མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

གཞོན་ལྷན་ནང་མཐུན་ཡོང་སླད་ཛ་དྲག་གི་ཚོགས་ཆེན་བསྐོང་དགོས།

བོད་ཀྱི་དུས་བབ།
༢༠༡༤/༠༣/༡༧
Share on FacebookShare on TwitterShare on EmailShare on Whatsapp

དེ་རིང་ཨ་རིའི་ནེའུ་ཡོག་བོད་ཀྱི་སྤྱི་ཁང་དུ་བགྲོ་གླེང་གོ་སྒྲིག་གནང་བའི་ཐོག་གདན་ཞུའི་སྐུ་མགྲོན་གཉིས་ཀྱིས་གཏམ་བཤད་གནང་བ་དང་འབྲེལ་ཏེ་དྲི་བ་དྲིས་ལན་ཧ་ཅང་འཁྲུག་ཆ་དོད་པོ་བྱུང་སོང་།

ཨ་རིའི་ནེའུ་ཡོག་དང་ནེའུ་ཇར་ཛི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག དེ་རིང་ཨ་རིའི་གཟའ་སྤེན་པའི་ཕྱི་དྲོའི་ཆུ་ཚོད་ ༢།༣༠ སྟེང་། བཀའ་ཟུར་བློ་བཟང་སྙན་གྲགས་ལགས་དང་དབུས་བོད་ཀྱི་གཞོན་ལྷན་གྱི་ཚོགས་གཙོ་བསྟན་འཛིན་འཇིགས་མེད་ལགས་གཉིས་ཆེད་དུ་གདན་འདྲེན་ཞུས་ཏེ། ནེའུ་ཡོག་བོད་ཀྱི་སྤྱི་ཁང་དུ་ ༼ བོད་སྤྱིའི་རྩ་དོན་བསྒྲུབ་བྱའི་ཐམས་ལམ་དང་འབྲེལ་བའི་གྲོས་མོལ་གསུང་བཤད།༽ཅེས་པའི་གཏམ་བཤད་ཅིག་གོ་སྒྲིག་གནང་སོང་ལ། དེར་ས་གནས་བོད་མི་ ༢༠༠ མ་ཟིན་ཙམ་འདུ་འཛོམས་བྱུང་སོང་།

  ཚོགས་འདུའི་ཐོག་དབུས་བོད་ཀྱི་གཞོན་ལྷན་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་གོང་གི་བརྗོད་གཞི་དང་འབྲེལ་ཏེ། ཚོགས་པ་ཞིག་གི་ཚོགས་མིར་འཛུལ་བའི་རྗེས་ལ་ཚོགས་པ་དེའི་དམིགས་ཡུལ་དང་ལངས་ཕྱོགས་བརྟན་པོར་འཛིན་དགོས་པའི་གལ་ཆེའི་རང་བཞིན་དང་། བོད་ཀྱི་གཞོན་ནུ་ལྷན་ཚོགས་ཀྱི་ལྟ་བ་ལངས་ཕྱོགས་ལ་འགྱུར་བ་མེད་སྐོར་སོགས་ནན་བརྗོད་གནང་སོང་། ཁོང་གིས་མུ་མཐུད་དུ། “ནེའུ་ཡོག་དང་ནེའུ་ཇར་ཛི་ས་གནས་གཞོན་ལྷན་རྒྱུན་ལས་ནས་ང་ལ་འཕྲིན་ཡིག་ཅིག་འབྱོར་སོང་། འཕྲིན་ཡིག་དེ་སུས་བསྐུར་མིན་ཐད་ཁ་པར་བཏང་ནས་སྐད་ཆ་དྲིས་དུས། ས་གནས་ཚོགས་གཙོ་དང་དྲུང་ཆེ་སོགས་ཀྱིས་དེའི་སྐོར་ཧ་གང་ཡང་གོ་མི་འདུག གནས་ཚུལ་འདིས་ས་གནས་རྒྱུན་ལས་ནང་ཁུལ་བསམ་ཚུལ་མཐུན་མིན་ཡོང་གི་ཡོད་པའི་རྟགས་ཤིག་སྟོན་གྱི་འདུག་སྟབས། རྗེས་སོར་འདི་འདྲའི་རིགས་མ་ཡོང་བ་གནང་དགོས་པ་དང་། གནས་ཚུལ་འདི་རིགས་ཐོག་ཚང་མས་གཟབ་གཟབ་གནང་དགོས་ཀྱི་འདུག” ཅེས་སོགས་བརྗོད་སོང་།

བཀའ་ཟུར་བློ་བཟང་སྙན་གྲགས་ལགས་ཀྱིས་ད་ལྟའི་བོད་ནང་གི་གནས་བབ་དང་རྒྱལ་སྤྱིའི་གནས་བབ་བཅས་ནས་མགོ་བརྩམས་ཏེ། དབུ་མའི་ལམ་གྱི་གལ་ཆེའི་རང་བཞིན་ཐད་གཏམ་བཤད་གནང་བ་དང་འབྲེལ་ཏེ། “ སྤྱི་ཚོགས་ནང་ལ་ཁམས་པ་ཡིན་ན་བོད་གཞུང་གིས་ཡག་པོ་བྱེད་ཀྱི་མ་རེད་ཟེར་མཁན་སྔོན་ཆད་མང་པོ་ཡོད་རེད། ང་ལ་ཡང་དེ་འདྲ་གསུངས་མཁན་མང་པོ་བྱུང་མྱོང་། ང་རང་ཡང་ཁམས་ཕྲུག་ཅིག་ཡིན། ཡིན་ན་ཡང་། སྐད་ཆ་དེ་ལ་ངས་གཞི་མེད་ཀྱི་རྙོག་གཏམ་ཟེར་གྱི་ཡོད། གང་ཡིན་ཟེར་ན། ད་ལྟའི་བར་གྱི་བོད་གཞུང་གི་བཀའ་བློན་མང་ཆེ་ཤོས་ཁམས་པ་ཤ་སྟག་ཡིན་པ་འདིས་ཀྱང་གསལ་བཤད་བྱས་ཡོད། མང་ཚོགས་སུ་ཞིག་ཡིན་རུང་སྐད་འདི་རིགས་ཀྱི་བསླུ་བྲིད་འོག་མགོ་འཁོར་རྒྱུ་ཡོད་པ་མ་རེད།” ཅེས་སོགས་བརྗོད་བྱུང་།

གཏམ་བཤད་རྗེས་ཀྱི་དྲི་བ་དྲིས་ལན་སྐབས། ས་གནས་ནས་དབུས་ལ་བཏང་འབྱོར་བྱུང་བའི་འཕྲིན་ཡིག་དེའི་སྐོར་ལ་རྩོད་གླེང་མང་པོ་བྱུང་སོང་ལ། རང་བཙན་དང་དབུ་མའི་སྐོར་དང་། དབུས་གཞོན་ནུ་དང་ས་གནས་ཀྱི་སྐོར། དེར་མཐུད་ནས་ད་ལོའི་གསུམ་བཅུའི་དུས་དྲན་སྲུང་གཙི་བྱེད་ཕྱོགས་དང་། འཕྲེད་དར་སྟེང་གི་བརྗོད་ཚིག་སྐོར་སོགས་ལ་གླེང་སློང་མང་པོ་བྱུང་སྟེ་ཚོགས་རྭ་ཡོངས་ཚ་ཚ་འུར་འུར་ཞིག་བྱུང་སོང་།

མཇུག་ཏུ་གསར་འགོད་པས་ནེའུ་ཡོག་དང་ནེའུ་ཇར་ཛི་ས་གནས་གཞོན་ནུའི་ཚོགས་གཙོ་ངག་དབང་དཔལ་ལྡན་ལགས་སུ་འཕྲིན་ཡིག་དེའི་སྐོར་ལ་བཅར་འདྲི་ཞུས་པར། ཁོང་གིས། “འཕྲིན་ཡིག་དེ་སྤྱིར་བཏང་གི་ཆ་ནས་གཞོན་ནུའི་ལངས་ཕྱོགས་དང་ལྟ་བའི་སྐོར་ལ་གང་ཡང་མ་རེད། ང་ཚོ་ནེའུ་ཡོག་དང་ནེའུ་ཇར་ཛི་ས་གནས་གཞོན་ནུ་ལྷན་ཚོགས་ལ་རྒྱུན་ལས་ ༡༡ ཡོད་པ་ཚང་མ་འཛོམས་ཐོག་ནས་གྲོས་བསྡུར་བྱས་ཏེ། གཞོན་ནུ་ལྷན་ཚོགས་ནང་ཁུལ་ལ་མཐུན་ལམ་ཡོང་ཐབས་ཐད་ཛ་དྲག་གི་ཚོགས་འདུ་ཞིག་ཚོགས་དགོས་ཀྱི་ཡོད་སྟབས། ཚོགས་འདུ་ཐོག་ལ་དབུས་གཞོན་ནུའི་ཚོགས་གཙོ་ཕེབས་རོགས་ཟེར་ནས་འཕྲིན་ཡིག་ཅིག་ཕུལ་རྒྱུར་ཐག་བཅད་པའི་ཐོག་ནས་བསྐུར་བ་ལས། རྒྱུན་ལས་ཁ་ཤས་ཤིག་གིས་གང་དྲན་བསྐུར་བ་དེ་འདྲ་མ་རེད། དབུས་གཞོན་ནུའི་ཚོགས་གཙོ་ལགས་ཀྱིས་ས་གནས་རྒྱུན་ལས་ནང་ཁུལ་དེའི་སྐོར་ཤེས་རྟོགས་མི་འདུག་ཟེར་བ་གཞི་རྩ་མེད་པའི་བཀའ་མོལ་རེད་”ཅེས་གསུངས་སོང་།

གཞོན་ནུའི་དབུས་རྒྱུན་ཚོགས་གཙོ་བསྟན་འཛིན་འཇིགས་མེད་ལགས་སུ་བཅར་འདྲི་ཞུས་པར། ཁོང་གིས། “ ཐེངས་འདིར་ང་ལ་གཞོན་ནུའི་སྐོར་ལ་བཤད་དགོས་གསུངས་སོང་། དེར་བརྟེན་ངས་གཞོན་ནུའི་སྐོར་ལ་འགྲེལ་བཤད་གང་ཐུབ་བྱས་པ་རེད། དེའི་སྐབས་ལ་ས་གནས་རྒྱུན་ལས་ནང་གི་སྐད་ཆ་དེ་ཚོ་བྱུང་བ་རེད། འཕྲིན་ཡིག་དེའི་སྐོར་ལ་ས་གནས་རྒྱུན་ལས་ཚང་མས་ཧ་གོ་ཡི་ཡོད་མེད་དེ་ས་གནས་ཚོགས་གཞོན་དང་དྲུང་ཆེ་གཉིས་ལ་སྐད་ཆ་དྲིས་དང་འགྲིག་གི་རེད།” ཅེས་བརྗོད་སྟབས། གསར་འགོད་པས་ཁ་པར་བརྒྱུད་ས་གནས་ཚོགས་གཞོན་དང་དྲུང་ཆེ་གཉིས་ལ་འབྲེལ་བ་ཞུས་ཀྱང་ཁ་པར་འཇོག་མཁན་བྱུང་མ་སོང་།

 རྙོག་གླེང་ཅན་གྱི་འཕྲིན་ཡིག་དེའི་ནང་དོན་འོག་ཏུ་བཀོད་ཡོད།

༼ ༄༅། །གུས་བཀུར་འོས་པའི་ངྷ་ས་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོས་དབུས་པའི་རྒྱུན་ལས་རྣམ་པ་ལྷན་རྒྱས་ཀྱི་སྐུ་ཁམས་བཟང་པོའི་དྲུང་དུ་ཆེད་གསོལ།

འདི་ག་ནེའུ་ཡོག་དང་ནེའུ་ཇར་སི་སྐབས་བཅུ་གཉིས་པའི་ས་གནས་བོད་ཀྱི་གཞོན་ནུ་ལྷན་ཙོགས་ཀྱི་རྒྱུན་ལས་ཡོངས་ནས་གལ་ཆེན་དོན་ཆེན་དུ་སེམས་ནས་ཞུ་གསོལ་སྙིང་བོར། བཙན་བྱོལ་བོད་མིའི་སྤྱི་ཚོགས་ཀྱི་ལོ་རྒྱུས་ལ་ཕྱིར་མིག་བལྟས་ན། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་ནི་བོད་མིའི་སྒྲིག་འཛུགས་ཀྱི་ལས་དོན་ལ་དངོས་ཤུགས་གང་ཐད་ནས་ཕྱར་གྲུ་མཉམ་འདེགས་ཞུ་མཁན་དང་། སྤྱི་ཚོགས་ཞབས་ཞུ་སྒྲུབ་མཁན། བཀའ་དྲིན་ཟླ་མེད་༧སྤྱི་ནོར་༧གོང་ས་༧སྐྱབས་མགོན་༧རྒྱལ་བའི་དབང་བོའི་རྩ་བའི་བཀའ་དགོངས་དང་མི་འགལ་བའི་ཐོག་ཁ་ཕྱོགས་མ་ནོར་བར་གཞུང་མང་འགྲོ་སར་ཤར་བསྐྱོད་བྱེད་མཁན་གྱི་གཞུང་འབྲེལ་མ་ཡིན་པའི་སྒྲིག་འཛུགས་ལོ་རྒྱུས་ཡོད་པ་ཞིག་ཡིན། དེ་འདྲའི་རྒྱུ་མཚན་ལ་བརྟེན་ནས་གཞོན་ལྷན་ནི་རྒྱ་ནག་གཞུང་གིས་སྡང་ཟུག་བྱེད་ཡུལ་དང་། བོད་མི་མང་ཚོགས་ཀྱིས་བསྔགས་བརྗོད་བྱེད་ཡུལ་གྱི་སྒྲིག་འཛུགས་གལ་ཆེན་ཞིག་ཡིན་པ་ཀུན་གྱིས་མཁྱེན་གསལ་རེད།

འོན་ཀྱང་། བར་སྐབས་ཤིག་ནས་སྐབས་འཚོལ་རིང་ལུགས་པ་ཆེས་ཉུང་ཤས་དང་། ས་གནས་རེ་ཟུང་གི་ལས་དོན་བྱེད་ཕྱོགས་དང་། འཐབ་རྩོད་ཀྱི་ཁ་ཕྱོགས་ནོར་འཁྲུལ་བྱུང་དབང་གིས་གཞོན་ལྷན་ནང་ཁུལ་འཆམ་མཐུན་མ་བྱུང་བའི་ཁར། གཞོན་ནུའི་ས་གནས་ཁ་ཤས་དབུས་གཞོན་ལྷན་གྱི་འགོ་ཁྲིད་འོག་མ་བསྡད་པར་ལོགས་སུ་ཐོན་པ་དང་། བོད་མིའི་སྤྱི་ཚོགས་ཁྲོད་དུའང་གཞོན་ལྷན་སྒྲིག་འཛུགས་ལ་མཐོང་ཕྱོགས་མི་ལེགས་པ་སྣ་ཚོགས་བྱུང་ཡོད་པ་སོགས་ནི་དགྲ་དགའ་གཉེན་སྡུག་དང་། གཞོན་ལྷན་ལ་སྙིང་ནས་ཤ་ཚ་ཡོད་མཁན་རྣམས་བློ་ཕམ་དགོས་པའི་གནས་ཚུལ་ཐབས་རྡུགས་ཤིག་ཆགས་ཡོད།

འདས་ཟིན་པའི་གནས་ཚུལ་ལ་འགྱོད་སེམས་བྱེད་རྒྱུ་ལས་ཅི་བྱ་དབེན་ཡང་། གལ་ཆེ་ཤོས་ནི་སྤྱི་ཚོགས་ཁྲོད་གཞོན་ལྷན་སྒྲིག་འཛུགས་ཀྱི་གཟུགས་བརྙན་འདི་སྔར་བཞིན་སླར་གསོ་ཡོང་ཐབས་ཀྱི་འབད་བརྩོན་ནུས་པ་ལྡན་པ་ཞིག་གང་མགྱོགས་མ་གནང་བ་ཡིན་ན། དབུས་གཞོན་ནུ་ལྷན་ཚོགས་འདི་བཞིན་འབངས་མེད་པའི་དཔོན་དུ་འགྱུར་ཉེན་ཡོད་པས། དེའི་ཐོག་དགོངས་པ་ཆེ་བཞེས་གནང་རྒྱུ་དུས་ལ་བབ་ཡོད་པའི་ཚོར་སྣང་ཆེན་པོ་བྱུང་།

ཆིག་སྒྲིལ་ནི་བོད་མི་རིགས་ཡུན་རིང་གསོན་པོར་གནས་ཐུབ་མིན་གྱི་འགག་རྩ་ཡིན་པ་ང་ཚོས་ཞུ་མི་དགོས་པར་གོང་རིམ་དབུས་རྒྱུན་རྣམ་པས་མཁྱེན་གསལ་ལ་སོང་། གཞིས་བྱེས་བོད་མི་ཡོངས་ཀྱི་མངོན་འདོད་ལ་དགོངས་བཞེས་ཀྱིས་དབུས་གཞོན་ནུ་ལྷན་ཚོགས་ཀྱིས། གཞོན་ལྷན་སྒྲིག་འཛུགས་ནས་ལོགས་སུ་ཐོན་པའི་ས་གནས་ཁ་ཤས་ཡོད་པ་དེ་རྣམས་དང་། དེ་མིན་ས་གནས་ཁག་ཡོངས་རྫོགས་ཆེད་བསྐོང་གིས། ཁོང་རྣམས་ཀྱི་རེ་འདོད་གང་ཡིན་པ་ལྷུག་བཤད་བྱེད་ས་ཡོད་པ་དང་། གཞོན་ལྷན་གྱི་གཟུགས་བརྙན་སྔར་ལྟར་སླར་གསོ་ཡོང་ཐབས་སུ་བསམ་ཚུལ་བརྗེ་ལེན་གྱི་ཛ་དྲག་གི་ཚོགས་ཆེན་ཞིག་འཕྲལ་དུ་བསྐོང་ཚོགས་གནང་སྐྱོང་ཡོང་བའི་འབོད་སྐུལ་ཞུ་རྒྱུ་ཡིན།

སྐབས་དེར་གཞོན་ནུའི་ས་གནས་ཡོངས་རྫོགས་ནས་རང་རང་ས་གནས་སོ་སོའི་རྒྱ་ཆེའི་སེར་སྐྱ་མི་མང་གི་རེ་འདོད་ངོ་མ་ཅི་ཡིན་བསྣམས་ནས་བོད་སྤྱིའི་བདེན་དོན་འཐབ་རྩོད་དང་། ད་ལྟའི་བོད་ནང་གི་ཆེས་ཡ་ང་བའི་ཛ་དྲག་གི་གནས་སྟངས་གཉན་འཕྲང་ལ་ཐུགས་བསམ་ཆེ་བཞེས་ཀྱིས་ལོ་རྒྱུས་ཡུན་རིང་ལྡན་པའི་གཞོན་ལྷན་སྒྲིག་འཛུགས་འདི། གང་འདྲ་བྱས་ནས་རྒྱ་ཆེའི་མང་ཚོགས་ཀྱི་སྔར་ལྷག་ཡིད་ཆེས་རྒྱབ་སྐྱོར་ཡོད་པའི་གཞུང་མང་གཉིས་ཕན་གྱི་སྒྲིག་འཛུགས་ཤིག་ཆགས་པ་བྱེད་རྒྱུར་ཐབས་ལམ་ཅི་ཡོད་ཀྱི་དགོངས་ཚུལ་བསྣམས་ཏེ་ཚོགས་ཆེན་དུ་ཕེབས་ཐུབ་པའི་རེ་བསྐུལ་ནན་པོ་ཞུ་རྒྱུ་ཡིན།

ང་ཚོ་རྒྱུན་ལས་ཐུན་མོང་ནས་དེ་རིང་གི་ཞུ་སྙན་འདི་ཕུལ་བའི་དགོས་དམིགས་གཙོ་བོ་ནི། སྤྱི་ལོ་ ༡༩༧༠ ཟླ་ ༡༠ ཚེས་ ༠༧ ཉིན་དབུ་བརྙེས་ཤིང་། ད་ལོ་ལོ་གྲངས་ཞེ་བཞི་སོན་པའི་སྒྲིག་འཛུགས་འདིའི་འཐབ་རྩོད་ཀྱི་ལོ་རྒྱུས་ཁྲོད་སྐུ་ངལ་འཛེམས་མེད་ཀྱིས་ལེགས་སྐྱེས་ཕུལ་མཁན་མེས་པོ་འདས་སོན་རྣམས་ཐུགས་ཕམ་མི་ཡོང་བ་དང་། གཞོན་ལྷན་སྒྲིག་འཛུགས་འདི་བཞིན་ཆིག་སྒྲིལ་གྱིས་གཞུང་མང་གཉིས་ཕན་གྱི་སྒྲིག་འཛུགས་གཟི་བརྗིད་དང་ལྡན་པ་ཞིག་ཆགས་པ་བྱེད་རྒྱུ་འདི་ཡིན་པས། དེ་ལུགས་མཛད་ཕྱོགས་དམ་དོན་གནང་སྐྱོང་ཡོང་བ་མཁྱེན། ཞེས་སྐབས་བཅུ་གཉིས་པའི་ནེའུ་ཡོག་དང་ནེའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ཐུན་མོང་ནས། སྤྱི་ལོ་ ༢༠༡༣ ཟླ་ ༡༡ ཚེས་ ༠༥ ཉིན་བཟང་པར་་་་་་་་་་ཕུལ། ༽ ཞེས་བཀོད་འདུག

ས་གནས་གསར་འགོད་པ། སངས་རྒྱས་བཀྲ་ཤིས།

འབྲེལ་ཡོད་གསར་འགྱུར།

བོད་ནང་གི་ན་གཞོན་གཞས་པ་ཨ་སངས་ལགས། པར་དུས་བབ་ཀྱིས་ཕྱོགས་སྒྲིག་བྱས།
Mobile App

གཞས་པ་ཨ་སངས་ལགས་མུ་མཐུད་བཀག་ཉར་འོག་ཡོད་འདུག

༢༠༢༥/༡༠/༡༨
Zhang Youxia (front), newly-elected Vice Chairman of the Central Military Commission of the People's Republic of China, swears an oath with members of the Central Military Commission (L-R) Zhang Shengmin, Liu Zhenli, He Weidong, Li Shangfu, and Miao Hua, after they were elected during the fourth plenary session of the National People's Congress (NPC) at the Great Hall of the People in Beijing. photo credit: Reuter
Mobile App

རྒྱ་ནག་གཞུང་གིས་དམར་ཤོག་དཔོན་རིགས་དགུ་ཕྱིར་ཕུད་བཏང་།

༢༠༢༥/༡༠/༡༨
མོན་ཡུལ་འཕགས་བོད་མཛའ་འབྲེལ་ཚོགས་པས་༧གོང་ས་མཆོག་ལ་མནྜལ་བརྟན་གསུམ་འདེགས་འབུལ་ཞུས། ༢༠༢༥།༡༠།༡༨ དུས་བབ་ཀྱི་པར།
Mobile App

མོན་ཡུལ་འཕགས་བོད་མཛའ་འབྲེལ་ཚོགས་པས་༧གོང་ས་མཆོག་ལ་མནྜལ་རྟེན་གསུམ་འདེགས་འབུལ་ཞུས།

༢༠༢༥/༡༠/༡༨
Richard Gere receiving the Human Rights First Visionary Award. Photo: ICT
Mobile App

བོད་དོན་རྒྱབ་སྐྱོར་བ་རེ་ཆར་ཌི་གྷེ་རེ་ལགས་སུ་འགྲོ་བ་མིའི་ཐོབ་ཐང་གི་གཟེངས་རྟགས་ཐོབ།

༢༠༢༥/༡༠/༡༧
Mobile App

སེར་བྱེས་མཁས་སྙན་གྲྭ་ཚང་གིས་༧སྐུའི་གོ་སྟོན་གྱི་བྱམས་བརྩེའི་ལོ་སྲུང་གཙི་ཞུས།

༢༠༢༥/༡༠/༡༧
Mobile App

བོད་ནང་ཤོག་སྦག་གི་སྒྱུ་རྩལ་འགྲེམས་སྟོན་བྱེད་མཁན་ལ་ཉེས་ཆད་བཅད།

༢༠༢༥/༡༠/༡༦

མཆན། 4

  1. བདེན་སྐྱོང་། says:
    ལོ་ 12 སྔོན།

    ཁ་སང་ངས་གནད་དོན་འདིའི་ཐོག་ལ་མཆན་ཞིག་བཏབ་པ་ཡིན། དུས་བབ་ཚང་གིས་ངའི་མཆན་དེ་བཏོན་མེད་པ་གང་རེད།

    Reply
  2. འབྲུག་སྨྱོན། says:
    ལོ་ 12 སྔོན།

    ས་དབུས་གཞོན་ལྷན་ཚོགས་པའི་ཚོགས་གཙོ་དང་ཚོགས་མི་རྣམ་པར་གལ་སྲིད་༸གོང་ས་ལྷ་མི་རྣམ་འདྲེན་མཆོག་གིས་ལམ་བཟང་སྟོན་པའི་གཉིས་མེད་དབུ་མའི་ལམ་ལ་རྟེན་ནས་བོད་ལ་རང་སྲིད་རང་སྐྱོང་འཐོབ་ཚེ་ད་དུང་རང་བཙན་འཐབ་རྩོད་བྱ་རྒྱུ་ཡིན་ནམ། ཁྱེད་རྣམ་པའི་ལས་འགུལ་ནི་ཟས་བཅད་ངོ་རྒོལ་དང་། མར་མེ་ཁྲོམ་སྐོར། རྐང་འཁོར་སྐོར་བསྐྱོད། ཞི་བའི་གོམ་བགྲོད་ལས་གཞན་ལས་འགུལ་རྣམ་པ་གསར་པ་འདྲ་མེད་པས། དུག་སྦྲང་ལས་འགུལ་ག་པར་ཡོད། ཁ་བདེན་ཚིག་ལ་གནས་ཡོད་ན། ཇཱན་ཏར་མཱན་ཏར་ལམ་ཁ་སྟོང་པ་རེད་འདུག་པའི་མཁྱེན་པ་གནང་། དེ་མ་གཏོགས་ས་དབུས་ཀྱི་སྐད་ཆ་ལ་ངོ་རེ་ཚ།

    Reply
  3. དཔའ་ཆེན་དོན་གྲུབ། says:
    ལོ་ 12 སྔོན།

    ད་དངོས་གནས་གཞོན་ནུར་ཚོགས་པ་འདི་ཚར་འདུག ས་གནས་ཚོགས་གཙོ་ཞིག་གིས་དབུས་ཚོགས་གཙོ་ལ་ཆེས་སྤྱིར་བཏང་གི་བརྩི་བཀུར་ཙམ་ཡང་མི་བྱེད་པར་ཧམ་བཤད་དཔེ་ན་མེད་པ་བྱེད་ཀྱི་འདུག

    “འཕྲིན་ཡིག་དེ་སྤྱིར་བཏང་གི་ཆ་ནས་གཞོན་ནུའི་ལངས་ཕྱོགས་དང་ལྟ་བའི་སྐོར་ལ་གང་ཡང་མ་རེད། ང་ཚོ་ནེའུ་ཡོག་དང་ནེའུ་ཇར་ཛི་ས་གནས་གཞོན་ནུ་ལྷན་ཚོགས་ལ་རྒྱུན་ལས་ ༡༡ ཡོད་པ་ཚང་མ་འཛོམས་ཐོག་ནས་གྲོས་བསྡུར་བྱས་ཏེ། གཞོན་ནུ་ལྷན་ཚོགས་ནང་ཁུལ་ལ་མཐུན་ལམ་ཡོང་ཐབས་ཐད་ཛ་དྲག་གི་ཚོགས་འདུ་ཞིག་ཚོགས་དགོས་ཀྱི་འདུག དེའི་ཐོག་ལ་དབུས་གཞོན་ནུའི་ཚོགས་གཙོ་ཕེབས་རོགས་ཟེར་ནས་འཕྲིན་ཡིག་ཅིག་ཕུལ་རྒྱུར་ཐག་བཅད་པའི་ཐོག་ནས་བསྐུར་བ་ལས། རྒྱུན་ལས་ཁ་ཤས་ཤིག་གིས་གང་དྲན་བསྐུར་བ་དེ་འདྲ་མ་རེད། དབུས་གཞོན་ནུའི་ཚོགས་གཙོ་ལགས་ཀྱིས་ས་གནས་རྒྱུན་ལས་ནང་ཁུལ་དེའི་སྐོར་ཤེས་རྟོགས་མི་འདུག་ཟེར་བ་གཞི་རྩ་མེད་པའི་བཀའ་མོལ་རེད་”

    “ ཐེངས་འདིར་ང་ལ་གཞོན་ནུའི་སྐོར་ལ་བཤད་དགོས་གསུངས་སོང་། དེར་བརྟེན་ངས་གཞོན་ནུའི་སྐོར་ལ་འགྲེལ་བཤད་གང་ཐུབ་བྱས་པ་རེད། དེའི་སྐབས་ལ་ས་གནས་རྒྱུན་ལས་ནང་གི་སྐད་ཆ་དེ་ཚོ་བྱུང་བ་རེད། འཕྲིན་ཡིག་དེའི་སྐོར་ལ་ས་གནས་རྒྱུན་ལས་ཚང་མས་ཧ་གོ་ཡི་ཡོད་མེད་དེ་ས་གནས་ཚོགས་གཞོན་དང་དྲུང་ཆེ་གཉིས་ལ་སྐད་ཆ་དྲིས་དང་འགྲིག་གི་རེད།”

    ནེ་ཡོག་འཇར་སའི་ས་གནས་གཞོན་ནུའི་ཚོགས་གཙོ་ཡང་འགྲིག་མི་འདུག ཨ་ཁ

    Reply
  4. གནས་ཚང་། says:
    ལོ་ 12 སྔོན།

    ད་བོད་ཕྱི་ལོགས་ཀྱི་ནུས་པ་ཁྱོན་ཡོངས་ནས་ཉམས་འགོ་ཚུགས་སོང་། ཕྱོགས་གཅིག་ནས་ཐབས་སྐྱོ་བོ་རེད་དེ། བོད་ནང་ལ་མཚོན་ན་ཡག་པོའང་རེད། རང་གི་རྐང་པའི་སྒང་ལ་རང་ཉིད་ལངས་དགོས་པའི་དུས་ལ་སླེབས་ཟིན་པ་རེད།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese