དྲ་རྒྱའི་ནང་དཔྱད་ཡིག་ལ་བལྟས་པའི་བསམ་ཚུལ།

མའི་སོར་ལུགས་བསམ་ཁོངས། ཨཱ་ཅརྱཱ་པདྨ་འོད་ཟེར།

༄༅།། ཉེ་སྔོན་བོད་ཀྱི་དུས་བབ་(༢༠༡༤།༠༤།༡༧)དྲ་རྒྱའི་ནང་ཀོ་ལི་སྒར་དོན་ལྡན་གླིང་ནས་རྒྱལ་གཅེས་ལྷག་བསམ་ཅན་གཞུང་པ་ཚེ་དབང་བསོད་ནམས་ཀྱིས་༼ཡུལ་མིའི་རྒྱལ་ཁབ་དང་ཡུལ་མིའི་སྲིད་སྐྱོང་ལ་དཔྱད་པའི་གཏམ།༽ཞེས་པའི་ཆེད་རྩོམ་འདི་མཇལ་སྐབས། ཁོང་ནས་མང་གཙོའི་འགན་དབང་ལོངས་སུ་སྤྱད་ནས་འདི་ལྟ་བུའི་སྔ་རྗེས་ལན་མང་དགོངས་ཚུལ་འབྲེལ་ཡོད་ལས་ཁུངས་དང་བརྒྱུད་ལམ་ཁག་ཏུ་གཏོང་གནང་བར་རྗེས་སུ་ཡི་རངས་དང་བཅས་གུས་པས་ཀྱང་གནད་དོན་ལ་ཕན་མིན་ཇི་ལྟར་ཡང་འདི་འབྲེལ་ཚིག་རེ་གཉིས་ཞུ་འདུན་བྱུང་།

མངའ་གསལ་བཞིན་དེང་མང་གཙོའི་རིང་ལུགས་འཛིན་པ་དང་ལྷག་པར་ཕྱག་བསྟར་གནང་མཁན་རྣམ་པས་བླ་ན་མེད་པའི་མཛད་འཕྲིན་གྱིས་གཞན་སེམས་འགུག་པའི་ཐབས་ཤེས་གཙོ་བོར་མ་ཡིན་པར། བཅའ་ཁྲིམས་དང་ཁྲིམས་ལུགས་ཁག་ནས་བསྐུར་བའི་འགན་དབང་ལ་ཐུགས་སྣང་ཆེན་པོ་གནང་གི་ཡོད་པའི་རེ་བ་ཡོད། གལ་སྲིད་དེང་གཞུང་དང་མང་ཚོགས་ཀྱིས་འགན་འཁུར་ལ་ལྷོད་གཡེང་ཕྲན་བུ་ཕྱིན་པ་ཡིན་ན། ཐུགས་མངའ་བཞིན་༸གོང་ས་སྐུ་ཕྲེང་བཅུ་བཞི་པ་ཆེན་པོས་ལོ་མང་རིང་འབད་བརྩོན་གནང་བའི་ཁྲིམས་ཀྱིས་དབང་བསྒྱུར་གྱི་ལམ་སྲོལ་འདི་ཉིད་ཉིན་ཞིག་ཐི་གུ་སྣེ་ཤོར་དུ་འབྱུང་མིན་ཇི་ལྟར་ཡང་བསམ་གཞིག་ཞུ་དགོས་པ་ཞིག་ཏུ་མཐོང་།

དེ་ཡང་དཔྱད་གཏམ་པས་བཙན་བྱོལ་བོད་མིའི་བཅའ་ཁྲིམས་དོན་ཚན་གསུམ་པའི་ནང་ཡུལ་མིའི་རྒྱལ་ཁབ་ཅེས་པ་དེ་ཡུལ་མིའི་སྲིད་སྐྱོང་དུ་ཁ་ཕྱོགས་ཚུལ་ལ་ཐུགས་དོགས་ཡོད་ཚུལ་གསུངས་པ་དོན་དང་ལྡན་ཞིང་། དེ་ཡང་བཅའ་ཁྲིམས་དོན་ཚན་གསུམ་པའི་ནང་”མ་འོངས་བོད་ཀྱི་ཆབ་སྲིད་ནི་འཚེ་མེད་ཞི་བའི་ལྟ་བར་གཞི་བཅོལ་བའི་ཐོག རང་དབང་དང་། སྤྱི་ཚོགས་བདེ་དོན། ཆོས་སྲིད་ཟུང་འབྲེལ། མང་གཙོ། ཡུལ་མིའི་རྒྱལ་ཁབ་ཞིག་བྱ་རྒྱུ་ཡིན་གཤིས།”ཞེས་པ་འདི་ཡུལ་མིའི་སྲིད་སྐྱོང་ཞིག་བྱ་རྒྱུ་ཡིན་གཤིས་ལ་བསྐྱར་བཅོས་གནང་བ་ནི་དཔལ་ལྡན་ཁྲིམས་བཟོ་ལྷན་ཚོགས་དབུས་གྲོས་ལ་དབང་བ་རྣམས་ཀྱིས། བཙན་བྱོལ་བོད་མིའི་བཅའ་ཁྲིམས་རིན་པོ་ཆེར་ཐུགས་སྣང་ཆེར་མ་ཞུས་པར་འགྱུར་བ་གནང་བ་ཞིག་ལ་ངོས་འཛིན་ཞུ་བཞིན་ཡོད་ཅིང་། འདི་ནི་གད་མོ་འཆོར་བའི་རྒྱུ་རང་མ་ཟད་མ་འོངས་པའི་གནད་དོན་ཡིན་པས་དེ་བས་བསྐྱར་བཅོས་ཞུ་དགོས་སུ་མ་མཐོང་།

ཡང་བཅའ་ཁྲིམས་ནང་བཀའ་བློན་ཁྲི་བ་ཞེས་པའི་ཚིག་དེ་སྲིད་སྐྱོང་དུ་འགྱུར་བ་གནང་བའི་ཐད་ ༢༠༡༡ ལོར་༸གོང་ས་ཆེན་པོས་ཆབ་སྲིད་ཀྱི་འགན་དབང་སྲིད་སྐྱོང་ལ་གནང་བའི་ཉིན།༸མགོན་པོ་གང་གི་བཀའ་སློབ་དང་སྐབས་དེའི་བཙན་བྱོལ་བོད་གཞུང་གི་བཀའ་ཁྲིའི་གསུང་བཤད་ནང་རྒྱུ་མཚན་དང་བཅས་སྲིད་སྐྱོང་ཞེས་གསལ་པོར་གསུང་ཡོད་ནའང་གོ་ཚོར་མེད་པར་ནར་ལུས་ཀྱིས་བསྐྱར་བསྐུལ་དང་གླེང་ཕྱོགས་མང་ཙམ་རྗེས་མཐར་འཛིན་སྐྱོང་ནས་གྲོས་འཆར་ཕུལ་ཏེ་བསྐྱར་བཅོས་གནང་བ་ཞིག་རེད། སྐབས་དོན་བཀའ་ཁྲིར་སྲིད་སྐྱོང་དུ་འགྱུར་བ་སོང་བའི་རྗེས་འབྲེལ་བཀའ་བློན་རྣམ་པར་བློན་ཆེན་དང་ལས་ཁུངས་ཀྱང་བློན་ཆེན་ལས་ཁུངས་སུ་འགྱུར་བ་གནང་ལེགས་རྒྱུ་མཚན་དང་བཅས་གསལ་ནའང་། སྲིད་སྐྱོང་མཆོག་གིས་དམིགས་འདོན་གནང་བའི་བཀའ་བློན་ཡིན་པའི་རྒྱུ་མཚན་གྱིས་མཚན་འདིས་མ་འཐུས་པ་ཞིག་མ་མཐོང་ཞིང་ལས་ཁུངས་བདུན་ལའང་བློན་ཆེན་ལས་ཁུངས་ཁག་ཅེས་ཞུ་བཞིན་རེད།

ཡང་ ༡༩༩༡ ལོར་གཏན་འབེབས་གནང་བའི་བཅའ་ཁྲིམས་དོན་ཚན་དང་པོའི་མགོ་འཛུགས་ཅེས་པ་བཅའ་ཁྲིམས་གསར་པའི་ནང་མི་འདུག་པ་དང་དགོས་ངེས་ཡིན་པའི་འགྲེལ་བཤད་ལ་རྒྱབ་བསྐྱོར་ཡོད། རང་ནས་བཅའ་ཁྲིམས་ ༢༠༡༢ ལོར་ཐེང་གཉིས་དཔར་བསྐྲུན་གནང་བའི་ཕྱི་མ་ཡིན་ཤག་ཅན་ལས་དེ་མིན་མཇལ་ཁོམ་མ་བྱུང་བར་དེའི་ནང་དུའང་དེ་དོན་འདུག ལར་ནས་དེང་སང་གནད་ཡོད་མི་སྣ་མང་པོ་ཞིག་གིས་བཅའ་ཁྲིམས་དང་ཁྲིམས་ཡིག་ཁག་བསྐྱར་བཅོས་དང་ཡང་བཅོས་ཕྱིར་བསྡུ་སོགས་ལན་མང་གནང་བ་མ་ཟད། ཕྱིས་ཐོན་བཅའ་ཁྲིམས་ཀྱི་མཇུག་ཏུ་སྔ་རྗེས་འགྱུར་བ་ཇི་སོང་བལྟ་བདེ་མ་གསལ་བས་ཆེད་མཁས་སྤྱི་འཐུས་རེ་ཟུང་ལས་ཤེས་རྒྱུ་དཀའ་བས་ལྟ་ཡི་མེད་གསུང་མཁན་ཡང་མཐོང་།

ཡང་བཅའ་ཁྲིམས་དོན་ཚན་༧༡ནང་ཁྲིམས་དོན་ལས་ཁུངས་ཕྱིར་འཐེན་གྱིས་དོན་ཚན་ ༦༡ པ་ཀ་བའི་ནང་གསར་འཇུག་གིས་ཚོགས་དྲུང་ལས་ཁུངས་ཀྱི་འོག་བཞག་ཡོད་པ་སོགས་ཀྱི་ཐད། ངས་མཇལ་བའི་གོང་ཞུས་བཅའ་ཁྲིམས་༼ སྔོན་གླེང་མཇུག་ཏུ་ ༢༠༡༢།༡༡།༠༧ འཁོད་༽འདིའི་ནང་དོན་ཚན་ ༧༡ མ་ཡིན་པར་དོན་ཚན་ ༧༠ རེད་འདུག འདི་ནི་ཆེ་མཐོའི་ཁྲིམས་ཞིབ་ཁང་ནས་ཕྱིར་བསྡུ་དང་ཁྲིམས་བཟོ་ལྷན་ཚོགས་སུ་བཞག་འདུག ཕྱིར་བསྡུ་དང་ག་བསྒྱུར་གཉིས་དོན་གཅིག་མིན་པ་མངོན་གསལ་དང་། སྤྱི་ལྷན་ལ་ཁྲིམས་བཟོའི་འགན་དབང་ཡོད་པས་རང་ཕྱོགས་ལ་དགེ་མཚན་དུ་གཟིགས་པ་ཞིག་ཡིན་ཤེས་ཆེ། འོན་ཀྱང་ཕྱིར་བསྡུ་དང་གསར་འཇུག་ག་བརྒྱུར་བཅས་གསལ་ཁ་མེད་པར་ཐབས་མཁས་ཀྱིས་བཏང་སྙོམས་སུ་བཞག་པ་མིན་ནམ་དྲན། ལར་ནས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེར་བོད་མི་ཡིན་ནོ་ཅོག་གིས་སྙིང་ནས་བརྩི་བསྐུར་དང་ཉམས་ལེན། དམ་འབུལ་སྐབས་ཡིད་ཆེས་དང་བློ་གཏད་ཞུ་དགོས་པར་སོང་གལ་གནད་ཆེ་རིགས་ལས་བསྐྱར་བཅོས་སོགས་མང་ན་དགེ་མཚན་དུ་མ་མཐོང་ཤིང་འདི་ནི་ཁྲིམས་ཐམས་ཅད་ཀྱི་འབྱུང་ཁུངས་དང་གཞི་མ་ཡིན་པས་སོ།།

གལ་ཆེ་བའི་དོན་ཚན་གཞན་ཞིག་ནི་སྔོན་གྱི་བཅའ་ཁྲིམས་ནང་མང་གཙོའི་ཀ་བ་གསུམ་དང་རང་དབང་ཅན་གྱི་སྡེ་ཚན་ཁག་བཅས་ལ་འཕོ་འགྱུར་གནང་རྒྱུའི་ལམ་སྲོལ་ཡོད་ཀྱང་། བཀུར་འོས་དཔལ་ལྡན་ཁྲིམས་བཟོ་ལྷན་ཚོགས་ནས་རང་ཉིད་གཅིག་པུར་འགྱུར་བ་བྱ་ལམ་མེད་པ་བཟོས་གནང་བ་མ་ཟད། ཕྱིར་བསྡུའི་ནང་དུའང་གཞན་མཚུངས་མི་གསལ། འདི་ནི་ནང་ཆོས་སུ་འཛམ་གླིང་འདི་བསྐལ་པ་མེ་བདུན་ཆུ་གཅིག་གི་འཇིག་པའི་སྐབས་རྒྱ་གར་རྡོ་རྗེ་གདན་མི་འཇིག་པར་ཟོ་བ་གནམ་ལ་དཔྱང་པ་བཞིན་ལྷག་འགྲོ་ཚུལ་གསུངས་པ་ལྟར། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གཉིས་དང་རང་དབང་ལྡན་པའི་སྡེ་ཚན་གསུམ་གྱི་ཁྱབ་ཁོངས་དང་བཅས་པ་མེད་པར་གྱུར་ནའང་གོང་དཔེ་བཞིན་བོད་མི་མང་སྤྱི་འཐུས་ལྷན་ཁང་གངས་སྐྱིད་དུ་ཀྲོང་ངེར་བཞུགས་རྒྱུའི་ཐུགས་རེ་མིན་ནམ་སྙམ། དཔྱད་གཏམ་འདི་ལས་འཕྲོས་ཏེ་གུས་པས་བཅའ་ཁྲིམས་འདིའི་ནང་དོན་འབྲེལ་ཆགས་ཁག་དང་མཇུག་ཏུ་བོད་མི་མང་སྤྱི་འཐུས་སྐབས་ ༡༥ པའི་གྲོས་ཚོགས་ཚོགས་དུས་ ༥ པའི་ཐོག་བཅའ་ཁྲིམས་བསྐྱར་བཅོས་༼༢༠༡༣།༠༤།༠༡ བཅའ་ཁྲིམས་བསྐྱར་བཅོས་ཉེར་དགུ་པ།༽དོན་ཚན་གསུམ་གནང་འདུག་པ་སོ་སོར་མཇལ་བའི་བསམ་ཚུལ།

༼༡༽ དོན་ཚན་བཅུ་གཅིག་པ། བསྐྱར་བཅོས་ཀྱི་ཚིག་བརྗོད་གསར་རྙིང་གཉིས་ལས་ཚིག་བརྗོད་རྙིང་པའི་ནང་ཁ་གསལ་གོ་བདེ་ཡོད་པ་དེ་གསར་པའི་ནང་མེད་པ་ཆགས་འདུག དཔེར་ན་ཚིག་བརྗོད་རྙིང་པར་བོད་ཀྱི་ཡུལ་མི་སེར་སྐྱ་ཕོ་མོ་དང་གསར་པའི་ནང་བོད་ཀྱི་ཡུལ་མི་ཕོ་མོ་འཁོད་པ་དང་རྙིང་པའི་ནང་ཁྲིམས་ལུགས་དང་གསར་པའི་ནང་ཁྲིམས་སྒྲིག་འཁོད་པར་འདི་ཡན་ཁ་གསལ་མིན་ཙམ་ལས་དེ་ཙམ་ཁྱད་མེད་ནའང་། འདི་མན་ཚིག་བརྗོད་རྙིང་པའི་ནང་བོད་ཀྱི་ཡུལ་མི་སེར་སྐྱ་ཕོ་མོ་རང་ལོ་ཉེར་ལྔ་ཧྲིལ་པོ་ལོན་པ་ཡན་ཚང་མར་འོས་གཞིར་གཞུག་པའི་ཐོབ་ཐང་ཡོད་ཅེས་དང་གསར་པའི་ནང་བོད་ཀྱི་ཡུལ་མི་ཚང་མར་འོས་གཞིར་ཞུགས་པའི་ཐོབ་ཐང་ཡོད་ཙམ་ལས་ལོ་གྲངས་མ་གསལ་བས་བཅའ་ཁྲིམས་དོན་ཚན་སོ་བརྒྱད་པ། སྤྱི་འཐུས་འོས་ཆོས་ནང་ལོ་གྲངས་གསལ་བ་དང་འགལ་འདུག གལ་སྲིད་དོན་ཚན་འདིའི་ནང་ཡོད་པའི་རྒྱུ་མཚན་གྱིས་བསྐྱར་བཅོས་ནང་མ་བཀོད་པ་ཡིན་ན། བཅའ་ཁྲིམས་དོན་ཚན་བཅུ་གཅིག་པ། སྤྱི་འཐུས་ཀྱི་འོས་བསྡུ་དང་འོས་གཞིའི་ཐོབ་ཐང་ནང་རང་ལོ་བཅོ་བརྒྱད་གསལ་བས་བསྐྱར་བཅོས་ཚིག་བརྗོད་གསར་པའི་ནང་བཀོད་པ་ནོར་འདུག

ཡང་ཆེས་གལ་ཆེའི་དོ་སྣང་ཞུ་དགོས་གཞན་ཞིག་ལ་གོང་ཞུས་བཅའ་ཁྲིམས་བསྐྱར་བཅོས་༼༢༽ དོན་ཚན་ཉེར་དགུ་པ། ནང་གསེས་ ༡ བཀའ་ཤག་གི་འགན་འཁུར་དང་འཕོ་འགྱུར་ཞེས་པའི་མགོ་བརྗོད་འོག་བསྐྱར་བཅོས་ཚིག་བརྗོད་རྙིང་པའི་ནང་སྲིད་སྐྱོང་ཞེས་གསར་བཅུག་གནང་པ་འགྲིགས་ངེས་ཀྱང་། ཡང་འདིའི་ནང་གསེས་༢པའི་སྐོར་རང་འཇག་དང་ཕྱིར་བསྡུ་གང་ཡིན་མ་གསལ། ཡང་ནང་གསེས་ ༣ ཀ་བའི་ཚིག་བརྗོད་གསར་པའི་ནང་སྤྱི་འཐུས་ལྷན་ཚོགས་ཀྱི་སྤྱི་འཐུས་ངོ་ཡོད་གསུམ་ཆ་གཉིས་ཡན་གྱིས་མོས་མཐུན་བྱུང་ན་སྲིད་སྐྱོང་དང་བཀའ་བློན་བྱེ་བྲག་པའམ། བཀའ་ཤག་ཡོངས་རྫོགས་འཕོ་འགྱུར་གཏོང་འཐུས་ཞེས་གསལ་པས་འདི་ནི་ཆེས་ཡ་མཚན་པའི་གནས་སུ་གྱུར། མང་གཙོའི་ལམ་སྲོལ་ནང་མཐའ་མའི་ཐག་གཅོད་གནང་རྒྱུའི་དབང་ཆ་གོང་ན་མེད་པ་མང་ཚོགས་ལ་ཡོད་པར་སོང་། མི་མང་ནས་འོས་འདེམས་ཞུས་པའི་སྲིད་སྐྱོང་གྲོས་ཚོགས་ནས་བཀའ་བློན་གཞན་མཚུངས་གསུམ་ཆ་གཉིས་ཡན་གྱི་འོས་འཕེན་གྱིས་འཕོ་འགྱུར་གཏོང་ལམ་དེ་ནི་གཞི་རྩ་མེད་པ་ཞིག་ཏུ་མངོན་པ་མ་ཟད། སྲིད་སྐྱོང་ལ་འཕོ་འགྱུར་གཏོང་བ་ཡིན་ན་བཀའ་བློན་གཞན་རྣམས་རང་བཞིན་གྱིས་འཕོ་རྒྱུ་དང་སྲིད་སྐྱོང་ནས་ཀྱང་བཀའ་བློན་གཞན་འཕོ་འགྱུར་གཏོང་ལམ་ཡང་མངོན་པར་གསལ་ཡོད།

གཞན་ཡང་བློ་ཕམ་པ་ཞིག་ལ་གུས་པ་མཐོང་རྒྱ་ཆུང་བའི་རྐྱེན་གྱིས་ད་དུང་དོན་ཚན་འདིའི་བསྐྱར་བཅོས་གནང་བ་འདི་རང་ལ་ངོས་འཛིན་ཞུ་དགོས་པ་ཞིག་ཡིན་ནམ། ཡང་ན་འདིའི་འཕྲོས་ལྷག་བཅའ་ཁྲིམས་ནང་གསལ་ནང་གསེས་ ༣ཁ།༤།༥།༦ བཅས་རང་འཇགས་གམ་ཕྱིར་བསྡུ་གང་ཡང་མ་གསལ་བས་མུ་འཐུད་དེ་འགྲོ་དགོས་མིན་ནི་བསྐྱར་བཅོས་འདིའི་ལམ་ནས་ཚོད་དཔག་ཙམ་ལས་སུས་ཀྱང་ངོས་འཛིན་ཞུ་དཀའ་བ་ཞིག་ཏུ་མཐོང་།

ཡང་བཅའ་ཁྲིམས་བསྐྱར་བཅོས་ ༼༣༽ དོན་ཚན་ཉེར་བཞི་པ། ཚིག་བརྗོད་རྙིང་པའི་ནང་བཀའ་བློན་རྣམས་ཚོགས་ཞུགས་ཆོག་པའི་ཐོབ་ཐང་ནང་སྲིད་སྐྱོང་ཞེས་པ་གསར་འཇུག་ཞུས་པ་ཙམ་ལས་དམིགས་བསལ་ཞུ་དགོས་མ་ཐོང་། མཐའ་དོན་དྲ་རྒྱའི་ནང་གི་དཔྱད་ཡིག་འདི་ལ་བལྟས་པའི་རྐྱེན་བྱས་ཏེ། དོན་ཕན་ལྡན་མིན་དང་གོང་རིམ་རྣམ་པའི་ཐུགས་ལ་འཇུག་མིན་ཇི་ལྟར་ཡང་། ཤ་ཚ་བའི་གཏམ་ལ་སྙན་མོ་མེད་པའི་དཔེ་ལྟར། སོ་སོ་བོད་ཀྱི་ཡུལ་མི་ཞིག་ཡིན་པའི་རྒྱུ་མཚན་དང་། དྲང་པོ་དང་བདེན་པ། འཚེ་བ་མེད་པ། མང་གཙོ་ཡང་དག་པའི་ལམ་བཅས་ལ་ཡིད་ཆེས་ཞུ་མཁན་ཞིག་ཡིན་ཁུལ་གྱིས་བསམ་ཚུལ་དུ། ༢༠༡༤ ཟླ་ ༤་ཚེས་ ༡༩ ཉིན་སུག་བྲིས་སུ་བགྱིས་པའོ།།།།