༧གོང་ས་མཆོག་གིས་བོད་པའི་ཆོས་བརྒྱུད་སོ་སོའི་ཆོས་སྡེ་དག་ཏུ་བཅོམ་ལྡན་འདས་ཀྱི་བསླབ་པ་གསུམ་གྱི་ཉམས་ལེན་མིང་དོན་མཚུངས་པ་ཞིག་ཡོད་མེད་དང་། གལ་སྲིད་འཐུས་ཤོར་འགྲོ་བཞིན་པའི་རིགས་ཡོད་ན་ཧ་ཅང་གཟབ་ནན་ཆེན་པོས་བཅོས་བསྒྱུར་གཏོང་དགོས་སྐོར། ཧི་མ་ལ་ཡའི་རི་རྒྱུད་ཁག་གིས་སོ་སོར་ཡུལ་སྐད་མ་འདྲ་བ་རེ་ཡོད་པ་དེར་བདག་པོ་རྒྱག་རྒྱུ་གལ་ཆེན་ཡིན་ཡང་། ནང་ཆོས་ལ་སློབ་གཉེར་མཐར་སོན་པ་ཞིག་གནང་རྒྱུར་ངེས་པར་དུ་བོད་ཡིག་ཡག་པོ་སྦྱོང་གལ་ཆེ་སྐོར་སོགས་གསུངས་སོང་།
དེ་རིང་ཞོགས་པར་༸གོང་ས་མཆོག་གིས་ལ་དྭགས་ཞི་བའི་ཚལ་གསུང་ཆོས་རྭ་བར་དགེ་འདུན་གྱི་སྡེ་མཉམ་དུ་དུས་འཁོར་གྱི་ཆོ་ག་གསོག་བསྒྲུབ་གནང་ཡོད་པ་དང་། ཉིན་རྒྱབ་དགའ་ལྡན་ཁྲི་རིན་པོ་མཆོག་དང་ས་སྐྱའི་གདུང་སྲས་མཆོག འབྲི་གུང་རིན་པོ་ཆེ་མཆོག བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་སོགས་གཙོ་བོར་གྱུར་བའི་བླ་སྤྲུལ་དགེ་བཤེས་དང་མི་མང་ཆིག་འབུམ་བཞི་ཁྲི་བརྒལ་བ་འདུ་འཛོམས་ཐོག ༸གོང་ས་མཆོག་གིས་དུས་དབང་མགོ་འཛུགས་དང་འབྲེལ་ནས་བཀའ་སློབ་གནང་དོན། དེ་རིང་འདིར་དགའ་ལྡན་ཁྲི་རིན་པོ་མཆོག་དང་གདན་ས་ཁག་གི་མཁན་པོ་ལས་ཟུར། དགེ་བཤེས་གང་འཚམ་ཕེབས་འདུག ང་རང་ཚོའི་བོད་ཀྱི་ལོ་རྒྱུའི་ནང་སེ་འབྲས་དགའ་གསུམ། བཀྲ་ཤིས་ལྷུན་པོ་སོགས་ལ་བཤད་གྲྭ་གལ་ཆེ་ཤོས་ཆགས་ཡོད། ང་ཚོ་བཙན་བྱོལ་ཆགས་ཡོད་ཀྱང་གནས་སྟངས་འོག་ཡག་ཐག་ཆོད་རེད། ད་དུང་ཉམས་པ་སོར་ཆུད་དང་མི་ཉམས་གོང་འཕེལ་གཏོང་རྒྱུ་ག་རེ་ཡོད་མེད་སྐོར་ཁ་སང་ཁྲི་རིན་པོ་ཆེ་མཆོག་དང་མཉམ་དུ་བཀའ་མོལ་རོབ་ཙམ་བྱུང་སོང་། དུས་དང་ཁོར་ཡུག་གི་འགྲོ་སྟངས་འཆར་ཅན་ཡོད་པ་དག་འགྲིག་བསྡད་བསམ་ནས་ལྷོད་གཡེང་མ་བཏང་བར་སློབ་གཉེར་ལ་འཐུས་ཤོར་ག་རེ་འགྲོ་བཞིན་ཡོད་མེད་དང་། འཐུས་ཤོར་འགྲོ་བཞིན་ཡོད་ན་རྒྱུ་རྐྱེན་ག་རེ་ཐོག་ནས་འགྲོ་བཞིན་ཡོད་པ་དག་འབྲེལ་ཡོད་ཚོས་དུས་དང་དུས་ནས་གོ་བསྡུར་གནང་རྒྱུ་གལ་ཆེན་པོ་རེད། ང་ཚོ་བཙན་བྱོལ་བ་ཆགས་ནས་ལོ་ ༥༥ ལྷག་ཕྱིན་ཏེ་མི་རབས་གསར་བ་སླེབ་བཞིན་ཡོད། ཁོང་ཚོས་མི་རབས་གོང་མའི་ཤེས་ཚད་ཀྱི་རྗེས་ཟིན་ཐུབ་ཀྱི་ཡོད་མེད་གཞི་ནས་ལྟ་དགོས། དེ་སྔ་མེད་པའི་གསར་བ་མང་པོ་བསླེབས་ཡོད་པ་དེའི་མཉེན་པོ་ཟེར་ན་འདྲ། གདོང་ལེན་བྱེད་པར་བསམ་བློ་གསར་བ་བཏང་ན་མ་གཏོགས་འཐུས་ཤོར་འགྲོ་རྒྱུའི་ཉེན་ཁ་མེད་པ་མ་རེད། དེར་བརྟེན། བདག་གི་རྩ་བའི་བླ་མ་ཁྲི་རིན་པོ་མཆོག་བཞུགས་པའི་ཐོག་ཁྱེད་རང་ཚོས་ཡིན་གཅིག་མིན་གཅིག་དོ་གལ་ཆེན་པོར་བརྩི་དགོས་ཞེས་ཞུ་འདོད་བྱུང་། ཞེས་གསུངས་སོང་།
༸གོང་ས་མཆོག་གིས་འབྲི་གུང་རིན་པོ་ཆེ་དང་ས་སྐྱ་གདོང་སྲས་གཉིས་རྣམ་གཉིས་ལ་དམིགས་ཏེ་གསུངས་དོན། དེ་རིང་འབྲི་གུང་རིན་པོ་ཆེ་དང་ས་སྐྱ་གདུང་སྲས་བཅས་ཕེབས་ཡོད་སྟབས། རང་རང་སོ་སོའི་ཆོས་སྡེ་ཁག་ཏུ་བཅོམ་ལྡན་གྱི་རྗེས་འབྲང་བསླབ་པ་གསུམ་གྱི་ཉམས་ལེན་ཡོད་པ་དེ་མིང་དོན་མཚུངས་བ་ཡོད་མེད་དང་། ལྷག་པར་དུ་ལྷོད་གཡེང་མ་བཏང་བར་ཡང་ནས་ཡང་དུ་གཟིགས་ཏེ་འབྲེལ་ཡོད་ཚོར་གོ་བསྡུར་གནང་རྒྱུ་ཧ་ཅང་གལ་ཆེན་པོ་རེད། བསླབ་པ་སློབ་གཉེར་དང་དགོན་པའི་སྒྲིག་ལམ་ཀུན་སྤྱོད་སོགས་ག་ལེར་ཉམས་ཆག་འགྲོ་བཞིན་པའི་ཁ་ཐུག་ལ་ཉེན་ཁ་ཞེ་དྲག་མེད་པ་འདྲ་བོ་ཡོད། ཉམས་ཆགས་གང་འཚམ་ཕྱིན་ནས་མངོན་གསལ་དོད་པོ་ཆགས་ཡོང་སྐབས་ལམ་སེང་བཟོ་བཅོས་རྒྱག་དགོས་ན་ཕྱོགས་མང་པོ་ཞིག་ལ་བལྟས་ནས་བཟོ་བཅོས་རྒྱག་དགོས་སྟབས། སྐྱོན་ཕྲན་བུ་ཤོར་སྐབས་གཟབ་གཟབ་དོ་སྣང་བྱས་ཏེ་བསྟན་པ་ཉམས་ཆག་མ་འགྲོ་བ་ཞིག་ལ་དགོངས་པ་བཞེས་རྒྱུ་གལ་ཆེན་པོ་རེད། བོད་ནང་ཆ་བཞག་ན་གུང་ཁྲན་ཏང་གི་བསམ་བློ་གུ་དོག་པོ་ཅན་དག་གིས་ཤེས་བཞིན་དུ་ཆོས་ལ་དམ་དྲག་བྱེད་ཀྱི་ཡོད་པ་རེད། ང་ཚོས་འདིར་བསྟན་པ་འཛིན་སྐྱོང་སྤེལ་གསུམ་བྱེད་ཀྱི་ཡོད་ཟེར་མཁན་སོ་སོའི་ངོས་ནས་རང་དབང་ལུང་པའི་ནང་ཚུགས་མ་ཚུད་པར་འཐུས་ཤོར་ཕྱིན་ན་ཧ་ཅང་ངོ་ཚ་བོ་རེད་དཱ། དེ་འདྲ་ཡིན་དུས་ཆོས་སྐྱོན་རེད་ཟེར་མཁན་གྱིས་དམ་དྲག་བྱེད་པ་དབྱིན་སྐད་ནང་ Understandable ལབ་ཆོག་གི་རེད། ཆོས་ཁས་ལེན་མཁན་སོ་སོའི་ངོས་ནས་ལྷོད་གཡེང་བཏང་ནས་འཐུས་ཤོར་ཕྱིན་ན་ཧ་ཅང་ཐབས་སྐྱོ་བོ་རེད། ཅེས་གསུངས་སོང་།
བོད་ཀྱི་སྐད་ཡིག་གལ་ཆེན་ཡིན་པའི་སྐོར་ལ་གསུངས་དོན། ང་རང་ཚོར་མཚོན་ན་བོད་པ་ཞིག་རེད། བོད་པ་ཞིག་གིས་སོ་སོའི་མི་རིགས་ཀྱི་ཞེན་ཁོག་བྱས་ཏེ་བོད་ཀྱི་སྐད་ཡིག་གལ་ཆེན་པོ་རེད་བ་ཙམ་མ་རེད། དེ་རིང་ཁ་སང་འཛམ་གླིང་འདིའི་སྒང་ལ་ནང་པ་སངས་རྒྱས་ཀྱི་ཆོས་སྤྱི་དང་ལྷག་པར་དུ་དཔལ་ན་ལེནྜའི་ཆོས་བརྒྱུད་ཟབ་ཅིང་བརླིང་བ་དེར་འགྲེལ་བཤད་མཐིལ་ཕྱིན་པ་རྒྱག་ཐུབ་མཁན་བོད་སྐད་རྩི་བཞིན་ཡོད། ཆོས་ལ་དོ་སྣང་བྱེད་མཁན་ཡིན་ན་བོད་སྐད་ལ་དོ་སྣང་བྱེད་དགོས་ཆགས་ཀྱི་ཡོད། དཔེར་ན། ལོ་བརྒྱ་ཕྲག་མང་པོའི་རིང་སོག་པོ་ཕྱི་ནང་གཉིས་གཙོས་ཨུ་རུ་སུའི་ཁོངས་གཏོགས་སུ་ཡོད་པའི་ཁེལ་མུག་ལ་སོགས་པའི་ས་ཁུལ་དག་བོད་ཀྱི་ཆོས་བརྒྱུད་འཛིན་མཁན་ཡིན་སྟབས། བོད་ཡིག་དང་བོད་སྐད་ཐོག་ནས་ནང་ཆོས་སློབ་སྦྱོང་བྱས་ཏེ་མཁས་པ་མང་པོ་ཐོན་ཡོད། ང་རང་གི་མི་ཚེ་ལ་ཆ་བཞག་ན། ངའི་དྲན་ཐོག་ལ་སེ་འབྲས་དགའ་གསུམ་ནང་སོག་པོའི་དགེ་བཤེས་བརྒྱ་ཕྲག་ཁ་ཤས་ཡོད་པ་རེད། ༡༩༧༩ ལོར་ང་རང་སོག་ཡུལ་དུ་ཐེངས་པོ་བསླེབས་པ་རེད། ལོ་ཙཱ་བ་མེད་ན་སྐད་ཤེས་ཀྱི་མི་འདུག་ཀྱང་། ཁོང་ཚོས་དྲི་བ་དབུ་ཅན་ཐོག་བྲིས་ནས་ཡོང་གི་འདུག ངས་དེའི་ལན་དབུ་ཅན་ནང་བྲིས་ནས་སྤྲད་ན་ཁོང་ཚོས་ཤེས་ཀྱི་འདུག དེ་སོག་པོ་ཚོས་བོད་པར་དགའ་ཞེན་བྱས་ཏེ་བོད་སྐད་བསླབ་པ་མ་རེད། ནང་ཆོས་ལ་སློབ་སྦྱོང་བྱེད་པར་སྐད་ཡིག་ཡག་ཤོས་བོད་ཡིག་ཡིན་སྟབས་ཁོང་ཚོས་བོད་ཡིག་སློབ་ཀྱི་ཡོད་པ་རེད། བོད་རིགས་ནང་ཆ་བཞག་ནའང་ཨ་མདོའི་སྐད་ཏོག་ཙམ་མ་འདྲ་བ་ཡོད་པ་རེད། མགོ་ལོག་གི་སྐད་ཏོག་ཙམ་མ་འདྲ་བ་ཡོད་པ་རེད། ཁམས་རྟ་བོར་ཆ་བཞག་ན་ལོག་སྐད་ཡོད་པ་རེད། ཡུལ་སྐད་ཕན་ཚུན་མི་འདྲ་ཡང་ཡི་གེ་འབྲི་དུས་གཅིག་གྱུར་ཡིན། ཞེས་དང་།
དེ་འདྲ་ཡིན་དུས་ཁྱེད་རང་ཚོ་ལ་དྭགས་ལ་སྐད་ཟུར་མེད་པ་འདྲ་བོ་འདུག ཁྱེད་རང་ཚོའི་སྐད་སྒྱུར་དེ་གང་འཚམ་གོ་ཡང་ཁ་ཤས་གོ་ཡི་མི་འདུག གང་ལྟར་ཁྱེད་ཚོར་ཡུལ་སྐད་ག་རེ་ཡོད་མེད་ཁྱད་མེད་པར་བོད་ཡིག་བསླབ་རྒྱུ་གལ་ཆེན་པོ་རེད། བཀའ་བསྟན་ལ་ལྟ་མི་དགོས་ཚེ་བོད་ཡིག་གཡུག་ཀྱང་སྐྱོན་མེད། དེ་མིན་བཀའ་བསྟན་ལ་དད་པ་ཡོད་ན་བོད་ཡིག་སློབ་དགོས། ད་ལྟའི་འཆར་བཀའ་བསྟན་པོ་ཏི་སུམ་བརྒྱ་དེ་ཧི་མ་ཡའི་རི་རྒྱུད་ས་ཁུལ་གྱི་སྐད་ཡིག་ནང་ཕལ་ཆེར་བསྒྱུར་ཡོད་པ་མ་རེད། གལ་སྲིད་བསྒྱུར་རྒྱུ་མགོ་འཛུགས་བྱས་ཀྱང་མི་རབས་གཅིག་གཉིས་འགོར་མདོག་ཁ་བོ་རེད། དེ་བསྒྱུར་བར་དཀའ་ངལ་དང་འགྲོ་སོང་། དུས་ཚོད་གཏོང་བ་ལས་བོད་ཡིག་སློབ་ན་ཡག་གི་རེད། སྔོན་མ་ངས་བོད་ཡིག་གལ་ཆེན་པོ་རེད་ཟེར་དུས་ལ་དྭགས་ཀྱི་གཞོན་ནུ་ཁ་ཤས་ཀྱིས་དེ་ལ་དྭགས་ཀྱི་ཆབ་སྲིད་རེད། ངས་ཆབ་སྲིད་ནང་ཐེ་གཏོགས་བྱེད་ཀྱི་མེད་ཟེར་མཁན་བྱུང་། དེར་ཁག་མི་འདུག སོ་སོས་མི་རིགས་ཀྱི་ཞེན་ཁོག་འདྲ་བྱས་ཏེ་ང་ཚོ་ལ་དྭགས་ལ་ལ་དྭགས་ཀྱི་སྐད་ཡོད་པར་བོད་ཡིག་བསླབ་དགོས་དོན་མེད་པ་དང་། མོན་པར་མོན་པའི་སྐད་ཡོད། འབྲས་ལྗོངས་ལ་འབྲས་ལྗོངས་ཀྱི་སྐད་ཡོད། སྦི་ཏེ་ལ་སྦི་ཏེ་ཀྱི་སྐད་ཡོད་ཟེར་ན་ཁྱེད་རང་ཚོས་ཀ་ཤཱ་སྐད་བརྒྱབ་ནས་དགེ་བཤེས་ཆགས་པ་མིན་པར་བོད་སྐད་བརྒྱབ་ནས་དགེ་བཤེས་ཆགས་པ་རེད། གང་ལྟར། ཧི་མ་ཡའི་རི་རྒྱུད་ཀྱི་ས་ཁུལ་དག་ལ་ཡུལ་སྐད་ཡོད་པ་སོ་སོས་བདག་པོ་རྒྱག་དགོས། ནང་ཆོས་སློབ་སྦྱོང་གི་སྟེང་ལ་སླེབ་ཡོང་སྐབས་ངས་བོད་ཡིག་ཤོད་ཀྱི་མེད་པར་བཀའ་བསྟན་གྱི་ཡི་གེ་དེ་བསླབ་དགོས་ཟེར་གྱི་ཡོད། ཅེས་གསུངས་སོང་།
སང་ཉིན་ཞོགས་པའི་ཆུ་ཚོད་ ༧ སྟེང་ ༸གོང་ས་མཆོག་གིས་ཐེངས་འདིའི་དུས་འཁོར་དབང་ཆེན་གྱི་ཆོས་ཞུ་བ་ཚང་མར་སྒྲོལ་དཀར་གྱི་ཚེ་དབང་གནང་རྒྱུ་དང་དེའི་རྗེས་རྟེན་བཞུགས་འབུལ་རྒྱུ་ཡིན་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ད་རེས་ལ་དྭགས་དུས་དབང་དང་འབྲེལ་ནས་༧གོང་ས་སྐྱབས་མགོན་ཆེན་པོ་མཆོག་གིས་བཀའ་གསུང་ཧ་ཅང་གནད་འགག་ཅན་རྐྱང་རྐྱང་གསུངས་གནང་འདུག
བོད་པའི་ཆོས་ལུགས་གྲུབ་མཐའ་ཁག་ལ་ཚ་འདྲི་ཞིག་བཏང་བཏང་བ་དེ་ཧ་ཅང་དུས་ཐོག་ཆར་བ་ལྟ་བུ་ཞིག་ཆགས་ཡོད་པ་རེད། ལྷག་དོན་དུ་རྙིང་མ་དང་བཀའ་བརྒྱུད་ལ་མཚོན་ན་ཕྱི་རྒྱལ་ཡུལ་གྲུ་ཁག་དང་བོད་དང་རྒྱ་ནག དེ་བཞིན་རྒྱ་བལ་འབྲུག་གསུམ་སོགས་ཀྱི་ནང་་དེང་སྐྱབས་གནས་ཚུལ་སྣ་ཚོགས་ཤིག་བྱུང་དང་འབྱུང་བཞིན་ཡོད་པ་ཚང་མས་མཁྱེན་གསལ་རེད། འདི་ལ་ལེགས་བཅོས་ཟེར་ན་འདྲ་ཕྱོགས་ཡོངས་ནས་ཡར་རྒྱས་དང་འཐུས་ཚང་ཡོང་ཐབས་ཤིག་མ་གནང་ན་ནམ་ཞིག་བོད་པ་ཚང་ལ་ཞབས་འདྲེན་ཞུ་་མཁན་ཞིག་ཆགས་རྒྱུ་ཡིན་པ་ཟུར་བལྟས་ལེབ་མཐོང་རེད་དོ།།།་