ཟླ་འདིའི་ཕྱི་ཚེས་ ༢༣ ཉིན་སི་པིན་མཐོ་རིམ་ཁྲིམས་ཁང་གིས་ཅང་ཙེ་མེན་སོགས་རྒྱ་ནག་གི་དཔོན་རིགས་ ༥ ལ་ནག་ཉེས་ཁྲིམས་བཤེར་གྱི་བཀའ་ཁྱབ་རྩིས་མེད་བཏང་ཡོད་འདུག
ཕྱི་ལོ་ ༢༠༠༦ ཙམ་ནས་བཟུང་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་དང་སི་པིན་བོད་དོན་རྒྱབ་སྐྱོར་ཚོགས་པ་མཉམ་འབྲེལ་གྱིས། སི་པིན་མཐོ་རིམ་ཁྲིམས་ཁང་ལ་རྒྱ་ནག་གི་སྲིད་འཛིན་ཟུར་པ་ཅང་ཙེ་མེན་དང་སྲིད་བློན་ཟུར་པ་ལིས་ཕུང་སོགས་མཐོ་རིམ་དཔོན་རིགས་ ༧ གྱིས། ལོ་རབས་ ༨༠ དང་ ༩༠ ནང་བོད་ཁུལ་དུ་མི་རིགས་རྩ་མེད་ཀྱི་སྲིད་བྱུས་ལག་བསྟར་བྱས་པ་སོགས་ཀྱི་ནག་ཉེས་ཞུ་གཏུག་གནང་ཡོད་པ་ལྟར། འདས་ལོའི་ཕྱི་ཟླ་ ༢ ཚེས་ ༡༠ ཉིན་སི་པིན་མཐོ་རིམ་ཁྲིམས་ཁང་གི་ཁྲིམས་དཔོན་ཨེ་སི་མཱེལ་མོ་རི་ནོ་（Ismael Moreno）ལགས་ཀྱིས། རྒྱ་ནག་གི་སྲིད་འཛིན་ཟུར་པ་ཅང་ཙེ་མེན་དང་ལིས་ཕུང་སོགས་མཐོ་རིམ་དཔོན་རིགས་ ༥ ལ་དངོས་སུ་ཁྲིམས་བཤེར་བྱ་རྒྱུ་གཏན་འབེབས་བྱུང་བ་བསྒྲགས་ཡོད་པ་མ་ཟད། རྒྱལ་སྤྱིའི་ཉེས་དོན་ཉེན་རྟོག་རྩ་འཛུགས་ལ་ཁོ་ཚོ་འཛིན་བཟུང་དགོས་པའི་བཀའ་རྒྱ་བཏང་ཡོད་ཀྱང་། རྒྱ་གཞུང་གི་གནོན་ཤུགས་འོག ཉེ་སྔོན་སི་པིན་མཐོ་རིམ་ཁྲིམས་ཁང་གིས་བཅའ་ཁྲིམས་ལ་བསྐྱར་བཅོས་བྱས་ཏེ། ཟླ་འདིའི་ཕྱི་ཚེས་ ༢༣ ཉིན་རྒྱ་ནག་གི་དཔོན་རིགས་ ༥ འཇུ་བཟུང་ཁྲིམས་བཤེར་བྱེད་པའི་་བཀའ་ཁྱབ་རྩིས་མེད་བཏང་ཡོད་འདུག
ད་ལོའི་ཕྱི་ཟླ་ ༢ པའི་ཟླ་མཇུག་ཏུ་སྲིད་འཛིན་ཚོགས་པས་སྣེ་ཁྲིད་པའི་སི་པིན་གྲོས་ཚོགས་ཀྱིས། སི་པིན་མཐོ་རིམ་ཁྲིམས་ཁང་གི་རྒྱལ་ཕྱིའི་འགྲོ་བ་མིའི་ཐོབ་ཐང་དང་འགལ་བའི་ཉེས་དོན་ཁག་ལ་ཞིབ་བཤེར་བྱེད་པའི་ཁེ་དབང་ལ་ཚོད་འཛིན་དགོས་པའི་གྲོས་གཞི་བཏོན་ཡོད་པ་ལྟར། རྒྱལ་ཕྱིའི་ཁྲིམས་བཤེར་བཅའ་ཁྲིམས་ལ་བསྐྱར་བཅོས་བྱས་ཏེ། དེ་རིགས་ཀྱི་ཉེས་དོན་ཐོ་འགོད་བྱེད་པར་ངེས་པར་དུ་ཚང་དགོས་པའི་ཆ་རྐྱེན་ཁག་ཅིག་གཏན་འབེབས་བྱས་པའི་ནང་། དོགས་ཡོད་ཉེས་ཅན་སི་པིན་རྒྱལ་ཁབ་ཀྱི་མི་སེར་ཡིན་པ་དང་། ཡང་ན་སི་པིན་ནང་གནས་སྡོད་བྱེད་མཁན་ཡིན་དགོས། གལ་སྲིད་ཉེས་དོན་དེ་བྱུང་སྐབས་གནོད་འཚེ་ཕོག་མཁན་སི་པིན་གྱི་མི་སེར་ཡིན་ན། ཁྲིམས་ཁང་གིས་ཉེས་དོན་དེ་ཞིབ་བཤེར་ཐོ་འགོད་བྱེད་ཆོག་ལ། ཉེས་དོན་ཞུ་གཏུག་སྐབས་ངེས་པར་དུ་གནོད་འཚེ་ཕོག་མཁན་དང་ཞིབ་བཤེར་ཁང་གིས། ཁྲིམས་ཁང་ལ་ཡིག་ཐོག་ནས་ཞུ་གཏུག་ཡི་གེ་འབུལ་དགོས་སྐོར་སོགས་བརྗོད་ཡོད་སྟབས། ཞུ་གཏུག་བྱས་པའི་རྒྱ་གཞུང་གི་དཔོན་རིགས་དེ་དག་གིས་བོད་ནང་མི་རིགས་རྩ་མེད་གཏོང་བའི་སྲིད་བྱུས་སྤེལ་སྐབས། ཉེས་དོན་ཞུ་གཏུག་པ་སྤྱི་འཐུས་ཐུབ་བསྟན་དབང་ཆེན་ལགས་སི་པིན་གྱི་མི་སེར་ཆགས་མེད་སྐོར་བརྗོད་དེ་ཁྲིམས་བཤེར་རྩིས་མེད་བཏང་ཡོད་འདུག
གོང་གི་གནད་དོན་ཐད་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་གསར་ལམ་དུ། སི་པིན་མཐོ་རིམ་ཁྲིམས་ཁང་གི་འདེམས་ཤོག་བླུགས་པ་བརྒྱུད་འོས་གྲངས་ ༩ དང་ ༧ བཅས་འོས་གཉིས་ཀྱི་ཁྱད་པར་གྱིས། ད་རེབ་ཀྱི་ཁྲིམས་བཤེར་རྩིས་མེད་བཏང་ཡོད་ཀྱང་སེམས་ཤུགས་ཆགས་མེད། རྒྱུ་མཚན་ནི་ཞུ་གཏུག་བརྒྱུད་རྒྱ་གཞུང་གིས་བོད་ནང་བཙན་གནོན་བྱས་པའི་དངོས་ཡོད་གནས་ཚུལ་འཛམ་གླིང་མི་མང་ལ་ཤེས་རྟོགས་བྱུང་དུ་བཅུག་ཡོད་སྟབས། ལོ་མང་རིང་དཀའ་ལས་བརྒྱབ་པ་འབྲས་མེད་དུ་གྱུར་མེད། དེར་བརྟེན་གནད་དོན་དེ་ལ་དོ་ཁུར་གནང་མཁན་གྱི་བོད་མི་དང་འཛམ་གླིང་མི་མང་སེམས་ཤུགས་མ་ཆགས་པར་མུ་མཐུད་དུ་ལམ་ཐབས་སྣ་ཚོགས་བརྒྱུད་དེ། རྒྱལ་སྤྱིའི་སྤྱི་ཚོགས་ལ་བོད་དོན་ངོ་སྤྲོད་བྱེད་དགོས་པའི་འབོད་སྐུལ་གནང་འདུག
སི་པིན་སྲིད་འཛིན་ཚོགས་པས་བཅའ་ཁྲིམས་ལ་ཐབས་བརྒྱ་ཇུས་སྟོང་གིས་ཚོད་འཛིན་བྱས་པའི་བྱ་སྤྱོད་དེར། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་སོགས་རྒྱལ་སྤྱིའི་ཚོགས་སྡེ་ཁག་ ༡༢༢ ཙམ་གྱིས། སི་པིན་གྲོས་ཚོགས་ཀྱིས་རྒྱལ་སྤྱིའི་བཅའ་ཁྲིམས་ཀྱི་འོས་འགན་རྒྱུན་འཁྱོངས་དང་ཡོངས་ཁྱབ་བདག་དབང་སྲུང་སྐྱོང་དགོས་པའི་འབོད་སྐུལ་བྱས་ཡོད་པ་མ་ཟད། ཟླ་འདིའི་ཕྱི་ཚེས་ ༡༣ ཉིན་སི་པིན་སྤྱི་ཚོགས་རིང་ལུགས་ལས་མི་ཚོགས་པས། སྲིད་འཛིན་ཚོགས་པའི་བྱ་སྤྱོད་དེ་སི་པིན་ཀྱི་རྩ་ཁྲིམས་དང་འགལ་ཡོད་པའི་ཁྲིམས་གཏུག་བྱས་པ་སོགས་སི་པིན་མི་མང་དང་རྒྱལ་སྤྱིའི་ཐོག་ནས་སྐྱོན་བརྗོད་མང་པོ་བྱེད་བཞིན་ཡོད་འདུག
གསར་འགོད་པ། པདྨ་མཚོ།
དངུལ་དངོས་ཀྱི་མདུན་ནས་དྲང་བདེན་ཟེར་བར་ལྕི་ཚད་མི་འདུག
་་་་་་ རྒྱ་ནག་གི་སྲིད་འཛིན་ཟུར་པ་ཅང་ཙེ་མེན་དང་ལིས་ཕུང་སོགས་མཐོ་རིམ་དཔོན་རིགས་ ༥ ལ་དངོས་སུ་ཁྲིམས་བཤེར་བྱ་རྒྱུ་གཏན་འབེབས་བྱུང་བ་བསྒྲགས་ཡོད་པ་མ་ཟད། རྒྱལ་སྤྱིའི་ཉེས་དོན་ཉེན་རྟོག་རྩ་འཛུགས་ལ་ཁོ་ཚོ་འཛིན་བཟུང་དགོས་པའི་བཀའ་རྒྱ་བཏང་ཡོད་ཀྱང་། རྒྱ་གཞུང་གི་གནོན་ཤུགས་འོག ཉེ་སྔོན་སི་པིན་མཐོ་རིམ་ཁྲིམས་ཁང་གིས་བཅའ་ཁྲིམས་ལ་བསྐྱར་བཅོས་བྱས་ཏེ། ཟླ་འདིའི་ཕྱི་ཚེས་ ༢༣ ཉིན་རྒྱ་ནག་གི་དཔོན་རིགས་ ༥ འཇུ་བཟུང་ཁྲིམས་བཤེར་བྱེད་པའི་་བཀའ་ཁྱབ་རྩིས་མེད་བཏང་ཡོད་འདུག ་་་་་་་