སྐབས་རེར་ཆབ་སྲིད་དང་དཔལ་འབྱོར་ལས་སྐད་ཡིག་རིག་གཞུང་སྲུང་སྐྱོབ་གལ་ཆེ།

གངས་སྐྱིད་བོད་ཀྱི་དཔེ་མཛོད་ཁང་གིས་བོད་སྐད་ཡིག་རིག་གཞུང་ལ་དོ་སྣང་གནང་མཁན་སྐོར་ཞིག་ལ་རྒྱལ་རབས་ལོ་རྒྱུས་དང་སུམ་རྟགས་སྙན་ངག་སོགས་ཀྱི་གཟབ་ཁྲིད་ཅིག་གནང་གི་ཡོད་ཅིང་། གོ་སྒྲིག་པས་བརྗོད་པ་ལྟར་ན། བོད་ཡིག་གི་གནས་སྟངས་ཡག་པོ་ཡོད་པ་འདི་མི་རབས་རྗེས་མ་ཚོར་རྒྱུན་ཡག་པོ་ཞིག་མཐུད་ཐུབ་རྒྱུ་དེ་ཤིན་ཏུ་གལ་ཆེན་ཡིན་ཟེར། 

དྷ་ས་བོད་ཀྱི་དཔེ་མཛོད་ཁང་གི་གོ་སྒྲིག་འོག ས་ར་མཐོ་སློབ་དང་རྒྱ་གར་མཐོ་སློབ་ཁག དེ་བཞིན་དགོན་སྡེ་ཁག་ཅིག་གི་སློབ་ཕྲུག་དང་གྲྭ་བ་ ༢༥ ཙམ་ལ་ཟླ་གཉིས་རིང་གི་བོད་པའི་ཆོས་དང་རིག་གཞུང་གཟབ་ཁྲིད་ཀྱི་ལས་རིམ་ཞིག་མགོ་འཛུགས་བྱེད་བཞིན་ཡོད་ཅིང་། དེར་བོད་ཀྱི་དཔེ་མཛོད་ཁང་གི་དགེ་བཤེས་བློ་བཟང་བརྩོན་འགྲུས་ལགས་ཀྱིས་ནང་ཆོས་ངོ་སྤྲོད་དང་། མགོ་ལོག་དམ་ཆོས་དཔལ་བཟང་ལགས་ཀྱིས་བརྡ་སྤྲོད་སློབ་ཁྲིད། བསྟན་འཛིན་ལམ་བཟང་ལགས་ཀྱིས་སྙན་ངག་དང་རྩོམ་རིག ན་ག་སངས་རྒྱས་བསྟན་དར་ལཊ་ཀྱིས་བོད་ཀྱི་གནའ་རབས་དང་དེང་རབས་ལོ་རྒྱུས་སློབ་ཁྲིད་གནང་གི་ཡོད་པ་དང་། དཔེ་མཛོད་ཁང་གིས་སློབ་ཕྲུག་དཀའ་ངལ་ཅན་ལ་ཟླ་རེར་ཟས་དོད་ཧིན་སྒོར་ ༢༠༠༠ དང་ཁང་དོད་ཧིན་སྒོར་ ༡༠༠༠ བཅས་ཀྱི་མཐུན་རྐྱེན་སྐྲུན་བཞིན་ཡོད་འདུག དཔེ་མཛོད་ཁང་གི་ཉམས་ཞིབ་པ་ན་ག་སངས་རྒྱས་བསྟན་དར་ལགས་ཀྱིས་བརྗོད་པ་ལྟར་ན། ཟབ་སྦྱོང་འདིའི་དམིགས་ཡུལ་གཙོ་བོ། བོད་རིཊ་གཞོན་སྐྱེས་ཚོར་བོད་པའི་ཆོས་དང་རིག་གཞུང་གི་རྨང་གཞི་སྲ་བརྟན་བཟོ་ཐབས་དང་། དུས་རྒྱུན་བོད་ཡིག་དང་བོད་པའི་རིག་གཞུང་ལ་འབྲེལ་འདྲིས་ཀྱི་གོ་སྐབས་དེ་ཙམ་མེད་མཁན་ཚོར་དྲན་གསོ་ལྟ་བུ་ཞིག་ཡིན་སྐོར་བརྗོད་བྱུང་། 

གསར་འགོད་པས་ཁོང་ལ་བཙན་བྱོལ་བོད་མིའི་བོད་སྐད་ཡིག་གི་གནས་སྟངས་ཐད་གཟིགས་ཚུལ་གང་འདྲ་ཡོད་མེད་དྲིས་པར་ཁོང་གིས། “ སྤྱི་ཡོངས་ཀྱི་ཆ་ནས་ག་ས་གང་དུ་བོད་ཡིག་བོད་སྐད་ཐོག་ཤུགས་རྒྱག་གི་ཡོད་པའི་ཟོལ་འདྲ་བོ་ཞིག་མཐོང་གི་འདུག མ་འོངས་པར་ང་ཚོ་དང་མི་རབས་རྗེས་མ་གཉིས་ཀྱི་མཐུད་མཚམས་ཡག་པོ་མ་བྱུང་བ་ཡིན་ན། རང་བཞིན་གྱིས་སེམས་ཁྲལ་ཞིག་ཆགས་རྒྱུ་རེད་བསམ་གྱི་འདུག ང་ཚོའི་མི་རབས་དང་ང་ཚོའི་ཕ་མའི་མི་རབས་ཚོའི་བསམ་བློའི་ནང་བོད་ཡིག་རྩ་ཆེན་པོར་བྩི་མཁན་ཞིག་ཆགས་ཡོད། གཅིག་བྱས་ནས་ལམ་ཁ་གཞན་མ་རྙེད་པས་ཡིན་རྒྱུ་རེད། འདེམས་ཀ་བྱུང་ན་འདི་བཞག་ཏེ་གཞན་པར་འགྲོ་ཆོག་ཆོག་གི་ཉེན་ཁ་ཞིག་མཐོང་གི་འདུག ཉེན་ཁ་འདི་ང་ཚོ་གཅིག་པུ་མ་རེད། འཛམ་གླིང་གང་སར་ཡོད་པ་ཞིག་ཡིན་ནའང་ང་ཚོ་མི་ཉུང་ཉུང་ཡིན་སྟབས་དེ་འདྲའི་བསམ་ཚུལ་འཁུར་བ་ཡིན་ན། མགྱོགས་པོར་དཀའ་ངལ་འཕྲད་རྒྱུའི་ཉེན་ཁ་ཡོད་པ་རེད། ཆོས་ཐམས་ཅད་རང་བཞིན་གྱིས་རྒུད་འགྲོ་བཞིན་ཡོད་པ་དེར་ཐབས་ཤེས་མེད་ཀྱང་སོ་སོས་འབད་བརྩོན་མ་བྱས་པར་དུས་མ་རན་པར་ཉམས་པ་ཡིན་ན། བློ་ཕམ་པོ་རེད། དེ་ཞེན་ཁོག་གི་སྐད་ཆ་མ་རེད། རང་གཞན་ཀུན་ལ་ཕན་ཐོགས་པའི་ལེགས་བཤད་བསམ་གྱིས་མི་ཁྱབ་པ་མང་པོ་ཞིག་ཡོད་པ་དེ་བརླག་པ་ཡིན་ན། དངོས་ནས་ཕངས་པོ་རེད། སྐབས་རེར་ཆབ་སྲིད་དང་དཔལ་འབྱོར་སྲུང་སྐྱོབ་ལས་སྐད་ཡིག་རིག་གཞུང་སྲུང་སྐྱོབ་འདི་གལ་ཆེ་བ་ཆགས་འདུག ཆབ་སྲིད་དང་དཔལ་འབྱོར་ཞེས་པ་དེ་ཡོ་ལང་ཞིག་གི་རྗེས་སུ་འགྲོ་བཞིན་ཡོད་པ་རེད། དུས་ཚོད་སྡུག་ཅག་བྱུང་ན་གནས་ཚུལ་ལོགས་ཀ་རེད་མ་གཏོགས། དེ་མིན་མི་ཆེན་པོ་གཉིས་ཀྱིས་ས་ཡིག་བརྒྱབ་ན་ཐག་ཆོད་འགྲོ་བ་ཞིག་རེད། འོན་ཀྱང་། སྐད་ཡིག་དང་རིག་གཞུང་ཟེར་བ་འདི་མི་རབས་ནས་མི་རབས་བར་མཚམས་སྦྱོར་ཡག་པོ་ཞིག་མ་བྱུང་ན། ཆད་འགྲོ་བ་དང་བརླག་འགྲོ་བ། ཉམས་རྒུད་དུ་འགྲོ་ལས་སླ་བོ་དང་འཕེལ་རྒྱས་སུ་གཏོང་དཀའ་མོ་འདྲ་ཞིག་ཡོད་པ་རེད། སྐད་ཡིག་རིག་གཞུང་རྒྱུན་ཡག་པོ་མཐུད་ནས་སྲུང་སྐྱོབ་བྱེད་ཐུབ་པ་ཡིན་ན་ཆབ་སྲིད་དང་མིའི་འཚོ་གནས་གཉིས་ཀར་ཕན་གྱི་རེད་ལ། དཔལ་འབྱོར་ལའང་ཞོར་ནས་ཕན་ཐོཊ་ཡོད་པ་ཞིག་རེད” ཅེས་བརྗོད་བྱུང་།

ཁོང་ལ་ཕྱིའི་ཁོར་ཡུག་ཏུ་བོད་ཡིག་འཛིན་སྐྱོང་སྤེལ་གསུམ་བྱེད་སྟངས་ལ་ཐབས་ལམ་གང་འདྲ་ཡོད་མེད་དྲིས་པར་ཁོང་གིས། རྒྱ་བལ་གཉིས་ནང་གང་ལ་གང་འཚམ་འགྲིག་བསྡད་ཡོད་པ་རེད། ནུབ་ཕྱོགས་རྒྱལ་ཁབ་ཁག་ནང་གི་བོད་པ་ཚོས་བོད་ཡིག་ཐོག་བསམ་བློ་གཏོང་དགོས་པ་ཆགས་ཡོད། དེའི་འགན་ཆེ་ཤོས་ཕ་མ་ཚོའི་ཕྲག་ཏུ་ཡོད་པ་རེད་བསམ་གྱི་འདུག ཕ་མ་དང་རྒན་རབས་ཚོས་སོ་སོའི་རིག་གཞུང་ལ་གཅེས་འཛིན་ཡག་པོ་ཡོད་ན། ཕྲུ་གུ་རེ་ཟུང་མ་གཏོགས་མང་ཆེ་བ་ཕ་མའི་ཁ་ཕྱོགས་ལ་ཏན་ཏན་འགྲོ་གི་རེད། ཕྲུ་གུའི་མིག་དང་ཨམ་ཅོག བསམ་བློའི་ནང་ཅི་ཙམ་ལྡུག་ཐུབ་ན། བག་ཆགས་དང་གོམས་གཤིས་བཟང་བོ་དེ་ཙམ་འདུག་གི་རེད། ནུབ་ཕྱོགས་ཀྱི་ཕྲུ་གུ་རེ་ཟུང་ཕ་མ་གཉིས་ཀ་བོད་པ་ཡིན་ཡང་བོད་སྐད་མི་ཤེས་མཁན་འདུག་ལ། འགའ་རེ་ཕ་མ་གང་རུང་ཕྱི་རྒྱལ་བ་ཡིན་ནའང་བོད་སྐད་སྤུས་དག་མོ་ཤོད་མཁན་འདུག གཙོ་ཆེ་ཤོས་སྐད་དེ་རེད། སྐད་ཀྱི་རྨིང་གཞི་ཡག་པོ་ཡོད་ན་རྗེས་མ་བོད་ཡིག་ཐོག་གོམ་པ་རྒྱག་ཆོག་ཆོག་ཡོད་པ་རེད། བོད་སྐད་ཀྱི་གཞི་རྩ་མེད་ན་བོད་ཡིག་སློབ་རྒྱུར་དཀའ་ལས་ལྷག་མ་ཡོད་པ་རེད། གནད་འགག་ཆེ་ཤོས་ཕྲུ་གུ་ཆུང་ཆུང་སྐབས་ལ་ཕ་མ་ཚོས་བོད་སྐད་བོད་ཡིག་དང་བོད་པའི་རིག་གཞུང་ཐོག་བག་ཆགས་ཅི་ཙམ་འཇོག་ཐུབ་མིན་ལ་ཐུག་ཡོད།” ཅེས་བརྗོད་བྱུང་། 

གསར་འགོད་པས་ཟབ་སྦྱོང་ནང་མཉམ་ཞུགས་གནང་མཁན་བུ་མོ་སྐལ་བཟང་ལགས་སུ་བཅར་འདྲི་ཞུས་པར་ཁོང་མོས། ང་རང་འཛིན་རིམ་བཅུ་གཉིས་བར་བོད་ཡིག་སྦྱངས་ཡོད་ཀྱང་། ཕྱིས་སུ་རྒྱ་གར་མཐོ་སློབ་ནང་ནད་གཡོག་གི་ཆེད་ལས་སྦྱངས་སྟབས། ལོ་ལྔ་ལྷག་རིང་བོད་ཡིག་སྦྱོང་རྒྱུའི་གོ་སྐབས་བྱུང་མ་སོང་། ད་རེས་ཡང་བསྐྱར་གོ་སྐབས་རག་པར་དགའ་བོ་བྱུང་སོང་། ང་འཛིན་རིམ་བཅུ་གཉིས་ཀྱི་སློབ་སྦྱོང་ཐོན་རྗེས་བོད་ཡིག་གལ་ཆེན་པོར་མཐོང་མ་སོང་། གང་ཡིན་ཞེ་ན་ངས་སྦྱངས་པའི་ནད་གཡོག་གི་ལས་ཀ་བོད་ཡིག་དང་འབྲེལ་བ་མི་འདུག རྗེས་སུ་གནས་ཚུལ་མང་པོ་ཞིག་གི་ཐོག་ནས་དཀའ་ལས་ཁག་པོ་ཆགས་ཡོང་གི་འདུག དེང་སྐབས་ང་ཚོས་རྒྱ་མིར་ཁ་གཏད་གཅོག་རྒྱུའི་སྐད་ཆ་བཤད་ན་འུར་ཚ་བོ་རེད། སོ་སོའི་སྐད་དང་ཡི་གེ རྒྱལ་རབས་ལོ་རྒྱུས་སོགས་ཡག་པོ་ཞིག་སེམས་ལ་ངེས་པ་དང་བཤད་ཤེས་པ་ཡིན་ན། དེ་རྒྱ་ནག་ལ་ཁ་གཏད་གཅོག་ཐབས་ཀྱི་ཆ་ཤས་གལ་ཆེན་པོ་ཞིག་ཆགས་ཀྱི་ཡོད་པ་རེད་བསམ་གྱི་འདུག མ་འོངས་པར་ང་རང་གིས་ཉི་མ་རྟག་པར་དེབ་འཁུར་ནས་བོད་ཡིག་གཅིག་པུ་ཀློག་རྒྱུ་ཁག་པོ་རེད་དེ་ལས་ཀའི་ཞོར་ནས་གང་ཐུབ་ཅི་ཐུབ་ཅིག་བྱེད་དགོས་བསམ་གྱི་འདུག ཅེས་བརྗོད་བྱུང་། 

ས་ར་མཐོ་སློབ་ཀྱི་སློབ་མ་ཤེས་རབ་རྒྱ་མཚོ་ལགས་སུ་བཙན་བྱོལ་སྤྱི་ཚོགས་ནང་བོད་ཡིག་བེད་སྤྱོད་གང་འདྲ་ཡོད་མེད་དྲིས་པར་ཁོང་གིས། སྤྱིར་བཏང་བཙན་བྱོལ་ནང་འཛིན་སྐྱོང་གི་ངོས་ནས་བོད་ཡིག་ལ་ལྟ་སྟངས་ཡག་པོ་མི་འདུག་མོད། དགོན་སྡེ་ཁག་དང་བོད་པའི་མཐོ་སློབ་ཁག་ཅིག་གིས་བོད་ཡིག་གི་རྐང་འདྲ་བོ་བཟུང་འདུག་བསམ་གྱི་ཡོད། འོན་ཀྱང་བོད་ནང་དང་བསྡུར་ན་ད་དུང་ཧ་ཅང་སྐྱོ་བོ་འདུག དམིགས་བསལ་གཞོན་སྐྱེས་ཚོའི་ཁྲོད་དུ་སྐད་བསྲེས་ལྷད་ཅན་རྒྱག་པ་དང་བོད་ཡིག་ལ་དོ་སྣང་མེད་པ་སོགས་ཀྱི་གནས་ཚུལ་མང་པོ་འདུག ཅེས་བརྗོད་བྱུང་།

གསར་འགོད་པ། དོན་གོ