སྦེལ་ལྗམ་གནས་སྡོད་ཆབ་འགག་དཔལ་ལྡན་གྱིས།
སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོཊ་ཀྱི་གྲོས་ཚོཊ་ཚོཊ་དུས་བདུན་པའི་ཐོག་བཅར་བའི་ཁྲིམས་ཞིབ་པ་ཆེ་བ་དང་སྲིད་སྐྱོང་གཉིས་ཀྱིས་གཙོས་བཀའ་བློན་དང་དྲུང་ཆེ་རྣམ་པ། སྤྱི་འཐུས་ཚོགས་གཙོ་དང་ཚོགས་གཞོན་གྱིས་དབུས་ཚོད་དཔག་ཚོགས་ཆུང་གི་ཚོགས་གཙོ་དང་སྤྱི་འཐུས་རྒྱུན་ལས་ཡོངས་ལ་གོང་བཀུར་སྔོན་བཏང་གིས་ད་རེབ་གྲོས་ཚོགས་ཚོགས་དུས་བདུན་པའི་སྐབས་ཀྱི་དྲི་བ་དྲིས་ལན་བལྟས་རྗེས་ཀྱི་ཚོར་སྣང་ཅི་བྱུང་གསོང་བོའི་ལམ་ནས་བརྗོད་པར་སྤྲོ་བས་བརྟས།
དེ་ཡང་བོད་བཙན་པོའི་སྐབས་ཀྱི་བྱུང་རབས་ལོ་རྒྱུས་སྤྱི་དང་། ཡང་སྒོས་བོད་སིལ་བུར་འཐོར་ནས་དུས་ད་ལྟའི་བར་ནང་སྒྲིལ་བྱུང་མ་ཐུབ་པར་ཧ་ལམ་ཁྱོད་ཤི་ང་གསོན་གྱི་འཐབ་འཛིང་མི་ཉུང་བ་ཞིག་བརྩམས་ཤིང་། ལྷག་དོན་དུ་སྲིད་གཞུང་གི་ལས་ཀྱི་སྣེ་མོ་བ་རྣམ་པས་ཕྱི་དགྲ་འགོག་རྒོལ་གྱི་ཐབས་ཇུས་དེ་ཙམ་མ་བཏང་བར་ནང་གཉེན་དགྲར་བལྟས་ཀྱི་ཐབས་ཇུས་སྣ་མང་བརྩམས་ཡོད་པ་ང་ཚོས་རང་མི་རིགས་ཀྱི་བྱུང་རབས་ལོ་རྒྱུས་ལ་ཕྱིར་བལྟས་ཤིག་བྱས་ན་གསལ་བོ་རྟོགས་ཐུབ། བྱུང་རབས་ལོ་རྒྱུས་ཀྱི་ཁྲོད་དུ་དགྲ་དགའ་གཉེན་སྡུག་གི་ལས་མང་བརྩམས་ཡོད་པ་ད་ལྟའི་བཙན་བྱོལ་བའི་མཛད་གཙོ་རྣམ་པ་དང་སྤྱི་འཐུས་རྒྱུན་ལས་རྣམ་པར་རྒྱུས་མངའ་ཡོད་པ་བོད་མི་སྤྱི་བོ་གནམ་བསྟན་ཡོངས་ལ་གསལ། འདི་འདྲའི་རྒྱུས་མངའ་ཡོད་བཞིན་དུ་གྲོས་ཚོགས་རྭ་བའི་ནང་ཕན་ཚུན་ལ་ཟུར་ཟའི་ཚིག་གི་མདའ་མཚོན་འཕེན་རེས་བྱེད་པ་འདི་ནི་ཅི་འདྲའི་སེམས་སྐྱོ་དགོས་པའི་གནས་ཚུལ་ཞིག་རེད་ཨང་།
སྤྱི་འཐུས་དྲི་བར་བཀའ་ཤག་གིས་ལན་འདེབས་མ་གནང་བ་ཆིག་སྒྲིལ་གྱི་གནོད་གཞིར་འགྱུར་ཉེན།
ད་ལྟའི་བོད་མིའི་སྒྲིག་འཛུགས་འདི་ནི་༧སྤྱི་ནོར་༧གོང་ས་༧སྐྱབས་མགོན་༧རྒྱལ་བའི་དབང་བོའི་རྩ་བའི་བཀའ་དགོངས་དང་འགལ་འཛོལ་མེད་ཐོག་ཁ་ཕྱོགས་མ་ནོར་བར་དམངས་ཕན་ལས་སྒྲུབ་ཀྱི་གལ་ཆེའི་སྒྲིག་འཛུགས་ཤིག་ཡིན་པ་ཀུན་གྱིས་མཁྱེན་གསལ་རེད། ཀུན་གྱིས་མཁྱེན་བཞིན་དུ་སྤྱི་འཐུས་རེ་ཟུང་གིས་སྲིད་སྐྱོང་མཆོག་དང་བཀའ་བློན་རྣམ་པར་གོང་བཀུར་དང་གདེང་འཇོག་མེད་པར་ཟུར་ཟའི་དྲི་ཚིག་འཕངས་ཤིང་། སྲིད་སྐྱོང་དང་ཕྱི་དྲིལ་བཀའ་བློན་རྣམ་གཉིས་ཀྱིས་བོད་སྐད་འདང་ལ་མ་འདང་བའི་ཐོག་ཡ་རབས་ཚུལ་མཐུན་གྱི་དྲིས་ལན་བསྐྱོན་པར་ཡི་རངས་དང་རྣམ་དཔྱོད་ཅན་གྱི་ཁྱད་འབྲས་སུ་ངོས་འཛིན་ཞུས་པ་ཡིན། ཡང་སྤྱི་འཐུས་རེ་ཟུང་གིས་དོན་གཅོད་བསྐོ་གཞག་དང་གཞུང་ཞབས་ཡིག་རྒྱུགས་ཀྱི་ལམ་ནས་འདེམས་སྒྲུག་གི་རྙོག་གླེང་སྐོར་གྱི་གནས་ཚུལ་གསལ་འདྲི་གནང་བར་བཀའ་ཤག་གིས་ལན་འདེབས་གང་ཡང་མ་གནང་བར་སྣང་མེད་དུ་བཞག་སོང་། ཡང་བསྐྱར་སྤྱི་འཐུས་རེ་གཉིས་ཤིག་གིས་དྲི་བ་གཞན་གཙོར་འདྲི་གནང་ཞོར་དུ་གོང་གི་དྲི་བ་དེ་བསྐྱར་འདྲི་གནང་སོང་ཡང་སྔར་བཞིན་བཀའ་ཤག་གིས་ལན་འདེབས་གནང་མ་སོང་།
སྐབས་འདིར་ངས་དྲན་གསོས་པ་ཞིག་ལ་༧གོང་ས་རྒྱལ་དབང་སྐུ་ཕྲེང་བཅུ་གསུམ་པ་མཆོག་གིས་ཕྱི་ལོ་ ༡༨༧༦ –༡༩༣༣ སྔ་ཕྱི་རིམ་པར་རྒྱལ་སྲུང་དང་སློབ་གསོ། བཟོ་ལས་སོགས་དང་འབྲེལ་བའི་དེང་རབས་ཅན་གྱི་སྲིད་ཇུས་ལག་བསྟར་བྱེད་མགོ་བརྩམས་ཀྱང་། དབང་ཡོད་དཔོན་རིགས་དང་སྐུ་དྲག་ཚོས་ “ནུབ་ཕྱོགས་རིག་གནས་ཀྱིས་བོད་ཀྱི་སྲོལ་རྒྱུན་རིག་གནས་ལ་གཏོར་བརླག་ཐེབས་ངེས་ཡིན“ ཞེས་སྣང་མེད་དུ་བཞག་པ་དེ་དང་། ཕྱི་ལོ་ ༡༩༣༢ ལོར་བོད་མི་རིགས་ཀྱི་འབྱུང་འགྱུར་གནས་བབ་སྐོར་ལ་གསུངས་པ། “ མི་འགྱངས་པར་གུང་ཁྲན་རིང་ལུགས་པ་ང་ཚོའི་ནང་ལ་འཛུལ་ཡོང་གི་རེད། ང་ཚོས་རང་ཉིད་ཀྱིས་རྒྱལ་སྲུང་གི་ཆོད་སེམས་འཇོག་དགོས། གལ་ཏེ་དེ་ལྟར་མ་བྱས་ན་གྲྭ་བའི་ཚེ་སྲོག་དང་དགོན་པ། ཆོས་སོགས་ལ་འཕྲོག་བཅོམ་ཐེབས་སྲིད་ལ། བོད་མིའི་རང་དབང་དང་རྒྱུ་ནོར་ལའང་འཕྲོག་བཅོམ་ཐེབས་སྲིད། སྐབས་དེར་ང་ཚོ་བཙན་འཛུལ་བའི་བྲན་གཡོག་ལ་གྱུར་ཏེ་སྤྲང་བོ་ལྟར་ཐམས་ཅད་ཤོར་ཞིང་འཁྱམ་པོ་ལྡོམ་པོར་ཆགས་སྲིད་” ཅེས་མ་འོངས་སྔོན་གསུངས་གནང་བར་སྐབས་དེའི་རང་གཞུང་གི་དཔོན་རིགས་དང་སྐུ་དྲག་དབང་ཅན་ཚོས་དོ་སྣང་བྱས་མེད། དེའི་རྐྱེན་གྱིས་ང་ཚོ་གུང་ཁྲན་བཙན་འཛུལ་བའི་བྲན་གཡོག་ཏུ་གྱུར་ཏེ་སྤྲང་བོ་ལྟར་ཐམས་ཅད་ཤོར་ཞིང་འཁྱམ་པོ་ལྡོམ་པོར་ཆགས་ནས་བགྲང་བྱ་བཅུ་ཕྲག་ལྔ་ལྷག་ཅིག་འགྲོ་བཞིན་པའི་ཡ་ང་བའི་གནས་སྟངས་འདི་ཆགས་པ་རེད།
རང་གཞུང་བཀའ་ཤག་གིས་གོང་བཀོད་གནས་ཚུལ་གྱི་དོན་སྙིང་རྟོགས་པའི་ཐོག་སྤྱི་ཚོགས་ཀྱི་སྲང་ལམ་ནས་འདེམས་སྒྲུག་བྱས་ཏེ་གྲོས་ཚོགས་རྭ་བའི་ནང་བསྣམས་ཕེབས་ཏེ་སྐད་ཆ་དྲིས་པར་ཕྱི་གསལ་ནང་གསལ་གྱི་ལན་འདེབས་ཤིག་མ་གནང་ཚེ་སྤྱི་ཚོགས་ནང་བཤད་ཡན་དེའི་རྐྱེན་བྱས་ཏེ་ད་ལྟའི་ཆིག་སྒྲིལ་གྱི་ནུས་པ་གཏོར་བརླག་གཏོང་བའི་གཞི་རྩར་འགྱུར་ཉེན་ཆེ། གལ་ཏེ་དེ་ལྟར་གྱུར་ཚེ་ང་ཚོའི་བདེ་སྐྱིད་རྨང་ནས་བཅོམ་ཞིང་ཀུན་གྱིས་འཕྱ་སྨོད་ཀྱི་གནས་སུ་འགྱུར་བའི་ངང་ཚུལ་འདི་ཚང་མས་ཀླད་མེད་ཅོལ་ཆུང་ཤེས་གསལ་རེད། ད་ཐེངས་ཀྱི་སྲིད་སྐྱོང་འདི་བ་ཚང་སྔར་གྱི་བཀའ་ཁྲི་བཞིན་ལུས་ཀྱི་རྣམ་འགྱུར་ལ་ཡ་རབས་གཤིས་བཟང་གི་ཁྱད་ཆོས་ལྡན་ཞིང་དུས་རབས་ཀྱི་རྗེས་ཆོད་པའི་སྐྱེས་བུ་ཞིག་རེད། ཁོང་ལ་ཐུན་མོང་གི་དཀའ་ངལ་ཞིག་ཡོད་པ་ནི་གྲོས་ཚོགས་སར་བཀའ་ཤག་གི་ཡིག་ངོས་ལན་འདེབས་སྙན་སྒྲོག་གནང་སྐབས་བོད་ཡིག་གི་ཀློག་རྩལ་མེད་པ་དང་། གཏམ་བཤད་གནང་སྐབས་བོད་སྐད་ཀྱིས་མི་འདང་བའི་དཀའ་ངལ་འདི་གཉིས་ངེས་པར་སེལ་ཐབས་ལ་ཅིས་ཀྱང་འབད་དགོས།
དཀའ་ངལ་འདི་གང་མགྱོགས་མ་སེལ་ན་ང་ཚོའི་སྤྱི་ཚོགས་ནི་ལབ་མོ་ལ་དགའ་བའི་སྤྱི་ཚོགས་ཤིག་ཡིན་པའི་ངོས་ནས་རྒྱུན་དུ་བོད་ཡིག་གལ་ཆུང་དུ་རྩིས་མཁན་རྣམས་ཀྱི་ཁ་ལས་རླུང་རྟ་དར་ཏེ་མ་འོངས་པར་ང་ཚོའི་མི་རབས་གསར་བའི་སྤྱི་ཚོགས་འདི་བཞིན་གཞན་སྐད་རྐྱང་པའི་གཉའ་འོག་ཏུ་ཚུད་དེ་བོད་སྐད་གཙང་གཉེར་གནང་བའི་གཞིས་ལུས་མི་རབས་སྤྱི་ཚོགས་གཉིས་ཀྱི་བར་འགལ་འཛོལ་ཆེན་པོ་བཟོ་ཉེན་ཆེ། ལར་ནས་བཀའ་ཁྲི་གོང་མས་གཏན་ལ་ཕབ་པའི་ཤེས་ཡོན་སྲིད་ཇུས་གསར་བ་སྐུ་ཉིད་ནས་མུ་མཐུད་རྒྱུན་སྐྱོང་སྲ་བརྟན་དང་ཡར་རྒྱས་ཚགས་ཚུད་གཏོང་རྒྱུ་ཡིན་ལུགས་གྲོས་ཚོགས་སུ་བཀའ་ཕེབས་པ་བཞིན་སྐུ་ཉིད་ཀྱིས་ཀྱང་བོད་ཡིག་གི་ཚད་གཞི་གོང་མཐོར་གཏོང་བའི་རེ་སྒུག་ཆེའོ།།
སྤྱི་འཐུས་ཚོགས་གཙོའི་སྟངས་འཛིན་སྣང་མེད་དུ་བཞག་སྟེ་སྤྱི་འཐུས་འགས་འཛིན་སྐྱོང་བཀའ་ཤག་ལ་ཟུར་ཟའི་དྲི་ཚིག་འཕངས་པ་དང་འབྲེལ་བའི་ཡ་རབས་སྤྱོད་བཟང་ཉམས་རྒུད་དུ་འགྲོ་བའི་ཐད་ཀྱི་སེམས་ཚོར།
ཕྱི་ལོ་ ༡༩༥༩ ལོར་བོད་ས་ཡོངས་རྫོགས་རྒྱ་གཞུང་གི་བཙན་འཛུལ་འོག་ཏུ་ཤོར་ཏེ་སྤྲང་འཁྱམ་དུ་གྱུར་ཏེ་མིའི་ལུང་བར་སྐྱབས་བཅོལ་བར་ཕེབས་ནས་དུས་ཡུན་ཅུང་ཙམ་སོང་མཚམས་༧གོང་ས་༧སྐྱབས་མགོན་༧རྒྱལ་དབང་མཆོག་གིས་བོད་མི་རྣམས་མི་གཅིག་གི་དབང་སྒྱུར་འོག་སྡོད་མི་དགོས་པར་ནུབ་ཕྱོགས་ཡུལ་ཁག་སྤྱི་དང་། ཡང་སྒོས་གནས་ཡུལ་རྒྱ་གར་གཞུང་གི་དམངས་གཙོའི་འགྲོ་ལུགས་ལ་བརྟག་དཔྱད་རིམ་གནང་གིས་ཐོག་མར་མཱ་སི་རུར་སྤྱི་འཐུས་དགོས་གལ་ཆེ་ལུགས་ཀྱི་བཀའ་སློབ་བསྩལ། དུས་དེ་ནས་བཟུང་གོམ་གང་མདུན་སྤོས་ཀྱིས་ལོ་རབས་བདུན་ཅུ་བའི་ནང་མགོ་བརྩམས་ཏེ་དུས་ད་ལྟའི་བར་རྙོག་འཛིང་གང་འཚམ་ལྷག་ཞོར་སྤྱི་བའི་ལས་དོན་བསྒྲུབས་ནས་རྒྱུན་སྐྱོང་གནང་ཐུབ་པ་ནི་ཆེས་གཟི་བརྗིད་ལྡན་པ་ཞིག་རེད། མགོན་གང་ཉིད་ཀྱིས་རིང་ནས་སྙིང་དུ་བརྣག་པའི་འདོད་དོན་ཡང་འདི་རེད་མོད། འོན་ཀྱང་གྲོས་ཚོགས་འདིའི་བྱུང་རབས་ལོ་རྒྱུས་ལ་ཕྱིར་མིག་ཅིག་བལྟས་ན་ཆོལ་ཁའི་འཐེན་འཁྱེར་དང་། ཆོས་བརྒྱུད་རས་བཅད། གསར་རྙིང་དབྱེ་འབྱེད་ཀྱི་མཁྲེགས་འཛིན་གྱི་ལྟ་ངན་རྣམས་རིམ་བཞིན་ཉམས་རྨས་སུ་ཕྱིན་པའི་རྣམ་པར་མཐོང་ཐུབ།
ད་ལྟའི་གྲོས་ཚོགས་ཀྱི་སྤྱི་འཐུས་ཡོངས་ལ་སྔར་ལས་ལྷག་པའི་ལས་འགན་ལྕི་མོ་ཞིག་ཕྲག་ཏུ་བབ་ཡོད་པའི་གནས་ལུགས་དེ་ཨང་དང་པོར་བཞག་སྟེ་དྲི་ཚིག་འཕེན་སྐབས་ལུས་ཀྱི་རྣམ་འགྱུར་དང་ངག་ནས་བརྗོད་པའི་ཚིག་སོགས་ལ་གང་གཟབ་གནང་སྟེ་གནའ་བོའི་ཡ་རབས་སྤྱོད་བཟང་གི་ལམ་ལུགས་སྲོལ་དེ་ཡང་སེམས་སུ་གཟུང་དགོས་པའི་དུས་ལ་བབ་འདུག་སྙམ། ད་ལྟ་སྤྱི་འཐུས་བཞི་བཅུ་ཞེ་གྲངས་ཤིག་ཡོད་ཁོངས་སུ་སྐྱ་སེར་གཉིས་ཀ་འདུས་ཡོད། མི་སྐྱའི་སྤྱི་འཐུས་ལས་ཀྱང་སེར་མོ་བའི་སྤྱི་འཐུས་རེ་འགའ་གཤིས་ཀ་རྩུབ་ཅིང་། རེ་འགས་སྨྲ་བརྗོད་ཁ་ལ་འཁྱེར་ཏེ་ཟུར་ཟའི་ཚིག་འཁྱལ་བེད་སྤྱོད་གཏོང་སྟངས་ལ་གཞིགས་ནས་བཤད་ན། འདུལ་བ་འཛིན་པའི་འདུས་སྡེ་ཆེ་ཁག་གདན་ས་གསུམ་གཙོས་གཡུང་དྲུང་བོན་སྡེ་ཁག་ནས་ཐོན་པའི་དགེ་བཤེས་ཀྱི་མིང་ཐོབ་སྤྱི་འཐུས་དང་། དེ་བཞིན་འདུལ་ཁྲིམས་རྒྱུད་ལ་འཇགས་པའི་ཆོས་བྱེད་དགེ་འདུན་པའི་སྤྱི་འཐུས་ཚོས་གཞན་དང་མ་འདྲ་བའི་ནང་བའི་གཞུང་ནས་གསུངས་པའི་ཞི་དུལ་གྱི་སྤྱོད་བཟང་རྣམས་གྲོས་ཚོགས་རྭ་བར་བརྒྱུད་རྒྱ་ཆེའི་མི་སྐྱའི་སྤྱི་ཚོགས་སུ་མིག་སྟོན་བྱེད་དགོས་ནའང་དེ་ལས་ལྡོག་སྟེ་སྡིག་པའི་ཁོངས་སུ་གཏོགས་པའི་ཟུར་ཚིག་བེད་སྤྱད་དེ་དྲི་ཚིག་འཕངས་པ་འདི་རང་རེའི་མི་རབས་གསར་བས་ཆོས་ཕྱོགས་སུ་དད་པ་བྱེད་པའི་འགག་རྡོ་ལྟར་གྱུར་ཡོད།
འདུལ་གཞུང་ལ་སྦྱངས་པའི་དགོས་དོན་ནི་བྱམས་བརྩེས་ཟིན་པའི་བསམ་བློ་རང་རྒྱུད་ལ་བསྐྱེད་དེ་ཉེ་རིང་ཆགས་སྡང་བྲལ་བའི་བཏང་སྙོམ་ལ་གནས་བརྟུལ་ཞུགས་འཛིན་རྒྱུ་དེ་རེད། བཏང་སྙོམ་ཞེས་པའང་དྲང་བདེན་གྱི་བཏང་སྙོམ་གོ་དགོས་པ་སྐབས་བབ་ཀྱི་གོ་དོན་རེད། དེ་མིན་རང་ཉིད་ནུབ་ཕྱོགས་ཡུལ་གྲུ་ཁག་ཏུ་ཉོབ་ཐུབ་མཁན་གྱི་སྤྱི་འཐུས་ཤིག་མིན་ན་ཡང་། ནུབ་ཕྱོགས་བོད་རིགས་སྤྱི་མཐུན་ཚོགས་པ་ཁག་གི་ལས་དོན་མཐོང་ཐོས་བྱུང་ཡོད་ཅེས་དང་། མ་འོངས་ལོ་བཅུ་དེ་སྲིད་སྐྱོང་གི་ལུང་བསྟན་མིན་ན་ཞེས་སོགས་ཀྱི་དྲི་ཚིག་འཕངས་པ་འདུལ་ཁྲིམས་དང་མཐུན་པའི་དགེ་འདུན་པ་ཞིག་གིས་གནང་སྟངས་གཏན་ནས་མིན་པར་འཁུམས། སྤྱི་འཐུས་རེ་འགས་མི་སྨྲ་བའི་བརྟུལ་ཞུགས་བཟུང་ནས་གོ་མེད་ཚོར་མེད་དུ་བཞུགས་མཁན་ཡང་གང་མང་འདུག སྤྱི་འཐུས་རེ་འགས་འཆར་གཞི་གང་ཡང་མ་བཏང་བར་གཞན་གྱི་དྲི་ཚིག་དེ་དགོས་མེད་ཀྱི་བསྐྱར་འདྲི་ཐངས་མང་གནང་མཁན་གང་མང་རེད།
སྤྱི་འཐུས་ལོ་སྣ་རྒན་པ་ཁག་གཅིག་གིས་རྒན་ཚིགས་ཟིན་ནས་བཀའ་ཤག་གི་ལས་ཀྱི་སྣེ་མོ་བ་ལ་དྲི་ཚིག་འཕེན་མཁན་ཡང་རེ་ཟུང་མཐོང་། ས་པཎ་གྱིས། རིགས་པས་འཐད་ན་བྱིས་པ་ཆུང་ཆུང་ཞིག་གི་ངག་ནས་ཐོན་པའི་སྐད་ཆ་ཡིན་ཡང་ཉན་དགོས་པའི་བསླབ་བྱ་ཟབ་མོ་གནང་ཡོད་པ་ང་ཚོས་ཉེར་ལེན་གནང་དགོས། ༧གོང་ས་མཆོག་གིས་ཀྱང་། ད་ཐེངས་ཀྱི་གྲོས་ཚོགས་སར་ “སོ་སོ་སྒེར་གྱི་ཐོག་ནས་སྨྲ་བརྗོད་རང་དབང་རེད། ག་རེ་བཤད་ན་ཁྱད་པར་མི་འདུག ངོ་གདོང་ལག་ལེན་གྱི་ཐོག་ནས་ཁྱེད་རང་ཚོ་གྲོས་ཚོགས་ཚོགས་མི་མང་པོ་ཞིག་ཡོད་པ་རེད། ཚང་མས་དངོས་ཡོད་གནས་ཚུལ་ལ་རན་པ་ཞིག་དང་། འཕྲལ་ཕུགས་རྒྱང་གསུམ་ལ་བོད་རྒྱ་ཆེ་མི་མང་ས་ཡ་དྲུག་ལ་གྱོང་མ་རག་པ་ཞིག་བྱ་རྒྱུ་ཧ་ཅང་གལ་ཆེན་པོ་རེད། བོད་རྒྱ་ཆེ་མི་མང་ལ་རང་དབང་གི་ཐོག་ནས་དབུགས་གཏོང་ལེན་མེད་པ་ཞིག་ཆགས་བསྡད་ཡོད་པ་རེད། དེ་དག་ང་རང་ཚོས་ཇི་ལྟར་བསྐྱབ་ཐུབ་པ་ཞིག་དང་སྲུང་ཐུབ་པ་ཞིག་འདུག དེ་ཡོང་བར་གཙོ་བོ་རྒྱ་རིགས་མང་ཚོགས་ནང་ང་ཚོའི་བོད་པར་ཤ་ཚ་དང་གདུང་སེམས་མཉམ་སྐྱེད་ཡོང་བསྡད་པ་དེ་དག་ཧ་ཅང་གལ་ཆེན་པོ་རེད། དེ་དག་དགོངས་པར་བཅངས་ཏེ་ཧུར་ཐག་གནང་རོགས།” ཞེས་བཀའ་ཕེབས་ཡོད།
གྲོས་ཚོགས་སུ་བཀའ་ཕེབས་ཏེ་གསུང་དྲོད་མ་ཡལ་བར་བསྡད་ཡོད་པའི་རིང་ཚོགས་དུས་བདུན་པ་མགོ་འཛུགས་གནང་བ་རེད། སྤྱི་འཐུས་ཀྱི་དྲི་བ་དང་བཀའ་ཤག་གི་ལན་འདེབས་དང་འབྲེལ་བའི་བྱེད་སྒོ་གང་འཚམ་ཞིག་བརྙན་འཕྲིན་བརྒྱུད་འཛམ་གླིང་གང་སར་ཁ་འཐོར་བའི་རང་གཞུང་གི་འབངས་མི་དང་། བོད་དོན་རྒྱབ་སྐྱོར་གྱི་རོགས་ཚོགས་ཁག་གིས་གསན་གཟིགས་གནང་ན་ཚོར་སྣང་ཅི་ཞིག་འབྱུང་ངམ། དགྲ་བོ་དམར་གཞུང་གིས་ད་ནས་བརྩིས་པའི་མི་ལོ་ཉི་ཤུའིི་རྗེས་ན་བཙན་བྱོལ་སྒྲིག་འཛུགས་ལ་རྩིས་ཅི་འདྲ་ཞིག་བརྒྱག་གི་ཡོད་དམ། ད་དུང་གྲོས་ཚོགས་ནང་འཛིན་སྐྱོང་བཀའ་ཤག་ནས་སྤྱི་འཐུས་སྒེར་བ་གང་མང་ཞིག་གིས་ར་མ་ལུག་གི་སྐད་ཡིག་ཕངས་གསུམ་པ་ཞིག་བེད་སྤྱོད་གཏོང་བཞིན་པ་འདིས་གཞིས་བྱེས་གཉིས་ཀྱི་རང་ལུས་མེ་རུ་བསྒྲོན་མཁན་གཅེས་དཔའ་བོ་དཔའ་མོ་རྣམས་ཀྱི་ཞལ་ཆེམས་རྩིས་མེད་རྡོག་རོལ་བཏང་བར་ངོས་འཛིན་དང་། རྒྱའི་མུ་ནག་གི་བཙོན་དུ་བཞུགས་མཁན་རྣམས་ཀྱི་སྙིང་སྟོབས་ལ་གདེང་འཇོག་གནང་གི་མེད་པའི་ཚོར་སྣང་བྱུང་།
ང་ཚོ་མི་དཀྱུས་མ་མི་ཉུང་བ་ཞིག་གིས་དང་བླངས་ཐོག་རེས་གཟའ་སྤེན་པ་འཆར་ཅན་འདི་ཁུལ་འཚར་ལོངས་བྱུང་དང་འབྱུང་བཞིན་པའི་བོད་ཕྲུག་རྣམས་ཀྱི་ཆེད་སློབ་གྲྭ་གསར་འཛུགས་གནང་སྟེ་མི་རིགས་ཀྱི་སྐད་ཡིག་དང་ཆོས་རིག་གི་ངོ་རྟགས་གཅེས་འཛིན་གནང་སྟེ་རང་ཉིད་ནས་མགོ་བརྩམས་ཏེ་ཕ་སྐད་གཙང་མ་བཤད་པའི་ལས་འགུལ་ནུབ་ཕྱོགས་སྤྱི་ཚོགས་ནང་སྤེལ་དང་སྤེལ་མུས་ལགས་ན། རང་གཞུང་ལས་ཀྱི་སྣེ་མོ་བ་རྣམ་པས་རང་སྐད་གཙང་མ་བསྐྱོན་རྒྱུ་ནི་ལྡོག་ཏུ་མེད་པའི་ལས་ཀྱིས་གནང་བའི་སྐལ་བ་ཞིག་རེད་འདོད།
ཡག་པོ་གསུངས་འདུག སེར་མོ་བ་དེ་འདྲ་ཡོད་ན་སེམས་པ་སྐྱོ།
རེད་རེད། ང་ཚོས་གྲོས་བ་རེ་རེའི་དོན་མེད་དགོས་མེད་ཙམ་དུ་མ་ཟད། མི་དགོས་མི་འོས་པའི་བརྗོད་པ་དང་ཉམས་འགྱུར་དག་ལ་རེ་རེ་བཞིན་དབྱེ་ཞིབ་ཅིག་གནང་རན་རེད་འདུག མི་མང་བོས་དཔེ་ལན་ས་ཞུས་དང་ཞུ་བཞིན་ཡོད་ཙང ་།
བདེན་བདེན་འདྲ་གསུངས་འདུག་མོད། ད་དུང་བློ་ཁོག་གིས་མ་འདང་བ་ཡིན་ནམ། མང་བོ་ཞིག་བསྐུངས་འདུག
ཡག་པོ་བྲིས་འདུག