བོད་རང་བཙན་དཔང་རྟགས་མེད་པ་བཟོ་མཁན་སུ་རེད།

༄༅།།  བོད་རང་བཙན་དཔང་རྟགས་མེད་པར་བཟོ་མཁན་བོད་མི་གསར་བརྗེ་བ་ཕུན་དབང་ཁོ་ནའི་ཞབས་རྗེས་རེད་དམ།

ཁ་བའི་འདབ་མ།

ལོ་རྒྱུས་ཀྱི་འཕེལ་ཕྱོགས་དང་རིག་གཞུང་གི་རང་མདངས། སྐད་ཡིག་གི་འགྱུར་ཁུག གོམས་གཤིས་ཀྱི་རྒྱུ་བ་སོགས་ཀྱིས་རང་དབང་རང་བཙན་དང་རང་ས་རང་སྲུང་། རང་དབང་བག་ཕེབས་ངང་དུ་འཚོ་ཞིང་གནས་པའི་མཐོ་སྒང་གི་མི་རིགས་ཤིག་སྟེ། དེང་སྐབས་བོད་གངས་ཅན་པ་ཞེས་གོ་ལའི་ཁྱོན་ཀུན་ཏུ་ཕྲེང་ཐག་ཆད་པའི་ཕྲེང་རྡོག་ཇི་བཞིན་གང་ས་རུ་འཐོར་ཞིང་གནས་པ་ནི། གུང་ཁྲན་ཏང་གི་ཧམ་སེམས་ཆེན་པོས་རྒྱ་ནག་གི་ས་ཁུལ་ཁྱོན་ཡོངས་བདག་དབང་བྱས་པའི་རྗེས་ཏེ། ༡༩༤༩ ལོར་རྒྱལ་འཛུགས་མཛད་སྒོ་དང་འབྲེལ་བའི་ཐོག་མའོ་ཙེ་ཏུང་གིས་གཏམ་བཤད་སྐབས་ད་དུང་བོད་ཀྱང་བཅིངས་བཀྲོལ་གཏང་དགོས་ལུགས་བརྗོད་པར་བརྟེན། བོད་གཞུང་གིས་ཕྱི་རྒྱལ་ལས་ཁུངས་བརྒྱུད་ནས་གཞུང་འབྲེལ་འཕྲིན་ཡིག་བཏང་སྟེ། བོད་ཀྱི་གནས་བབ་དང་མཚོ་སྔོན་དང་ཟི་ཁྲོན་སོགས་སུ་གུང་མིང་ཏང་གིས་ཧམ་བཟུང་བྱས་པ་དག་ཕྱིར་སྤྲོད་དགོས་པའི་བསམ་ཚུལ་བཏོན་ཡོད་པར་གྲགས། འོན་ཀྱང་གསར་དུ་བཙུགས་མ་ཐག་པའི་གུང་ཁྲན་སྲིད་གཞུང་གིས་བོད་གཞུང་གི་བསམ་ཚུལ་ལ་བསམ་ཤེས་བྱ་བའི་ཚབ་ཏུ་བོད་ཁ་བའི་ལྗོངས་སུ་བཙན་འཛུལ་གྱི་འཆར་གཞི་གདིང་བ་དང་། སྐབས་དེར་མའོ་ཙེ་ཏུང་ཨུ་རུ་སུར་རྒྱལ་དོན་འཚམས་གཟིགས་སུ་འགྲོ་བའི་ལམ་བར་མེ་འཁོར་ནང་ནས་ཀྱང་ཁ་དོན་མི་མཚུངས་པའི་བཅིངས་གྲོལ་ཞེས་བར་ཁ་གཡར་ཏེ། བོད་ནང་དུ་དམག་དཔུང་ཇི་ལྟར་འགྲོ་ཐབས་ལ་འཆར་བཀོད་བྱས་འདུག

སྐབས་དེར་བོད་གཞུང་གིས་ཕུན་དབང་ལགས་ནི་གུང་ཁྲན་ཏང་གི་སོ་ཉུལ་ཡིན་པའི་དཔང་རྟགས་ལྟར། བོད་ནས་རྒྱ་གར་བརྒྱུད་ཕྱིར་ཕུད་བྱས་པ་བཞིན་རྒྱ་གར་བརྒྱུད་ནས་ཡུན་ནན་དུ་འབྱོར་བ་དང་ཏག་ཏག་ཏིན་ཞོའོ་ཕིན་དང་ཐུག་ཅིང་། ཕུན་དབང་ནི་འདོད་ཐོག་ཏུ་རྟ་རྒྱུགས་པ་བཞིན་ཞོའོ་ཕིན་བརྒྱུད་དེ་གུང་ཁྲན་ཏང་གི་གོང་རིམ་ལ་འགྲེལ་བརྗོད་བྱས་པ་བཞིན་བོད་ནང་དུ་བཙན་འཛུལ་དམག་དཔང་གི་སྣེ་འཁྲིད་པར་གྱུར། སྐབས་དེ་དག་ཏུ་ཕུན་དབང་ནི་རྒྱ་ནག་གུང་ཁྲན་གྱིས་གདུག་རྩུབ་ཆེ་བའི་ཞིང་བྲན་ལམ་ལུགས་ཞེས་སྒྲོག་པ་དང་། དོན་དམ་པར་ཆོས་སྲིད་ཟུང་འབྲེལ་བོད་གཞུང་དགའ་ལྡན་ཕོ་བྲང་ཞེས་མི་ལོ་སུམ་བརྒྱ་ལྷག་གི་ལོ་རྒྱུས་ལྡན་པའི་བོད་མི་རིགས་ཀྱིས་གློ་སྙིང་བྲང་གསུམ་གཏོད་ཡུལ་གྱི་སྲིད་གཞུང་དེ་མགོ་རྟིང་སློག་པར་སྤྲོ་བས་ཁེངས་ནས་ཡོད།

ཕྱི་ལོ་ ༡༩༥༠ ལོར་བོད་ཤར་ཕྱོགས་ནས་མགོ་བཙུགས་ཏེ་གུང་ཁྲན་གྱིས་དམག་དཔུང་དྲངས་ཤིང་། དམག་མི་ཞིག་གི་ཉིན་དེབ་ཏུ་གལ་སྲིད་ཁྱེད་ཀྱིས་བཅིངས་བཀྲོལ་དམག་ཨང་བཅོ་བརྒྱད་པ་དར་མདོ་བརྒྱུད་ནས་བསྐྱོད་པར་ཤེས་འདོད་ཚེ་ཐོག་མར་མི་རོ་ཡིས་བརྩིགས་པའི་མཁར་རྫོང་ཆེན་པོ་ཞིག་བཤགས་ཏེ་སྐྱོད་པར་ཡིད་ལ་དྲན་དགོས་ཞེས་འཁོད་ཡོད། དེ་ལོས་ཀྱང་ཡིན་ཏེ་ལམ་བར་ནས་ཡུལ་དམག་དང་འཐབ་འཛིང་གིས་ལམ་བུ་བཤམས་ཏེ་ཡོང་འདུག

ཕྱི་ལོ་ ༡༩༥༠ ལོ་ཟླ་ ༡༠ ཚེས་ ༧ ཉིན་བོད་རྒྱལ་ཁབ་ཀྱི་གཞུང་དམག་དང་གདོང་ཐུག་ཤོར་ཞིང་ཉིན་ཤས་རིང་དམག་འཐབ་བྱས་ཀྱང་རང་གཞུང་གི་དམག་མི་ལྔ་སྟོང་ལྷག་ཕམ་ཉེས་སུ་བཏང་སྟེ་ཆབ་མདོ་བཙན་གྱིས་བཟུང་བ་དང་། མདོ་སྤྱི་ང་ཕོད་འཁོར་བཅས་བཙོན་དུ་བཅུག་འདུག་ཀྱང་ཕུན་དབང་གིས་དེ་འདྲ་བྱེད་མི་རུང་ཚུལ་གླེང་སྟེ་སང་ཞོགས་བཟང་བཙོན་དུ་ཉར་ཞིང་། བོད་གཞུང་ལ་ཞི་འགྲིག་དགོས་པའི་བརྡ་བཏང་འདུག གུང་ཁྲན་གྱིས་བརྗོད་པ་ལྟར་བོད་གཞུང་གིས་ང་ཕོད་སོགས་པེ་ཅིན་དུ་གྲོས་མོལ་བྱེད་དུ་བཏང་། ཕྱི་ལོ་ ༡༩༥༡ ཟླ་ལྔ་པའི་ནང་དུ་པེ་ཅིན་དུ་གྲོས་མོལ་སྐབས་ཐོག་མར་ང་ཕོད་སོགས་ཀྱིས་བོད་ནི་གནའ་རབས་ལོ་རྒྱུས་ཀྱིས་ཕྱུག་པའི་རྒྱལ་ཁབ་ཅིག་ཡིན་པ་དང་། སྐད་ཡིག་དང་རིག་གཞུང་། ཡུལ་སྲོལ་གོམས་གཤིས་སོགས་ཐུན་མོང་མིན་པས། རྒྱ་ཁོངས་སུ་མེད་ལུགས་བཤད་དེ་གུང་ཁྲན་གྱིས་བཟོས་པའི་གྲོས་བསྡུར་ལ་མཚན་རྟགས་བཀོད་མི་འདུག

འོན་ཀྱང་སྐབས་དེར་ཕུན་དབང་ནི་སྐད་སྒྱུར་བ་ཡིན་སྟབས། རང་གཞུང་གི་སྐུ་ཚབ་ཚོ་ལ་མཁྲེགས་བཟུང་བྱེད་མི་རུང་བ་སོགས་ཀྱི་ཁ་མཁས་ཚིག་སྙན། ལྷག་པར་ཆབ་མདོ་དམག་འཁྲུག་ཕམ་ཉེས་ཤོར་བའི་ང་ཕོད་ལགས་དང་དམིགས་བསལ་གྱིས་ཐུག་འཕྲད་ལན་མང་བྱས་ཏེ། གུང་ཁྲན་དམག་དཔུང་བོད་དུ་ཡར་རྒྱས་གཏོང་མཁན་ཡིན་རབས་དང་། གལ་ཏེ་བཀག་འགོག་བྱས་ན་བོད་མི་ཁྲི་སྟོང་མང་པོ་དམག་འཐབ་ནང་ཚུད་དེ་ཚོད་དཔག་དཀའ་བའི་མཇུག་འབྲས་ཡོང་སྲིད་སྟབས། གྲོས་བསྡུར་ལ་མིང་རྟགས་འགོད་དགོས་པར་ནན་ཏན་བྱས་པར་བརྟེན་མཐར་རང་གཞུང་གི་སྐུ་ཚབ་ཚོས་ཀྱང་གྲོས་མཐུན་ལ་མིང་རྟགས་བཀོད་འདུག

དེ་ནི་དོན་ཚན་བཅུ་བདུན་ཟེར་བ་དེ་ཡིན་ཞིང་། དེ་ཡང་གུང་ཁྲན་ཏང་གིས་བོད་ཞི་བའི་བཅིངས་བཀྲོལ་གཏང་བའི་གྲོས་མཐུན་ཞེས་བརྗོད་པ་དང་། ཕྱི་ལོ་ ༡༩༥༩ ལོའི་ཟླ་གསུམ་པའི་ནང་༧གོང་ས་ཏཱ་ལའི་བླ་མ་མཆོག་གིས་གྲོ་མོར་དུ་ཆིངས་ཡིག་དོན་ཚན་བཅུ་བདུན་ནི་ཐོག་མར་འཇོག་དུས་བཙན་དབང་གིས་བཞག་དགོས་ཐུག་པ་དང་། ལྷག་པར་གུང་ཁྲན་རང་ཉིད་ཀྱིས་གྲོས་དོན་དང་ཡང་ཡང་འགལ་བར་བྱེད་ཀྱི་འདུག་པས་གྲོས་དོན་དེ་ལ་ངོས་ལེན་མེད་ཅེས་བཀའ་བསྩལ་གནང་བ་དེ་རེད། གྲོས་མཐུན་མིང་རྟགས་དེ་བཀོད་པ་ནས་བོད་རྒྱལ་ཁབ་ཆེན་མོ་ཟེར་བ་དེ་འཇའ་ཡལ་བ་བཞིན་ཡལ་སོང་བ་དང་། བོད་རང་བཙན་ཟེར་བ་དེ་བོར་སོང་བ་རེད་ལ། བོད་མི་རིགས་ལ་རང་དབང་ཟེར་བ་དེ་ཡང་ཉིན་དེ་ནས་བཟུང་ཤོར་སོང་བ་རེད།

གལ་ཏེ་གྲོས་མཐུན་མིང་རྟགས་དེ་བཀོད་ཐུབ་མེད་ན་གུང་ཁྲན་ཏང་གིས་གླང་ཆེན་སྨྱོས་བ་ཇི་བཞིན་བོད་མི་རིགས་ལ་བསད་རྡུང་འཕྲོག་གསུམ་གྱི་བྱ་ངན་འདི་དག་ད་ལྟའང་ད་དུང་མཚམས་མ་ཆད་པར་ལུས་དོན་མེད་པ་ཡིན་ཏེ། སྐབས་དེར་གྲོས་བསྡུར་ལ་མིང་རྟགས་བཀོད་ཐུབ་མེད་ཚེ་གུང་ཁྲན་ཏང་གིས་བོད་ནང་དུ་གསོད་རྡུང་འཕྲོག་བཅོམ་གྱིས་བཙན་འཛུལ་དེ་རྒྱལ་སྤྱིའི་ཐོག་ཏུ་ཁྲིམས་ཀྱིས་ངོས་ལེན་ཡོད་པའི་བཙན་འཛུལ་ཞིག་ཏུ་འགྱུར་ཞིང་། གུང་ཁྲན་དམག་དཔུང་བོད་དུ་གནས་པ་ཡང་བཙན་འཛུལ་གྱི་ངོ་བོའི་ཐོག་ཏུ་གནས་དགོས་སྟབས། ཆབ་མདོའི་གཞུང་དམག་གིས་མཚོན་པའི་གུང་ཁྲན་གྱིས་མཚོན་འོག་ཏུ་ཤོར་བའི་རྒྱ་འགོག་བོད་མིའི་ཚེ་སྲོག་དག་ལ་ཡང་རིན་ཐང་ཡོད་པ་དང་། ལོ་རྒྱུས་ཀྱི་ཆུ་རྒྱུན་ཀློང་དུ་ཡང་དོན་སྙིང་ཡོད་པར་གྱུར་པ་ལས། དེ་སྐབས་ལྟར་དྲན་གསོ་བྱེད་མི་ནུས་པའམ་དྲན་གསོ་བྱེད་མི་ཕོད་པའི་ཆབ་སྲིད་ཀྱི་ཁ་ཕྱོགས་ཤིག་འདེམ་དགོས་དོན་མེད།

ལྷག་པར་དུ་མའོ་ཙེ་ཏུང་གིས་ཀྱང་རྒྱ་ནག་གི་ས་ཁུལ་ཁག་ཏུ་གུང་མིང་ཏང་གཏོར་ཕམ་བཏང་བ་དང་མི་འདྲ་བ་བོད་ཀྱི་སྲིད་དབང་གཏོར་ཕམ་གཏང་རྒྱུ་ནི་ལོ་རྒྱུས་ཀྱི་གནད་དོན་ཐེབས་པའི་དབང་སྒྱུར་བྱེད་ཐབས་ལ་རྒྱལ་སྤྱིའི་ཐོག་ཏུ་རྙོག་གླེང་ལ་ཧ་ཅང་སྐྲག་སྣང་སྐྱེས་བཞིན་ཡོད། སྐབས་དེར་ཏག་ཏག་ཕུན་དབང་གིས་བོད་ཀྱི་སྐུ་ཚབ་ཚོ་ལ་འཇམ་རྩུབ་གཉིས་ཀྱི་བྱེད་ཐབས་ཀྱིས་གྲོས་མཐུན་དོན་ཚན་བཅུ་བདུན་ཟེར་བར་མིང་རྟགས་བཀོད་ཡོད་ལ་དེ་དང་ཕྱོགས་མཚུངས་མའོ་ཙེ་ཏུང་གིས་གནད་དོན་དེ་འཛམ་གླིང་ལ་བསྒྲགས་པ་དང་ང་ཕོད་ཀྱིས་ཀྱང་རླུང་འཕྲིན་ནང་འགྲེལ་བརྗོད་བྱས་ཡོད།

གནད་དེའི་མགོ་མཇུག་བར་གསུམ་དུ་ཕུན་དབང་མ་གཏོགས་མའོ་ཙེ་ཏུང་གི་འཆར་བཀོད་ལག་བསྟར་བྱེད་ཐུབ་མཁན་སུ་ཡང་མེད་སྟབས། དངོས་གནས་ཁོང་ནི་བོད་ཀྱི་ཆབ་སྲིད་འཕོ་འགྱུར་ཁྲོད་གནད་ཡོད་མི་སྣ་ཞེས་བསྔགས་པ་ཡང་རང་གི་མི་རིགས་ཀྱི་རང་དབང་ཤོར་བ་དང་། རྒྱལ་ཁབ་ཀྱི་ལོ་རྒྱུས་བཅད་པ། བོད་ནང་དུ་བཙན་འཛུལ་གྱི་མེ་ལྕེ་དེ་དག་ཀྱང་ཞི་བའི་བཅིངས་བཀྲོལ་ཞེས་པའི་ཁ་གཡང་སྒྲོག་ཐུབ་པ་སོགས་ཀྱིས་མཚོན་པའི་ལས་དོན་འདི་ཚོ་ཁོ་ན་ལས་བོད་མི་རིགས་ལ་སྨན་པའི་ལས་དོན་གང་ཞིག་ཡིན་ནམ། གང་ཞིག་བསྟན་རྒྱུ་ཡོད་དམ།

མ་གཞི་ཁོང་འདས་གྲོངས་སུ་གྱུར་ཟིན་པའི་ཁོང་གི་ལོ་རྒྱུས་དག་ཀྱང་མུ་མཐུད་འཇིག་རྟེན་ན་གླེང་སློང་གནས་དགོས་དོན་མེད་མོད། བཙན་བྱོལ་བོད་མི་ཞེས་མཛུབ་རྩེར་བགྲང་ནུས་པའི་སྤྱི་ཚོགས་ཆུང་ངུ་འདིར་ཆབ་སྲིད་མཁས་པར་གྲགས་པ་ཚོས་རང་གི་བསམ་དོན་སྒྲུབ་བྱེད་དུ་འདི་ལྟ་བུའི་སྐྱེ་བོ་ཚོར་ཡང་བསམ་ཡུལ་ལས་འདས་པའི་ཆེ་བསྟོད་དང་། རྒྱུ་ལམ་འདྲ་མིན་ནས་འབྲེལ་བ་ཆེ་ལུགས། བཙན་བྱོལ་བོད་མིའི་ཆབ་སྲིད་ཀྱི་སློབ་སྟོན་ཡིན་ཟོལ་གྱིས་ཁོང་འདས་གྲོངས་སུ་གྱུར་བར་བློ་ཕམ་ཡོད་པའི་སྐྱོ་ཉམས། མི་རིགས་དང་ལོ་རྒྱུས་བཅས་ལ་རྡོག་རོལ་གཏོང་མཁན་ཁོང་ལ་ད་དུང་མི་རིགས་ཀྱི་དཔའ་བོ་ཟེར་བའི་གཏམ་བཤད་དེ་དག་གིས། ཆབ་སྲིད་མཁས་པ་ཟེར་པ་ཡང་ལེགས་ཉེས་གོ་ལྡོག་གི་བསམ་བློ་ཅན་ཞིག་དགོས་པ་མིན་ནམ་སྙམ་ཡོང་བ་དང་། དབུ་མའི་ལམ་གྱི་སྲིད་ཇུས་ལམ་ལྷོང་ཡོང་བར་དྲང་བདེན་བཏང་སྟེ། འཁྱོག་བཤད་ཁོ་ནས་ཐབས་ཅི་ཕྱིར་སྤྱོད་པ་ཡིན་ནམ་སྙམ་ཏེ། མི་རིགས་ཤིག་ལ་བཅངས་པའི་བརྩེ་སེམས་ཟབ་མོ་རྒྱ་མཚོའི་རླབས་ལྟར་གཡོ་ཞིང་མི་རིགས་ཤིག་ལ་དུང་བ་ཟབ་མོས་ད་ལྟར་ང་ཚོའི་གནས་བབ་ཉག་ཕྲ་བའི་དུས་འདིར་འདས་དོན་རྣམས་ལ་རང་དབང་མེད་པར་བསམ་གཞིགས་ཀྱི་ཀློང་ན་འགུལ་སྐྱོད་ཅིག་རྒྱག་ཡོང་གི་འདུག

ཕྱི་ལོ་ ༢༠༡༤ཟླ་བ་ ༥ ཚེས་ ༡༨ ཉིན།