རེས་གཟའ་མིག་དམར་ཉིན་ཐའེ་ཝན་གྱི་སློབ་ཆེན་སློབ་མ་དང་མི་མང་བརྒྱ་ཕྲག་གིས་ཁྲིམས་བཟོ་ལྷན་ཁང་གི་ཚོགས་རའི་ནང་ངོ་རྒོལ་བྱེད་མགོ་བརྩམས་ཡོད་འདུག
ཟླ་འདིའི་ཕྱི་ཚེས་ ༡༨ ཉིན་གྱི་སྔ་དྲོར་ཐའེ་ཝན་གྱི་སློབ་ཆེན་སློབ་མ་དང་མི་མང་སྟོང་ཕྲག་མང་པོས། ཐའེ་ཝན་ཁྲིམས་བཟོ་ལྷན་ཁང་གིས་ཁྲིམས་མེད་ལུགས་མེད་ཀྱིས་རྒྱ་ནག་དང་ཚོང་ལས་མཉམ་འབྲེལ་གྱི་གྲོས་ཆོད་བཞག་པར་ངོ་རྒོལ་བྱས་ཏེ། ཁྲིམས་བཟོ་ལྷན་ཁང་གི་ཉེ་འཁྲེས་སུ་འཕྲེད་དར་སྣ་ཚོགས་བཟུང་སྟེ་ཁྲོམ་སྐོར་བྱས་ཡོད་པ་མ་ཟད། ཉིན་དེའི་དགོང་མོའི་ཆུ་ཚོད་ ༩ ཡས་མས་སུ། ཉེན་རྟོག་པས་བཀག་འགོག་བྱེད་མ་ཐུབ་པར་ངོ་རྒོལ་བ་ ༣༠༠ ཙམ་ཁྲིམས་བཟོ་ལྷན་ཁང་གི་ཚོགས་རའི་ནང་ཤོར་ཏེ་སྒོ་དང་སྒེའུ་ཁུང་སོགས་བཅག་བཅོམ་བཏང་ཡོད་པ་མ་ཟད། མི་ཁ་ཤས་ལ་རྨས་སྐྱོན་ཕོག་ཡོད་འདུག ངོ་རྒོལ་བ་ཚོས་གྲོས་ཚོགས་ར་བའི་ནང་ཆུ་ཚོད་ ༧༧ རིང་གཏམ་བཤད་དང་ངོ་རྒོལ་སྐད་འབོད་བྱས་ཡོད་སྟབས། ད་ལྟའི་ཆར་ངོ་རྒོལ་བ་དང་ཉེན་རྟོག་པ། གསར་འགོད་པ་བཅས་ཚང་མ་ཐང་ཆད་དེ་ཁུ་སིམ་མེར་མུ་མཐུད་དུ་གྲོས་ཚོགས་ནང་ངོ་རྒོལ་བྱས་ནས་བསྡད་ཡོད་འདུག
ངོ་རྒོལ་ལས་འགུལ་བྱུང་རྗེས། ཐའེ་ཝན་གཞུང་ཕྱོགས་ནས་དམིགས་བསལ་གྱིས་ཉེན་རྟོག་པ་དང་དམག་དཔུང་བཏང་ནས་དྲག་གནོན་བྱས་མེད་ཀྱང་། ཉིན་དེའི་དགོང་མོའི་ཆུ་ཚོད་ ༡༡།༣༠ ཙམ་ལ་གསར་འགོད་ལྷན་ཚོགས་ཤིག་སྐོང་ཚོགས་བྱས་ཏེ། ཐའེ་ཝན་ཁྲིམས་བཟོ་ལྷན་ཁང་གི་ཁྲིམས་དཔོན་ཝང་ཅི་ཕིན་གྱིས། ངོ་རྒོལ་བ་ཚོ་རང་འགུལ་གྱིས་ཕྱིར་འཐེན་མ་བྱས་ཚེ། དམག་ཤུགས་ལ་བརྟེན་ནས་བཙན་གྱིས་མཐར་སྐྲོད་རྒྱུ་ཡིན་ལུགས་ཁྱབ་བསྒྲགས་བྱས་ཡོད་ཀྱང་། ད་ལྟའི་ཆར་ཉེན་རྟོག་པས་དྲག་གནོན་བྱས་པའི་གནས་ཚུལ་ཐོན་མི་འདུག
ད་ལྟའི་བར་སྲིད་འཛིན་མ་ཡེན་ཅིག་གིས་གནད་དོན་དེའི་ཐད་སྐད་ཆ་གང་ཡང་བཤད་མེད་ཀྱང་། ཕྱི་ཚེས་ ༡༨ ཉིན་སྲིད་འཛིན་མགྲིན་ཚབ་པ་ལི་ཅཱ་ཧྥིས་ཁྲིམས་བཟོ་ལྷན་ཁང་ནི་ཐའེ་ཝན་གོ་མིན་ཏང་སྲིད་གཞུང་གི་རྒྱལ་ཚོགས་ཡིན་ལ། དམངས་གཙོའི་ལྷན་ཁང་ཡང་ཡིན་སྟབས། འཛམ་གླིང་རྒྱལ་ཁབ་ཁག་གིས་བསམ་ཤེས་དང་། ཞི་བའི་ཐབས་ལམ་ལ་བརྟེན་ནས་བསམ་ཚུལ་འདོན་པའི་རེ་བ་ཡོད་སྐོར་དང་། མ་ཡེན་ཅིག་སྲིད་གཞུང་གིས་རྒྱལ་ཚོགས་ཀྱི་རང་སྐྱོང་ལ་བརྩི་བཀུར་དང་། ཁྲིམས་བཟོ་ལྷན་ཁང་གིས་གནད་དོན་དེར་ཐག་གཅོད་འོས་འཚམ་བྱེད་པར་ཡིད་ཆེས་ཡོད་སྐོར་བརྗོད་འདུག་པ་དང་། དེ་བཞིན། ཁྲིམས་བཟོ་ལྷན་ཁང་གི་གོ་མིན་ཏང་གི་ཚོགས་མི་ཚོས། ཁོ་ཚོའི་བྱེད་སྟངས་དེ་ཁྲིམས་དང་མཐུན་གྱི་ཡོད་པ་མ་ཟད། ཐའེ་ཝན་མི་མང་གི་རྩ་བའི་ཁེ་ཕན་དང་མཐུན་ཞིང་། ཐའེ་ཝན་གྱི་དཔལ་འབྱོར་འཕེལ་རྒྱས་ལའང་ཕན་པ་ཆེན་པོ་ཡོད་སྐོར་བརྗོད་འདུག
ཚོང་ལས་མཉམ་འབྲེལ་གྱི་གྲོས་ཆོད་དེ་རྒྱ་ནག་དང་ཐའེ་ཝན་བར་གྱི་ཚོང་འབྲེལ་གྲོས་ཆོད་གཞི་རྒྱ་ཆེ་ཤོས་ཤིག་ཡིན་པ་དང་། གྲོས་ཆོད་དེར་འདས་ལོའི་ཕྱི་ཟླ་ ༦ པའི་ནང་རྒྱ་ནག་ཧྲང་ཧེ་གྲོང་ཁྱེར་ནས་གྲོས་མཐུན་མིང་རྟགས་བཀོད་ཡོད་ཀྱང་། ཐའེ་ཝན་དམངས་གཙོ་ཡར་སྐུལ་ཚོགས་པ་དང་མི་མང་ཚོགས་པ་ཁག་གིས། གྲོས་ཆོད་དེར་གྲོས་ཚོགས་ཀྱིས་དཔྱད་ཞིབ་ནན་པོ་བྱས་ཏེ་ཐག་གཅོད་བྱེད་དགོས་པའི་རེ་བ་འདོན་གྱི་ཡོད་པ་རེད། ཡིན་ནའང་། ཟླ་འདིའི་ཕྱི་ཚེས་ ༡༧ ཉིན་ཐའེ་ཝན་ཁྲིམས་བཟོ་ལྷན་ཁང་གི་ཚོགས་གཙོ་ཀྲང་ཆིན་ཙོང་གིས། གྲོས་ཚོགས་ནང་གནད་དོན་དེའི་ཐོག་གྲོས་འཆམ་བྱུང་མིན་ལ་མ་ལྟོས་པར་ཐད་ཀར་གྲོས་ཆོད་གཏན་འབེབས་བྱུང་བ་ཁྱབ་བསྒྲགས་བྱས་པར་བརྟེན། ཐའེ་ཝན་གོ་མིན་ཏང་སྲིད་གཞུང་གི་ལོ་རྒྱུས་ནང་ངོ་རྒོལ་གྱི་ཟིན་ཐོ་གསར་པ་ཞིག་བསྐྲུན་ཡོད་འདུག
གསར་འགོད་པ། པདྨ་མཚོ།
