རྡོ་རྗེ་གདན་ཁུལ་དུ་ཤ་ཆང་སྤང་དགོས།

གནས་མཆོག་རྡོ་རྗེ་གདན་གྱི་བྱང་ཆུབ་ཆོས་ཚོགས་དང་ཁྱབ་འཇུག་ཆོས་ཚོགས་མཐུན་མོང་གིས་མངའ་སྡེ་གཞུང་ལ་སྙན་ཞུ་ཕུལ་ཏེ་རྡོ་རྗེ་གདན་དང་གྷ་ཡཱ་གྲོང་ཁྱེར་དུ་ཤ་ཆང་འགོག་དགོས་སྐོར་བརྗོད་ཡོད་འདུག

ཁ་སང་ཚེས་ ༡༨ ཉིན་རྒྱ་གར་ལྷོ་ཕྱོགས་བྷེང་ལོར་ས་གནས་ཀྱི་ཉིན་རེའི་གསར་ཤོག་ཌེ་ཀེན་ཧེ་རེལ་ཌི་(Deccan Herald)ཞེས་པའི་ནང་གསར་འགོད་པ་ཨ་ཇེ་ཀུ་མར་གྱིས་པཌ་ཎ་(Patna)ཞུ་བས་གནས་ཚུལ་སྤེལ་བར། རྒྱ་གར་ཤར་ཕྱོགས་བྷི་ཧར་(Bihar)མངའ་སྡེ་ནང་ཡོད་པའི་གྷ་ཡཱ་(Gaya)གྲོང་ཁྱེར་དང་། གནས་མཆོག་རྡོ་རྗེ་གདན་ཏེ་བྷོ་དྷི་གྷ་ཡཱ་(Bodh Gaya)གཉིས་ཀྱི་ཆོས་ལུགས་ཀྱི་དབུ་ཁྲིད་ཚོས་མཉམ་འབྲེལ་ཐོག་མངའ་སྡེ་གཞུང་ལ་སྙན་ཞུ་ཕུལ་ཏེ། གྲོང་ཁྱེར་དེ་གཉིས་ནང་ཤ་དང་ཆང་བཀག་སྡོམ་བྱས་ཏེ་དཀར་ཟས་དང་ཆང་རག་མི་སྤྱོད་པའི་གནས་ཤིག་ཏུ་ཁྱབ་སྒྲག་བྱ་དགོས་སྐོར་འཁོད་ཡོད་འདུག

གནས་ཚུལ་ནང་འཁོད་པར། རྡོ་རྗེ་གདན་གྱི་མ་ཧཱ་བྷོ་དྷི་ཚོགས་པ་(བྱང་ཆུབ་ཆེན་པོའི་ཆོས་ཚོགས།)དང་། ཁྱབ་འཇུག་ཞབས་ལྷ་ཁང་འཛིན་སྐྱོང་ཚོགས་ཆུང་གཉིས་མཉམ་ཞུགས་ཀྱི་ཚོགས་འདུ་ཞིག་རྡོ་རྗེ་གདན་གྱི་ཤྲི་ལདྐའི་དགོན་པའི་ནང་ཚོགས་ཏེ། བྷོ་དྷི་གྷ་ཡཱ་དང་གྷ་ཡཱ་གཉིས་ནང་ཤ་ཆང་བཀག་སྡོམ་གྱི་གྲོས་ཆོད་དེ་བཞག་ཡོད་འདུག རྡོ་རྗེ་གདན་ནི་ནང་པ་ཚོས་གནས་རྩ་བ་ཆེན་དུ་རྩི་བཞིན་ཡོད་ཅིང་། གནས་དེ་རུ་རྒྱལ་སྲས་གཞོན་ནུ་དོན་གྲུབ་གོ་ཏ་མས་ད་ནས་ལོ་ ༢༥༥༠ ཙམ་གྱི་སྔོན་ལ་སངས་རྒྱས་ཤིང་། དེའི་རྗེས་ཁོང་གིས་འཛམ་གླིང་གི་ཆོས་ལུགས་རྙིང་ཤོས་གྲས་ནང་པ་ཞེས་པ་སྲོལ་གཏོད་མཛད། དེ་བཞིན་དུ་གྷ་ཡཱ་ཞེས་པའི་གནས་དེར་ཁྱབ་འཇུག་ཞབས་ཀྱི་ལྷ་ཁང་ཡོད་སྟབས་གནས་ཧ་ཅང་གལ་ཆེན་དུ་གྱུར་ཡོད་ཅིང་། དེར་ཕྱོགས་མཐའ་ཁག་ནས་གནས་མཇལ་མཆོད་འབུལ་བྱེད་མཁན་རྒྱུན་མི་ཆད་པར་ཡོང་གི་ཡོད།

རེས་གཟའ་ཕུར་བུའི་ཉིན་མ་ཧཱ་བྷོ་དྷི་ཚོགས་པའི་ཚོགས་མི་ཞིག་གིས་བརྗོད་དོན། ཚོགས་འདུ་དེར་ཁྱབ་འཇུག་ཞབས་ལྷ་ཁང་འཛིན་སྐྱོང་ཚོགས་ཆུང་དང་དེ་མིན་གྱི་དགོན་པ་འདྲ་མིན་གྱི་འཐུས་མི་མཉམ་ཞུགས་ཐོག་སྤྱི་མོས་གྲོས་ཆོད་བཞག་སྟེ། ཨུ་ཏ་ར་ཁན་ཌི་(Uttarakhand)མངའ་སྡེའི་གཞུང་གིས་ཅར་དཱམ་(char dham)དང་ཧ་རི་དྷཝར་(Haridwar)གཉིས་ནང་དཀར་ཟས་སྤྱོད་པ་དང་ཆང་རག་སྤྱོད་མི་ཆོག་པའི་གནས་སུ་ཁྱབ་བསྒྲགས་བྱས་ཡོད་པ་བཞིན། གྷ་ཡཱ་དང་རྡོ་རྗེ་གདན་གཉིས་ཀྱང་དཀར་ཟས་སྤྱོད་པ་དང་ཆང་རག་སྤྱོད་མི་ཆོག་པའི་གནས་སུ་ཁྱབ་བསྒྲགས་བྱ་དགོས་པའི་སྐོར་མངའ་སྡེ་གཞུང་ལ་སྙན་ཞུ་འབུལ་རྒྱུ་རེད། ཅེས་བརྗོད་འདུག མི་དེས་མུ་མཐུད་དུ་བརྗོད་དོན། གྷ་ཡཱ་དང་རྡོ་རྗེ་གདན་གཉིས་ནི་ཁྱབ་འཇུག་དང་སྟོན་པ་སངས་རྒྱས་གཉིས་ཀྱི་གནས་རྩ་ཆེན་ཞིག་ཡིན་པ་ཡོངས་གྲགས་ཡིན། ཆོས་ལུགས་དེ་གཉིས་ཀས་འཚེ་བ་མེད་པ་སྨྲ་བཞིན་ཡོད། འོན་ཀྱང་ཉེ་ཆར་ནས་བཟུང་ཤ་ཡོད་ཀྱི་ཟས་རིགས་དང་ཆང་རག་ཉོ་ཚོང་ཇེ་མང་དུ་ཕྱིན་ཡོད་སྟབས། ཆོས་ཀྱི་ལྟེ་གནས་འདི་གཉིས་ནང་ཆོས་ལུགས་ཀྱི་ངོ་བོ་དང་དགོངས་དོན་སྤུས་གཙང་ཞིག་འཛིན་སྐྱོང་སྤེལ་གསུམ་ཡོང་ཆེད། ཤ་ཆང་གཉིས་ཀྱི་བཟའ་བཏུང་བཀག་སྡོམ་བྱེད་པའི་དུས་ལ་བབ་ཡོད་པ་རེད། ཅེས་བརྗོད་བྱུང་།

ཤྲི་ལདྐའི་དགོན་པའི་དྲུང་ཆེ་གནས་བརྟན་ཤི་བ་ལི་ཡིས་བརྗོད་དོན། ས་གནས་འདི་གཉིས་ཀྱི་མགྲོན་ཁང་དང་ཟ་ཁང་། ཚོང་གི་ལྟེ་གནས་མང་པོས་སངས་རྒྱས་ཀྱི་མཚན་བེད་སྤྱོད་བྱེད་ཅིང་། ཚོང་པ་སྦྱིན་བདག་དང་འགན་འཁུར་བ་རྣམས་ཀྱིས་དཀར་ཟས་མིན་པའི་ཟས་དང་ཆང་རག་གི་གསོལ་སྟོན་བྱེད་ཀྱི་ཡོད། དེ་ནི་སངས་རྒྱས་ཀྱིས་ལམ་སྟོན་མཛད་པའི་འཚེ་བ་མེད་པ་དང་ཞི་བདེའི་དགོངས་པ་དང་ཡོངས་སུ་འགལ་ཡོད། ཅེས་བརྗོད་སོང་། ཞེས་གནས་ཚུལ་ནང་འཁོད་འདུག་པ་བསྡུ་སྒྲིག་གིས་བོད་བསྒྱུར་བྱས།