བོད་ཀྱི་གསོ་རིག་སློབ་ཚན་རྒྱ་གར་སྨན་པའི་ལྷན་ཚོགས་ལ་ཕུལ་ཡོད།

ཉེ་ལམ་རྒྱལ་ས་ལྡི་ལིར་བོད་ཀྱི་གསོ་རིག་སློབ་ཚན་གཏན་འབེབས་སྐོར་ལ་ཚོགས་འདུ་ཞིག་ཚོགས་པའི་སྟེང་། རྒྱ་གར་གྱི་སྨན་པའི་ལྷན་ཚོགས་ཚོགས་གཙོ་སོགས་ཀྱིས། མ་འོངས་པར་བོད་ཀྱི་གསོ་བ་རིག་པའི་སློབ་ཚན་དང་སྒྲིག་གཞི་གཏན་འབེབས་བྱུང་མཚམས་གསོ་རིག་སྐོར་གྱི་ལས་འགུལ་རིགས་ཀྱི་འགྲོ་སོང་ཡོངས་རྫོགས་རྒྱ་གར་གཞུང་གིས་གཏོང་རྒྱུ་ཡིན་སྐོར་བརྗོད་ཡོད་འདུག

ཟླ་སྔོན་མའི་ཟླ་མཇུག་ཏུ་རྒྱ་གར་རྒྱལ་ས་ལྡི་ལིར་ཉིན་གཉིས་རིང་། རྒྱ་གར་ཨ་ཡུ་ཤའི་ལས་ཁུངས་ཀྱི་ཁྱབ་ཁོངས་དབུས་སྨན་པའི་ལྷན་ཚོགས་(Central Council of Indian Medicine)ཀྱི་གོ་སྒྲིག་འོག བོད་ཀྱི་གསོ་བ་རིག་པའི་སློབ་ཚན་གཏན་འབེབས་སྐོར་གྱི་ཚོགས་འདུ་ཞིག་ཚོགས་ཡོད་པ་དང་། ཚོགས་ཐོག་ཏུ་རྒྱ་གར་དབུས་སྨན་པའི་ལྷན་ཚོགས་ཀྱི་ཚོགས་གཙོ་ལྕམ་ཝཱ་ནི་ཊཱ་ལགས (Dr. Vanitha Murali kumar )དང་ཚོགས་གཞོན་ཨེ་མི་ཊཱབ་ (Dr. Amitabh Kumar)རྣམ་གཉིས་ཀྱི་གཙོས། བོད་ཀྱི་སྨན་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་ངག་དབང་བཟོད་པ་ལགས་དང་ལ་དྭགས་རྒྱལ་ཡོངས་གསོ་རིག་ཉམས་ཞིབ་ཁང་གི་འགན་འཛིན་སྨན་རམས་པ་པདྨ་འགྱུར་མེད་ལགས། དེ་བཞིན། སྨན་རྩིས་ཁང་མཐོ་སློབ་ཀྱི་སློབ་སྤྱི། ཝར་ནཱ་མཐོ་སློབ་སྨན་གྱི་སྡེ་ཚན་སྐུ་ཚབ། ལ་དྭགས་སྨན་ཁང་གི་སྨན་པ་གཙོ་བོ། ལ་དྭགས་སྨན་རྩིས་སློབ་གྲྭའི་སློབ་སྤྱི་སྨན་རམས་པ་འཕྲིན་ལས་དབྱངས་འབྱོར་ལགས་བཅས་བོད་ཀྱི་གསོ་བ་རིག་པའི་འཐུས་མི་ ༦ ཆེད་བཅར་གནང་ཡོད་འདུག

འདི་གའི་གསར་འགོད་པས་ཚོགས་འདུ་དེའི་སྟེང་གྲུབ་འབྲས་ཅི་བྱུང་སྐོར། བོད་ཀྱི་སྨན་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་ངག་དབང་བཟོད་པ་ལགས་སུ་བཅར་འདྲི་ཞུས་པར་ཁོང་གིས། ཚོགས་ཐོག་ཏུ་རྒྱ་གར་དབུས་སྨན་པའི་ལྷན་ཚོགས་ནས་ ‘གསོ་བ་རིག་པ’  དེ་མ་འོངས་པར་ཡར་རྒྱས་སུ་གཏོང་རྒྱུ་ཧ་ཅང་གལ་ཆེན་པོ་ཡིན་པ་དང་། ལྷག་པར་དུ་གསོ་བ་རིག་པའི་སློབ་ཚན་གང་མགྱོགས་གཏན་འབེབས་གནང་དགོས་པ། མ་འོངས་པར་མཐོ་སློབ་ཀྱི་སློབ་ཚན་དང་སྒྲིག་གཞི་ཆ་ཚང་བསྒྲིག་ཐུབ་ཚེ་ཁོ་རང་ཚོའི་ལས་ཁུངས་ཀྱི་ངོས་ནས་བཀའ་བསྡུར་གྱིས་གཏན་འབེབས་གནང་སྟེ། གསོ་བ་རིག་པའི་ཐོག་ལས་འགུལ་ག་རེ་སྤེལ་བ་ཡིན་ནའང་སྟབས་བདེ་བོ་ཆགས་རྒྱུ་ཡིན་ལུགས་གསུང་གི་འདུག ཅེས་བརྗོད་སོང་། ཁོང་གིས་མུ་མཐུད་དུ་བརྗོད་དོན། སློབ་ཚན་གཏན་འབེབས་བྱེད་པར་རྒྱ་གར་དབུས་སྨན་པའི་ལྷན་ཚོགས་ལ་ཁྲིམས་ཀྱི་འགྲོ་སྟངས་ཤིག་ཡོད་སྟབས། ཁྲིམས་ཀྱི་འགྲོ་སྟངས་ལྟར་བཟོ་དགོས་ཀྱང་བརྗོད་བྱ་དེ་སོ་སོའི་རིག་གཞུང་ག་རེ་ཡིན་ན་དེ་ལྡུག་རྒྱུ་རེད་ཟེར་ནས་སྔོན་མ་ཁོ་ཚོས་བཟོས་བཞག་པ་དེ་ཚོ་དཔེ་མཚོན་དུ་ང་ཚོར་བསྟན་སོང་། ད་རེབ་ང་ཚོ་ལ་དྭགས་དང་ཝར་ན། སྨན་རྩིས་ཁང་བཅས་འཐུས་མི་རྣམས་ལྷན་དུ་འཛོམས་ཏེ། སློབ་ཚན་གཏན་འབེབས་ཐོག་གྲོས་བསྡུར་གནང་ཡོད་ཀྱང་། ང་ཚོ་སྨན་པའི་ལྷན་ཚོགས་ཀྱིས་སློབ་ཚན་གཏན་འབེབས་བཟོས་ཡོད་པ་དེ་ཡག་ཤོས་རེད་ཅེས་མོས་མཐུན་གནང་གི་འདུག་པ་གཞིར་བཟུང་། ད་རེབ་ང་ཚོས་ལོ་ལྔའི་སློབ་ཚན་ཟེར་ན་འདྲ་སྨན་པ་དཀའ་བཅུ་བའི་སློབ་ཚན་ཡར་ཕུལ་ཡོད་པ་རེད། ཅེས་སོགས་བརྗོད་སོང་།

སྨན་རམས་པ་ངག་དབང་བཟོད་པ་ལགས་ཀྱིས་རྒྱ་གར་གཞུང་གིས་གསོ་བ་རིག་པའི་སྐུ་ཚབ་ཅིག་ཆེད་བསྐོས་གནང་ཡོད་པའི་སྐོར་བརྗོད་དོན། ཉེ་སྔོན་རྒྱ་གར་གཞུང་རང་ནས་ལ་དྭགས་མཚན་ཉིད་སློབ་གྲྭའི་སྨན་པ་འཕྲིན་ལས་དབྱངས་འབྱོར་ལགས་གསོ་བ་རིག་པའི་སྐུ་ཚབ་ལ་ཆེད་བསྐོས་ཡོད་པ་དང་། ཁོང་གསོ་བ་རིག་པའི་སྐུ་ཚབ་དང་པོ་དེ་ཆགས་ཡོད་པ་རེད། ང་ཚོས་ད་རེབ་ཚོགས་འདུའི་སྐབས། གསོ་བ་རིག་པའི་སྐུ་ཚབ་དེ་གལ་ཆེན་པོ་ཡིན་སྟབས་སྐུ་ཚབ་མང་པོ་འཛོམས་ཐོག་ནས་གཏན་འབེབས་བྱ་རྒྱུ་གལ་ཆེན་པོ་ཡིན་ལུགས་ཞུས་སྐབས། ཁོང་ཚོས་ཨ་ཡུ་ཤི་ལས་ཁུངས་ཀྱི་དྲུང་ཆེ་ལ་སྙན་ཞུ་ཕུལ་དགོས་པའི་ལམ་སྟོན་གནང་བ་ལྟར། ང་ཚོ་ཨ་ཡུ་ཤའི་ལས་ཁུངས་ཀྱི་དྲུང་ཆེའི་ལས་རོགས་ལ་ཐུག་སྟེ་སྙན་ཞུའི་ངོ་བཤུས་ཤིག་ཕུལ་ཡོད། སྤྱིར་བཏང་སྐུ་ཚབ་བསྐོ་བཞག་བྱེད་སྟངས་ལ་རྒྱ་གར་གཞུང་གིས་ཐད་ཀར་བཀའ་གནང་སྟེ་བསྐོ་བཞག་བྱེད་པ་ཞིག་དང་། སྨན་པ་ ༡༠༠ ནས་ ༡༠༠༠ བར་ཡོད་ན་འོས་འདེམས་ཀྱི་འགྲོ་སྟངས་ཤིག་བཅས་འདུག མཐའ་མར་ང་ཚོས་གནས་སྐབས་རིང་གཞུང་ངོས་ནས་སྐུ་ཚབ་གཉིས་གསུམ་ཞིག་ཁ་སྣོན་གནང་རོགས་ཞེས་སྙན་ཞུ་ཕུལ་ཡོད། ཅེས་བརྗོད་བྱུང་།

ཡང་གསར་འགོད་པས་མ་འོངས་པར་འཛིན་སྐྱོང་སོགས་ཀྱི་ཐོག་འགྱུར་ལྡོག་དང་ཕན་ཐོགས་ག་རེ་འབྱུང་མིན་དྲིས་པར་ཁོང་གིས། དེབ་སྐྱེལ་བྱེད་ཐུབ་པ་ཡིན་ན་འཛིན་སྐྱོང་ལ་འགྱུར་བ་འགྲོ་ངེས་རེད། སློབ་ཚན་དང་ནང་ལོགས་ཀྱི་སྒྲོམ་གཞི་ཚང་མ་གཏན་འབེབས་གནང་ཚར་ན། རྒྱ་གར་དབུས་གཞུང་གིས་གསོ་བ་རིག་པའི་གཙུག་ལག་སློབ་ཆེན་རྒྱག་པར་དངུལ་ཕོན་ཆེན་པོ་གཏོང་རྒྱུའི་འཆར་གཞི་ཡོད་སྟབས། འཛིན་སྐྱོང་གི་ལས་ཀ་མང་པོ་ཞིག་ལ་འགྱུར་བ་འགྲོ་ངེས་རེད། ཡིན་ནའང་གསོ་བ་རིག་པའི་ཐོག་ཉམས་ཞིབ་སོགས་ཀྱི་ལས་འགུལ་ག་རེ་སྤེལ་ནའང་འགྲོ་སོང་ཆ་ཚང་ཁོ་ཚོས་གཏོང་རྒྱུ་མ་ཟད། བོད་རིགས་སྨན་པ་མང་པོ་ཞིག་ལ་ལས་ཀ་རག་པར་ཡང་ཕན་ཐོགས་ཆེན་པོ་ཡོང་གི་རེད། ཅེས་བརྗོད་བྱུང་།

མཇུག་ཏུ་བོད་ཀྱི་གསོ་བ་རིག་པ་དེ་གསོ་རིག་གི་མིང་ཐོག་ནས་རྒྱ་གར་གཞུང་ལ་དེབ་སྐྱེལ་བྱས་ན་ཕན་གནོད་ག་རེ་ཡོད་དྲིས་པར། ང་ཚོ་བཙན་བྱོལ་ནང་དུས་ཡུན་རིང་པོར་འདུག་དགོས་ཁེལ་ཏེ། ཕུགས་རྒྱང་རིང་པོ་ཞིག་ལ་བསམ་བློ་བཏང་བ་ཡིན་ན། རྩ་བའི་རྒྱ་གར་གཞུང་གི་ཁྲིམས་ཤིག་གི་འོག་ལ་འགྲོ་ཡི་ཡོད་ཀྱང་། ནང་ལོགས་ཀྱི་བརྗོད་བྱ་ཚང་མ་ང་ཚོ་བོད་པ་རང་གི་རིག་གཞུང་ཡིན་སྟབས་བོད་ཀྱི་གསོ་བ་རིག་པ་བརྟན་གནས་དང་ཡར་རྒྱས་ཡོང་བར་ཕན་ཐོགས་ཆེན་པོ་ཡོང་གི་རེད། དེབ་སྐྱེལ་བྱེད་སྐབས་བོད་ཀྱི་གསོ་བ་རིག་པ་ཞེས་བོད་ཟེར་བའི་ཐ་སྙད་འདི་ཡོད་མེད་ཐོག་བཀའ་མོལ་མང་པོ་བྱུང་བ་རེད་ལ། བོད་ཀྱི་སྨན་པའི་ལྷན་ཚོགས་སྐབས་ ༣ པར་བོད་ཟེར་བའི་ཐ་སྙད་འདི་མེད་ན་ངོས་ལེན་བྱེད་རྒྱུ་མིན་ཞེས་འབྲེལ་ཡོད་ལ་བཀའ་འདྲི་ཞུས་ཏེ་བཀའ་བསྡུར་རིམ་པ་མང་པོ་བྱུང་རྗེས། རྒྱ་གར་གཞུང་གིས་གསོ་བ་རིག་པ་ངོས་ལེན་བྱེད་པར་རྒྱ་གར་གྲོས་ཚོགས་ནང་ངེས་པར་དུ་འགྲོ་དགོས་སྟབས། ཆབ་སྲིད་ཀྱི་གནས་སྟངས་སོགས་མང་པོ་ཞིག་ལ་དཀའ་ངལ་ཡོད་པ་དངོས་འབྲེལ་རེད། དེར་བརྟེན་བོད་ཟེར་བའི་ཐ་སྙད་འདི་མེད་ཀྱང་གསོ་བ་རིག་པ་ཟེར་དུས་བོད་པའི་ཐ་སྙད་རང་ཆགས་ཡོད་སྟབས། མ་འོངས་པར་ང་ཚོས་འཆར་གཞི་ལེགས་པོ་བསྒྲིག་སྟེ་སྔར་ལས་ཤུགས་རྒྱག་ཐུབ་ན། རྒྱ་གར་གཞུང་ལ་དེབ་སྐྱེལ་བྱས་པ་དེར་གྱོང་ཡོད་པ་མ་རེད་བསམ་གྱི་འདུག ཅེས་བརྗོད་བྱུང་།

གསར་འགོད་པ། པདྨ་མཚོ།