ཉེ་ལམ་རྒྱ་གར་བྷེ་ཇཱའེ་པི་ཆབ་སྲིད་ཚོགས་པའི་སྲིད་བློན་གྱི་འོས་མི་སྐུ་ཞབས་ན་རིན་ཌ་མུ་དྷི་ལགས་རྒྱ་གར་བྱང་ཤར་ཨ་རུ་ཎ་ཅལ་གྱི་པཱ་སེ་གྷཌི་ཞེས་པའི་ས་ཁུལ་དུ་འོས་བསྡུའི་ཁྱབ་བསྒྲགས་བྱེད་དུ་སྐྱོད་སྐབས། རྒྱ་ནག་གཞུང་གིས་རྒྱ་སྐྱེད་རིང་ལུགས་ཀྱི་བསམ་བློ་དོར་དགོས་པ་དང་། ཨ་རུ་ཎ་ཅལ་ནི་རྒྱ་གར་གྱི་ཁ་བྲལ་ཐབས་མེད་པའི་ཆ་ཤས་ཡིན་པ། རྒྱ་ནག་གཞུང་གིས་རྒྱ་གར་དང་མཉམ་དུ་ཞི་བདེ་ལྷིང་འཇགས་ཀྱི་འབྲེལ་ལམ་འཛུགས་གལ་ཆེ་བ་ལས། མགོ་བདེ་འཁྲབ་ན་ཡག་པོ་མེད་ལུགས་སོགས་བརྗོད་པར། ཁ་ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧ་ཁྲོན་ཡིང་ (Hua Chunying ) གིས་ལན་འདེབས་བྱས་འདུག
ཧ་ཁྲོན་ཡིང་གིས། “ཁྱེད་ཀྱིས་རྒྱ་ནག་གཞུང་གིས་རྒྱ་སྐྱེད་རིང་ལུགས་ཀྱི་སྲིད་ཇུས་འཛིན་བཞིན་ཡོད་སྐོར་བརྗོད་ཀྱང་། ད་བར་རྒྱ་ནག་གཞུང་གིས་དྲག་པོའི་དམག་འཐབ་སྤྱད་དེ་རྒྱལ་ཁབ་གཞན་གྱི་ས་ཆ་ཏིལ་འབྲུ་ཙམ་ཞིག་ཧམ་བཟུང་བྱས་མེད་ལ། ང་ཚོས་རྒྱུན་དུ་ཁྱིམ་མཚེས་རྒྱལ་ཁབ་ཀྱི་འབྲེལ་ལམ་གལ་ཆེར་བཟུང་སྟེ་གཉིས་ཕན་ཡར་རྒྱས་ཡོང་ཐབས་ལ་འབད་བརྩོན་བྱེད་ཀྱིན་ཡོད་པ་མ་ཟད། ༡༩༦༢ ཀྱི་དམག་འཁྲུག་ཞི་འཇགས་བྱུང་བ་ནས་བཟུང་ད་བར་རྒྱལ་ཁབ་གཞན་གྱི་ས་མཚམས་ཁག་ཏུ་བཙན་འཛུལ་དང་ཁྱིམ་མཚེས་རྒྱལ་ཁབ་གྱི་ཞི་བདེ་བརྟན་རླིངས་གཏོར་བཤིག་བཏང་མྱོང་མེད” ཅེས་བརྗོད་འདུག
འདིའི་ཐད་གནད་དོན་དབྱེ་ཞིབ་པ་ཚོས། རྒྱ་གར་བྷེ་ཇཱའི་པི་སྲིད་དོན་ཚོགས་པའི་སྲིད་བློན་འོས་མི་སྐུ་ཞབས་ཎ་རིན་མུ་དྷི་ལགས་ཀྱིས། རྒྱ་ནག་གི་སྲིད་ཇུས་འཛིན་སྟངས་དང་རྒྱ་དཀར་ནག་བར་རྩོད་གླེང་ཡོང་བཞིན་པའི་ཨ་རུ་ཎ་ཅལ་གྱི་གནད་དོན་སོགས་ཀྱི་ཐད་རྒྱ་ནག་ལ་ཁ་བརྡུང་བཏང་ཡང་། རྒྱ་གཞུང་གིས་ཁོང་གི་སྐྱོན་འཛུགས་དག་ལ་འཇམ་པོས་ལན་འདེབས་བྱས་པ་དེས། རྒྱ་གཞུང་རྒྱ་གར་ལ་ཞེད་སྣང་སྐྱེ་པ་མིན་ཡང་། རྒྱ་གར་གྱི་འོས་བསྡུའི་ཁྲོད་སྐུ་ཞབས་ཎ་རིན་ཌ་མུ་དྷི་ལགས་སྲིད་བློན་དུ་འཐོབ་རྒྱུར་རེ་བ་ཆེན་པོ་ཡོད་སྟབས། མ་འོངས་པར་རྒྱ་དཀར་ནག་གི་འབྲེལ་ལམ་ལ་དོ་ཕོག་མི་འགྲོ་ཆེད་བསམ་ཤེས་ཀྱི་ལན་འདེབས་དེ་བྱས་པར་ངོས་འཛིན་བྱེད་བཞིན་ཡོད་འདུག
ཟླ་སྔོན་མའི་ཚེས་ ༢༩ ཉིན། ཨ་རུ་ཎ་ཅལ་གྱི་སློབ་མ་ནེ་དྷུ་ (Nido Tania) ལགས་རྒྱ་གར་ལྡི་ལིར་ཚོང་པ་འགས་ཉེས་བརྡུང་བཏང་སྟེ་བསད་ཡོད་སྟབས། སྐུ་ཞབས་ཎ་རིན་ཌ་མུ་དྷི་ལགས་ཀྱིས་ལྡི་ལི་ས་གནས་སྲིད་གཞུང་གི་བློན་ཆེན་ཨར་ཝུན་ཁེ་ཅེ་རེ་ཝལ་ལགས་དང་། ཀོང་རེ་སེ་ཚོགས་པའི་ཚོགས་གཙོ་སཱོ་ཎེ་ཡཱ་གྷན་དྷི་ལགས་ལ་ཨ་རུ་ཎ་ཅལ་གྱི་མི་མང་ཚོ་ཉིན་ལྟར་རྒྱ་ནག་དང་མཉམ་དུ་འཐབ་རྩོད་དང་དངངས་སྐྲག་ཁྲོད་མི་ཚེ་སྐྱེལ་བཞིན་ཡོད་སྟབས། ཁོ་ཚོའི་བདེ་འཇགས་ལ་འགན་མ་འཁུར་བར་ཚེ་སྲོག་ཤོར་བ་དེ་ནི་ངོ་ཚ་དགོས་པ་ཞིག་ཡིན་སྐོར་སྐྱོན་བརྗོད་བྱས་འདུག
འབྱུང་འགྱུར་ཕྱི་ཟླ་ ༤ པའི་ཚེས་ ༡༦ ནས་ཟླ་ ༥ པའི་ཚེས་ ༡༣ བར། རྒྱ་གར་གྱི་སྐབས་ ༡༦ པའི་གྲོས་ཚོགས་འོག་མའི་རྒྱལ་ཡོངས་འོས་བསྡུ་ཆེན་མོ་དེ་གནང་རྒྱུ་ཡིན་པ་དང་། ད་སྔ་རྒྱ་གར་གྱི་གསར་ལམ་ཆེ་ཁག་གིས་བསམ་ཤོག་ཐེངས་ ༧ ཙམ་བསྡུས་པའི་ཁྲོད། མི་སེར་དཀྱུས་མའི་ཆབ་སྲིད་ཚོགས་པར་བརྒྱ་ཆ་ ༡༥ དང་། ཀོང་རེ་ཚོགས་པར་བརྒྱ་ཆ་ ༣༠། ཕྱོགས་འགལ་བྷེ་ཇཱའེ་པི་ཚོགས་པར་བརྒྱ་ཆ་ ༤༠། དེ་མིན་ཆབ་སྲིད་ཚོགས་པ་ཁག་ལ་བརྒྱ་ཆ་ ༡༥ ཙམ་ཐོབ་ཡོད་འདུག
བྷེ་ཇཱའེ་པི་ཚོགས་པའི་སྲིད་བློན་འོས་མི་སྐུ་ཞབས་ན་རིན་ཌ་མུ་དྷི་ ( Narendra Modi ) ལགས་ནི་ ༡༩༥༠ ལོའི་ཟླ་ ༡༡ པའི་ཚེས་ ༡༧ ཉིན་རྒྱ་གར་གུ་ཆུ་ར་ཌི་མེ་སཱ་ཎ་རྗོང་ཁོངས་ཝུ་ཎ་གྷར་ (Vadnagar) ཞེས་པའི་གྲོང་ཚོའི་ནང་སྐྱེས་ཤིང་། ཝུ་ཎ་གྷར་སློབ་གྲྭའི་ནང་གཞི་རིམ་དང་འབྲིང་རིམ་གྱི་སློབ་སྦྱོང་ཐོན་རྗེས། གུ་ཆུ་ར་ཌི་འགྲིམ་འགྲུལ་ལས་ཁུངས་ཀྱི་ལས་བྱེད་གསོལ་ཐབ་ཁང་ནང་ཕྱག་ལས་གནང་ཡོད་པ་དང་། རྗེས་སུ་ (RSS) ཞེས་པའི་ཆབ་སྲིད་ཚོགས་པའི་ནང་ཞུགས་ཏེ་ཕྱག་ལས་འདྲ་མིན་གནང་ཡོད། ༢༠༠༡ ལོ་ནས་བཟུང་ད་བར་གུ་ཆུ་ར་ཌི་མངའ་སྡེའི་བློན་ཆེན་ཐེངས་བཞི་ཙམ་གནང་ཡོད།
གསར་འགོད་པ། དོན་གྲུབ།
