དེ་རིང་རྒྱ་གར་གཞུང་གིས་གྷོ་ཐམ་བྷམ་བྷ་ཝ་ལེ་ལགས་འབྲུག་གི་རྒྱ་གར་གཞུང་ཚབ་ཏུ་བསྐོ་བཞག་གནང་རྒྱུའི་གསལ་བསྒྲགས་གནང་འདུག
དེ་རིང་རྒྱ་གར་གཞུང་གིས་ལྷོ་ཤར་ཨེ་ཤ་ཡའི་གནད་དོན་ཐད་ཀྱི་ཟུང་འབྲེལ་དྲུང་ཆེ་དང་རྒྱ་ནག་ཆེད་མཁས་པ་གྷོ་ཐམ་བྷམ་བྷ་ཝ་ལེ་ (Gautam Bambawale) ལགས། ཟླ་ ༨ པའི་ཚེས་ ༡ ཉིན་ནས་བཟུང་ད་ལྟའི་འབྲུག་གི་རྒྱ་གར་གཞུང་ཚབ་ཧཱ་རན་ (V P Haran) ལགས་ཀྱི་ཚབ་ཏུ་བསྐོ་ བཞག་གནང་རྒྱུ་ཡིན་སྐོར་བསྒྲགས་འདུག
གནད་དོན་དབྱེ་ཞིབ་པ་ཚོས། ཉེ་ལམ་རྒྱ་གཞུང་གིས་རྒྱ་སྐྱེད་རིང་ལུགས་ཀྱི་སྲིད་ཇུས་བཟུང་ནས་འབྲུག་གི་ས་མཚམས་དང་བོད་དོན་ཐད་ཐབས་ཤེས་ཡོད་རྒུ་བཏོན་ཏེ་ཁ་གཏད་གཅོག་བཞིན་ཡོད་སྟབས། རྒྱ་གར་གཞུང་གིས་རྒྱ་ནག་གནད་དོན་ཆེད་མཁས་པ་སྐུ་ཞབས་གྷོ་ཐམ་བྷམ་བྷ་ཝ་ལེ་ལགས་འབྲུག་གི་རྒྱ་གར་གཞུང་ཚབ་ཏུ་བསྐོ་བཞག་གནང་བ་དེ་ནི། རྒྱ་གཞུང་གི་གནོན་ཤུགས་འབྲུག་ནང་མི་བསླེབ་པའི་ཆེད་གདོང་ལེན་བྱས་པ་ཞིག་ཡིན་སྐོར་བརྗོད་འདུག
རྒྱ་གར་གཞུང་གིས་རྒྱ་དཀར་ནག་གཉིས་ཀྱི་འབྲེལ་ལམ་ལ་དོ་ཕོག་མི་འགྲོ་ཆེད། རྒྱ་གར་འཆར་འགོད་ལྷན་ཁང་གི་འགན་འཛིན་མོན་ཌེག་སིན་ (Montek Singh Ahluwalia) ལགས་ཀྱིས་སྣེ་འཁྲིད་པའི་སྐུ་ཚབ་ཚོགས་པ་ཞིག་བདུན་ཕྲག་རྗེས་མའི་ནང་པེ་ཅིན་དུ་བསྐྱོད་དེ་རྒྱ་ནག་སྲིད་འཛིན་ཞི་ཅིན་ཕིན་དང་ཐུག་ཕྲད་གནང་སྟེ། རྒྱ་དཀར་ནག་གཉིས་ཀྱི་ཐབས་ཇུས་དང་དཔལ་འབྱོར་གནད་དོན་ཐད་གྲོས་མོལ་དང་འབྲེལ། རྒྱ་ནག་ནང་དཔྱ་ཁྲལ་མེད་པའི་ཐོག་རྒྱ་གར་གྱི་ཁྱད་ལས་ཞབས་ཞུ་གཙོས་སྨན་རྗས་ཚོང་གཉེར་དང་། རྒྱ་ནག་གི་ཁེ་ལས་རྒྱ་གར་ས་ཐོག་ཏུ་མ་འཛུགས་བྱེད་ཕྱོགས་ཤུགས་ཆེ་རུ་གཏོང་ཐབས། རྒྱ་དཀར་ནག་གཉིས་བར་རྩོད་རྙོག་ཤུགས་ཆེར་བྱུང་བཞིན་པའི་འབྲུག་གི་ས་མཚམས་ཁྲོམ་བྷེ་ ( Chumbi ) གནད་དོན་སོགས་ཀྱི་སྐོར་ལ་གོ་བསྡུར་སྦྱང་བཤད་གནང་རྒྱུ་ཡིན་འདུག
རྒྱ་ནག་གི་སྲིད་འཛིན་ཞི་ཅིན་ཕིན་འདི་ལོའི་ལོ་མཇུག་ཏུ། རྒྱ་དཀར་ནག་གཉིས་བར་གྲོས་མཐུན་དོན་ཚན་ ༥ ལ་མིང་རྟགས་བཀོད་ནས་ལོ་ངོ་ ༦༠ འཁོར་བའི་དུས་དྲན་སྲུང་གཙི་ཞུ་ཆེད། རྒྱ་གར་ ནང་གཟིགས་སྐོར་གྱིས་རྒྱ་གར་གྱི་སྲིད་གཞུང་གསར་པའི་མགོ་ཁྲིད་དང་ཐུག་ཕྲད་གནང་སྟེ་ཚོང་འབྲེལ་དང་ས་མཚམས། མཉམ་ལས། ཁེ་ལས་གསར་འཛུགས་དང་མ་འཇོག་བྱེད་ཕྱོགས་སོགས་ཀྱི་སྐོར་ལ་གྲོས་མོལ་བྱ་འཆར་ཡོད་འདུག
སྐུ་ཞབས་གྷོ་ཐམ་བྷམ་བྷ་ཝ་ལེ་ལགས་ནི། རྒྱ་གར་གཞུང་གིས་རྒྱ་དཀར་ནག་གི་ས་མཚམས་རྩོད་ལེན་ཐད་རྐང་འཁུར་གོ་བསྡུར་དང་གྲོས་མོལ་གནང་མཁན་ཞིག་ཡིན་པ་མ་ཟད། འདས་ལོའི་ནང་རྒྱ་མིའི་དམག་མིས་ལ་དྭགས་ལྡེབ་བཟང་ས་ཁུལ་ནང་བཙན་འཛུལ་གྱིས་རྒྱ་དཀར་ནག་གཉིས་བར་ས་མཚམས་ཐད་རྩོད་རྙོག་ཤུགས་ཆེ་བྱུང་སྟབས། རྒྱལ་ཁབ་གཉིས་ཀྱི་ས་མཚམས་སྲུང་སྐྱོབ་གྲོས་མོལ་སྐོར་ལ་བཀའ་སྡུར་གནང་མཁན་གཙོ་བོ་ཞིག་ཀྱང་ཡིན་ལ། རྒྱ་གར་ཕྱི་སྲིད་ལྷན་ཁང་གི་ཨེ་ཤ་ཡའི་གནད་དོན་ཐད་ཀྱི་ཟུང་འབྲེལ་དྲུང་ཆེ་ཡིན་པ་མ་ཟད། རྒྱ་ནག་སྐོར་གྱི་ཆེད་མཁས་མི་སྣ་ཞིག་ཀྱང་ཡིན་འདུག
གསར་འགོད་པ། དོན་གྲུབ།
