པདྨ་རིག་འཛིན། མཛད་རྣམ་ལས་བྱེད་ཟུར་པ།
འདིར་སྟོན་པ་བཅོལ་ལྡན་འདས་སྐུ་མྱ་ངན་ལས་འདས་ཚུལ་ལ་དོགས་གཅོད་ཀྱི་ཚུལ་དུ། མདོ་ལས་ལུང་དྲངས་ཏེ་སྟོན་པ་བཅོམ་ལྡན་འདས་དང་འཁོར་སེང་གེ་སྒྲའི་བར་གསུང་ལན་གནང་བ་ཞིག་བཀོད་ཡོད།
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་༼ཏ་པ༽རྒྱ་ནག་ནས་བསྒྱུར་བ་འདི། རྒྱ་ནག་གི་མཁན་པོ་ཝང་ཕབ་ཞུན་དང་། རྡརྨའི་གཞི་འཛིན་དགེ་བའི་བློ་གྲོས་དང་། ལོ་ཙྭ་ཚོ་བ་རྒྱ་མཚོའི་སྡེས་བསྒྱུར་ཏེ་གཏན་ལ་ཕན་པའི་མདོ་༼ཏ་པ༽ཤོག་ངོས་ ༡༤༢ རྒྱབ་ཀྱི་ཐིག་ ༤ པ་རུ་སེང་གེ་སྒྲས་གསོལ་བ། “བཅོམ་ལྡན་འདས་ཀྱིས་ཅིའི་སླད་དུ་དཔྱིད་ཟླ་འབྲིང་པོ་ལ་མྱ་ངན་ལས་འདའ།” ཞེས་དྲིས་པའི་ལན་དུ། བཅོམ་ལྡན་འདུས་ཀྱིས་ “རིགས་ཀྱི་བུ། (༡)དཔྱིད་ཟླ་འབྲིང་པོ་ནི། དཔྱིད་ཅེས་བྱ་སྟེ། དཔྱིད་ཀྱི་ཟླ་བ་ལ་དངོས་པོ་ཐམས་ཅད་སྐྱེ་ཞིང་། རྨོ་བ་ཐམས་ཅད་རྩ་བ་གཙུགས་ཏེ། མེ་ཏོག་དང་། འབྲས་བུ་ཡོངས་སུ་རྒྱས་ལ། ཆུ་བོ་ཐམས་ཅད་འབྲུབ་ཅིང་། བྱོལ་སོང་ཐམས་ཅད་ནུ་མ་རྒྱས་ཏེ། དེའི་ཚེ་ན་སེམས་ཅན་དག་རྟག་པའི་འདུ་ཤེས་མང་དུ་སྐྱེས་ཏེ། སེམས་ཅན་གྱི་མི་རྟག་པའི་སེམས་གཞིག་པའི་ཕྱིར། ཆོས་ཐམས་ཅད་མི་རྟག་པར་བསྟན་ཏེ། དེ་བཞིན་གཤེགས་པ་འབའ་ཞིག་ནི། རྟག་པ་མི་འགྱུར་བ་གནས་པར་བསྟན་ཏོ།།” ཞེས་གསུངས་ཡོད།
སེང་གེ་སྒྲས་གསོལ་བ། “དེ་བཞིན་གཤེགས་པ་ཐོག་མ་བལྟམས་ནས་རབ་ཏུ་བྱུང་བ་དང་། མངོན་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བའི་བར་དུ་ཀུན་ཀྱང་ཚེས་བརྒྱད་པ་དང་སྦྱར་ན། ཅིའི་སླད་དུ་མྱང་ངན་ལས་འདས་པ་འབའ་ཞིག་ཚེས་བཅོ་ལྔ་དང་སྦྱར།” ཞེས་དྲིས་པའི་ལན་དུ། བཅོམ་ལྡན་འདས་ཀྱིས། “ལེགས་སོ། ལེགས་སོ། རིགས་ཀྱི་བུ་ཇི་ལྟར་ཚེས་བཅོ་ལྔ་ལ་ཟླ་བ་སྐྱེད་དབྲི་མེད་པ་ལྟར། སངས་རྒྱས་བཅོམ་ལྡན་འདས་ཀྱང་དེ་དང་འདྲ་སྟེ། ཡོངས་སུ་མྱང་ངན་ལས་འདས་པ་ལ་སྐྱེད་དབྲི་མེད་དོ།། དེ་ལྟ་བས་ན་ཚེས་བཅོ་ལྔ་ལ་ཡོངས་སུ་མྱ་ངན་ལས་འདའོ།།” ཞེས་བཀའ་ལན་བསྩལ་ཡོད།
(༡)དཔྱིད་ཟླ་འབྲིང་པོ་ནི། ཧོར་ཟླ་གཉིས་པ་ལ་གོ་དགོས་སྟབས། རྣམ་དཔྱོད་བློ་གྲོས་དང་ལྡན་པ་རྣམས་ཀྱིས་མདོ་དཔར་འདི་བཞིན་མ་ཡིན་པར་མདོ་དཔར་གཞན་ལའང་གཟིགས་ཞིབ་ཀྱིས་དགོངས་ཆུབ་ཡོང་བ་ཞུ།།
མདོ་ལྟར་ན་ང་ཚོས་དེང་སྐབས་བོད་ཕྱི་ནང་གཉིས་ནས་ས་ག་ཟླ་བ་སྲུང་བརྩི་གནང་སྟངས་དེ་ནོར་འདུག་གསུང་གི་ཡོད་པ་རེད་དམ། འདི་གསལ་བོ་ཞིག་གནས་གནང་རོགས།
སྐུ་ངོ་མཆོག་གིས་གསུངས་སྟངས་བྱས་ན། ས་ག་ཟླ་བའི་ཚེས་བཅོ་ལྔ་འདི་ཉིད་སྟོན་པ་སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་པའི་ཉིན་མོ་མ་རེད་གསུངས་གི་ཡོད་པ་མ་རེད་དམ། མདོ་ལུགས་ཀྱི་བཤད་སྟངས་དེ་འདྲ་ཡོད་ན་ང་ཚོས་ཞིབ་འཇུག་བྱེད་དགོས་པ་རེད་དོ།།