ཨུ་རུ་སུར་དཔལ་འབྱོར་ཉེས་ཆད་བཏང་།

ཨུ་རུ་སུའི་གཞུང་གིས་ཡུག་རེན་གྱེན་ལོག་ཤོག་ཁག་ལ་རྒྱབ་རོགས་བྱེད་ཀྱི་ཡོད་སྟབས་ཁ་སང་ཨ་རི་དང་ཡུ་རོབ་མཐུན་ཚོགས་ཀྱིས་ཨུ་རུ་སུར་དཔལ་འབྱོར་ཚོང་འབྲེལ་ཐོག་ཉེས་ཆད་བཏང་འདུག

ཁ་སང་ཨ་རི་དང་ཡུ་རོབ་མཐུན་ཚོགས་ཀྱིས་ཨུ་རུ་སུ་གཞུང་གིས་ཨུ་རུ་སུར་དགའ་མོས་བྱེད་མཁན་གྱི་ཡུག་རེན་གྱེན་ལོག་ཤོག་ཁག་ཚོར་རྒྱབ་སྐྱོར་བྱས་ཏེ། ཡུག་རེན་གྱི་བརྟན་བརླིང་སྲུང་སྐྱོབ་ལ་གཏོར་རྒོལ་གཏོང་གི་ཡོད་པའི་ཉེས་མིང་འོག ཨོ་བྷ་མས་ཨ་རིའི་ཁེ་ལས་དང་ཨུ་རུ་སུ་གཞུང་གི་སྟངས་འཛིན་འོག་ཡོད་པའི་རོ་སེ་ནཱེབ་རྡོ་སྣུམ་ཁེ་ལས་ (Rosneft oil company) དང་ཝུབ་དངུལ་རྩའི་ཁེ་ལས་ (VEB)། དེ་བཞིན། སྒེར་གཉེར་རྡོ་སྣུམ་ཁེ་ལས་ནཱོ་ཝ་ཌེག་ (Novatek) དང་སྒེར་གཉེར་དངུལ་ཁང་གྷ་ཛེ་པོར་རོམ་ (Gazprombank) བཅས་བར་གྱི་མཉམ་ལས་གྲོས་མཐུན་བཀག་སྡོམ་དང་། ཡུ་རོབ་མཐུན་ཚོགས་ཀྱིས་ཨུ་རུ་སུའི་ནང་ཡུ་རོབ་མ་འཛུགས་དངུལ་ཁང་ (European Investment Bank) དང་། ཡུ་རོབ་དངུལ་ཁང་ (European Bank) གཉིས་ཀྱིས་མ་དངུལ་གཏོང་མཚམས་འཇོག་རྒྱུ་དང་། ད་དུང་ཨ་རིའི་གཞུང་གིས། ད་ལོའི་ལོ་མཇུག་ཏུ་ཡུག་རེན་མངའ་འོག་ནས་རང་བཙན་རྩོད་བཞིན་ཡོད་པའི་ (Donetsk People’s Republic) དང་ (Luhansk People’s Republic) ཞེས་པའི་སྒྲིག་འཛུགས་གཉིས་དང་། ཨུ་རུ་སུའི་མཚོན་ཆ་བཟོ་གྲྭ་བྷལ་ཛལ་ཌི་ (Bazalt) དང་ཁཱ་ལ་ཤི་ནི་ཁཱོ་ (Kalashnikov)། དེ་བཞིན་རོ་སི་ཡཱ་དངུལ་ཁང་ (Rossiya Bank) བཅས་ལ་དཔལ་འབྱོར་གྱི་ཉེས་ཆད་གཏོང་རྒྱུ་ཡིན་ཚུལ་བརྗོད་འདུག

འདིའི་ཐད་ཨོ་བྷ་མས། ”དཔལ་འབྱོར་གྱི་ཉེས་ཆད་དེ་གལ་འགངས་ཆེན་པོ་ཞིག་ལ་བརྩིས་ཏེ་དམིགས་ཡུལ་གཞིར་ བཟུང་ཐག་གཅོད་བྱས་པ་ཞིག་ཡིན་སྟབས། ང་ཚོས་ཨུ་རུ་སུའི་དབུ་ཁྲིད་ཀྱིས་ཡུག་རེན་གྱི་གནད་དོན་ལ་ཐེ་ཇུས་བྱས་ན་ཨུ་རུ་སུར་དཔལ་འབྱོར་དང་ཆབ་སྲིད་གཉིས་ཐད་ནས་གྱོང་ཕོག་རྒྱུ་ཡིན་པ་ཤེས་རྟོགས་ཡོང་ཆེད་ཡིན།”€™ཞེས་བརྗོད་འདུག

ཨུ་རུ་སུའི་སྲིད་འཛིན་པུ་ཌིན་གྱིས། “€œཨུ་རུ་སུར་དཔལ་འབྱོར་གྱི་ཉེས་ཆད་བཏང་བ་དེས་རྒྱལ་ཁབ་ཀྱི་དཔལ་འབྱོར་དང་འཛུགས་སྐྲུན་འཕེལ་རྒྱས་ལ་ཤུགས་རྐྱེན་ཆེན་པོ་ཐེབས་རྒྱུ་ཡིན་པ་མ་ཟད། དེ་དང་མཉམ་དུ་ཨ་རི་དང་ཨུ་རུ་སུའི་འབྲེལ་ལམ་ལའང་དོ་ཕོག་འགྲོ་སྲིད།”ཅེས་དང་། ཨུ་རུ་སུའི་ཕྱི་སྲིད་བློན་ཆེན་གཞོན་པ་སར་གྷེ་ (Sergei Rybakov) ལགས་ཀྱིས། “ང་ཚོས་ཨ་རིས་ཨུ་རུ་སུར་དཔལ་འབྱོར་ཉེས་ཆད་བཏང་བ་དེར་ཞིབ་མཇུག་བྱས་ཏེ། ཆད་པ་གཅོད་མཁན་གྱི་འབྲེལ་ཡོད་ལས་བྱེད་དང་ཆབ་སྲིད་པར་འགོག་རྒོལ་མཐའ་གཅིག་ཏུ་བྱ་རྒྱུ་ཡིན།”ཞེས་སོགས་བརྗོད་འདུག

ཟླ་འདིའི་ཚེས་ ༡༤ ཉིན་ཨ་རིའི་ཕོ་བྲང་དཀར་པོས་ཨ་རིར་ཡོད་པའི་ཡུ་རོབ་མཐུན་ཚོགས་ཀྱི་རྒྱལ་ཁབ་ ༢༨ ཀྱི་གཞུང་ཚབ་དང་གྲོས་མོལ་བྱས་ཏེ། ཨུ་རུ་སུའི་རྒྱལ་མང་དཔལ་འབྱོར་ལ་དོ་ཕོག་འགྲོ་རྒྱུ་ཡིན་པའི་དཔལ་འབྱོར་གྱི་ཉེས་ཆད་རིམ་པ་གསུམ་པ་ (level 3 sanctions) གཅོད་རྒྱུ་ཐག་གཅོད་བྱས་བ་ཡིན་འདུག

ཨུ་རུ་སུའི་རོ་སེ་ནཱེབ་རྡོ་སྣུམ་ཁེ་ལས་ཀྱི་སྤྱི་ཁྱབ་འགན་འཛིན་སཱེ་ཆིན་ (Igor Sechin) ལགས་ཀྱིས། “ཡུག་རེན་གྱི་དཀའ་རྙོག་དང་རོ་སེ་ནཱེབ་རྡོ་སྣུམ་ཁེ་ལས་བར་འབྲེལ་བ་གང་ཡང་མེད་སྟབས། ང་ཚོའི་ཁེ་ལས་ཀྱང་དཔལ་འབྱོར་ཉེས་ཆད་གཏོང་རྒྱུའི་མིང་ཁོངས་སུ་བཅུག་པ་དེ་ནི་ཁྲིམས་མཐུན་དང་དྲང་བདེན་ཆགས་མེད།” ཅེས་བརྗོད་འདུག

ཨ་རིའི་རྒྱལ་ཡོངས་བཟོ་སྐྲུན་ཚན་པའི་མགྲིན་ཚབ་པས། “ཨ་རིས་ཕྱོགས་གཅིག་རྐྱང་པའི་ཐོག་ནས་ཨུ་རུ་སུར་དཔལ་འབྱོར་ཉེས་ཆད་བཏང་ཡོད་སྟབས། མ་འོངས་པར་ཨུ་རུ་སུ་ཙམ་མིན་པར་ཨ་རིའི་ཚོང་འབྲེལ་ཐད་ལའང་དོ་ཕོག་ཤུགས་ཆེན་འགྲོ་ངེས་རེད།”ཅེས་བརྗོད་འདུག

ཨོ་བྷ་མའི་ཐག་གཅོད་འདིར་ཨ་རིའི་སྤྱི་མཐུན་ཚོགས་པ་དང་དམངས་གཙོ་ཚོགས་པ་གཉིས་ཀྱི་གྲོས་ཚོགས་འཐུས་མི་མང་ཆེ་བས་རྒྱབ་སྐྱོར་བྱས་ཡོད་ཀྱང་། སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་མར་ཁོ་ (Marco Rubio) ལགས་གཙོས་འཐུས་མི་ཁག་ཅིག་གིས་སྐྱོན་བརྗོད་བྱས་ཡོད་འདུག

ཕྱི་ཟླ་ ༤ པའི་ཟླ་དཀྱིལ་ནས་ད་བར་ཡུག་རེན་གྱེན་ལོག་ཤོག་ཁག་གིས་ཡུག་རེན་གྱི་མི་སེར་དང་དམག་མི་ ༡༠༠༠ ལྷག་རྐྱེན་ལམ་དུ་བཏང་ཡོད་ཅིང་། ཟླ་འདིའི་ཚེས་ ༡༥ ཉིན་ཡུག་རེན་གྱེན་ལོག་ཤོག་ཁག་གིས་ཨུ་རུ་སུའི་རྒྱབ་རོགས་ལ་བརྟེན་ཏེ། ཡུག་རེན་ཤར་ཕྱོགས་ས་ཁུལ་གྱི་དམག་འཐབ་གནམ་གྲུ་ཞིག་ལ་མེ་ཤུགས་འཕུར་མདེལ་འཕངས་ཏེ་དམག་མི་ ༡༡ བསད་ཡོད་སྟབས་ཨ་རིས་ད་ལྟ་ཡུག་རེན་གྱི་ས་མཚམས་ཁུལ་དུ་ཨུ་རུ་སུའི་དམག་མི་ ༡༠༠༠༠ ནས་ ༡༢༠༠༠ བར་ཡོད་པར་ངོས་འཛིན་བྱེད་བཞིན་ཡོད་འདུག

གསར་འགོད་པ། དོན་གྲུབ།