འབངས་མིའི་སྤྱི་ཚོགས་དགྲ་རུ་བཟུང་ན་རང་གིས་རང་ལ་དུར་ཁུང་དྲུས་པ་ཡིན།

ཡུ་ཅེ་ཡིས་བརྩམས། ཚེ་རིང་རྡོ་རྗེས་བསྒྱུར།

ཀྲིག་ཡུང་ཁང་ཕམ་པ་དེས་རྒྱ་ནག་དམར་ཤོག་གི་སྒེར་གཅོད་ལམ་ལུགས་བཟང་ཕྱོགས་སུ་ལྡོག་པ་ཅང་མཚོན་མི་ཐུབ། ཀྲིག་ཡུང་ཁང་ལ་༼ལྷ་བཟོ་ཀུན་དགའི་ཐབས་ངན་རང་ལ་འཁོར༽ཞེས་པ་བྱུང་ནའང་། དེས་མང་ཚོགས་ཀྱིས་རྒྱ་ནག་དམར་ཤོག་གི་ལྐོག་ཟ་རུང་སུངས་དང་གདུབ་རྩུབ་ཀྱི་སྲིད་དབང་ལ་འཆང་བའི་སྙིང་ནད་སེལ་མི་ཐུབ། རྒྱུ་མཚན་ཅི་ཞེ་ན། ཞི་ཅིན་ཕིན་གྱིས་ལྟ་གྲུབ་འཛིན་སྟངས་ཀྱི་ངོས་ན་པོ་ཞི་ལའེ་མེད་པའི་༼དམར་གླུ་ལེན་ཞིང་མི་ནག་རྡུང་བ༽་ལག་ལེན་བྱེད་པ་དང་། ཁྲིམས་སྲིད་དང་བདེ་འཇགས་ཀྱི་ཁྱབ་ཁོངས་ན་ཀྲིག་ཡུང་ཁང་མེད་པའི་༼དྲག་སྤྱོད་ཀྱིས་བརྟན་བརླིང་སྲུང་བ༽་ལག་ལེན་བྱེད་པ་ཡིན། ཞི་ཅིན་ཕིན་གྱིས་སྲིད་དབང་བཟུང་བའི་རྗེས་སུ། མི་འཛིན་བཟུང་དང་། མི་བཀག་ཉར་དང་། མི་ལ་རྡུང་རྡེག་དང་། མི་གསོད་པ་ལ་སོགས་བྱས་པ་ནི་ཧུའུ་ཝུན་གཉིས་ཀྱི་དུས་སྐབས་དང་བསྡུར་ཡང་མང་མེད་ན་ཉུང་མེད།

ཉིས་སྟོང་བཅུ་བཞི་ལོ་སླེབས་མ་ཐག་ཏུ། ཞི་ཅིན་ཕིན་གྱིས་གསོད་བརྔམ་ཤིག་ཤིག་གིས་༼གྲི༽་ཕྱར་ཏེ། ཞུ་ཀྲི་ཡུང་སོགས་ཀྱིས་སྣེ་འཁྲིད་པའི༼འབངས་མི་གསར་བའི་ལས་འགུལ༽་ལ་གདུག་རྩུབ་ཆེ་བའི་རྒོལ་རྡུང་བྱས་པ་དང་། ལོ་ལྔའི་ཡར་སྔོན་དུ་ལིག་ཞོ་པོ་ཡིས་སྣེ་འཁྲིད་པའི་༼ཀླད་གོར་བརྒྱད་རྩ་ཚིག་ལས་འགུལ༽་གྱི་སྟེང་དུའང་གདུག་རྩུབ་དེ་འདྲ་བྱས་མི་འདུག དེ་སྔོན་རྒྱ་ནག་དམངས་གཙོ་ལ་འགྱུར་བར་བྱེ་བྲག་གི་རྩ་ཚིག་བཏོན་པའི་༼ཀླད་གོར་བརྒྱད་རྩ་ཚིག་ལས་འགུལ༽ལ་གདོང་ཐུག་པའི་དུས་དེར། ཏན་ཏན་ཏིག་ཏིག་ཡིན་པའི་ཧུའུ་ཅིན་ཐོ་ཡིས་བཀའ་བཏང་ནས་ལིག་ཞོ་པོ་གཅིག་པུ་འཛིན་བཟུང་བྱས་པ་དང་། ༼རྐུན་མ་འཛིན་ན་སྔོན་ལ་རྐུན་དཔོན་འཛིན་དགོས༽ཟེར་བའི་ཐབས་བྱུས་ལག་ལེན་བྱས་ཏེ་གནས་སྟངས་ཇེ་ཆེར་འགྲོ་བར་གཡོལ་ཅི་ཐུབ་བྱས་པ་དང་། ལས་འགུལ་དེར་མིང་རྟགས་འགོད་མི་ཡོད་ཚད་གཅིག་ཀྱང་མ་ལུས་པར་བཅོམ་པ་དེ་འདྲ་བྱས་མེད། དེང་སྐབས་དེ་ལས་ཞི་འཇམ་ཡིན་ཞིང་། ཐ་ན་༼ཆབ་སྲིད་ཀྱི་རང་བཞིན་མིན་པ༽དང་༼གདོང་ཐུག་གི་རང་བཞིན་མིན་པ༽་ཡི་མིག་དཔེར་གྱུར་བའི་༼འབངས་མི་གསར་བའི་ལས་འགུལ༽ཞེས་པ་ལ་ཐུག་པའི་དུས་སུ། ཞེ་གནག་ཅིང་སྦྱོར་བ་རྩུབ་པའི་ཞི་ཅིན་ཕིན་གྱིས་གནམ་ཁའི་བྱ་ཡང་མི་ཐར་བའི་རྙི་རྒྱ་བཀྲམས་ཏེ། རྒྱལ་ཡོངས་ཀྱི་ས་ཁུལ་སོ་སོ་རུ་མི་བཅུ་ཕྲག་ཅིག་སྔ་རྗེས་སུ་འཛིན་བཟུང་བྱས་པ་མ་ཟད། གདུག་རྩུབ་ཀྱི་ཁྲིམས་སྦྱོར་དང་། དམའ་འབེབ་དང་། ཁྱིམ་མི་ལ་ཉེས་ཆད་གཅོད་པ་སོགས་ཀྱི་བྱེད་སྟངས་རྒྱ་ཁྱབ་དུ་ལག་ལེན་བྱས་པ་དང་། ཁོའི་བྱེད་ལུགས་ལ་སྔར་མའོ་ཙེ་ཏུང་གིས་༼མི་གཅིག་མི་ཤོར་བའི་ཆེད་དུ་མི་སྟོང་གསོད་ཉེས་བྱ་དགོས་ཀྱང་ཡ་ངན་མི་རུང་༽ཟེར་བའི་གཏུམ་དྲག་གི་ཉམས་འདུག

༼འབངས་མི་གསར་བའི་ལས་འགུལ༽་ལ་དྲག་གནོན་བྱས་པ་དེས་རྒྱ་ནག་དམར་ཤོག་དབང་འཛིན་པའི་ངོས་ནས་དམངས་ཀྱི་སྤྱི་ཚོགས་དང་སྐད་ཆ་བཤད་པའམ་གྲོས་མོལ་བྱེད་པའི་ལམ་ཁ་བཅད་པ་མཚོན། དམངས་ཁྲོད་ཀྱི་ཞི་བའི་ཚོགས་ཁག་ཡོངས་སུ་ཕམ་ཉེས་བྱུང་ན། དྲག་པོའི་ངོ་རྒོལ་གྱི་སྟོབས་ཤུགས་གཅིག་འཇག་གཅིག་ལངས་ཀྱིས་འཕྱུར་འོང་བ་ཡིན། ལིག་ཞོ་པོ་དང་ཞུ་ཀྲི་ཡུང་བཙོན་དུ་བཅུག་ཀྱང་ར་བསད་ན་ལུག་འདར་བའི་གཡོ་ཐབས་ལ་ནུས་པ་ཉམས་ཚར་བས། གཉིད་སད་ཟིན་པའི་འབངས་མིའི་སྤྱི་ཚོགས་ཀྱིས་དེ་ཙམ་ལ་གཉའ་ཆགས་ནས་སྒུར་སྒུར་བྱ་མི་སྲིད། མ་འོངས་པའི་དུས་ཚོད་ཀྱི་གནས་རིམ་ག་གེ་མོ་ཞིག་ལ། ༼དམངས་ནི་འཆི་བར་མི་འཇིགས་ན། དེ་ཡིས་འཇིགས་སྐུལ་ཅི་ལ་ཕན།༽ཞེས་པའི་ཚུལ་དུ་ཡོད་པའི་རྒྱ་ནག་གི་མི་གྲངས་ཀྱིས་མི་ཟིན་པ་ཞིག་༼གསར་བརྗེ་གཉིས་པ༽ནང་གི་ཡུ་ཁུ་རན་གྱི་མང་ཚོགས་ཇི་བཞིན་དུ་ཁྲོམ་གཞུང་ལ་སོང་སྟེ། རྒྱལ་ཁབ་ཀྱི་དྲག་སྤྱོད་འཕྲུལ་ཆས་དང་ཐད་ཀར་གདོང་གཏུག་པས་མི་ཚད། གཟི་འོད་འབར་བའི་རྒྱལ་ཁ་ལེན་པ་ཡིན། ཡུ་ཁུ་རན་གྱི་མི་དམངས་ཁྲོམ་གཞུང་དུ་འབུད་དོན་ནི་ཁ་ལ་ཟས་མ་རག་པའི་རྐྱེན་གྱིས་མིན་པ་དང་། སྒེར་འཛིན་ལམ་ལུགས་ཀྱི་ཤར་ཕྱོགས་༼ཨུ་རུ་སུ༽་དང་ཁ་བྲལ་ཏེ་རང་དབང་གི་ནུབ་ཕྱོགས༼ཡུ་རོབ་མཐུན་ཚོགས༽་ལ་ཞུགས་པའི་སྙིང་སྟོབས་དང་ཆོད་སེམས་བསྟན་པ་དེ་ཡིན། རྒྱ་ནག་མང་ཚོགས་ལའང་སྙིང་སྟོབས་དང་ཆོད་སེམས་དེ་འདྲ་སླེབས་རྒྱུ་ཡིན་པ་ལྡོག་ཏུ་མེད།

ཞ་ཅོན་ཧྥིན་གྱི་དོན་རྐྱེན་ནས་ཞའེ་ཧྥུ་ཧྲུང་གི་དོན་རྐྱེན་བར་དུ་རྒྱ་ནག་གི་འབངས་མིའི་སྤྱི་ཚོགས་ཁོང་ཁྲོ་ལངས་ནས་འབར་ལ་ཁད་ཀྱི་ཚད་ན་ཡོད་པ་ཤེས་ཐུབ། ༼དམངས་ཁྲོད་ཐུགས་ཁུར་དཔུང་ཁག༽ནི་རྒྱལ་ཡོངས་ཀྱི་ས་ཆ་སོ་སོ་ནས་ཆས་ཏེ་དྲང་བདེན་མིན་པའི་དོན་རྐྱེན་བྱུང་ས་ལ་ཤར་བསྐྱོད་བྱས་པས། ས་གནས་ཀྱི་བརྟན་བརླིང་སྲུང་སྐྱོབ་སྟོབས་ཤུགས་ཀྱིས་གླགས་མ་ཁེལ། འཇིགས་སྣང་བྲལ་བའི་མང་ཚོགས་ནི་ཇེ་མང་ནས་ཇེ་མང་ཡིན་པ་དང་། དཔེར་ན་དྲ་གྲོགས་ཤིག་གིས་བཤད་པ་ལྟར་༼མི་གཅིག་ཡར་ལངས་ན་ཁོ་ཚོས་ཁྱོད་བཟུང་སྟེ་རྡུང་རྡེག་དྲག་པོ་གཏོང་བ་ཡིན། མི་བཅུ་ཡར་ལངས་ན་ཁོ་ཚོས་ཁྱོད་བཀག་ཉར་བྱེད་པ་ཡིན། མི་བརྒྱ་ཡར་ལངས་ན་ཁོ་ཚོས་མེ་འཁོར་གྱི་ཁྲོལ་འཛིན་ཉོས་ཏེ་ཁྱོད་ཕྱིར་སྐྱེལ་བ་དང་ཟ་མའང་སྟེར་བ་ཡིན། མི་སྟོང་ཡར་ལངས་ན་ཁོ་ཚོ་ཕྱིར་བཀྱེད་དེ་བལྟས་ནས་འདུག་པ་ཡིན། མི་ཁྲི་ཡར་ལངས་ན་ཁོ་ཚོས་འཇམ་ཅག་གེར་སྒྲིག་ཆས་ཕུད་དེ་ཁྱོད་ཀྱི་གྲལ་དུ་འཛུལ་བ་ཡིན།༽ ཡིན་ནའང་ཞི་ཅིན་ཕིན་གཟའ་རོས་མེ་རི་གསོན་པོ་འཕྱུར་ལ་ཁད་ཡོད་པ་མི་ཤེས། ཀྲིག་ཡུང་ཁང་གི་ཤུལ་འཛིན་པ་དང་དམར་ཤོག་དབུས་ཁྲིམས་སྲིད་ལྷན་ཁང་གི་དྲུང་ཆེ་མིན་ཅན་ཀྲུའུ་ཡིས་མི་དམངས་ཉིན་རེའི་ཚགས་པར་སྟེང་དུ་རྩོམ་ཡིག་སྤེལ་ཏེ། དམར་ཤོག་དབུས་ཁྲིམས་སྲིད་ལས་དོན་ཚོགས་འདུའི་ཐོག་ཏུ་ཞི་ཅིན་ཕིན་གྱིས་བཤད་པའི་གཏམ་ལ་བསྟོད་བསྔགས་བྱས་ཤིང་། ༼ཞི་ཅིན་ཕིན་གྱིས་བསམ་བློ་གསར་བ་དང་། ལྟ་བ་གསར་བ་དང་། བླང་བྱ་གསར་བ་རབ་དང་རིམ་པ་བཏོན་སོང་། དེ་དག་ནི་གནས་བབ་གསར་བའི་འོག་གི་ཁྲིམས་སྲིད་ལས་དོན་ལ་སློབ་སྟོན་བྱས་པའི་རྩ་འཛིན་རང་བཞིན་གྱི་ཡིག་ཆ་ཡིན༽ཞེས་བརྗོད་འདུག

མིན་ཅན་ཀྲུའུ་ཡིས་ཞི་ཅིན་ཕིན་གྱི་ལྟ་བ་གསར་བ་ལ་སྡོམ་ཚིག་འདི་ལྟར་བཀོད་འདུག་སྟེ། ༼ཐོབ་ཐང་སྲུང་བ་ནི་བརྟག་བརླིང་སྲུང་བའི་རྨང་གཞི་ཡིན་པ་དང་། བརྟན་བརླིང་སྲུང་བའི་དོན་དམ་གྱི་སྙིང་བོ་ནི་ཐོབ་ཐང་སྲུང་བ་ཡིན༽ཞེས་ཟེར། དེ་ཐོས་པ་ན། རྒྱ་ནག་ནི་ཞག་མ་གཅིག་གིས་ཨོ་ཝེལ་གྱིས་བྲིས་པའི་༼གཅིག་དགུ་གྱ་བཞི༽་སྟོང་སང་ངེ་བ་དང་སྐྱ་ཆིལ་ལེ་བ་དེ་རུ་ཕྱིར་ལོག་པ་དང་མཚུངས། དུས་དེར་མཁས་པ་རན་ཡོན་ཧྥེ་ལགས་ཀྱིས་ཏྲི་ཝི་ཏྲི་ཟིན་བྲིས་སྟེང་དུ། ༼གཅིག་དགུ་གྱ་བཞི་ཡི་པར་གཞི་འཕར་མ་སླེབས་བྱུང་། དམག་འཁྲུག་ནི་ཞི་བདེ་ཡིན་ཟེར། བྲལ་བཀོལ་ནི་རང་དབང་ཡིན་ཟེར། རྨོངས་རྟུལ་ནི་སྟོབས་ཤུགས་ཡིན་ཟེར། བརྟན་བརླིང་སྲུང་བ་ནི་ཐོབ་ཐང་སྲུང་བ་ཡིན་ཟེར། འོས་གཞི་གཅིག་ཅན་གྱི་འདེམ་ལུགས་ནི་འོས་འདེམ་ཡིན་ཟེར་རོ།།༽ཞེས་གསུངས་འདུག མིན་ཅན་ཀྲུའུ་ཡིས་བཤད་པ་ནི་ཁོ་སྒེར་གྱི་ལྟ་ཚུལ་མིན་པ་ཐག་ཆོད། དེ་ནི་ཞི་ཅིན་ཕིན་གྱི་སྐད་ཆ་དཔེར་བླངས་པ་དང་། ཁོ་རང་དུས་སྐབས་གསར་བའི་བློན་ངན་གདུག་རྩུབ་ཅན་དེ་བྱ་དགོས། ཞི་ཅིན་ཕིན་གྱིས་མའོ་ཙེ་ཏུང་ལ་སློབ་སྦྱོང་བྱ་རྒྱུར་བློ་ཐག་ཆོད་ན། ཁོའི་ཉེ་འཁོར་དུ་ཁང་ཧྲིན་ལྟ་བུའི་མི་སྣ་ཞིག་མེད་སྲིད་དམ།

བློན་ངན་གདུག་རྩུབ་ཅན་མེད་ན་སྒེར་གཅོད་པས་འབངས་མི་ཁྲི་མ་འབུམ་འཇིགས་སྣང་གིས་ཟིལ་གྱིས་གནོན་ཐབས་མེད་པ་དང་། སྒེར་གཅོད་པ་མེད་ན་བློན་ངན་གདུག་རྩུབ་ཅན་ལ་ཞབས་ཞུ་བྱ་ཡུལ་མེད། སྒེར་གཅོད་པ་རེ་རེ་དང་ཁོ་ཚོའི་འདང་རྩིས་ཆེ་བའི་བློན་ངན་གདུག་རྩུབ་ཅན་གཉིས་ནི་བུ་སྤུན་མཚེ་མ་དང་འདྲ་ལ། གཅིག་སེམས་གཅིག་གིས་ཤེས་ཤིང་གར་སྟབས་ལང་ལིང་སྒྱུར་བ་ཡིན། ཞི་ཅིན་ཕིན་དང་ཀྲིག་ཡུང་ཁང་གཉིས་ཆ་རང་དབང་གི་དགྲ་བོ་ཡིན་པ་དང་། ཁོ་ཚོའི་བར་གྱི་འཛིང་རེས་ལ་དཀར་ནག་དང་དགེ་སྡུག་གི་ཁྱད་པར་གང་ཡང་བཤད་རྒྱུ་མེད་པ་དང་། མའོ་ཙེ་ཏུང་དང་ལིན་པེའོ་གཉིས་ཀྱིས་ཕན་ཚུན་ལ་བློ་ལོག་བྱས་པ་དང་མཚུངས་ཏེ་ཁྱི་ཡིས་ཁྱི་ལ་རྨུག་པའི་ཚུལ་ལས་མ་འདས། སི་ཏ་ལིན་གྱི་ལོ་རྒྱུས་འབྲི་མཁན་ཝོལ་ཁོ་ཀོ་ནོབ་ཀྱིས།༼སི་ཏ་ལིན་གྱིས་རང་གི་འདོད་བློ་བསྟུད་མར་བསྐངས་པ་དང་། འོན་ཀྱང་ཁོའི་ཁྲག་དྲི་ང་བའི་འདོད་བློ་དེ་ཧྲིལ་གྱིས་སྐོང་ཐབས་བྲལ་བའི་མཚམས་སུ། རང་དབང་ལ་རྒོལ་བའི་ནག་ཉེས་སྔར་མ་བྱུང་བ་བསགས། ཁོས་མི་རྣམས་ལ་རང་དབང་གིས་འཚོ་བ་རོལ་དུ་མ་བཅུག་པ་དང་རང་དབང་གིས་བསམ་བློ་གཏོང་དུ་མ་བཅུག༽ཅེས་བརྗོད་འདུག ལོ་རྒྱུས་ཀྱི་ཆུ་ཀླུང་ཞབས་མེད་ནི་མི་ཚང་མར་ཉེ་རིང་མེད་པར་གཏིང་ཟབ་ནའང་། ཤི་མཁན་ཟགས་པའི་བྲག་ཆ་ནི་དགེ་སྡུག་གང་ཡིན་གྱི་འབོད་སྒྲ་དང་དཔང་བོ་རུ་འགྱུར་ངེས། པོ་ཞི་ལེ་དེ་བཞིན་ཡིན་པ་དང་། ཀྲིག་ཡུང་ཁང་དེ་བཞིན་ཡིན་པ་དང་། ཅང་ཙེ་མིན་དེ་བཞིན་ཡིན་པ་དང་། ཧུའུ་ཅིན་ཐོ་དེ་བཞིན་ཡིན་པ་དང་། ཝུན་ཅ་པོ་དེ་བཞིན་ཡིན་པ་དང་། ཞི་ཅིན་ཕིན་ཡང་དེ་བཞིན་ཡིན་ནོ།།