བོད་རིག་པའི་སློབ་གླིང་ནས་བོད་ཡིག་གི་འབོད་སྐུལ།

ལྷ་སྡེ་གནམ་ལོ་ཡག

ད་ལྟ་རྒྱ་དམར་གཞུང་གིས་བོད་ཐོག་འཛིན་པའི་སྲིད་ཇུས་མང་ཆེ་བ་རིག་འཕྲུལ་གྱི་སྦྱོར་བ་སྣ་ཚོགས་བརྒྱུད་ནས་གཏན་འཁེལ་བྱས་པ་ཡིན་སྟབས། གནས་དེར་སྡོད་མཁན་ཚོ་ལའང་དངོས་སུ་སྐྱོན་ལ་མཛུབ་མོ་འཛུགས་རོགས་ཟེར་སྐབས། ཧ་ལམ་གཅིག་གིས་གཅིག་ལ་ལྟ་བ་ཙམ་ལས་སྐྱོན་འདིའོ་ཟེར་བ་ཞིག་སྟོན་མི་ཐུབ་པའི་ཚད་ལ་སླེབས་ཡོད། དཔེར་ན། ལོ་ཤས་ནས་བཟུང་། བོད་ཤར་ཁུལ་ཡང་༼ བོད་ལ་ཁ་གཏད་རོགས་སྐྱོར༽ཟེར་བའི་ཁོངས་སུ་བཅུག་ཡོད་སྟབས། ཁམས་དང་ཨ་མདོ་ནས་རྒྱ་ནག་ནང་འགྲིམ་གྱིན་པའི་མཐོ་རིམ་སློབ་མ་མང་བོ་བྱུང་ཡོད། ཐད་ཀར་ལྟ་སྐབས། དེ་ནི་བཟང་ཕྱོགས་ཀྱི་འགྱུར་བ་ཞིག་ལས་སྐྱོན་ཞིག་ཏུ་མཐོང་མི་ཐུབ། ཡིན་ནའང་། བོད་ནང་གི་མཐོ་རིམ་སློབ་ཆེན་ཁག་ནས་ཕེབས་མཁན་ཚོར་འབྲེལ་འདྲིས་བྱེད་སྐབས། གཞི་ནས་འགྱུར་བ་དེའང་གནད་དོན་ཚབས་ཆེན་ཞིག་ཡིན་པ་ཤེས་འོངས།

ཕྱི་ལོ་ ༢༠༠༨ ལོའི་བོད་ནང་གི་གྱེན་ལངས་རྗེས་ནས་བཟུང་། རྒྱ་དམར་གཞུང་གིས་མཐོ་སློབ་ཁག་ནང་ཡོད་པའི་བོད་རིག་པའི་སློབ་གླིང་ཁག་གི་སློབ་མ་བསྡུ་བའི་སྐར་གྲངས་ཇེ་མཐོར་བཏང་ནས་བོད་ཡིག་སྦྱངས་ནས་ཡིག་རྒྱུགས་གཏོང་མཁན་གྱི་བརྒྱ་ཆའི་རེ་གཉིས་ཤིག་མ་གཏོགས་མཐོ་སློབ་དེ་དག་ནང་འཛུལ་ཞུགས་བྱེད་མི་ཐུབ་པ་བཟོས་འདུག དེ་བས། བོད་ཡིག་ཡོད་པའི་མཐོ་སློབ་ནང་འཛུལ་མ་ཐུབ་པའི་སློབ་མ་མང་ཆེ་ཤོས་རྒྱ་ནག་ནང་ཁུལ་གྱི་མཐོ་སློབ་ཁག་དང་ས་གནས་སོ་སོའི་རྒྱ་ཡིག་གི་མཐོ་སློབ་ཁག་ནང་བཅུག་འདུག= ད་ལྟ་འཆར་གཞི་འདི་ཧ་ལམ་དམའ་འབྲིང་རིམ་པ་ནས་བཏང་ཚར་ཡོད་པ་ཞིག་རེད། གནད་དོན་འདི་བྱེ་བྲག་ཏུ་མཚོ་སྔོན་ནང་མངོན་གསལ་དོད་པོ་རེད། ཡང་ཅིག་བཤད་ན། མཚོ་སྔོན་ཆེས་མཐའ་མཇུག་གི་བོད་ཡིག་ཆེད་ལས་གང་ཙམ་ལྷག་ཡོད་པའི་གནས་ཤིག་ཡིན་པར་འབྲེལ་བ་ཡོད་སྲིད་པ་ཞིག་རེད།

མཚོ་སྔོན་མི་རིགས་སློབ་ཆེན་ནི་བོད་རིག་པའི་སློབ་གླིང་དར་ཆ་ཕྱར་བའི་མཐོ་སློབ་ཞིག་ཡིན་པར་མ་ཟད། སློབ་ཆེན་འདིར་བོད་ཡིག་སློབ་ཁྲིད་ཀྱི་ལོ་རྒྱུས་རྒྱ་དམར་གཞུང་གིས་བོད་ཤར་ཕྱོགས་སུ་བཙན་འཛུལ་བྱས་པ་དང་དུས་མཉམ་སྟེ། ཕྱི་ལོ་ ༡༩༤༩ ལོའི་ཟླ་ ༡༢ ནས་སློབ་གླིང་འདི་བཙུགས་འདུག་པ་དང་། སློབ་མའི་ཡོང་ཁུངས་བོད་ཁུལ་སྤྱི་རེད། ཕྱི་ལོ་ ༢༠༡༡ ལོར་མཚོ་སྔོན་མི་རིགས་སློབ་<ཆེན་དུ་མིང་བསྒྱུར་དང་། ཕྱི་ལོ་ ༢༠༡༢ ལོ་ནས་རྒྱ་ནག་ཐེན་ཅིན་མཐོ་སློབ་ཀྱིས་ཐད་ཀར་རོགས་བསྐྱོར་བྱེད་ཡུལ་དང་ཕྱི་ལོ ༢༠༡༣ ལོ་ནས་དེང་གི་རྒྱ་ནག་གི་དཀྱིལ་རྒྱུད་དང་ནུབ་རྒྱུད་ཀྱི་ནུས་པའི་རྨང་གཞིའི་འཛུགས་བསྐྲུན་རྣམ་གྲངས་དར་སྤེལ་བྱེད་པའི་མཐོ་སློབ་ཁྲོད་འདེམས་འདུག

ཕྱི་ལོ་ ༢༠༡༢ ལོར་མཚོ་སྔོན་མི་རིགས་སློབ་ཆེན་གྱི་བོད་རིག་པའི་སློབ་གླིང་ནང་རྒྱ་ཡིག་རྐྱང་བའི་ལམ་ནས་སློབ་མ་ ༣༢ བསྡུས་ཡོད་པ་དང་། སློབ་མ་དེ་དག་སློབ་མཐར་ཕྱིན་རྗེས། བོད་རྒྱ་ཡིག་རིགས་གཉིས་ཀྱི་མཐོ་སློབ་ཀྱི་ལག་འཁྱེར་སྤྱོད་རྒྱུ་ཡིན་པ་དང་། མ་འོངས་ལས་གནས་གོ་སྒྲིག་བྱེད་ཡུལ་བོད་ཁུལ་གྱི་གཞི་རིམ་མམ། ཤང་རིམ་པའི་མགོ་ཁྲིད་ཡིན་པར་མ་ཟད། སློབ་མ་འདི་དག་བསྡུ་སྐབས། སྔོན་འགྲོའི་ཆ་རྐྱེན་གཉིས་ཡོད་པ་ནི།

༡ རྒྱ་ནག་གི་ཆེས་དབུལ་བའི་ས་ཁུལ་ནས་ཡིན་དགོས་པ།

༢ མི་རབས་བདུན་ལ་བོད་དམ། གྲངས་ཉུང་མི་རིགས་ལ་ཤ་ཁྲག་གི་འབྲེལ་བ་མེད་པ།

བོད་ལྗོངས་སློབ་གྲྭ་ཆེན་མོ་དང་པེ་ཅིན་དུ་ཡོད་པའི༼ཀྲུང་དབྱང་མི་རིགས་སློབ་ཆེན༽གྱི་བོད་རིག་པའི་སློབ་གླིང་ནང་འཛིན་གྲྭ་འདི་བཞིན་ཕྱི་ལོ་ ༢༠༠༨ ལོའི་ཡར་སྔོན་ནས་བཙུགས་ཡོད་པར་བཤད། སློབ་བསྡུའི་དམིགས་ཡུལ་གོང་དུ་བརྗོད་ཟིན་པ་ལྟར། བོད་ཁུལ་གྱི་གཞི་རིམ་དཔོན་རིགས་སྐྱེད་སྲིང་བྱེད་ཀྱིན་པ་ཞིག་རེད་ལ། སློབ་མ་འདི་དག་བསྡུ་ལེན་བྱེད་པའི་སྔོན་འགྲོའི་ཆ་རྐྱེན་ལ་དཔག་ན། བོད་ལ་མུ་མཐུད་སྲིད་ཇུས་མཁྲེགས་འཛིན་དང་དཔལ་འབྱོར་གཡོ་འཕྲོག་བྱེད་མཁན་ཁྱུ་ཞིག་ཏུ་འགྱུར་ངེས་པ་ནི་རིགས་འདེད་བྱེད་ཐུབ་པ་ཞིག་རེད།

ལོ་ཤས་སྔོན་ནས་མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་ནང་ཚོགས་འདུ་དུ་མ་བསྐོང་འཚོགས་ཀྱིས་༼རྒྱལ་ཁབ་ལ་ཞབས་ཞུའི་འཐབ་ཇུས་ཀྱི་དམིགས་བསལ་དགོས་མཁོ༽ཟེར་བ་ཞིག་ལ་གྲོས་བསྡུར་རབ་དང་རིམ་པས་བྱས་ཡོད་ཅིང་། ཕྱི་ལོ་ ༢༠༡༤ ལོར་རྒྱ་ནག་ཐེན་ཅིན་མཐོ་སློབ་དང་མཚོ་སྔོན་མི་རིགས་སློབ་ཆེན་མཉམ་འབྲེལ་གྱིས་འབུམ་རམས་པའི(PH.D)ཞིབ་འཇུག་འཛིན་གྲྭ་བསྡུ་རྒྱུ་དང་། སློབ་མཐར་ཕྱིན་རྗེས་ཐེན་ཅིན་མཐོ་སློབ་ནས་ལག་འཁྱེར་སྤྲོད་རྒྱུ་རེད་ལ། སློབ་མ་དྲུག་བསྡུ་ལེན་བྱེད་པའི་འཆར་གཞི་འདུག་པར་མ་ཟད། སྔོན་འགྲོའི་ཆ་རྐྱེན་ནང་རྒྱ་ནག་དམར་ཤོག་ཚོགས་པའི་དབུ་ཁྲིད་བརྩི་སྲུང་དང་ཆབ་སྲིད་ཀྱི་ལངས་ཕྱོགས་བརྟན་པ། མེས་རྒྱལ་ལ་དགའ་ཞིང་མེས་རྒྱལ་གཅིག་གྱུར་ལ་སྲུང་སྐྱོབ། རྒྱལ་ཁབ་ཀྱི་བོད་ཁུལ་དར་སྤེལ་འཐབ་ཇུས་ལ་ཞབས་ཞུ་དང་ཁྲིམས་ལུགས་སྲུང་བ། གཤིས་རྒྱུད་དྲང་མོ་ཅན་ཡིན་དགོས་ཚུལ་བཀོད་འདུག

ཆེད་ལས་དབྱེ་སྟངས་ཀྱི་ཆ་ནས་ལྟ་སྐབས། ཡིག་རྒྱུགས་སམ་ཡིག་རྩལ་ཕལ་ཆེ་བ་རྒྱ་ཡིག་གི་ལམ་ནས་ཡིན་པ་གཏན་འཁེལ་ཟིན་ནའང་། བོད་བརྒྱུད་སངས་རྒྱས་ཆོས་ལུགས་ཚན་རིག་གིས་འགྲེལ་སྟངས་ཐད་ཀྱི་སྐར་གྲངས་ནང་བོད་ཡིག་དང་རྒྱ་ཡིག་གཉིས་ཀ་དགོས་ཚུལ་བཀོད་འདུག དེ་བས། བོད་ཡིག་ཤེས་མཁན་ལ་ས་མིག་གཅིག་ནས་གཉིས་ཡོད་པ་འདྲ། ཆེད་ལས་ཁག་རིམ་པ་དྲུག་ལ་དབྱེ་ཡོད་པ་གཤམ་གསལ།

༡ བོད་ཁུལ་སྤྱི་ཚོགས་བརྟན་ལྷིང་དང་འཛིན་སྐྱོང་བྱེད་ཕྱོགས་ཞིབ་འཇུག ༢ བོད་བརྒྱུད་སངས་རྒྱས་ཆོས་ལུགས་དོ་དམ་བྱེད་སྟངས་ཞིབ་འཇུག

༣ བོད་ཁུལ་སྤྱི་ཚོགས་ཀྱི་གནད་དོན་ཞིབ་འཇུག

༤ བོད་ཀྱི་གསོ་བ་རིག་པ་བརྒྱུད་འཛིན་དང་དར་སྤེལ་ཞིབ་འཇུག

༥ བོད་བརྒྱུད་སངས་རྒྱས་ཆོས་གཞུང་ཚན་རིག་གིས་འགྲེལ་སྟངས།

༦ བོད་ཀྱི་ལོ་རྒྱུས་རིག་གནས་གསུང་རྩོམ་རྒྱ་བསྒྱུར།

གནས་སྟངས་འདིའི་ཆ་ནས་བལྟ་སྐབས། རྒྱ་དམར་རྒྱལ་ཡོངས་ནང་བོད་རིག་པའི་སློབ་གླིང་ཁོངས་སུ་བསྡུས་པའི་མཐོ་སློབ་དྲུག་གམ་བདུན་ལས་མེད་ནའང་། སློབ་གླིང་འདི་དག་ནས་བོད་ཡིག་གཙོར་བཟུང་གིས་སློབ་མ་གསོ་སྐྱོང་བྱེད་པའི་སྔར་སྲོལ་ལ་འགྱུར་བ་བཏང་དང་གཏོང་བཞིན་པ་གསལ་བོར་མཚོན་ཡོད་པར་མ་ཟད། སྒོས་སུ་ལོ་ཤས་རིང་མཚོ་སྔོན་མི་རིགས་སློབ་ཆེན་གྱི་བོད་རིག་པའི་སྡེ་ཁག་ནང་དངོས་གཞིའི་སློབ་མ་(༢༠༡༢)ནས་ཞིབ་འཇུག་སློབ་མ(༢༠༡༣ ལོ་དང་སློམ་མ་ ༨)དང་། ད་ལོ་ནས་འབུམ་རམས་པའང་རྒྱ་ཡིག་རྐྱང་བའི་ལམ་ནས་བསྡུ་རྩིས་བྱེད་ཀྱིན་པ་ནི་བོད་ཡིག་གི་ཚེ་སྲོག་ཐད་ཀར་འཇིག་ཉེན་ལ་འཕྲད་ཟིན་པའི་མངོན་རྟགས་ཅིས་མ་ཡིན།

དེའི་ཕྱིར། བཙན་བྱོལ་ནང་གི་རྒྱ་དམར་རྩ་ཁྲིམས་འོག་ཏུ་སྡོད་འདུན་ཡོད་མེད་གཉིས་ཀ་དང་འཐབ་ཕྱོགས་གཅིག་གྱུར་ཁང་ལ་དགའ་བསུ་ཡོད་མེད་གཉིས་ཀ་ནས་ཕྱར་གྲུ་མཉམ་འདེགས་སམ། ཡང་ན། ཕྱོགས་སོ་སོ་ནས་ཐབས་ལམ་སྣ་མང་འོག་བོད་ཡིག་ལ་འཕྲད་ཀྱིན་པའི་འཇིག་ཉེན་འདི་ཅིས་ཀྱང་སེལ་ཐབས་གནང་དགོས་པའི་དུས་ལ་བབས་ཟིན་པ་ཞུ་མ་དགོས་པ་ཞིག་རེད། བོད་ཡིག་ནི་ཚང་མ་མཉམ་རུབ་ཀྱིས་སྲུང་སྐྱོབ་བྱེད་དགོས་པའི་ནོར་བུ་ཡིན་ཏེ། བོད་ཡིག་སྟེང་བོད་ཀྱི་འདས་མ་ད་གསུམ་ཡོད། ལུས་ངག་ཡིད་གསུམ་ཡང་ཡོད།

ཕྱི་ལོ་ ༢༠༡༤ ལོའི་ཟླ་ ༥ ཚེས་ ༢༩ ཉིན་བྲིས།