ཉེ་ལམ་ཉི་ཧོང་དང་ཨོ་སི་ཊོ་ལི་ཡའི་སྐུ་ཚབ་དོན་གཅོད་གསར་བ་བསྐོ་གཞག་གནང་སྟེ། ཕྱི་ཟླ་ ༦ པའི་ཚེས་ ༡༦ དང་ ༢༥ བཅས་སུ་ལས་འཁུར་ཞུ་རྒྱུ་ཡིན་འདུག
བོད་མིའི་སྒྲིག་འཛུཊ་ཀྱི་དྲ་རྒྱའི་སྟེང་གནས་ཚུལ་སྤེལ་བ་ལྟར་ན། ཉེ་ལམ་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ཟུང་དྲུང་ལུང་རྟོགས་ལགས་ཉི་ཧོང་སྐུ་ཚབ་དོན་གཅོད་དུ་བསྐོ་བཞག་དང་། ཉི་ཧོང་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཨོ་སི་ཊོ་ལི་ཡའི་སྐུ་ཚབ་དོན་གཅོད་དུ་བསྐོ་གཞག་གནང་ཡོད་འདུག
ལུང་རྟོགས་ལགས་ཕྱི་ལོ་ ༢༠༠༦ ལོའི་ཡར་སྔོན་དུ་ཉི་ཧོང་སྐུ་ཚབ་དོན་གཅོད་ཆོད་གན་དུ་བསྐོ་གཞག་གནང་སྟེ་ལོ་ ༤ རིང་ཕྱག་ལས་གནང་ཡོད་པ་དང་། ༢༠༠༦ ལོར་དྲུང་གཞོན་གྱི་གནས་རིམ་ཐོག་ཉི་ཧོང་སྐུ་ཚབ་དོན་གཅོད་དུ་དམིགས་བསལ་བསྐོ་གཞག་གནང་ཡོད་འདུག ༢༠༡༣ ལོར་བདེ་སྲུང་ལས་ཁུངས་སུ་གནས་སྤོར་གནང་འདུག ཕྱི་ཟླ་ ༦ ཚེས་ ༡༦ ཉིན་ནས་བཟུང་ལུང་རྟོག་ལགས་ཀྱིས་དངོས་སུ་ཉི་ཧོང་སྐུ་ཚབ་དོན་གཅོད་ཀྱི་ལས་འཁུར་ཞུ་རྒྱུ་ཡིན་འདུག
ལྷག་པ་མཚོ་སྒོ་ལགས། ༡༩༨༢ ལོར་བདེ་སྐྱིད་གླིང་ས་གནས་མགོ་འཛིན་ལས་ཁུངས་ཀྱི་ལས་དྲུང་དུ་བསྐོ་གཞག་དང་། ༡༩༨༤ ལོ་ནས་ ༢༠༠༡ བར་ཉི་ཧོང་སྐུ་ཚབ་དོན་གཅོད་ལས་ཁུངས་སུ་གནས་སྤོར། ༢༠༠༡ ལོ་ནས་ ༢༠༠༧ བར་ལྡི་ལི་སྐུ་ཚབ་དོན་གཅོད་ལས་ཁུངས་སུ་གནས་སྤོར། ༢༠༠༧ ལོར་སླར་ཡང་ཉི་ཧོང་སྐུ་ཚབ་དོན་གཅོད་དུ་བསྐོ་གཞག་བཅས་གནང་ཡོད་འདུག ཕྱི་ཟླ་ ༦ ཚེས་ ༢༥ ཉིན་ནས་བཟུང་མཚོ་སྒོ་ལྷ་པ་ལགས་ཀྱིས་ཨོ་སི་ཊོ་ལི་ཡའི་སྐུ་ཚབ་དོན་གཅོད་ཀྱི་ལས་འཁུར་ཞུ་རྒྱུ་ཡིན་འདུག
ཕྱི་ཟླ་ ༧ ཚེས་ ༢ ཉིན་ནས་བཟུང་ཨོ་སི་ཊོ་ལི་ཡའི་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་བོད་མིའི་སྒྲིག་འཛུཊ་ཕྱི་དྲིལ་ལས་ཁུངས་སུ་གནས་སྦོར་གྱིས་དྲུང་ཆེའི་ལས་འཁུར་ཞུ་རྒྱུ་ཡིན་འདུག
གསར་འགོད་པ། དོན་གོ
