སིམ་ལའི་ཆིངས་ཡིག་བཞག་སྟེ་ལོ་ངོ་ཧྲིལ་པོ་ ༡༠༠ འཁོར་བའི་བགྲོ་གླེང་ཐོག་ཆིངས་ཡིག་དེས་བོད་རང་བཙན་གྱི་རྒྱལ་ཁབ་ཅིག་ཡིན་པ་མཚོན་ཡོད་ཀྱང་བོད་ས་ཡོངས་རྫོཊ་གཅིག་གྱུར་ཡིན་པའི་ལོ་རྒྱུས་ལ་གནོད་བསྐྱལ་ཡོད་ཟེར།
ཕྱི་ལོ་ ༡༩༡༤ ལོར་བོད་རྒྱ་དབྱིན་གསུམ་གྱི་བར་སིམ་ལའི་ཆིངས་ཡིག་བཞག་སྟེ་ལོ་ངོ་ཧྲིལ་པོ་ ༡༠༠ འཁོར་བའི་སྐབས་དང་བསྟུན་ཏེ། ཁ་སང་ཕྱི་ཚེས་ ༢༣ ཉིན་གྱི་ཕྱི་དྲོའི་ཆུ་ཚོད་ ༥།༣༠ ཙམ་ལ། བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག དྷ་ས་ཉིན་མོའི་སློབ་གྲྭའི་ཚོགས་ཁང་དུ་བགྲོ་གླེང་ཞིག་སྐོང་ཚོགས་གནང་ཡོད་པ་དང་། བགྲོ་གླེང་ཐོག་སྤྱི་འཐུས་བློ་བཟང་ཡེ་ཤེས་ལགས་དང་དབྱིན་ཇིའི་གཙུག་ལག་སློབ་ཆེན་ (University of Westminister )གྱི་ཆེད་མཁས་པ་དྷི་བྷི་ཞི་ཨཱ་ནན་ཌི་ (Dibyesh Anand) ལགས། དེ་བཞིན་ལས་འགུལ་བ་བསྟན་འཛིན་བརྩོན་འགྲུས་ལགས་བཅས་ཀྱིས་མེག་མོ་ཧན་ས་ཐིག་ (McMahon Line) དང་། རྒྱ་གར་དང་རྒྱ་ནག་བར་གྱི་གྲོས་མཐུན་དོན་ཚན་ལྔ། དེ་བཞིན། ད་ལྟའི་ཧིན་རྒྱ་བར་གྱི་མཐའ་མཚམས་རྩོད་རྙོག་བཅས་ཀྱི་བརྗོད་གཞིའི་ཐོག་གཏམ་བཤད་གནང་ཡོད་པ་དང་། དེ་རྗེས་མི་མང་གི་དྲི་བར་ལན་འདེབས་ཀྱང་གནང་ཡོད་འདུག
བགྲོ་གླེང་ཐོག་ཆེད་མཁས་པ་དྷི་བྷི་ཞི་ལགས་ཀྱིས་བརྗོད་དོན། རྒྱ་གར་པ་ཀི་སི་ཐན་གཙོས་ཨེ་ཤ་ཡའི་ཡུལ་གྲུ་ཁག་གིས་རྒྱ་ནག་ལ་ཁ་གཏད་གཅོག་རྒྱུ་ཁག་པོ་ཡོད་པ་མ་ཟད། རྒྱ་ནག་ལ་ཁ་གཏད་གཅོག་རྒྱུའི་ནུས་པ་ཡོད་མཁན་གྱི་ནུབ་ཕྱོགས་རྒྱལ་ཁབ་ཁག་གིས་ཀྱང་ཁག་པོ་ཆགས་ཡོད། དཔེར་ན་ནོར་ཝེ་ཡིན་ན་སྔོན་མ་བོད་དོན་ཐོག་རྒྱབ་སྐྱོར་ཅུང་བྱེད་མཁན་ཞིག་ཆགས་ ཡོད་ཀྱང་། རྒྱ་གཞུང་གིས་གནོན་ཤུགས་སྤྲོད་བཞིན་ཡོད་པར་བརྟེན་ད་ལྟ་སྔོན་མ་དང་བསྡུར་ན་བོད་དོན་ཐོག་རྒྱབ་སྐྱོར་དེ་ཙམ་བྱེད་ཀྱི་མེད། ལོ་རྒྱུས་ཐོག་བོད་རང་བཙན་གཙང་མ་ཡིན་ཡང་བོད་དོན་གྱི་མཐའ་མའི་ཐག་གཅོད་དེ་རང་བཙན་དང་། རྒྱ་འོག་ཏུ་འདུག་རྒྱུ་གང་ཡིན་བོད་མི་རང་ལ་ཐག་གཅོད་བྱེད་རྒྱུའི་དབང་ཆ་ཡོད་པ་ལས། རྒྱ་ནག་དང་རྒྱ་གར་གཞུང་སོགས་ལ་དབང་ཆ་ཡོད་པ་མ་རེད་ཅེས་སོགས་གསུངས་སོང་།
སྤྱི་འཐུས་བློ་བཟང་ཡེ་ཤེས་ལགས་ཀྱིས་སིམ་ལའི་ཆིངས་འཇོག་སྐབས་ཀྱི་ལོ་རྒྱུས་ངོ་སྤྲོད་གནང་སྐབས། ང་ཚོས་བསམ་བློ་ཞིག་གཏོང་དུས་སྤོབས་པ་སྐྱེས་བ་ཞིག་ལ་སིམ་ལའི་ཆིངས་ཡིག་དེ་རྒྱལ་ཁབ་རང་བཙན་ཡིན་པའི་ངོ་བོའི་ཐོག་ནས་བཞག་པ་རེད་ཟེར་ནས་ང་ཚོར་བཤད་སྟངས་གཅིག་ཡོད་པ་དང་། ཡང་ཕྱོགས་གཞན་པ་ཞིག་ནས་བལྟས་ཡོང་དུས་བོད་ཆེ་བ་དང་ཆུང་བ་ཟེར་ནས་བོད་ཕྱི་དང་ནང་ཟེར་ཡོང་དུས། རྒྱལ་སྤྱིའི་སྡིངས་ཆ་ཆེན་པོ་ཞིག་གི་ནང་སྐད་ཆ་གསལ་བོ་མེད་པ་དེ་སིམ་ལའི་ཆིངས་ཡིག་སྐབས་སུ་ཆགས་འདུག་སྟབས། དེས་ང་ཚོའི་ལོ་རྒྱུས་ལ་གནོད་བསྐྱལ་ཡོད་པ་རེད། སྐབས་དེར་བློན་ཆེན་མཆོག་གིས་རྩ་བ་ཉིད་ནས་ངོས་ལེན་མ་གནང་པར་མཐའ་གཅིག་ཏུ་ངོ་རྒོལ་བྱས་ཏེ། དུས་ཡུན་རིང་པོ་ཞེ་དྲགས་ཤིག་ཏུ་འབད་བརྩོན་གནང་འདུག ཡིན་ནའང་། དེ་ཁས་མ་བླངས་ན་གཏན་ནས་འགྲིག་གི་མ་རེད་ཟེར་ནས་རྒྱ་གར་དང་དབྱིན་ཇིའི་སྐུ་ཚབ་ཀྱིས་གནོན་ཤུགས་སྤྲད་དེ་མཐའ་མར་མཚན་རྟགས་བཀོད་དགོས་བྱུང་བ་རེད། ཅེས་སོགས་བརྗོད་ཡོད་འདུག
དེ་རྗེས་བསྟན་འཛིན་བརྩོན་འགྲུས་ལགས་ཀྱིས། ཕྱི་ལོ་ ༡༩༤༩ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་དབུ་མ་བརྙེས་གོང་བོད་ནི་རང་བཙན་ལྡན་པའི་རྒྱལ་ཁབ་ཅིག་ཡིན་ལ། རྒྱ་གར་གྱིས་བོད་ལོ་རྒྱུས་ཐོག་རང་བཙན་ཡིན་པ་ངོས་ལེན་གནང་དགོས་པ་རེད། ངས་རྒྱ་གར་གྱི་གྲོགས་པོ་ཚོར། ཁྱེད་ཚོས་བོད་ལོ་རྒྱུས་ཐོག་རང་བཙན་ཡིན་པ་ངོས་ལེན་མ་བྱས་ཚེ། ཨ་རུ་ནཱ་ཅལ་མངའ་སྡེ་རྒྱ་གར་གྱི་མངའ་ཁོངས་ཡིན་པ་བཤད་ཐུབ་ཀྱི་མེད་ཅེས་རྩོད་གླེང་བྱེད་ཀྱི་ཡོད། གང་ཡིན་ཟེར་ན། ཨ་རུ་ནཱ་ཅལ་མངའ་སྡེ་ནི་རྒྱ་གར་བཙན་བཟུང་བྱེད་མཁན་དབྱིན་ཇི་དང་བོད་གཉིས་ཆང་ས་བརྒྱབ་ནས་བྱུང་བའི་ཕྲུ་གུ་ཞིག་རེད། གལ་སྲིད། ཁྱེད་ཀྱིས་པ་ལགས་ངོས་འཛིན་མ་ཐུབ་ན་ཁྱེད་ཀྱིས་རང་གི་ཕྲུ་གུ་ཁྲིམས་མཐུན་ཡིན་པར་ཇི་ལྟར་ངོས་འཛིན་ཐུབ་བམ། དེར་བརྟེན་རྒྱ་གར་གྱིས་ངེས་པར་དུ་མངོན་གསལ་དོད་པོས་ལོ་རྒྱུས་ཁྲོད་བོད་རང་བཙན་གྱི་རྒྱལ་ཁབ་ཅིག་ཡིན་པ་གསལ་བསྒྲགས་བྱེད་དགོས་པ་རེད། དེ་མིན་ཨ་རུ་ནཱ་ཅལ་རྒྱ་གར་གྱི་མངའ་ཁོངས་ཡིན་པ་བརྗོད་རྒྱུ་ལྷག་མེད་པ་རེད། ཅེས་སོགས་བརྗོད་སོང་།
གསར་འགོད་པ། པདྨ་མཚོ།
རྩ་བའི་སློབ་ཕྲུག་ཚོགས་པ་ཞིག་ཡིན་ན་སློབ་ཕྲུག་ན་གཞོན་རྣམས་ལ་དབང་བའི་ཚོགས་པ་ཞིག་དགོས་པ་ལས། མི་རྒན་ད་དུང་རྒྱུན་ལས་ནང་སྡོད་དེ། དེས་གར་ཁྲིད་དུ་འགྱུར་བ་ཡིན་ན་ཁྱད་མཚར། ལྷག་པར་དུ་དགོས་པའི་དབུ་མའི་ལམ་ལ་ནུས་པ་མཉམ་སྤུངས་མ་བྱས་པར། དབུ་མའི་ལམ་ལ་ཟུར་ཟའི་རྣམ་པ་ཅན་གྱི་ལས་འགུལ་སྤེལ་བ་སྔོན་མ་ཚོགས་པ་འདི་ཉིད་ཀྱི་མིང་ཐོག་ནས་ཕྱི་ལོ་༡༩༡༢ལོའི་ཁྱབ་སྒྲག་གི་ལོ་༡༠༠འཁོར་བའི་ལས་འགུལ་སྤེལ་བ་དང་། དེ་རིང་ཡང་དེ་དང་ཆ་འདྲ་བའི་བགྲོ་གླེང་ལ་བསྙད་བཏགས་པའི་ལས་འགུལ་འདི་སྤེལ།
ཨརཱུཎཅལ་སྐོར་སྐད་ཆ་བཤད་པ་དེ་དོན་གྱི་བདག་པོ་ས་གནས་དེའི་ཡུལ་མི་རྣམས་ལ་སྐད་ཆ་དེ་ཁོ་ཚོའི་སེམས་ལ་བཟོད་དུ་མེད་པའི་སྐད་ཆ་ཞིག་ཏུ་འགྲོ་ཉེན་ཡོད་པའང་ཚོད་དཔག་མ་བྱས་པའི་བབ་ཅོལ་རེད།
ཁ་སེང་ཕྱི་ཟླ་༣པའི་ནང་དྷ་སའི་བོད་ཀྱི་འགྲེམས་སྟོན་ཁང་གི་ཁ་སྤྲོད་དྲན་རྟེན་ཡོད་ས་དེར་དགོང་མོ་སྲོད་ཙམ་ལ་མི་ཉི་ཤུ་ཙམ་འཛོམས་པའི་མར་མེའི་ཁྲོམ་སྐོར་མཇུག་བསྡུའི་གཏམ་བཤད་བྱེད་ཀྱི་འདུག །ནུབ་ཕྱོགས་པ་ཞིག་གིས་གཅིག་ཤོད་ཀྱི་འདུག །རྒྱ་གར་བ་གནས་མཇལ་བ་འགའ་གཙུག་ལག་ཁང་ལ་མཆོད་མཇལ་དུ་འགྲོ་བའི་ལམ་དུ་གཏམ་བཤད་བྱེད་ས་དེ་ནས་ཡར་ཕྱིན་སོང་། ཁོ་ཚོ་ནང་ཁུལ་རྒྱ་གར་སྐད་ཐོག་སྐད་ཆ་ཤོད་ཀྱིན་ཕྱིན་སོང། སྐད་ཆེན་པོ་གང་ཡང་མ་རེད། དེ་ནས་གློ་བུར་དུ་རྒྱ་གར་བ་ཁོ་ཚོ་ལ་དཔྲལ་བར་རས་ཅན་པའི་མི་ཞིག་གིས་ཁྱོད་ཚོ་བསམ་བློ་གཏོང་མི་ཐུབ་མཁན་སྐད་ཅོར་ཆེན་པོ་འདི་འདྲ་རྒྱག་གི་འདུག་ཅེས་ཤོད་ཤོད་བཏང་སོང་། རྒྱ་གར་བ་ཁོ་ཚོ་ནི་སུ་ལ་ཟེར་གྱི་ཡོད་དམ་སེམས་པའི་ཕར་བལྟས་ཚུར་བལྟས་བྱས་ཏེ་བརྡ་ལན་མ་སྤྲད་པར་སྐས་འཛེགས་འཛེགས་ཏེ་ཡར་ཕྱིན་སོང་། མི་རས་ཅན་པ་དེ་ནི་ཁོང་ཁྲོའི་རྣམ་པ་དྲག་པོས་ང་ཚོ་མི་རེ་ཟུང་ཁོ་པའི་ཕྱོགས་སུ་ལྟ་བཞིན་སྡོད་ཡོད་པ་ལ་ཚུར་གདོང་བསྟན་ཏེ་ཧིནྡིའི་སྐད་ཐོག་མུག་ཤི་མང་དག་ཅིག་བགྲངས་སོང་། ང་ཚོས་ཧིནྡི་ཤེས་ཀྱི་མེད་པ་ལྟར་མཐོང་ཏེ་ཁོ་པ་གཅིག་པུས་སྐད་ཤེས་ཀྱི་ཡོད་ཅེས་ངོམས་པ་ལྟ་བུའི་རྣམ་རྟོག་ཤར་བྱུང་།
གནས་མཇལ་བ་རྣམས་ཀྱི་སྐད་སྒྲ་ཆུང་བར་ཁོ་པ་དེ་འདྲ་ཞེ་ཁྲོ་བ་ཅི་ཡིན་ནམ་བསམ་པའི་དྭོགས་པ་ཞིག་བྱུང་། ཁོ་ཚོའི་ལུང་པའི་ནང་སྐྱབས་བཅོལ་ཏེ་ཡོད་པ་ལ་ད་དུང་ཉེས་འདོགས་ཀྱིས་ཤོད་ཤོད་གཏོང་བ་ག་ལ་རུང་ཞེས་ཀྱང་དྲན།
ཏག་ཏག་སྐར་མ་གཉིས་ཙམ་རྗེས་གཏམ་བཤད་དང་པོ་དེ་ཚར་བ་ན་དེའི་རྗེས་ཀྱི་གཏམ་བཤད་པ་ནི་མི་རས་ཅན་པ་ཁོ་རེད་འདུག །དེར་འདུས་པའི་མི་རྣམས་ནི་ཕལ་ཆེ་བ་བོད་པ་ཡིན་འདུག་ཀྱང་ཁོས་དབྱིན་སྐད་ཐོག་གཏམ་བཤད་བྱས་སོང་།
ངས་ནི་གཏམ་བཤད་གི་དོན་ལ་རྣ་བ་དང་སེམས་གཏད་པའི་ཚབ་ཏུ་སེམས་ནང་བསམ་བློ་ངང་གིས་འཁོར་བ་ནི། ཡཱ། ད་གིན་རྒྱ་གར་གནས་མཇལ་བ་ཉེས་མེད་རྣམས་ལ་ཁོས་སྐད་ཆ་རྩུབ་པོ་དེ་འདྲ་བཤད་པ་དེ། ཁོ་རང་གི་གཏམ་བཤད་ལ་གནོད་པའི་དྭོགས་པས་ཡིན་པ་འདྲ་སྟེ། འབྱུང་བ་གཉིས་སྣེ་སྦྱོར་བའི་རྗེས་དཔག་ཅིག་བྱས་པ་ཡིན།
འདིར་བྲིས་པ་འདི་སྡང་སེམས་དང་འཁོན་སེམས་ཀྱིས་ཀུན་ནས་བསླངས་པ་ནི་མིན། སྤྱི་དོན་ཡིག་ཐོག་ཏུ་བཀོད་པ་ཡིན།།