བོད་མིའི་སྒྲིག་འཛུགས་ཆེས་མཐོའི་ཁྲིམས་ཞབ་ཁང་གིས་བཅད་ཁྲ་ཞིག་བཏང་ཡོད་པའི་ནང་། དབུས་འོས་བསྡུ་ལྷན་ཁང་གིས་འགན་དབང་ལག་བསྟར་བྱས་མེད་པར་ཆད་པ་ཧིན་སྒོར་ ༢༠༠༠༠ དང་། བལ་ཡུལ་ཀ་ཐ་མན་གྲུ་ས་གནས་འོས་བསྡུ་ལས་ཁང་སྒྲིག་གཞི་དང་འགལ་ཡོད་པར་ཆད་པ་ཧིན་སྒོར་ ༡༠༠༠༠ ། ཀོང་པོ་དོན་གྲུབ་ཀྱིས་བོད་མིའི་སྒྲུག་འཛུཊ་སྣང་མེད་ཀྱིས་བལ་ཡུལ་སྐོར་སྲུང་ལས་ཁུངས་སུ་སྙན་ཞུ་ཕུལ་ཏེ་འོས་བསྡུའི་ལས་དོན་ལ་འགོག་རྐྱེན་བཟོ་རྩིས་བྱས་པར་ཆད་པ་ཧིན་སྒོར་ ༧༠༠༠ བཅས་བཅད་འདུག
གཟའ་ལྷག་པའི་ཉིན་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གིས་བལ་ཡུལ་མཆོད་འཇོར་ས་གནས་མགོ་འཛིན་འོས་བསྡུའི་སྐོར་གྱི་ཁ་མཆིའི་བཅད་ཁྲ་ཞིག་ཕྱིར་བསྒྲགས་བྱས་པ་ལྟར་ན། བལ་ཡུལ་མཆོད་འཇོར་ཁུལ་གྱི་སྐབས་བཞི་པའི་ས་གནས་མགོ་འཛིན་འོས་བསྡུའི་སྐབས། ཀ་ཐ་མན་གྲུ་ས་གནས་འོས་བསྡུ་ལས་ཁང་གིས། ཀོང་པོ་དོན་གྲུབ་ཀྱིས་དེ་སྔོན་ཟློས་གར་ཚོགས་པའི་ཅ་དངོས་ཚོང་བཅོལ་བཞག་པའི་རྩིས་འཕྲོད་མེད་སྟབས། ས་གནས་མགོ་འཛིན་གྱི་འོས་མིའི་ཁུངས་སུ་ཞུགས་རྒྱུའི་ཆ་རྐྱེན་ཚང་མེད་ལུགས་བརྗོད་དེ་ཁོའི་མིང་དངོས་གཞིའི་འོས་མིའི་ཁོངས་ནས་ཕྱིར་འཐེན་བྱས་ཡོད་འདུག
ཀོང་པོ་དོན་གྲུབ་ཀྱིས་ས་གནས་འོས་བསྡུ་ལས་ཁང་ལ་སྙན་ཞུ་ཕུལ་ཏེ་དོན་དག་དེར་བསྐྱབ་ཞིབ་དགོས་པའི་རེ་སྐུལ་ཞུས་ཡོད་པ་མ་ཟད། དྷ་རམ་ས་ལའི་དབུས་འོས་བསྡུ་ལས་ཁང་ལའང་དེ་བཞིན་རེ་སྐུལ་ཞུས་ཡོད་ཀྱང་། དབུས་འོས་བསྡུ་ལས་ཁང་གིས་ལན་འབྱོར་བའི་ནང་། “འོས་བསྡུའི་ལས་དོན་བྱེད་ཕྱོགས་ཐོག་ཉིད་ཀྱི་ཞུ་སྦྱོར་དང་འདྲ་མཚུངས་ས་གནས་ཁ་ཤས་ལ་ཡོང་གི་ཡོད་སྟབས། ས་གནས་འོས་བསྡུའི་འགན་འཛིན་དང་འབྲེལ་ཡོད་ཚོགས་མི་རྣམས་ནས་སྐབས་དེར་ཞིབ་འཇུག་ཐག་གཅོད་ཇི་ལྟར་བྱུང་མིན་ས་གནས་དེའི་འགན་འཁུར་གནང་མཁན་རྣམས་ནས་ལེགས་པ་ཞིབ་ཁྲ་ཤེས་རྟོགས་ཡོད་པར་སོང་། ས་གནས་ཀྱིས་ཇི་ལྟར་ཐག་གཅོད་བྱེད་པ་ཞིག་ལ་དབུས་འོས་བསྡུ་ལས་ཁང་ནས་དམིགས་བསལ་ཐེ་བྱུས་བྱེད་སྲོལ་མེད” ཅེས་ལན་སྤྲད་ཡོད་འདུག
དེའི་རྗེས་ཀོང་པོ་དོན་གྲུབ་ཀྱིས་དྷ་རམ་ས་ལའི་དབུས་ཆེས་མཐོའི་ཁྲིམས་ཞིབ་ཁང་དུ་ཉེས་མེད་འོས་གཞིའི་ཐོབ་ཐང་འཕྲོག་པའི་ཞུ་གཏུགས་བྱས་ཡོད་པ་དང་། ཕྱི་ལོ་ ༢༠༡༣ ཟླ་ ༩ ཚེས་ ༢༡ ཉིན་སྐབས་བཞི་པའི་བལ་ཡུལ་མཆོད་འཇོར་ས་གནས་མགོ་འཛིན་གྱི་སྔོན་འགྲོའི་འོས་བསྡུའི་ཁྲོད་ཀོང་པོ་དོན་གྲུབ་ལ་འོས་ཤོག་མང་པོ་ཐོབ་ཡོད་ཀྱང་། ཚེས་ ༢༨ ཉིན་གྱི་དངོས་གཞིའི་འོས་བསྡུ་མ་བྱས་སྔོན་ལ་ས་གནས་འོས་བསྡུ་ལྷན་ཁང་གིས་ཀོང་པོ་དོན་འགྲུབ་ལ་འོས་མིའི་ཆ་རྐྱེན་ཚང་མེད་ལུགས་བརྗོད་དེ་དངོས་གཞིའི་འོས་མིའི་ཁུངས་ནས་ཕྱིར་འཐེན་བྱས་ཡོད་འདུག ཚེས་ ༢༦ ཉིན་བསྟན་འཛིན་ཞུ་བ་ཞིག་གིས་ཟློས་གར་ཚོགས་པའི་བུ་ལོན་སྒོར་འབུམ་ ༢ དེ་ཕྱིར་སྤྲད་ཡོད་འདུག་པ་དང་། དེ་མ་ཐག་ཀོང་པོ་དོན་གྲུབ་ནས་ཀྱང་ཁོང་ལ་འོས་མིའི་ཆ་རྐྱེན་ཚང་ཡོད་ལུགས་བསྐྱར་དུ་འགྲེལ་བཤད་བྱས་ཡོད་ཀྱང་ས་གནས་འོས་བསྡུའི་ལས་ཁང་གིས་ངོས་ལེན་བྱས་མི་འདུག
སྐབས་དེའི་མཆོད་འཇོར་ས་གནས་མགོ་འཛིན་དང་ས་གནས་འོས་བསྡུའི་འགན་འཛིན་གཅིག་ལྕོག་བདུད་འདུལ་རྡོ་རྗེ་ཡིན་འདུག་ལ། ཁོས་ཀོང་པོ་དོན་གྲུབ་ལ་བུ་ལོན་སྒྲུབ་འཇལ་ཐུབ་མེད་སྟབས་ས་གནས་མགོ་འཛིན་གྱི་འོས་མིའི་ཆ་རྐྱེན་ཚང་མེད་སྐོར་དང་། ཟློས་གར་གྱི་དངུལ་ཕྱིར་སློག་བྱེད་མཁན་བསྟན་འཛིན་རྡོ་རྗེ་ཟེར་བ་དེ་ཀོང་པོ་དོན་གྲུབ་ཀྱིས་མངགས་གཏོང་བྱས་པ། དངོས་གཞིའི་འོས་བསྡུའི་སྐབས་ཀོང་པོ་དོན་གྲུབ་ཀྱིས་མཆོད་འཇོར་ས་གནས་སྐོར་སྲུང་ལས་ཁུངས་ DSP ལ་སྙན་ཞུ་ཕུལ་ཏེ་དངོས་གཞིའི་འོས་བསྡུ་འགོག་ཐབས་བྱས་ཡོད་པ། ད་དུང་ཀོང་པོ་དོན་གྲུབ་ཀྱིས་ཁོ་ལ་ཁ་པར་བརྒྱུད་སྡིགས་ར་སྐུལ་ཚུལ་བཅས་ཀྱི་རྩོད་ལན་བྱས་ཡོད་འདུག
ཐེངས་འདིར་ཆེས་མཐོའི་ཁྲིམས་ཞིབ་ཁང་གིས་ཐག་བཅོད་བྱས་པའི་བཅད་ཁྲའི་ནང་། ཁ་མཆི་དེར་གནད་དོན་ ༦ དང་ལྡོག་གཏུག་གི་གནད་དོན་ ༢ བཅས་སུ་ཐག་གཅོད་བྱས་ཡོད་པ་དག་ནི། དང་པོ། ཀོང་པོ་དོན་གྲུབ་ཀྱིས་ཟློས་གར་གྱི་ཅ་དངོས་བཅོལ་ཡུལ་བསྟན་འཛིན་རྡོ་རྗེ་ཡིན་པ་ཁུངས་སྐྱེལ་ཐུབ་མེད་པའི་ངོས་འཛིན་དང་། འོས་བསྡུའི་འགན་འཛིན་གྱིས་བརྗོད་པ་ལྟར་ཟློས་གར་གྱི་ཅ་དངོས་བཅོལ་ཡུལ་ཀོང་པོ་དོན་གྲུབ་ཡིན་པའི་ངོས་འཛིན། སྔོན་འགྲོའི་འོས་གཞི་ལས་ཕྱིར་འཐེན་བྱས་ཟིན་པ་ཞིག་དངོས་གཞིའི་འོས་གཞིར་ཞུགས་པའི་ཆ་རྐྱེན་མེད་པའི་ངོས་འཛིན། ཀོང་པོ་དོན་གྲུབ་ཀྱིས་ལོ་ངོ་ ༢༡ རིང་བུ་ལོན་སྒྲུབ་མཇལ་མ་ཐུབ་སྟབས། ཆེས་མཐོའི་ཁྲིམས་ཞིབ་ཁང་ནས་ཁོ་རང་མཆོད་འཇོར་ས་གནས་མགོ་འཛིན་སྐབས་བཞི་བའི་འོས་ཚོས་མ་ཚང་བར་ཆད་འགེལ་ཐག་གཅོད་བྱས་འདུག དེ་བཞིན་ལྡོག་གཏུག་སྐབས་ཀོང་པོ་དོན་གྲུབ་ཀྱིས་ས་གནས་སྐོར་སྲུང་ལས་ཁུངས་ལ་སྙན་ཞུ་ཕུལ་མེད་པ་ཁུངས་སྐྱེལ་ཐུབ་མེད་པ་མ་ཟད། བཙན་བྱོལ་བོད་མིའི་སྒྲུག་འཛུགས་ལ་ལྟོས་མེད་ཀྱིས་གནས་ཡུལ་སྐོར་སྲུང་ལས་ཁུངས་སུ་སྙན་ཞུ་ཕུལ་ཏེ་འོས་བསྡུའི་ལས་དོན་ལ་འགོག་རྐྱེན་བཟོ་རྩིས་བྱས་པར་ཀོང་པོ་དོན་གྲུབ་ཆད་པ་ཧིན་སྒོར་ ༧༠༠༠ བཅད་པ།
གཉིས་པ། བཙན་བྱོལ་བོད་མིའི་བཅའ་ཁྲིམས་ནང་། འོས་བསྡུའི་ལས་དོན་དང་འབྲེལ་བའི་རྩོད་རྙོག་རིགས་དབུས་འོས་བསྡུ་ལྷན་ཁང་གིས་ཐག་གཅོད་བྱེད་དགོས་པ་གསལ་ཡོད་ཀྱང་། ས་གནས་འོས་བསྡུའི་ལས་ཁུངས་ཀྱི་ཐག་གཅོད་འགྲིག་མིན་ཞིབ་འཇུག་བྱས་པའི་གནས་ཚུལ་གང་ཡང་མེད་པ་མ་ཟད། “འོས་བསྡུའི་ལས་དོན་བྱེད་ཕྱོགས་ཐོག་ཉིད་ཀྱི་ཞུ་སྦྱོར་དང་འདྲ་མཚུངས་ས་གནས་ཁ་ཤས་ལ་ཡོང་གི་ཡོད་སྟབས། ས་གནས་འོས་བསྡུའི་འགན་འཛིན་དང་འབྲེལ་ཡོད་ཚོགས་མི་རྣམས་ནས་སྐབས་དེར་ཞིབ་འཇུག་ཐག་གཅོད་ཇི་ལྟར་བྱུང་མིན་ས་གནས་དེའི་འགན་འཁུར་གནང་མཁན་རྣམས་ནས་ལེགས་པ་ཞིབ་ཁྲ་ཤེས་རྟོགས་ཡོད་པར་སོང་། ས་གནས་ཀྱིས་ཇི་ལྟར་ཐག་གཅོད་བྱེད་པ་ཞིག་ལ་དབུས་འོས་བསྡུ་ལས་ཁང་ནས་དམིཊ་བསལ་ཐེ་བྱུས་བྱེད་སྲོལ་མེད” ཅེས་ལན་སྤྲད་ཡོད་སྟབས། དབུས་འོས་བསྡུ་ལས་ཁང་གིས་འགན་དབང་ལག་བསྟར་མ་བྱས་པར། འོས་བསྡུའི་འགན་འཛིན་འཇམ་དཔལ་ཆོས་བཟང་ལ་ཆད་པ་ཧིན་སྒོར་ ༢༠༠༠༠ བཅད་པ།
གསུམ་པ། བདུད་འདུལ་རྡོ་རྗེ་ཡིས་ཀོང་པོ་དོན་གྲུབ་ཀྱི་མིང་དངོས་གཞིའི་འོས་ཁུངས་ནས་ཕྱིར་འཐེན་བྱས་པ་དོ་བདག་གིས་ངོས་ལེན་བྱས་ལུགས་ཁུངས་སྐྱེལ་ཐུབ་མེད་པ་དང་། ཀོང་པོ་དོན་གྲུབ་ཀྱིས་ཁ་པར་བརྒྱུད་ཁོ་རང་ལ་སྡུགས་ར་སྐུལ་ཚུལ་བདུད་འདུལ་རྡོ་རྗེ་ནས་ཁུངས་སྐྱེལ་ཐུབ་མེད་པ། ས་གནས་འོས་བསྡུ་ལས་ཁང་གིས་ཀོང་པོ་དོན་གྲུབ་དངོས་གཞིའི་འོས་ཁོངས་ནས་ཕྱིར་འཐེན་བྱས་པ་དེ་འོས་བསྡུའི་སྒྲིག་གཞི་དང་འགལ་ཡོད་པར། བདུད་འདུལ་རྡོ་རྗེ་ལ་ཆད་པ་ཧིན་སྒོར་ ༡༠༠༠༠ བཅས་ཀྱི་ཐག་གཅོད་བྱས་ཡོད་པ་དེ་དག་ཉིན་ ༣༠ ནང་ཚུད་དུ་བོད་མིའི་སྒྲིག་འཛུགས་སྤྲོད་དགོས་སྐོར་སོགས་འཁོད་འདུག
ཁ་མཆི་འདིའི་ཐད་གསར་འགོད་པས་འབྲེལ་ཡོད་མི་སྣ་ཞིག་ལ་བཅར་འདྲི་བརྒྱུད་ཤེས་རྟོགས་བྱུང་བར། ༢༠༡༣ ལོའི་ཕྱི་ཟླ་ ༩ ཚེ་ ༢༡ ཉིན་བལ་ཡུལ་མཆོད་འཇོར་ས་གནས་མགོ་འཛིན་སྐབས་བཞི་བའི་སྔོན་འགྲོའི་འོས་བསྡུ་བྱས་ཡོད་པ་དང་། ཉིན་དེའི་དགོང་མོར་འོས་བསྡུའི་ཚོགས་མི་དང་ཟུར་དཔང་། འགན་འཛིན་བཅས་འཛོམས་ཏེ་འོས་ཤོག་གྲངས་བཤེར་བྱས་རྗེས་རང་སར་ལོག་ཡོད་ཅིང་། འོས་བསྡུའི་སྒྲིག་གཞི་ལྟར་ན། རྩོད་རྙོག་ཐག་གཅོད་རིགས་དང་། འོས་གཞིར་བརྟག་དཔྱད་བརྩད་གཅོད། འོས་སྒམ་ལ་རྟགས་ཐེལ་རྒྱག་པ། འོས་གྲངས་གསལ་བསྒྲགས་བཅས་ཀྱི་སྐབས་སུ། འོས་བསྡུའི་ཚོགས་མི་དང་ཟུར་དཔང་བཅས་ཀྱི་སུམ་ཆ་གཉིས་འཛོམས་དགོས་ཀྱང་། མཆོད་འཇོར་ས་གནས་མགོ་འཛིན་དང་ས་གནས་འོས་བསྡུའི་འགན་འཛིན་གཅིག་ལྕོག་བདུད་འདུལ་རྡོ་རྗེ་ཡིས། ཀོང་པོ་དོན་འགྲུབ་ལ་འོས་གྲངས་ ༥༡༦ དང་། གཞན་པ་འོས་མི་ ༦ ཡོད་པ་དག་ལ་འོས་གྲངས་ ༥༡༧ ཡོད་ཚུལ་བསྒྲགས་ཡོད་འདུག
གལ་སྲིད། འོས་ཤོག་གཅིག་ཚུར་ཡོང་བ་ཡིན་ན་སྔོན་འགྲོའི་འོས་བསྡུའི་སྐབས་ཀོང་པོ་དོན་འགྲུབ་ལ་ཁ་གཏད་མེད་པའི་ས་གནས་མགོ་འཛིན་ཆགས་ཀྱི་ཡོད་འདུག བདུད་འདུད་རྡོ་རྗེ་ཡིས་ཀོང་པོ་དོན་འགྲུབ་འོས་མིའི་ཁོང་ནས་ཕྱིར་འཐེན་བྱེད་དོན། ཀོང་པོ་དོན་འགྲུབ་ཀྱིས་ཟློས་གར་ཚོགས་པའི་ཧིན་སྒོར་འབུམ་ ༢ ལྷག་གི་ཟློས་གར་གྱི་ཅ་དངོས་ཁག་ ༨ ཙམ་ཞིག་ཕྱི་ལོ་ ༡༩༩༢ ལོ་ནས་བཅོལ་བཞག་པ་དེའི་བུ་ལོན་གཙང་མ་བཟོས་མེད་པ་དང་། དེ་གཙང་མ་བཟོས་མེད་པ་དེ་རྩིས་ཞིབ་སྙན་ཐོ་དང་། མང་ཚོགས་རྩིས་ཁྲ་ཚོགས་ཆུང་གི་སྙན་ཐོ། ཟློས་གར་གྱི་ཡིག་ཆ་བཅས་སུ་གསལ་འདུག་སྟབས། ཀོང་པོ་དོན་གྲུབ་འོས་མིའི་ཁོངས་ནས་མར་འཐེན་པ་ཡིན་སྐོར་ས་གནས་འོས་བསྡུ་ལས་ཁང་གིས་བརྗོད་ཡོད་འདུག
དངོས་གཞིའི་འོས་བསྡུ་མ་བྱས་ཡར་སྔོན་ཏེ། ཕྱི་ཟླ་ ༩ ཚེས་ ༢༦ ཉིན་བསྟན་འཛིན་རྡོ་རྗེ་ཞུ་བ་ཞིག་གིས་ཟློས་གར་ཚོགས་པར་བུ་ལོན་འཇལ་ཏེ་གཙང་མ་བཟོས་རྗེས། ཀོང་པོ་དོན་གྲུབ་ཀྱིས་སླར་ཡང་ས་གནས་འོས་བསྡུ་ལས་ཁང་ལ་ཁོ་རང་ལ་འོས་ཆོས་ཚང་ཡོད་ཚུལ་བརྗོད་སྐབས། ས་གནས་འོས་བསྡུ་ལས་ཁང་གིས་དངོས་གཞིའི་གསལ་བསྒྲགས་ནང་བཏོན་ཚར་བ་ཞིག་བསྐྱར་དུ་དངོས་གཞིའི་འོས་བསྡུའི་ནང་འགྲོ་བའི་སྒྲིག་གཞིའི་ཆ་རྐྱེན་མི་འདུག་ལབ་ཡོད་འདུག
ཀོང་པོ་དོན་འགྲུབ་ཀྱིས་ ༢༠༡༣ ལོའི་ཕྱི་ཟླ་ ༡༠ ཚེས་ ༡༡ ཉིན་ས་གནས་འོས་བསྡུའི་ལས་ཁུངས་ལ་སྙན་ཞུ་ཕུལ་ཏེ་དོན་དག་དེར་བསྐྱར་ཞིབ་བྱེད་དགོས་སྐོར་བརྗོད་ཡོད་པ་དང་། ཟླ་དེའི་ཚེས་ ༢༠ བར་བདུད་འདུལ་རྡོ་རྗེས་ས་གནས་འོས་བསྡུའི་ལས་ཁུངས་ཀྱི་འགན་འཛིན་ཡིན་པ་དང་། དེའི་རྗེས་ཁོ་སྒང་ཏོག་ས་གནས་མགོ་འཛིན་དུ་གནས་སྤོར་བཏང་འདུག་སྟབས། ཁོང་ལ་སྙན་ཞུ་དེ་དངོས་སུ་འབུལ་ཐུབ་མེད་སྟབས་ཚེས་ ༢༡ ཉིན་བལ་ཡུལ་འོས་བསྡུའི་འགན་འཛིན་ལས་ཚབ་མིག་དམར་རྡོ་རྗེ་ལ་སྤྲད་དེ་བསྐྱར་ཞིབ་གནང་རོགས་ལབ་སྐབས། ང་རང་ལ་འོས་བསྡུའི་ཚོགས་མིའི་ཁྲོད་འདི་འགྲིག་མི་འདུག་ལབ་མཁན་མི་འདུག་ཅེས་ལབ་ཡོད་འདུག ༢༠༡༤ ལོའི་ཟླ་ ༢ ཚེས་ ༢ ཉིན་ཀོང་པོ་དོན་འགྲུབ་ཀྱིས་དབུས་འོས་བསྡུ་ལས་ཁུངས་ལ་ཡི་གེ་བཏང་སྟེ་བསྐྱར་ཞིབ་གནང་རོགས་ལབ་པའི་ལན་དུ། ས་གནས་ཀྱི་གནས་སྟངས་ས་གནས་རང་གི་མིས་ཐག་གཅོད་བྱས་ན་ཡག་སྐོར་བརྗོད་དེ་ཁ་ཡ་མ་བྱས་སྟབས་གནས་ཚུལ་འདི་བྱུང་ཡོད་འདུག
འབྲེལ་ཡོད་མི་སྣར། ཁོང་ལ་ཀོང་པོ་དོན་འགྲུབ་ཀྱིས་ས་གནས་སྐོར་སྲུང་ལས་ཁུངས་ DSP ལ་སྙན་ཞུ་ཕུལ་བའི་བདེན་དཔང་ཡོད་མེད་དྲིས་པར་ཁོང་གིས། ༢༠༡༣ ལོའི་ཕྱི་ཟླ་ ༩ ཚེས་ ༢༧ ཉིན་མཆོད་རྟེན་ཁུལ་གྱི་ DSP ཡིས་མཆོད་འབྱོར་ས་གནས་མགོ་འཛིན་ལས་ཚབ་མིག་དམར་རྡོ་རྗེ་དང་ལས་དྲུང་བསྟན་འཛིན་དཔལ་ལྡན་གཉིས་སྐད་བཏང་སྟེ། ཀོང་པོ་དོན་འགྲུབ་ཀྱིས་སྙན་ཞུ་ཕུལ་ཡོད་པ་དེ་བསྟན་འདུག སྙན་ཞུ་དེའི་ནང་འོས་བསྡུ་དྲང་པོ་བྱུང་མི་འདུག་ཅེས་གསལ་ཡོད་པ་དང་། གལ་སྲིད། ནང་འགྲིག་མ་བྱུང་བ་ཡིན་ན་འོས་བསྡུ་གནང་བཅུག་གི་མིན་པ་མ་ཟད་ཁྱེད་རང་གཉིས་འཛན་རྒྱུ་ཡིན། ཞེས་ལབ་འདུག དེ་ཀོང་པོ་དོན་འགྲུབ་ཀྱིས་ཁས་ལེན་བྱས་མེད་ཀྱང་། བདུད་འདུལ་རྡོ་རྗེ་ཡར་མར་མང་པོར་ཐུག་སྟེ་ཁུངས་སྐྱེལ་ཐུབ་ཡོད་པ་རེད།
མཇུག་ཏུ་གསར་འགོད་པས་དབུས་འོས་བསྡུ་ལས་ཁུངས་ཀྱི་འགན་འཛིན་འཇམ་དཔལ་ཆོས་བཟང་ལགས་སུ། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིས་ཐེངས་འདིར་བཅད་ཁྲ་བཏང་བ་དེར་དགོངས་ཚུལ་དང་ངོས་ལེན་ཡོད་མེད་དྲིས་པར་ཁོང་གིས་ད་ལྟའི་ཆར་གནས་ཚུལ་དེ་སྐོར་ལ་སྐད་ཆ་གང་ཡང་ཞུ་རྒྱུ་མེད་ཅེས་བརྗོད་བྱུང་།
ད་རེབ་ཆེས་མཐོའི་ཁྲིམས་ཞིབ་ཁང་གིས་བུ་ལོན་སྒྲུབ་མཇལ་མ་ཐུབ་པ་མ་ཡིན་པ་ཞེས་པ་དེར་འགྲེལ་བཤད་ཅིག་བསྐྱོན་ཡོད་པ་ནི། “བུ་ལོན་སྒྲུབ་མཇལ་མ་ཐུབ་པ་མ་ཡིན་པ་ཞེས་པའི་གོ་དོན་ནི་ཁྲིམས་དོན་གྱི་བྱ་རིམ་ཐོག་ནས་སོ་སོའི་ཁ་རྗེ་དབང་ཐང་གིས་གཞན་ནས་གཡར་ལེན་བྱས་པའི་བུ་ལོན་སྒྲུབ་འཇལ་གྱི་ནུས་པ་གང་ཞིག་ལ་ཁྲིམས་ཁང་རང་ནས་ཐག་གཅོད་ཚོང་རྐུབ་རྡིབ་པ་ (bankruptcy)ཅེས་བརྗོད་པ་དང་། རྒྱུ་ནོར་གྱི་གནས་སྟངས་ཆ་ནས་བུ་ལོན་སྒྲུབ་འཇལ་མ་ཐུབ་པའི་སྐྱེ་བོ་གང་ཞིག་ནས་ཞུ་གཏུགས་ཀྱིས་ཁྲིམས་ཁང་ནས་བུ་ལོན་སྒྲུབ་མཇལ་མ་ཐུབ་པ་མ་ཡིན་པའི་གནས་སྟངས་མེད་པར་ཆགས་པའི་ངོས་ལེན་གནང་མེད་པ་ཡིན་ན། (Undischarged insolvent) སྐྱེ་བོ་དེ་གཞུང་གི་གནད་ཡོད་ལས་གནས་ཐོག་འོས་བསྡུའི་ལམ་ནས་འཛུལ་ཞུགས་ཀྱི་འོས་ཆོས་ཚང་གི་མེད་པ་ནི་གཞུང་གི་གནད་ཡོད་ལས་སྣེར་འོས་ཆོས་འདི་བཞག་པའི་རྒྱལ་ཁབ་ཕལ་མོ་ཆེའི་འགྲེལ་བཤད་རྒྱག་སྟངས་ཤིག་ཡིན་ཞིང” ཞེས་དང་། “བཙན་བྱོལ་བོད་མིའི་སྒྲིག་འཛུགས་ཀྱི་གནས་བབ་དང་འཚམ་པའི་འགྲེལ་བརྗོད་ནི། སྐྱེ་བོ་གང་ཞིག་རྒྱུ་ནོར་ལོངས་སྤྱོད་ཀྱིས་ཕོངས་ནས་གཞན་དབང་དུ་གྱུར་བའམ། སྤྱི་སྒེར་ནས་དངུལ་དངོས་གཡར་ལེན་བྱས་པ་དུས་བཀག་ནང་ཚུན་སྐྱིན་གསབ་ཀྱི་འགན་འཁུར་མི་ལེན་པ་ཞིག་ལ་གོ་དགོས་པ་ཡིན” ཞེས་སོགས་འཁོད་འདུག
གསར་འགོད་པ། དོན་གོ
བཙན་བྱོལ་བོད་གཞུང་གི་ཆེས་མཐོའི་ཁྲིམས་ཞིབ་ཁང་དེ་དགོས་མཁོ་གཅིག་ཀྱང་མེད་པའི་ལས་ཁུངས་གཅིག་རེད་བསམ་བསྡད་ཡོད། ད་རེས་ལས་ཀ་ཡག་པོ་བསྒྲུབས་འདུག འོས་བསྡུ་ལྷན་ཁང་དབུས་དང་ས་གནས་གཉིས་ཀའི་ནོར་འཁྲུལ་ཆེན་པོ་བཟོས་འདུག ལྷག་པར་དུ་དབུས་ནས་འགན་དབང་མ་སྒྲུབ་པ་དེ་ཁ་གསལ་བོར་བཤད་ན་ལས་ཀ་ཡག་པོ་མ་བྱས་པ་དང་བྱེད་འདོད་མེད་པའི་རྣམ་འགྱུར་ཞིག་རེད།
འོ་བླ་མ་མཁྱེན་ སྐྱབས་མགོན་མཁྱེན་ བལ་ཡུལ་འདི་ནང་རྒྱ་དམར་གྱི་ཀྱག་པ་གཏང་ནས་ག་ས་ག་ལ་དྲི་མ་ཡོད་རེད། ཡིན་ན་ཡང་ལས་འབྲས་ཟེར་བ་དངོས་ནས་ཡོད་པ་རེད་ད་བོད་མི་ཚོ། ཚེ་འདིར་དངུམ་དམར་གཅིག་པུར་གལ་ཆེ་མ་རེད་ཁོ། རང་བསྟོད་མི་སྨོན་གྱིས་ཡ་རབས་བཟང་སྤྱོད་ནི་སྙིང་པོའི་ནང་གི་སྙིང་པོ་རེད་དེ་མ་བྱུང་བ་ཡིན་ན་ལོ་རྒྱུས་ཡང་ནག་ཉེས་ཅན་ཞིག་ཆགས་པ་རེད། བདེ་སྲུང་ལས་ཁུངས་ནས་བྱ་བ་འདི་རིགས་ཀྱིས་བརྒྱབ་ལྗོངས་ན་སུ་ཡོད་དང་གང་ལ་བརྟེན་ནས་བྱུང་རྟག་ཏུ་ཞིབ་བཤེར་མུ་འཐུད་གནང་དགོས་པ་འདུག་ བལ་ཡུལ་ས་གནས་ག་ཡོད་དང་། ལྡི་ལི་བོད་མིའི་སྡོད་སྒར་བཅས་ལ་རྒྱ་དམར་གྱིས་དངུལ་གྲོན་གཏོང་བ་ནི་ཧ་ལས་པ་རང་རེད།