀྱིས་ལས་བྱེད་གཉིས་ཆེད་ཕེབས་ཀྱིས་མཐོ་སློབ་ཀྱི་སློབ་ཚན་ལེན་སྟངས་ཐོག་གཏམ་བཤད་དང་། གྷོ་ཇི་ར་ཊི་མངའ་སྡེའི་དབུས་གཙུག་ལག་སློབ་གཉེར་ཁང་གི་རང་ལུས་མེར་བསྲེཊ་ཐད་ཞིབ་འཇུག་གནང་མཁན་བསོད་ནམས་སྟོབས་རྒྱལ་ལགས་ཀྱིས་མེར་བསྲེཊ་ཐད་གཏམ་བཤད། བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་༼ད་ལྟའི་བོད་ཀྱི་འཐབ་རྩོད་ཀྱི་གནས་བབ༽ཞེས་པའི་བརྗོད་གཞིའི་ཐོག་གཏམ་བཤད། ལྡི་ལིར་གློག་ཀླད་ཐོག་སློབ་སྦྱོང་གནང་བཞིན་པའི་སློབ་མ་གསུམ་གྱིས་གློག་ཀླད་ཀྱི་བདེ་འཇགས་སྐོར་ལ་གཏམ་བཤད། རྒྱ་གར་གྱི་མཁས་དབང་སེ་མཱ་ཤོ་བྷི་ཤི་ལགས་ཀྱིས་གཞོན་སྐྱེས་ཚོའི་སྣེ་འཁྲིད་གནང་ཕྱོགས་ཐོག་གཏམ་བཤད་བཅས་གནང་གནང་རྒྱུ་ཡིན་འདུག
གསར་འགོད་པས་ཁ་པར་བརྒྱུད་ཚོགས་འདུ་གོ་སྒྲིག་པ་ཕུན་ཚོགས་ཉི་མ་ལགས་སུ་བཅར་འདྲི་ཞུས་པར་ཁོང་གིས། “ ནམ་རྒྱུན་ང་ཚོ་ཡེ་ཤུའི་འཁྲུངས་སྐར་གྱི་གུང་གསེང་དང་བསྟུན་ཏེ་ཚོགས་ཀྱི་ཡོད་ཀྱང་། ད་ལོ་དཔལ་འབྱོར་དཀའ་ངལ་གྱི་དབང་གིས་ཚོགས་འདུ་ཕྱིར་འགྱངས་བྱེད་དགོས་བྱུང་སོང་། དེ་སྔའི་ཚོགས་འདུ་རིམ་པ་བརྒྱུད་དེ་གཞོན་སྐྱེས་ཕན་ཚུན་བར་གྱི་འབྲེལ་ལམ་མཐུན་ལམ། བསམ་བློ་བརྗེ་རེས་སོགས་ཀྱི་ཐོག་ཕན་ཐོགས་བྱུང་འདུག ད་རེབ་ཀྱང་སློབ་ཕྲུག་མང་ཕེབས་འདུག་སྟབས། ང་ཚོས་གྲུབ་འབྲས་ཡག་པོ་འབྱུང་རྒྱུར་ཡིད་ཆེས་བྱེད་ཀྱིན་ཡོད།” ཅེས་བརྗོད་བྱུང་།
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
བོད་རིགས་སློབ་ཆེན་སློབ་མའི་ཚོགས་འདུར་ཕེབས་མཁན་ཡོངས་ལ་བཀྲ་ཤིས་བདེ་ལེགས་ཞུ། ཁོ་བོ་དེ་སྔོན་ཚོགས་འདུ་ཐེངས་གཉིས་པ་དང་གསུམ་པར་ཞུགས་མྱོང་། རྒྱུ་མཚན་གསལ་པོ་མི་ཤེས་ཀྱང་ད་ལན་ཚོགས་འདུར་ཞུགས་མཁན་ཧ་ཅང་ཉུང་འདུག གང་ལྟར་ཡང་། ཕྱི་སྡོད་བོད་རིགས་སློབ་ཆེན་སློབ་མ་རྣམས་ལ་ཆ་མཚོན་ན་མཉམ་འཛོམས་ཀྱི་སྟེགས་བུ་འདི་གལ་གནད་ཆེ་བས་མུ་མཐུད་རྒྱུན་གནས་ཐུབ་པ་བྱ་དགོས། ཉིན་ཤས་ཀྱི་ཚོགས་འདུའི་རིང་ཁྱེད་ཀྱིས་བྱས་རྗེས་གང་ཡང་འཇོག་མི་ཐུབ་ཀྱང་། སློབ་ཆེན་སློབ་མ་ཞིག་གི་འགན་འཁྲི་དང་ལྗིད་ཚད་ཚོར་བའི་སྒོ་ནས་ཁྱེད་ཀྱི་བསམ་སྤྱོད་ལ་ལེགས་བཅོས་ཕྲན་བུ་ཞིག་ནི་ཡོང་ངེས། དེས་ན། རྒྱུ་ནུས་དུས་གསུམ་སྤྱད་ཅིང་ཀུན་གྱི་རེ་བ་བཅང་ཡུལ་གྱི་སློབ་ཆེན་སློབ་མ་ཚོས་རང་རང་གི་བློའི་ཡོལ་བ་ཕྱེ་ནས་ཕྱི་ནང་རིག་པའི་གནས་ལ་བརྩོན་པར་མཛོད་ཞུ།
དྲན་ཚོད་ལ་རང་ངོ་རང་ཤེས་དང་རང་འགན་རང་འཁུར་ཞེས་པ་དེ་བོད་རིགས་མཐོ་རིམ་སློབ་མའི་ཚོགས་ཆེན་དང་པོའི་སྐབས་གཏན་འབེབས་གནང་བའི་ཚོགས་ཆེན་གྱི་དགོས་དམིགས་ཤིག་ཡིན་ཞིང་། ད་བར་ཚོགས་ཆེན་ཐེངས་བརྒྱད་ཀྱི་ཐོག་དགོས་དམིགས་འདི་རང་གཙིགས་ཆེར་འཛིན་ཡོད།
ཚོགས་ཆེན་འདིའི་ཐོག་རང་བཙན་དང་དབུ་མ་སོགས་གང་ཞིག་གླེང་ཡོད་ཀྱང་། ཚོགས་ཆེན་གྱི་དགོས་དམིགས་དང་ལས་དོན་བྱ་ཕྱོགས་ནང་༸གོང་ས་སྐྱབས་མགོན་ཆེན་པོའི་བཀའ་བཞིན་བསྒྲུབ་རྒྱུ་ཞེས་དམ་བཅས་པ་དག་ལས་མི་འགལ་བ་བྱས་ཏེ། ཆབ་སྲིད་ཀྱི་ལས་འགུལ་ཙག་ཙིག་ནང་ཞུགས་པ་ལས་སློབ་གསོའི་ལས་འགུལ་གང་མང་སྤེལ་བ་དང་། སྐབས་བབ་རང་འཕྲིའི་སློབ་སྦྱོང་ཐོག་དོ་སྣང་ཆེར་བསྐྱེད་བྱ་གལ།
དྲ་གྲོགས་ཚེ་བཟང་ལགས་ཀྱིས་རྒྱ་གར་ནང་གི་བོད་རིགས་མཐོ་རིམ་སློབ་མ་ཚོས་བོད་ཡིག་བོད་སྐད་ཐོག་ཤུགས་བརྒྱབ་སྟེ་མི་རིགས་གཞན་པའི་མདུན་ནས་ངོ་གནོང་མི་དགོས་པ་ཞིག་བྱེད་རྒྱུ་དེ་ནི། རང་ངོ་རང་ཤེས་དང་རང་འགན་རང་འཁུར། ཟེར་བ་དེ་རེད་ཅེས་གསུངས་འདུག་པ་དེ་ནི་ཅི་འདྲའི་ལེགས་བཤད་གནད་དུ་འཁེལ་བ་ཞིག་རེད་ཨང་། འདི་སློབ་ཕྲུག་ཚོས་ཐུགས་ལ་ཉར་རྒྱུ་ཧ་ཅང་གལ་ཆེན་དོན་ཆེན་རེད།
མཐོ་རིམ་སློབ་མའི་ཚོགས་ཆེན་ལ་བཀྲ་ཤིས་བདེ་ལེགས་ཞུ་བ་དང་ཆབས་ཅིག་སྐུ་མགྲོན་གཙོ་བོས་རང་བཙན་ཞེས་པའི་ཚིག་རྩ་ཆེན་འདི་མི་བརྗེད་པར་སྔར་ལས་ལྷག་པའི་འབད་བརྩོན་གནང་རྒྱུ་གལ་ཆེན་ཡིན་པའི་གཏམ་བཤད་གནང་བ་དེ་ནི་ལོ་རྒྱུས་ཀྱི་རྒྱབ་ལྗོངས་ནག་སུབ་གཏོང་ཐབས་མེད་པའི་བདེན་པ་ཡིན་པ་ཕྱིའི་མི་ཞིག་གིས་ཀྱང་དེ་ལྟར་བཤད་ན་ང་ཚོས་ཡིན་ད་ཡིན་དོན་ལ་གནས་པའི་སྐད་ཆ་རེད། དེང་དུས་ཀྱི་སློབ་སྦྱོང་ཡོད་ལ་རྨོངས་དད་དང་གཞན་དབང་དུ་མ་སོང་པར་བོད་མི་རིགས་དང་རྒྱལ་ཁབ་ཁོ་ནའི་དོན་དུ་འབད་བརྩོན་གནང་རྒྱུ་ནི་རང་རེ་ན་གཞོན་ཚོས་དོར་དུ་མེད་པའི་འོས་འགན་རེད། ད་རེས་གཞོན་ནུའི་ཚོགས་གཙོ་མཆོག་དང་། བོད་དོན་བདེན་པའི་འཐབ་རྩོད་པ་བསྟན་འཛིན་བརྩོན་འགྲུས་ལགས་སོགས་ཆེད་དུ་གདན་ཞུས་བཀའ་སློབ་གནང་དང་གནང་བཞིན་པ་ཡིན་འདུག་པས་སྙིང་ནས་དགའ་བསུ་ཞུ། ད་ནི་རང་རེ་ན་གཞོན་ཚོས་གནས་ཚུལ་ཇི་བཞིན་ཤེས་པའི་ཐོག་ནས་འབད་བརྩོན་གནང་བའི་དུས་ཕྱིས་མེད་ཀྱང་སྔ་མི་འདུག་པས་རེམས་ཤིག།
ཕྱོགས་མཐའ་ཁག་ནས་ཕེབས་པའི་སློབ་ཕྲུག་ཚོར་འཚམས་འདྲིའི་བཀྲ་ཤིས་བདེ་ལེགས་ཞུ། ལྷག་པར་དུ་ད་རེས་ཀྱི་ཚོགས་ཆེན་དེ་དོན་དང་ལྡན་པ་ཞིག་ཡོང་བའི་སྨོན་ལམ་ཡོད། རང་ངོ་རང་ཤེས་རང་འགན་རང་འཁུར་ཟེར་བ་དེ་སྲིད་སྐྱོང་མཆོག་གི་(ཆིག་སྒྲིལ། གསར་གཏོད། རང་ཁ་རང་གསོ།)ཟེར་བ་ལྟར་ཚིག་སྙན་པོ་ཞིག་ཡིན་ནའང་དོན་དག་གི་ཆ་ནས་ག་ཚོད་ཅིག་ལག་ལེན་བསྟར་ཐུབ་ཀྱི་ཡོད་དམ། ང་རང་གིས་བསམ་ཚུལ་བྱས་པ་ཡིན་ན་མཐོ་རིམ་སློབ་མ་ཚོས་ཟང་ཟིང་བྱས་ཏེ་ལས་འགུལ་གྲུབ་འབྲས་མེད་པ་དེ་འདྲ་སྤེལ་རྒྱུ་ལས་རང་འཁྲིའི་ལས་འགན་སློབ་སྦྱོང་ཐོག་ཤུགས་བརྒྱབ་སྟེ་མི་རིགས་གཞན་དང་སློབ་གྲོགས་གཞན་གྱི་རྗེས་སུ་མ་ལྷག་པ་གནང་རྒྱུ་དང་། ལྷག་པར་དུ་བོད་ཡིག་བོད་སྐད་ཐོག་ཤུགས་བརྒྱབ་སྟེ་འབྲི་དགོས་ན་ཀློག་དགོས་ན། བཤད་དགོས་ན་གཞན་ལ་ངོ་གནོང་མི་དགོས་པ་ཞིག་བྱས་ཐུབ་པ་ཡིན་ན། དེ་ནི་བོད་པའི་མཐོ་རིམ་སློབ་མ་ཚོའི་རང་ངོ་རང་ཤེས་དང་རང་འགན་རང་འཁུར་རེད་བསམ་གྱི་འདུག དེ་ལས་གཞན་ཆབ་སྲིད་པ་ཚོའི་ཁ་རྗེས་སུ་རྒྱུགས་ཏེ་རང་གི་དོན་དག་གཏིང་བརྗེད་དུ་སོང་ནས་ངོ་རྒོལ་སྐད་འབོད་སོགས་ལས་འགུལ་ཐབ་ཐེབ་སྤེལ་བ་ཡིན་ན་བོད་པའི་མཐོ་རིམ་སློབ་མ་ཟེར་བ་དེའི་ལམ་ཁ་རྦད་དེ་ནོར་ཚར་བ་རེད་བསམ་གྱི་འདུག དེ་བསམ་ཚུལ་ཙམ་ཡིན།