ཚེ་རིང་རྡོ་རྗེས།
དེང་གི་ཆར་གཞིས་བྱེས་གཉིས་ན་བོད་སྐད་ཡིག་འཛིན་སྐྱོང་སྤེལ་གསུམ་སྐོར་གྱི་གླེང་སློང་མང་བ་དང་། དོན་གཉེར་ཅན་མང་པོས་ཁ་བཤད་དང་ལག་ལེན་གཉིས་ཐད་ནས་ཕ་སྐད་རྒྱུད་འཛིན་གྱི་བྱ་འགུལ་འདྲ་མིན་སྤེལ་དང་སྤེལ་མུས་སུ་མཆིས། འདི་ནི་དགའ་བར་འོས་པའི་དོན་བཟང་ཞིག་ཏུ་སྣང་ཡང་། ཡིད་ཕངས་པ་ཞིག་ལ། ཕ་སྐད་རྒྱུད་འཛིན་གྱི་དགོས་པ་ངོས་འཛིན་སྟངས་ལ་ཞན་ཆའམ་མི་མངོན་པའི་ཉེན་ཁ་ཞིག་འདུག བོད་མི་མང་པོས་བོད་སྐད་ཡིག་ནི་རང་གི་འཚོ་གནས་ལ་དེ་ཙམ་ཕན་ཐོགས་མེད་པ་དང་། དེ་རྒྱུན་འཛིན་བྱེད་པ་ནི་བོད་མི་རིགས་ཀྱི་སྤྱི་བྱུས་འབའ་ཞིག་ཡིན་པར་སྙམ་པ་དང་། ཕ་སྐད་རྒྱུད་འཛིན་གྱི་གདོང་ལེན་པ་དག་གིས་ཀྱང་བོད་ཡིག་སློབ་པའི་དགོས་དོན་ནི་རིགས་ཞེན་ལ་གཞི་བཅོལ་བ་ལས་གང་ཟག་སྒེར་གྱི་ཁེ་ཕན་དང་འབྲེལ་ནས་གླེང་མཁན་ཉུང་། ངས་བསམ་ན་བོད་ཡིག་སློབ་པའི་དགོས་དོན་ནི་བོད་མི་སྒེར་བ་ལ་དངོས་སུ་ཕན་ཐོགས་མིན་གྱི་ཆ་ནས་ལྟ་དགོས་སྙམ།
ང་ཚོས་སྐད་ཡིག་ནི་མི་རིགས་ཀྱི་བླ་སྲོག་ཡིན་ཟེར་བའི་ཚེ། སྐད་ཡིག་གི་མི་སྒེར་བར་ཕན་པའི་ཆ་ལ་གོ་རྟོགས་ཡང་དག་ཅིག་མེད་པར་མི་རིགས་ཀྱི་ལ་རྒྱའམ་རིགས་ཞེན་གྱི་ཆ་དེ་དམིགས་སུ་བཟུང་སྟེ། བོད་སྐད་ཡིག་སློབ་པ་ནི་མི་རིགས་ཀྱི་ངོ་བོ་ཡུན་གནས་ཙམ་གྱི་ཆེད་དུ་ཡིན་པར་ངོས་འཛིན་སྲོལ་འདུག འདི་ནི་བོད་སྐད་ཡིག་རྒྱུད་འཛིན་གྱི་ཞན་ཆ་ཞིག་ཡིན་པ་མ་ཟད། ཉེན་ཁ་ཞིག་ཏུའང་མཐོང་། ཅི་ཕྱིར་ཞེ་ན། འགྲོ་བ་མིའི་རིགས་གཞན་དང་ཁྱད་མེད་པར་ང་ཚོ་བོད་མི་ཕལ་ཆེ་བས་ཀྱང་ཚེ་འདིའི་ལྟོ་གོས་གཏམ་གསུམ་གཙོ་བོར་དོན་དུ་གཉེར་བ་དང་། རང་ལ་དངོས་སུ་ཕན་པར་ངེས་པའི་དོན་ཞིག་ཡིན་ན་སྤྲོ་བ་དང་བརྩོན་པས་ལྷུར་ལེན་པ་ཡིན། བོད་སྐད་ཡིག་སློབ་པའང་རང་ལ་ཕན་པའི་ངེས་ཤེས་འདྲོངས་ན། སློབ་གཉེར་གྱི་འདུན་པ་ཆེ་བ་དང་རང་འགུལ་གྱིས་གཙིགས་སུ་འཛིན་སྲིད། འོན་ཀྱང་། བོད་སྐད་ཡིག་སློབ་པའི་དགོས་དོན་ནི་བོད་མི་རིགས་ཀྱི་ངོ་བོ་ཡུན་གནས་ཀྱི་དགོས་མཁོ་འབའ་ཞིག་ཡིན་པར་འཁྲུལ་བས། བོད་སྐད་ཡིག་གི་དངོས་ཕན་རིན་ཐང་དང་གང་ཟག་སྒེར་གྱི་མི་ཚེའི་དཀའ་ངལ་སེལ་བར་ཕན་པའི་ཕྱོགས་དེ་ངོས་མ་ཟིན་པས། བོད་སྐད་ཡིག་རྒྱུད་འཛིན་གྱི་བྱ་གཞག་དོན་དུ་གཉེར་མཁན་ཚོས་རིགས་ཞེན་གྱི་ངོས་ནས་བོད་ཡིག་སློབ་པར་སྐུལ་མ་ཇི་ཙམ་བཏང་ཡང་། བོད་མི་མང་པོས་བོད་ཡིག་སློབ་པ་ནི་སྒེར་གྱི་འཚོ་གནས་ལ་འབྲེལ་བ་ཆེར་མེད་པ་དང་བོད་མི་རིགས་ཀྱི་སྤྱི་བྱུས་འབའ་ཞིག་ཡིན་པར་སྙམ་ནས་དོ་སྣང་དེ་ཙམ་མི་བྱེད། དེར་བརྟེན་ང་ཚོས་ངེས་པར་དུ་དངོས་ཕན་དང་སྒེར་དོན་གྱི་ངོས་ནས་བོད་ཡིག་གི་རིན་ཐང་དང་བོད་ཡིག་སློབ་པའི་དོན་སྙིང་རྟོགས་དགོས།
ཕྱི་དངོས་པོའི་འཚོ་བ་འཕེལ་རྒྱས་ཧ་ཅང་ཆེ་བའི་དུས་རབས་འདིར་ནང་བསམ་པའི་འཚོ་བར་ཕན་པའི་རིག་གནས་ཀྱང་མེད་དུ་མི་རུང་། འཛམ་གླིང་གི་ཡུལ་གྲུ་སོ་སོར་སེམས་ཀྱི་སྡུག་བསྔལ་སེལ་ནུས་པའི་རིག་གནས་རེ་ཡོད་པ་དང་། སྔོན་ཆད་དང་ད་ལྟ་གང་ཡིན་ཡང་བསམ་པའི་འཚོ་བ་ལ་ཕན་ཐོགས་ངེས་ཅན་རེ་བྱུང་དང་འབྱུང་བར་གདའ། རང་རེའི་མེས་པོ་ཚོས་བློ་གྲོས་དང་ཉམས་མྱོང་ལས་བཞེངས་པའི་བོད་ཀྱི་རིག་གནས་བང་མཛོད་ནང་དུ་མིའི་སེམས་ཀྱི་སྡུལ་བསྔལ་སེལ་བར་ཕན་པའི་ཤེས་བྱ་གང་མང་མཆིས་པ་དང་། ལྷག་པར་དུ་བོད་མིའི་འཚོ་གནས་ཀྱི་ཁོར་ཡུག་ཐུན་མོང་མ་ཡིན་པ་དང་རྟེན་ཅིང་འབྲེལ་བའི་བསམ་པའི་རིག་གནས་དེ་ནི་སྒང་བ་བོད་མིའི་གཅེས་ནོར་དུ་གྲུབ། བོད་སྐད་ཡིག་ནི་རིག་གནས་དེའི་རྟེན་ལྟ་བུ་ཡིན་པ་དང་། དེ་ཤེས་ན་སའི་གོ་ལའི་གླིང་སྣེ་གསུམ་པར་གྲགས་པའི་ས་སྒང་འདིར་འཚོ་བའི་དུས་སུ། ནང་སེམས་ཀྱི་བདེ་སྐྱིད་རྙེད་པར་ཕན་ནུས་ཆེ་བ་དང་བསམ་པའི་ལོངས་སྤྱོད་ཕུན་སུམ་ཚོགས་པར་འགྱུར་བ་ཡིན། ཕྱོགས་གཞན་ནས་བཤད་ན། བོད་ནི་གཞན་དབང་དང་བཙན་གནོན་གྱི་འོག་ན་ཡོད་པ་དང་། ཆབ་སྲིད་དང་དཔལ་འབྱོར་དང་བསམ་བློ་སོགས་ཀྱི་རང་དབང་ལ་བཀག་རྒྱ་ཤིན་ཏུ་ཆེ་བས། བོད་སྐད་ཡིག་གིས་ནང་བསམ་པ་ཙམ་དུ་མ་ཟད། ཕྱི་དངོས་པོའི་འཚོ་བ་ལའང་ཕན་ཐོགས་ལྡན། དཔེ་མཚོན་ཕྲན་བུ་ཞིག་དྲངས་ན། བོད་སྐད་ཡིག་ནི་ནང་ཁུལ་མཐུན་སྒྲིལ་དང་འབྲེལ་འདྲིས་ཀྱི་ལག་ཆ་དཔེ་མེད་ཅིག་ཡིན། རང་ས་རང་ཡུལ་དུ་བོད་སྐད་ཡིག་བཀོལ་ནས་ཚོང་ལས་ཞིག་གཉེར་ནའང་། རྒྱ་ནག་སྐད་ཡིག་གི་བཙན་འཛུལ་ལ་བརྟེན་པ་ཚོས་བོད་དུ་ཚོང་ལས་ཀྱི་ཁེ་ཕན་ཧམ་ཟ་བྱེད་པའི་གནད་དོན་གང་འཚམ་སེལ་ནུས།
ཁོ་བོ་སྒེར་གྱི་ཉམས་མྱོང་གི་ཆ་ནས་བཤད་ན། རྒྱ་ནག་གི་སྐད་ཡིག་དང་དབྱིན་སྐད་འོས་འཚམ་ཞིག་ཤེས་པ་དང་། སྐད་རིགས་དེ་དག་ལ་བརྟེན་པའི་ཕྱི་དངོས་པོའི་འཚོ་བར་ཕན་པའི་ཤེས་བྱ་སྣ་ཚོགས་ཚུར་ལེན་བྱ་ནུས། འོན་ཀྱང་། རང་གི་འཚོ་གནས་ཀྱི་ཁོར་ཡུག་དང་སེམས་ཁམས་ལ་འཚམ་པའི་ཐུན་མིན་རིག་གནས་ནི་བོད་སྐད་ཡིག་གི་ངོས་ན་ཡོད་པ་རྟོགས་སོང་། དེའི་དོན་ནི་སྐད་ཡིག་གཞན་ན་རང་གི་བསམ་བློའི་འཚོ་བར་ཕན་པའི་རིག་གནས་ཅི་ཡང་མི་འདུག་ཟེར་བ་མིན། འཛམ་བུ་གླིང་ལ་ཐུན་མོང་དུ་གྱུར་བའི་རིག་གནས་ཀྱང་ཡོད་པ་སྨྲོས་མ་དགོས། ང་ལ་མཚོན་ན། ༧རྒྱལ་བ་རིན་པོ་ཆེ་མཆོག་ཇི་ལྟ་བུ་ཞིག་ཡིན་པ་རང་བློས་གང་ནུས་ཤིག་རྟོགས་པའི་མཐུན་རྐྱེན་མེད་དུ་མི་རུང་བ་ནི་བོད་སྐད་ཡིག་ཡིན། གལ་སྲིད་ངས་བོད་སྐད་མ་གོ་བ་དང་བོད་ཡིག་གི་ཤེས་ཚད་འོས་འཚམ་ཞིག་མེད་ཚེ། ཁོང་གི་ཇི་ལྟ་བུ་ཡིན་པ་ནི་ཕྱོགས་རེ་བ་ཙམ་ལས་རྟོགས་མི་ནུས་པའམ། ཡང་ན་རྨོངས་དད་ཙམ་ལས་རྒྱུ་མཚན་ཤེས་པའི་དད་པ་ནི་རྙེད་མི་སྲིད། བོད་སྐད་ཡིག་ནི་༧རྒྱལ་དབང་མཆོག་དང་ཕྲན་ཆུང་བར་གྱི་ཟམ་པ་ཡིན་ཟེར་ཆོག ཁོང་གིས་བོད་སྐད་ཡིག་གི་སྟེང་ནས་གནངས་པའི་གསུང་ཆོས་དང་བཀའ་སློབ་དག་གིས་ངའི་སེམས་ལ་འོད་སྣང་དང་སྙིང་སྟོབས་སྩོལ་བ་དང་། དེའང་ང་རང་གིས་བོད་སྐད་ཡིག་ཤེས་པའི་མཐུན་རྐྱེན་ལ་རག་ལས་པ་དང་། ལྷག་པར་དུ་བོད་ཡིག་རན་པར་ཤེས་པའི་རྐྱེན་གྱིས་ཡིན།
གལ་སྲིད་དོན་དངོས་ཀྱི་སྟེང་ནས་བོད་སྐད་ཡིག་ནི་བོད་མིའི་ནང་སེམས་དང་ཕྱི་དངོས་པོའི་འཚོ་བ་གང་ལའང་ཕན་ཐོགས་མེད་ཚེ། ང་ཚོས་རིགས་ཞེན་ཙམ་གྱི་དབང་དུ་བྱས་ནས་སྐད་ཡིག་བེད་མེད་ཅིག་རྒྱུད་འཛིན་བྱ་དགོས་དོན་ཅི་ཡང་མ་མཆིས། བོད་མི་བརྒྱ་ཆའི་དྲུག་བཅུ་ལས་བརྒལ་བ་ཞིག་གིས་བོད་སྐད་ཡིག་ནི་རང་གི་འཚོ་བ་ལ་ཕན་ཐོགས་མེད་པར་ལྟ་བའི་སྣང་ཚུལ་བྱུང་ན། དེའི་དུས་སུ་བོད་སྐད་ཡིག་ནི་ཤི་ཟིན་པ་ཡིན། དེ་ལྟ་བས་ན། དངོས་ཡོད་འཚོ་བའི་ཉམས་མྱོང་ལ་གཞི་བཅོལ་ནས་བོད་སྐད་ཡིག་རྒྱུད་འཛིན་གྱི་དགོས་དོན་ནི་སྒེར་ཕན་དང་རིགས་ཞེན་གཉིས་ལས་གང་གི་སྟེང་ན་ཡོད་པ་ངེས་དགོས་པ་དང་། བོད་སྐད་ཡིག་ཤེས་ན་རང་ཉིད་ལ་ཕན་ཐོགས་གང་ཞིག་ཡོད་མེད་རྟོགས་དགོས་སོ།།
