ཨ་རིའི་གཞུང་ཚབ་དགོངས་ཞུ།

ཁ་སང་རྒྱ་གར་ཨ་རིའི་གཞུང་ཚབ་ཆེན་མོ་ལྕམ་ཎན་སི་པཱ་ཝལ་ལགས་གཞུང་ཚབ་ནས་དགོངས་པ་ཞུས་ཡོད་འདུག

ཁ་སང་ཕྱི་ཚེས་ ༣༡ ཉིན་ཨ་རིའི་ཕྱི་སྲིད་ལྷན་ཁང་གིས་གསར་འགོད་གསལ་བསྒྲགས་ཤིག་གི་ཐོག རྒྱ་གར་རྒྱལ་ས་ལྡི་ལིར་ཡོད་པའི་ཨ་རིའི་གཞུང་ཚབ་ཆེན་མོ་ལྕམ་ཎན་སི་པཱ་ཝལ་ (Nancy J. Powell) ལགས་གཞུང་ཚབ་ནས་དགོངས་པ་ཞུས་ཏེ་ཕྱིར་ཨ་རིར་ལོག་རྒྱུ་ཡིན་སྐོར་བསྒྲགས་འདུག

འདིའི་ཐད་གསར་འགྱུར་བརྒྱུད་ལམ་ཁག་ཏུ། ༢༠༡༣ ལོའི་ཟླ་ ༡༢ ཚེས་ ༡༢ ཉིན་ཨ་རིའི་ནེའུ་ཡོག་གྲོང་ཁྱེར་ཉེན་རྟོག་པས་ནེའུ་ཡོག་ཏུ་ཡོད་པའི་རྒྱ་གར་གཞུང་ཚབ་ཡན་ལག་ཁང་གི་སྐུ་ཚབ་གཞོན་པ་ལྕམ་ལྡེ་བེ་ཡྰ་ནེ་ (Devyani Khobragade) ལགས་ཀྱིས། ཨ་རིའི་ཐོངས་མཆན་དང་ཡིག་ཆ་རྫུན་བཟོ་བྱས་པའི་ཉེས་དོན་འོག་འཛིན་བཟུང་འདྲི་གཅོད་བྱས་པ་དང་། ༢༠༡༣ ལོའི་ཟླ་ ༡༢ ཚེས་ ༡༧ ཉིན་རྒྱ་གར་གཞུང་གིས་རྒྱ་གར་ཨ་རིའི་གཞུང་ཚབ་ཁང་གི་སྟངས་འཛིན་འོག་ཡོད་པའི་ཤེས་ཡོན་བསྟི་གནས་ཁག་ལ་དམ་དྲག་བྱ་རྒྱུའི་བཀའ་རྒྱ་བཏང་བ། ལྡི་ལིར་ཡོད་པའི་ཨ་རིའི་གཞུང་ཚབ་ཁང་གི་སྲུང་སྐྱོབ་ར་བ་དང་། རྒྱ་གར་གཞུང་གིས་སྤྲད་པའི་ཨ་རིའི་གཞུང་ཚབ་ཀྱི་ལས་བྱེད་ཚོའི་ཐོབ་ཐང་ཁག་ཕྱིར་བསྡུ། དེ་བཞིན། ཇོར་ཇི་བྷུ་ཤི་ ( George W. Bush) སྲིད་གཞུང་གིས་གྲོས་ཆོད་བཞག་པའི་རྡུལ་ཕྲན་གློག་ཤུགས་མ་ལག་བཀོལ་གཏོང་ ( Civil Nuclear Power Plant) གི་སྲིད་ཇུས་ཁག་ལག་བསྟར་མ་བྱས་པ་དང་། རྒྱལ་ཁབ་གཉིས་ཀྱི་འབྲེལ་ལམ་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་སོགས་ཀྱི་དབང་གིས་གཞུང་ཚབ་ནས་དགོངས་པ་ཞུས་པ་ཞིག་ཡིན་སྐོར་བརྗོད་འདུག

ཨ་རིའི་གཞུང་གི་མགྲིན་ཚབ་པ་གཞོན་པ་ལྕམ་ཧེད་ཧྥ་ ( Marie Harf ) ལགས་ཀྱིས། “གསར་འགྱུར་བརྒྱུད་ལམ་ཁག་གིས་ཉེ་ལམ་རྒྱ་གར་དང་ཨ་རིའི་འབྲེལ་ལམ་སྡུག་ཏུ་འགྲོ་བཞིན་ཡོད་སྟབས། ཨ་རིའི་གཞུང་ཚབ་ཆེན་མོ་ལྕམ་ཎན་སི་པཱ་ཝལ་ལགས་གཞུང་ཚབ་ནས་རྩ་དགོངས་ཞུས་པ་ཞིག་ཡིན་ཚུལ་བརྗོད་པ་དེ་གོ་མེད་ཚོར་མེད་ཀྱིས་དཀྲོག་གཏམ་ཞིག་རེད།”ཅེས་སྐྱོན་བརྗོད་བྱས་འདུག

གནད་དོན་དབྱེ་ཞིབ་པ་ཚོས། རྒྱ་གར་གཞུང་གིས་ཨ་རིའི་གཞུང་ཚབ་ཁང་གི་སྲུང་སྐྱོབ་ར་བ་ཕྱིར་བསྡུ་བྱས་པ་ཙམ་མ་ཟད། ཨ་རི་དང་རྒྱ་གར་བར་བཞག་པའི་གྲོས་ཆོད་མང་པོ་ཞིག་དུས་ལྟར་ལག་བསྟར་དོན་འཁྱོལ་མ་བྱས་སྟབས། ཨ་རིའི་གཞུང་ཚབ་དགོངས་པ་ཞུས་པ་ཞིག་ཡིན་སྐོར་བརྗོད་འདུག

ལྕམ་ཎན་སི་པཱ་ཝལ་ (Nancy J. Powell) ལགས་ནི། ཕྱི་ལོ་ ༡༩༤༧ ལོར་ཨ་རིའི་སེ་ཌར་ཧྥོལ་ (Cedar Falls) གྲོང་ཁྱེར་དུ་སྐྱེས་ཤིང་། གཞི་རིམ་དང་འབྲིང་རིམ་སློབ་གྲྭ་ཐོན་རྗེས་ཨ་རིའི་ནུབ་ཕྱོཊ་ཀྱི་ལོ་ཝ་གཙུག་ལག་སློབ་ཆེན་ (University of Northern Iowa) དུ་སློབ་སྦྱོང་གནང་ཡོད། ཕྱིས་སུ་ཨ་རིའི་ཕྱི་བསྐྱོད་གཞུང་ཞབས་ཁོངས་སུ་འཛུལ་ཞུགས་གནང་ཡོད་པ་དང་། ༡༩༩༠ ལོ་ནས་ ༡༩༩༢ ལོའི་བར་ཊོ་གྷོའི་ (Togo) དང་། དེ་རྗེས་བྷང་ལ་དྷེ་ཤེ། བལ་ཡུལ། པ་ཀི་སི་ཐན། ཁེ་ན་ཌ། ཡུ་གྷན་ཌ། གྷ་ན་སོགས་ཀྱི་ནང་ཨ་རིའི་གཞུང་ཚབ་ཀྱི་ལས་འགན་བཞེས་ཡོད་པ་དང་། ༢༠༠༩ ལོ་ནས་ ༢༠༡༢ ལོའི་ཟླ་ ༢ ཚེས་ ༣ བར་ཨ་རིའི་ཕྱི་བསྐྱོད་གཞུང་ཞབས་འདེམས་ལྷན་གྱི་འགན་འཛིན་གནང་ཡོད། ༢༠༡༢ ཟླ་ ༦ ཚེས་ ༥ ནས་ ༢༠༡༤ ཟླ་ ༣ ཚེས་ ༣༡ བར་རྒྱ་གར་ཨ་རིའི་གཞུང་ཚབ་གནང་བ་བཅས་ཁྱོན་ལོ་ ༣༧ རིང་ཕྱག་ལས་གནང་ཡོད་འདུག

གསར་འགོད་པ། དོན་གྲུབ།