རྒྱ་གར་རྒྱལ་ཡོངས་ཀྱི་འོས་བསྡུ་ཆེན་མོ་མཇུག་སྒྲིལ་རྗེས། རྒྱ་གར་ནང་གི་ཨ་རིའི་གཞུང་ཚབ་གསར་པ་བསྐོ་བཞག་གནང་རྒྱུ་ཡིན་འདུག
ཟླ་སྔོན་མའི་ཚེས་ ༣༡ ཉིན་རྒྱ་གར་ཨ་རིའི་གཞུང་ཚབ་ཆེན་མོ་ལྕམ་ཎན་སི་པཱ་ཝལ་ (Nancy J. Powell) ལགས་གཞུང་ཚབ་ནས་དགོངས་པ་ཞུས་ཡོད་པ་ལྟར། རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུ་ཆེན་མོ་གྲུབ་པ་དང་། སྲིད་གཞུང་གསར་པ་བརྗེ་བསྒྱུར་བྱེད་མཚམས་སུ་ཨ་རིའི་གཞུང་ཚབ་པ་གསར་བ་ཞིག་བསྐོ་བཞག་གནང་རྒྱུ་ཡིན་སྐོར་བསྒྲགས་འདུག
ཐེངས་འདིའི་རྒྱ་གར་ཨ་རིའི་གཞུང་ཚབ་ཀྱི་འོས་མིའི་ཁྲོད། ཨ་རིའི་རོགས་སྐྱོར་ཚན་པ་ (USAID) ཡི་འགན་འཛིན་སྐུ་ཞབས་ར་ཇིབ་ཤཱ་ (Rajiv Shah) ལགས་དང་། ཨ་རིའི་བདེ་སྲུང་ལྷན་ཁང་གི་དྲུང་འཕར་ཟུར་པ་སྐུ་ཞབས་ཨ་ཤི་ཌོན་ཁར་ཌར་ (Ashton Carter) ལགས། ཨ་རིའི་ཕྱི་སྲིད་ལྷན་ཁང་གི་དྲུང་འཕར་ཟུར་བ་རེ་ཆར་ཌི་ཝོར་མཱ་ (Richard Verma) ལགས། ཨེ་ཛེམ་ (Exim) དངུལ་ཁང་གི་འགན་འཛིན་ཧྥེར་ཌི་ (Fred Hochberg) ལགས་བཅས་ཡོད་འདུག་ལ། དེ་དག་ཁྲོད་རེ་བ་ཆེ་ཤོས་སྐུ་ཞབས་ཨ་ཤི་ཌོན་ཁར་ཌར་ལགས་ཆགས་ཡོད་སྐོར་བསྒྲགས་འདུག
སྐུ་ཞབས་ཨ་ཤི་ཌོན་ཁར་ཌར་ལགས་རེ་བ་ཆེ་ཤོས་ཆགས་དོན། ཁོང་ཨ་རི་དང་རྒྱ་གར་གྱི་བདེ་འཇགས་སྲུང་སྐྱོབ་ཐད་ཀྱི་འབྲེལ་ལམ་ཇེ་ཟབ་དུ་གཏོང་རྒྱུར་མེད་དུ་མི་རུང་བའི་མི་སྣ་ཞིག་ཆགས་ཡོད་པ་མ་ཟད། དེ་སྔོན་རྒྱ་གར་གྱི་རྒྱལ་སྲུང་སློབ་སྟོན་པ་སྐུ་ཞབས་ཤིབ་ཤན་ཁར་མེ་ནོན་ (Shivshankar Menon ) ལགས་དང་མཉམ་དུ་རྒྱ་གར་དང་ཨ་རི་ཐུན་མོང་གི་དམག་དོན་མཚོན་ཆ་དང་གོ་མཚོན་འཕེལ་རྒྱས་གཏོང་ཕྱོགས་ཐད་ཕྱག་ལས་གནང་མྱོང་མཁན་ཞིག་ཡིན་འདུག་ལ། ད་ཆར་རྒྱ་གར་དང་ཨ་རིའི་འབྲེལ་ལམ་ཇེ་སྡུག་ཏུ་འགྲོ་བཞིན་པའི་སྐབས་འདིར། ཕྱོཊ་གཉིས་ཀྱི་གོ་མཚོན་དང་དམག་སྤྱོད་འཕྲུལ་ཆས་སོཊ་ཀྱི་ཚོང་འབྲེལ་དང་། དཀའ་ངལ་རྒྱུས་ལོན། ཕན་ཚུན་གྱི་འབྲེལ་ལམ་བཅས་ནི་རྒྱལ་ཁབ་གཉིས་ཀྱི་འབྲེལ་ལམ་སླར་གསོ་ལ་མེད་དུ་མི་རུང་ཆགས་ཡོད་སྟབས། ཁོང་ནི་ཤེས་འཇོན་དང་ཉམས་མྱོང་བཅས་ཐོག་ནས་གཞུང་ཚབ་ཀྱི་འོས་མི་ཡག་ཤོས་ཆགས་ཡོད་འདུག
གནད་དོན་དབྱེ་ཞིབ་པ་ཚོས། སྐུ་ཞབས་ཨ་ཤི་ཌོན་ཁར་ཌར་ལགས་ཨ་རིའི་རྒྱལ་སྲུང་ཐད་ཀྱི་ཆེད་ལས་མི་སྣ་ཞིག་དང་། ཨ་རི་དང་རྒྱ་གར་གྱི་འབྲེལ་ལམ་ལ་འགན་འཁུར་ཐུབ་མཁན་ཞིག་ཡིན་པ་མ་ཟད། རྒྱ་གར་གྱི་རྒྱལ་སྲུང་སློབ་སྟོན་པ་སྐུ་ཞབས་ཤིབ་ཤན་ཁར་མེ་ནོན་ལགས་གཙོས་རྒྱ་གར་གྱི་གནད་ཡོད་མི་སྣ་དག་དང་འབྲེལ་བ་ཡག་པོ་ཡོད་མཁན་ཞིག་ཡིན་པ་དང་། ཁོང་གཞུང་ཚབ་ལ་བསྐོ་བཞག་གནང་བ་ཡིན་ན། ཨ་རི་དང་རྒྱ་གར་གྱི་འབྲེལ་ལམ་ལ་བཟང་ཕྱོགས་ཀྱི་འགྱུར་བ་ཞིག་ཐེབས་རྒྱུ་ཡིན་སྐོར་བརྗོད་འདུག
སྐུ་ཞབས་ཨ་ཤི་ཌོན་ཁར་ཌར་ (Ashton Carter) ལགས་ནི། ༡༩༥༤ ལོའི་ཟླ་ ༩ ཚེས་ ༡༤ ཉིན་ཧྥེ་ལཱ་ཌལ་ཧྥེ་ཡཱ (Philadelphia) རུ་སྐྱེས་ཤིང་། ཨེ་བྷན་ཌོན་ (Abington High School) སློབ་གྲྭ་ནས་མཐོ་འབྲིང་སློབ་སྦྱོང་གནང་ཡོད་འདུག ཕྱིས་སུ་ཡེ་ལི་ ( Yale) མཐོ་སློབ་ཏུ་འཛུལ་ཞུགས་ཀྱིས་དངོས་ཁམས་ཚན་རིག་སྐོར་ལ་རིག་གནས་རབ་འབྱམས་པ་གནང་ཡོད་པ་དང་། དེའི་རྗེས་ཨོ་ཁི་སི་ཧྥོར་ཌི་གཙུག་ལག་སློབ་ཆེན་ནང་དངོས་ཁམས་ཚན་རིག་གི་རྣམ་གཞག་ཐོག་འབུམ་རམས་པ་ཐོན་ཡོད་འདུག
༡༩༩༡ ལོ་ནས་ ༡༩༩༣ ལོའི་བར་ཨ་རིའི་རྒྱལ་སྲུང་བདེ་འཇགས་ཚན་རིག་ལྷན་ཚོགས་ཀྱི་ཚོགས་མི་དང་། ༡༩༩༣ ལོ་ནས་ ༡༩༩༦ ལོའི་བར་ཨ་རིའི་བདེ་སྲུང་ལྷན་ཁང་གི་རྒྱལ་སྲུང་སྲིད་ཇུས་སྐོར་གྱི་དྲུང་འཕར་གནང་ཡོད་འདུག ༡༩༩༧ ལོ་ནས་ ༢༠༠༡ ལོའི་བར་ཨ་རིའི་རྒྱལ་སྲུང་བདེ་འཇགས་སྲིད་ཇུས་ལྷན་ཚོགས་ཀྱི་ཚོགས་མི་དང་། ༢༠༠༡ ལོ་ནས་ ༢༠༠༢ ལོའི་བར་ཨ་རིའི་རྒྱལ་ཡོངས་ཚན་རིག་དང་འཕྲུལ་ལས་ཚན་རྩལ་ལྷན་ཚོགས་ཀྱི་ཚོགས་མི་གནང་ཡོད་འདུག
༢༠༠༦ ལོ་ནས་ ༢༠༠༨ ལོའི་བར་རྒྱལ་སྤྱིའི་སྲུང་སྐྱོབ་སློབ་སྟོན་ལྷན་ཚོགས་ཀྱི་ཚོགས་མི་དང་། ༢༠༡༡ ལོའི་ཟླ་ ༩ ཚེས་ ༢༣ ནས་ ༢༠༡༣ ལོའི་ཟླ་ ༡༢ ཚེས ༣ བར་ཨ་རིའི་བདེ་སྲུང་ལྷན་ཁང་གི་དྲུང་འཕར་གནང་ཡོད་པ་མ་ཟད། ད་བར་ཚན་རིག་དང་བདེ་སྲུང་། གཞུང་འཛིན་སྐྱོང་བྱེད་ཕྱོགས་སོགས་ཀྱི་སྐོར་ལ་ཕྱག་དེབ་ ༡༡ བརྩམས་གནང་ཡོད་འདུག
གསར་འགོད་པ། དོན་གྲུབ།
