མི་མང་བློ་འགུག་གི་དམག་འཐབ།

ཁ་སང་ཨུ་རུ་སུ་གཞུང་གིས་ཡུག་རེན་ཤར་ཕྱོགས་ས་ཁུལ་གྱི་དཀའ་ངལ་ནང་ཡོད་པའི་མང་ཚོགས་ལ་སྐྱོབ་གསོ་སྤྲོད་རྒྱུ་ཡིན་སྐོར་བརྗོད་དེ་དོས་སྐྱེལ་རླངས་འཁོར་ ༢༨༠ ཙམ་ཡུག་རེན་གྱི་ཕྱོགས་སུ་བཏང་ཡོད་འདུག

ཁ་སང་ཨུ་རུ་སུ་གཞུང་གིས་རྒྱལ་ས་མོ་སོ་ཁཱོ་ནས་སྐྱོབ་གསོ་དྲུད་ཡོད་པའི་དོས་སྐྱེལ་རླངས་འཁོར་ ༢༨༠ ཙམ་ཞིག་དམག་འཁྲུག་གི་གོད་ཆག་ཤུགས་ཆེན་ཕོག་ཡུལ་ཡུག་རེན་ཤར་ཕྱོགས་ས་ཁུལ་ཌོ་ནེ་སེ་ཁེ་ (Donetsk) དང་ཨུ་རུ་སུ་དང་ཡུག་རེན་བར་གྱི་ས་མཚམས་གྲོང་ཁྱེར་ལུ་ཧན་སེ་ཁེ་ (Luhansk)ཕྱོགས་སུ་བཏང་ཡོད་པ་དང་། སྐྱོབ་གསོ་དེ་དག་དཀའ་ངལ་འོག་ཡོད་པའི་ས་ཁུལ་དེ་དག་ནང་གི་མང་ཚོགས་ཚོར་སྤྲོད་རྒྱུ་ཡིན་སྐོར་བརྗོད་ཡོད་ཀྱང་། ཡུག་རེན་གཞུང་གིས་གནས་ཚུལ་དེའི་སྐོར་ལ་རྒྱལ་སྤྱིའི་རྒྱ་གྲམ་དམར་པོ་ཚོགས་པས་རྟོག་ཞིབ་མ་བྱས་བར་ཡུག་རེན་ནང་གཏོང་རྒྱུ་མིན་སྐོར་བརྗོད་འདུག

ཡུག་རེན་གྱི་རྒྱལ་སྲུང་ལྷན་ཚོགས་ཀྱི་མགྲིན་ཚབ་པ་ཨན་ཌེ་ (Andriy Lysenko) ལགས་ཀྱིས། “ད་ལྟ་ཨུ་རུ་སུའི་དོས་སྐྱེལ་རླངས་འཁོར་ནང་གི་སྐྱོབ་གསོ་དེ་དག་ནི་རྒྱལ་སྤྱིའི་རྒྱ་གྲམ་དམར་པོས་དག་སྐྱེལ་ངོས་ལེན་བྱས་པའི་སྐྱོབ་གསོ་ཞིག་མིན་སྟབས། ཡུག་རེན་ནང་གཏོང་ཐབས་མེད” ཅེས་བརྗོད་འདུག དེ་བཞིན། ཨོ་སི་ཌོ་ལི་ཡའི་ཕྱི་སྲིད་བློན་ཆེན་བྷེ་ཤོབ་ (Julie Bishop) ལགས་ཀྱིས། “ཨུ་རུ་སུས་སྐྱོབ་གསོ་ལ་ཁ་གཡར་ནས་ཡུག་རེན་གྱི་བརྟན་ལྷིང་ལ་གནོད་འཚེ་གཏང་ཚེ། ཨོ་སི་ཌོ་ལི་ཡས་གཞུང་གིས་ཨུ་རུ་སུར་ཁ་གཏད་གཅོག་རྒྱུ་ཡིན” ཞེས་དང་། ཧྥ་རན་སིའི་ཕྱི་སྲིད་བློན་ཆེན་ལཱོ་རན་ཌེ་ (Laurent Fabius) ལགས་ཀྱིས་ཀྱང་། “ཡུག་རེན་ནང་དབོར་འདྲེན་བྱེད་བཞིན་པའི་ཨུ་རུ་སུའི་སྐྱོབ་གསོ་དེ་དག་ནི། ཡུག་རེན་ས་ཁུལ་ལུ་ཧན་སེ་ཁེ་དང་ཌོ་ནེ་སེ་ཁེ་ནང་ཨུ་རུ་སུའི་རྟེན་གཞི་འཛུགས་ཆེད་མཁོ་དངོས་སྐྱེལ་བཞིན་ཡོད་སྟབས། ང་ཚོས་ཨུ་རུ་སུའི་བྱ་སྤྱོད་དེར་ཞིབ་མཇུག་མཐིལ་ཕྱིན་བྱ་དགོས” ཞེས་བརྗོད་འདུག

ཨུ་རུ་སུའི་ཕྱོགས་ནས་བརྗོད་པ་ལྟར་ན། དོས་སྐྱེལ་རླངས་འཁོར་དེ་དག་ནང་འབྲུ་རིགས་ཏུན་ ༤༠༠ དང་། བྱེ་མ་ཀ་ར་ཏུན་ ༡༠༠། ཕྲུ་གུའི་ཟས་རིགས་ཏུན་ ༦༢། སྨན་བཅོས་ཡོ་ཆས་དང་སྨན་རྫས་ཏུན་ ༥༤། ཉལ་ཁུག་ (sleeping bags) ༡༢༠༠༠། ཆེ་ཆུང་འདྲ་མིན་གྱི་སྐམ་གློག་འཕྲུལ་འཁོར་ ༦༩ བཅས་ཁྱོན་ཏུན་ ༢༠༠༠ ལྷག་ཡོད་འདུག

ཨ་རི་དང་ཧྥ་རན་སི། ཨོ་སི་ཌོ་ལི་ཡ་གཙོས་རྒྱལ་སྤྱིའི་སྒྲིག་འཛུགས་ཁག་གིས་ཨུ་རུ་སུ་གཞུང་གིས་ཡུག་རེན་ནང་སྐྱོབ་གསོ་སྤྲོད་རྒྱུར་ཁ་གཡར་ཏེ། ཡུག་རེན་ནང་འཛུལ་ནས་ཨུ་རུ་སུར་རྒྱབ་སྐྱོར་བྱེད་མཁན་གྱི་ཡུག་རེན་གྱེན་ལོག་ཤོག་ཁག་ཚོར་རོགས་རམ་བྱས་པ་བརྒྱུད་བློ་འགུག་ཐབས་བྱས་ཏེ་མུ་མཐུད་ཡུག་རེན་ནང་རྙོག་ཟིང་བཟོ་འཆར་ཡོད་པར་ངོས་འཛིན་བྱེད་བཞིན་ཡོད་འདུག

ཟླ་འདིའི་ཚེས་ ༡༡ ཉིན་ཨ་རིའི་སྲིད་འཛིན་ཨོ་བྷ་མས་ཡུག་རེན་གཞུང་གིས་མོས་མཐུན་མ་བྱས་བར། ཨུ་རུ་སུས་ཡུག་རེན་གྱི་གནད་དོན་ལ་ཐེ་ཇུས་བྱས་ཚེ། དེ་ནི་རྒྱལ་སྤྱིའི་ཁྲིམས་ལུགས་དང་འགལ་བའི་བྱ་སྤྱོད་ཅིག་ཡིན་སྟབས། ཨ་རིས་ངོས་ལེན་བྱ་ཐབས་མེད་སྐོར་དང་། ཡུ་རོབ་ལྷན་ཚོགས་ཀྱི་ཚོགས་གཙོ་ཇོ་སེ་ (Jose Manuel Barroso) ལགས་ཀྱིས་ཀྱང་། ཡུག་རེན་གཞུང་གིས་མོས་མཐུན་མ་བྱས་བར་ཡུག་རེན་ནང་དམག་དཔུང་གཏོང་བ་དང་། སྐྱོབ་གསོ་སྤྲོད་པ་སོགས་ཀྱི་བྱ་སྤྱོད་ལས་འགུལ་སྤེལ་ན་འགོག་རྒོལ་དང་འབྲེལ་ཡ་ལན་སློག་རྒྱུ་ཡིན་སྐོར་བརྗོད་འདུག

ད་བར་ཡུག་རེན་དམག་དཔུང་དང་ཡུག་རེན་གྱེན་ལོག་ཤོག་ཁག་བར་གྱི་དམག་འཁྲུག་ཁྲོད་མི་ ༡༣༦༨ ལྷག་འདས་གྲོངས་དང་། ཟླ་ ༧ ཚེས་ ༡༧ ཉིན་མ་ལེ་ཞི་ཡའི་འགྲུལ་སྐྱེལ་གནམ་གྲུ་ཞིག་ཡུག་རེན་ཤར་ཕྱོགས་ས་ཁུལ་དུ་འབྱོར་སྐབས་གློ་བུར་གཏོར་རྒོལ་བྱུང་སྟེ་མི་ ༢༩༨ རྐྱེན་འདས་ཕྱིན་པ་མ་ཟད། ད་ལྟ་ཡུག་རེན་གྱེན་ལོག་ཤོག་ཁག་གིས་བཙན་བཟུང་བྱས་པའི་ཡུག་རེན་གྱི་ལུ་ཧན་སེ་གྲོང་ཁྱེར་གྱི་གྲོང་མི་ ༤༢༠༠༠༠ ཁྲོད་ནས་མི་ ༢༥༠༠༠༠ ཙམ་ལ་ཆུ་དང་གློག་མེད་པར་ཉིན་མཚན་ ༩ འགྲོ་བཞིན་ཡོད་པ་དང་། ད་ལྟ་ཡུག་རེན་ས་མཚམས་ཁུལ་དུ་ཨུ་རུ་སུའི་དམག་མི་ ༤༥༠༠༠ ལྷག་ཡོད་པ་མ་ཟད། ཟླ་འདིའི་ཚེས་ ༡༡ ཉིན་ནེ་ཌོ་ (NATO) དམག་དཔུང་གིས་ཡུག་རེན་ནང་སླར་ཡང་ཨུ་རུ་སུའི་དམག་དཔུང་གིས་ཐེ་ཇུས་བྱེད་སྲིད་པའི་ཉེན་བརྡ་ཡང་བཏང་ཡོད་འདུག

ཆབ་སྲིད་དབྱེ་ཞིབ་པ་ཚོས། ཨུ་རུ་སུ་གཞུང་གིས་ཡུག་རེན་ནང་སྐྱོབ་གསོ་མང་དག་ཅིག་དབོར་འདྲེན་བྱེད་བཞིན་ཡོད་ཀྱང་། ཡུག་རེན་གཞུང་གིས་སྐྱོབ་གསོ་དེ་དག་ས་མཚམས་བརྒྱུད་ཡུག་རེན་ནང་གཏོང་འཇུག་རྒྱུ་ཁག་པོ་ཡིན་སྐོར་བརྗོད་འདུག

གསར་འགོད་པ། དོན་གྲུབ།