རྒྱ་གཞུང་གིས་སོག་ཙན་དན་དགོན་པའི་གྲྭ་བ་ཞིག་འཛིན་བཟུང་བྱས་ཏེ་ཟླ་གཉིས་ལྷག་འགོར་ཡོད་ཀྱང་། ད་ཆར་ཡང་གར་ཡོད་མ་ཤེས་པར་ལྷག་ཡོད་འདུག
རྒྱ་གཞུང་གིས་འདི་ལོའི་ཕྱི་ཟླ་ ༣ ཚེས་ ༡༦ ཉིན་ཁ་པར་གྱི་འཕྲིན་ཐུང་བརྒྱུད་གྲོགས་པོ་དང་དགོན་པར་ཡོད་པའི་རྒྱ་གཞུང་གི་ལས་དོན་མི་སྣར། རྒྱ་ནག་གཞུང་ལ་ངོ་རྒོལ་གྱི་རྩོམ་ཡིག་སྤེལ་བའི་ཉེས་མིང་འོག ནག་ཆུ་སོག་རྫོང་ཙན་དན་དགོན་པའི་གྲྭ་ཆོས་དབྱིངས་སྐལ་ལྡན་ལགས་འཇུ་བཟུང་བྱས་ཡོད་པ་དང་། ཁོང་འཛིན་བཟུང་བཀག་ཉར་བྱས་ཏེ་ཟླ་གཉིས་ལྷག་འགོར་ཡོད་ཀྱང་། ད་ཆར་ཡང་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་ཀྱི་མེད་པར་ལྷག་ཡོད་འདུག
ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ད་ལྟ་རང་ལོ་ ༢༠ ཡིན་པའི་གྲྭ་ཆོས་དབྱིངས་སྐལ་ལྡན་ལགས་ཀྱི་སྐྱ་མིང་ལ་ཨ་ཐོག་ཞུ་བཞིན་ཡོད་པ་དང་། ཁོང་སོག་རྫོང་གཡག་ལ་ཡུལ་ཚོའི་གཡེག་གུ་གྲོང་གི་ཕ་ལྷ་འཁྱིལ་དང་མ་འབུམ་བཟང་གཉིས་ཀྱི་བུ་ཡིན་འདུག ཁོང་དེ་སྔོན་སློབ་གྲྭའི་ནང་ཡོད་སྐབས་བོད་ཡིག་གི་ཤེས་ཚད་ཡག་པོ་ཡོད་སྟབས། རྒྱུན་དུ་མི་རིགས་དང་རིག་གཞུང་སྐོར་གྱི་རྩོམ་ཡིག་སྤེལ་བཞིན་ཡོད་པར་མ་ཟད། སོག་ཕྲུག་ཅེས་པའི་སྨྱུག་མིང་ལོག་རྒྱ་གཞུང་ལ་ངོ་རྒོལ་གྱི་རྩོམ་ཡིག་མང་པོ་ཞིག་སྤེལ་ཡོད་འདུག
ཉེ་ལམ་འབྲེལ་ཡོད་བརྒྱུད་ཕྱི་ཕྱོཊ་སུ་འབྱོར་བའི་རྩོམ་ཡིག་ནང་། ཧམ་པས་རྫུན་མགོ་སྐོར་བའི་དམར་པོའི་ཚོགས།། ཕམ་ཁའི་རླུང་བ་གཡོ་དུས་གཡོ་འཕྲུལ་མང་།། རྫུན་གཏམ་ཉིན་མཚན་འབྲེལ་བའི་གསར་འགྱུར་ལ།། མཐོང་ཚེ་ང་ཚོ་སྤོབས་པ་ཇེ་ཆེ་རེད།། ཁ་ལྕེའི་སྨྲ་སྒོ་ཁྱོད་ཀྱིས་དབང་བསྒྱུར་ཡང་།། མི་འགྱུར་སེམས་ཀྱི་གཏད་སོ་བླ་མ་རེད།། སྐར་ལྔའི་དར་ཆ་གངས་ལ་སྒྲེང་ནས་ཡང་།། མི་འགྱུར་གངས་ཀྱི་མཚོན་རྟགས་གངས་སེང་རེད།། དེང་སྐབས་འཇིག་རྟེན་མང་གཙོས་ཁ་ཕྱོགས་འདི།། རྒྱ་དམར་དཔོན་གྱི་མགོ་བོའི་གཉའ་སྒ་རེད།། མི་དགོས་དམག་གི་ཞི་བདེའི་རྒྱལ་ཁ་འདི།། གདོང་དམར་མི་རིགས་འདི་ཡི་གཟི་བརྗིད་རེད།། གངས་དཀར་ལྷུན་པོའི་ལོ་རྒྱུས་རྡོ་རིང་ཐོག། དམར་པོའི་རྐང་རྗེས་བཞག་པ་ལས་ཤིག་རེད།། དེང་དུས་གོ་ལ་འཕྲིན་གྱི་འཇིག་རྟེན་ལ།། དམར་པོའི་རང་ཚུགས་ཤོར་བ་ལས་ཤིག་རེད།། ”ཅེས་དང་།
ཡང་རྩོམ་ཡིག་ནང་མཚན་དང་སྙན་གྲགས་དོན་དུ་ཟེར་ཀྱང་ཆོག། མི་ཤེས་འཇོན་མདོག་བྱེད་ཀྱི་གསུང་ཡང་རུང་།། གདོང་དམར་བོད་པ་ཚང་གི་བདེ་སྡུག་འདི།། མི་འཁྱམས་ཀུན་ལ་བཤད་པའི་དམ་བཅའ་ཡོད།། བུ་ཆུང་ཤེས་ཡོན་དམན་འདུག་ཟེར་ཀྱང་ཆོག། གང་ཡང་མི་ཤེས་འཁྲུལ་འདུག་གསུང་ཀྱང་ཆོག། བོད་པ་ཚང་གི་ལས་དབང་ན་ཟུག་འདི།། མི་ཞུམ་གངས་དཀར་རྩེ་ནས་བསྒྲགས་རྒྱུ་ཡིན།། རང་ང་རང་འདོད་ཆེ་འདུག་ཟེར་ཀྱང་ཆོག། ཀུན་དང་མི་མཐུན་ངན་འདུག་གསུང་ཀྱང་རུང་།། གངས་ཅན་མི་རིགས་འདི་ཡི་བདེ་དོན་འདི།། སྤོབས་པས་འཛམ་གླིང་བཤད་པའི་དགའ་སྤྲོ་ཡོད།། རང་ལུས་མེ་མཆོད་འབུལ་བའི་དཔའ་བོ་གཅིག། དྲུག་འགྱུར་དབྱངས་ཀྱི་བདེ་སྡུག་གླེང་མཁན་གཉིས།། སྨྱུག་སོས་རང་དབང་གླེང་བའི་མཁས་པ་གསུམ།། བུ་ངས་ནམ་ཡང་མ་ཎིའི་མཆོད་པ་འབུལ།། ང་ཡི་ལུས་འདི་གདོང་དམར་བོད་ལ་དབང་།། ང་ཡི་སེམས་འདི་གདོང་དམར་བོད་ལ་དགའ།། ལུས་སེམས་བོད་ལ་དབང་བའི་བུ་ཆུང་ང་།། མ་ཤི་ལ་རྒྱའི་ཁུ་ཚུར་ལྷོད་པ་མེད།། ཅེས་བཀོད་འདུག
རྩོམ་ཡིག་ནང་། “སྐར་ལྔའི་འོག་ན་བོད་པའི་ཡི་བདེ་སྡུག་ཡོད།། སྐར་ལྔའི་འོག་ན་གངས་སེང་གི་རིགས་རྒྱུད་ཡོད།། སྐར་ལྔའི་འོག་ན་གདོང་དམར་གྱི་རྒྱལ་ཁབ་ཡོད།། སྐར་ལྔའི་འོག་ན་རྨ་མེད་ཀྱི་ན་ཟུག་ཡོད།། སྐར་ལྔའི་འོག་ན་གངས་དཀར་གྱི་ཕ་གཞིས་ཡོད།། སྐར་ལྔའི་འོག་ན་སྦྲ་ནག་གི་ལོ་རྒྱུས་ཡོད།། སྐར་ལྔའི་འོག་ན་བཙན་པོ་ཚོའི་རིག་གཞུང་ཡོད།། སྐར་ལྔའི་འོག་ན་དབང་མེད་ཀྱི་མི་རིགས་ཡོད།། སྐར་ལྔའི་འོག་ན་སྲོལ་རྒྱུན་ལ་རང་དབང་མེད།། སྐར་ལྔའི་འོག་ན་ཆོས་ལུགས་ལ་རང་དབང་མེད།། སྐར་ལྔའི་འོག་ན་འགྲོ་འོང་ལ་རང་དབང་མེད།། སྐར་ལྔའི་འོག་ན་སྨྲ་སྒོ་ལ་རང་དབང་མེད།། སྐར་ལྔའི་འོག་ན་བདེན་དཔང་ལ་སྟོབས་ཤུགས་མེད།། སྐར་ལྔའི་འོག་ན་དྲང་བདེན་ལ་རིན་ཐང་མེད།། སྐར་ལྔའི་འོག་ན་ཤེས་ཡོན་ལ་མདུན་ལམ་མེད།། སྐར་ལྔའི་འོག་ན་ཞི་བདེ་ལ་ཁ་ཕྱོགས་མེད།། སྐར་ལྔའི་འོག་ན་སྒོར་མོ་ཡི་དེ་རིང་ཉོ།། སྐར་ལྔའི་འོག་ན་གོ་ས་ཡི་སང་ཉིན་ཉོ།། སྐར་ལྔའི་འོག་ན་དབང་ཆ་ཡི་ཁ་ལོ་བསྒྱུར།། སྐར་ལྔའི་འོག་ན་མིག་ཆུའི་ཁྲོད་རྩོམ་འདི་ཤོར།། ཞེས་དང་།
“དེང་དུས་ཅ་དངོས་གསར་པའི་རིགས་མང་ཞིང་།། མི་འདོད་འགལ་རྐྱེན་མང་ཞིང་ཁུར་ལྕི་བས།། ཐུན་(ཐུབ་)བསྟན་རིན་ཆེན་འཛིན་པའི་བཙུན་ཆུང་རྣམས།། མི་འགྱུར་བློ་རྩ་རྡོ་རྗེ་བྲག་ལྟར་བརྟན།། དེང་དུས་ཕོ་མོ་འདོད་ཆགས་ཆེན་པོས་གཟེར།། ཁྲེལ་མེད་ཆ་ལུགས་ཚོན་ཁྲའི་བྱུག་རྫས་སོགས།། སྣ་མང་དུག་རྫས་རིགས་དག་སྤྱོད་དགའ་བས།། གདོང་དམར་གཞོན་ནུ་རང་གཤིས་མ་བརྗེད་དགོས།། དེང་དུས་ང་ཅག་བོད་ཀྱི་འབངས་རྣམས་ལ།། མི་འདོད་འགལ་རྐྱེན་མང་ཞིང་ཁུར་ལྗི་བས།། བདེ་དོན་རྩོད་ལེན་བྱེད་པའི་དུས་འདི་ལ།། སྤོབ་པའི་སེམས་ཤུགས་མ་འཁུམས་གངས་ཅན་པ།། ” ཅེས་སོགས་རྩོམ་ཡིག་མང་དག་ཅིག་བྲིས་ཡོད་འདུག
གསར་འགོད་པ། དོན་གོ
