གཞུང་ཆེན་རིགས་གཅིག་རྐང་འཛིན་གནང་མཁན་ཡོད་དམ།

ཆོས་རིག་ལས་ཁུངས་འོག་གི་གཞུང་ཆེན་རིགས་གཅིག་རྐང་འཛིན་གྱི་ལས་གཞིའི་ཁྲོད་ལོ་རེར་ཆོས་བརྒྱུད་ཆེན་པོ་བཞི་དང་གཡུང་དྲུང་བོན། ཇོ་ནང་བཅས་ནས་སློབ་གཉེར་བ་ཁྱོན་ ༥༥ བསྡུ་རྒྱུའི་གསལ་བསྒྲགས་སྤེལ་ཡོད་ཀྱང་། སྐབས་དང་པོར་སློབ་གཉེར་བ་ ༢༡ ལས་བྱུང་མེད་པ་དང་ད་ལྟ་སྐབས་གཉིས་པའི་གསལ་བསྒྲགས་སྤེལ་འདུག

གསར་འགོད་པས་རྒྱུས་ལོན་བྱུང་བ་ལྟར་ན། ༢༠༡༡ ལོའི་ཟླ་ ༩ ཚེས་ ༢༢ ནས་ ༢༤ ཉིན་བར་དྷ་ས་མེག་གྷན་སུ་རི་ཡ་མགྲོན་ཁང་དུ་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་དབུ་ཁྲིད་བླ་ཆེན་རྣམ་པའི་ཆོས་ཚོགས་ཐེངས་ ༡༡ པ་སྐོང་ཚོགས་གནང་བའི་སྟེང་། ༧གོང་ས་མཆོག་གིས་ཆོས་སྡེ་ཁག་ནས་བསླབ་པ་སློབ་གཉེར་ཟིན་པའི་གྲྭ་བཙུན་ཁྲོད་གཞུང་ཆེན་རིགས་གཅིག་རྐང་འཛིན་གྱི་ལས་འཆར་ཞིག་བསྒྲིག་ན་ལེགས་པའི་བཀའ་ཕེབས་པ་ལྟར། ཆོས་རིག་ལས་ཁུངས་ཀྱི་གོ་སྒྲིག་འོག་ ༢༠༡༣ ལོའི་ ༥ ནང་རྒྱུད་སྟོད་གྲྭ་ཚང་དུ་ཆོས་བརྒྱུད་འདྲ་མིན་གྱི་ཆོས་སྡེ་ཁག་ ༥༠ ཙམ་གྱི་སྐུ་ཚབ་ལས་བསྒྲུབས་པའི་བཤད་སྒྲུབ་བསྟན་པ་གོང་འཕེལ་ལྷན་ཚོགས་ཞེས་པའི་ཚོགས་འདུ་ཞིག་བསྐོངས་པའི་སྟེང་། གཞུང་ཆེན་རིགས་གཅིག་རྐང་འཛིན་གྱི་སློབ་གཉེར་ལས་རིམ་དང་ཆོས་རིག་ལས་ཁུངས་ཀྱི་སློབ་ཡོན་སྤྲོད་ཕྱོགས་བཅས་ཀྱི་སྒྲིག་གཞི་གཏན་འབེབས་གནང་བ་དང་། དེའི་རྗེས་ཆོས་བརྒྱུད་ཁག་གི་སྐུ་ཚབ་ལས་གྲུབ་པའི་གཞུང་ཆེན་རིགས་གཅིག་རྐང་འཛིན་འདེམས་སྒྲུག་གནང་མཁན་མཁས་པའི་ཚོགས་ཆུང་གསར་བཙུགས་བཅས་གནང་སྟེ། གཞུང་ཆེན་རིགས་གཅིག་རྐང་འཛིན་གྱི་སློབ་གཉེར་བ་བསྡུ་བའི་ལས་གཞི་དངོས་སུ་མགོ་འཛུགས་གནང་ཡོད།

༢༠༡༣ ཟླ་ ༧ ཚེས་ ༡༥ ཉིན་ཆོས་རིག་ལས་ཁུངས་ཀྱིས་གསལ་བསྒྲགས་སྤེལ་ཏེ། ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ནས་སློབ་གཉེར་བ་ ༡༠ རེ་དང་། ཇོ་ནང་ནས་ ༥ བཅས་ཁྱོན་སློབ་གཉེར་བ་ ༥༥ ཙམ་བདམས་ཏེ་ཆོས་བརྒྱུད་སོ་སོའི་རྩེད་ཕུད་གཉིས་རེ་དང་། ཇོ་ནང་ནས་གཅིག་བཅས་སློབ་གཉེར་བ་ ༡༡ ཙམ་ལ། ཆོས་རིག་ལས་ཁུངས་ནས་ལོ་བཞིའི་རིང་ཟླ་རེར་སློབ་ཡོན་ ༡༥༠༠ རེ་སྦྱོར་རྒྱུ་དང་། དེ་འཕྲོས་ ༤༤ ཡི་སློབ་ཡོན་དོ་བདག་སོ་སོས་ཐབས་འཚོལ་བྱ་དགོས་སྐོར་འཁོད་འདུག

སྐབས་དང་པོའི་ནང་སྙན་ཞུ་ཕུལ་མཁན་ ༢༥ བྱུང་ཡོད་པ་ལས། མཁས་པའི་ཚོགས་ཆུང་གིས་ཞིབ་དཔྱད་གནང་མཐར་མི་ ༢༡ བདམས་ཡོད་པ་དག་ནི། རྙིང་མ་ ༡ དང་། བཀའ་བརྒྱུད་ ༢། དགེ་ལུགས་ ༨། བོན་པོ་ ༨། ཇོ་ནང་ ༢ བཅས་ཡོད་པ་དང་། ད་ལོའི་ཕྱི་ཟླ་ ༣ ཚེས་ ༡༦ ནས་ ༢༠ ཉིན་བར་ཁོ་ཚོར་ཝ་ར་ཎཱ་སི་མཐོ་སློབ་དང་ཟུང་འབྲེལ་ཐོག་གཞུང་ཆེན་ཐོག་རིགས་གཅིག་རྐང་འཛིན་དང་ཉམས་ཞིབ་གནང་ཕྱོགས་སྐོར་གྱི་ཟབ་སྦྱོང་ཞིག་ཕུལ་ཡོད་པ་དང་། ཕྱི་ཟླ་ ༤ པའི་ནང་སློབ་མགོ་དངོས་སུ་བཙུགས་ཡོད་འདུག

ད་ལོའི་ཕྱི་ཟླ་ ༧ ཚེས་ ༢༢ ཉིན་ཆོས་རིགས་ལས་ཁུངས་ནས་སྐབས་གཉིས་པའི་གཞུང་ཆེན་རིགས་གཅིག་རྐང་འཛིན་པ་བསྡུ་བའི་གསལ་བསྒྲགས་སྤེལ་ཡོད་ཅིང་། ཐེངས་འདིར་སྔར་དང་མ་འདྲ་བ་ཞིག་ནི། སྐབས་དང་པོའི་ཁྲོད་ནས་སློབ་གཉེར་བ་ ༡༡ ལ་སློབ་ཡོན་ཕུལ་བའི་ལམ་སྲོལ་དེ་ལ་འགྱུར་བ་བཏང་སྟེ། འདི་ལོ་ནས་ཆ་རྐྱེན་ཚད་ལོངས་བའི་སློབ་གཉེར་བ་ཡོངས་ལ་སྤྱི་མཚུངས་ལོ་ ༤ རིང་ཟླ་རེར་ཧིན་སྒོར་ ༡༥༠༠ དང་། ལོ་གཅིག་ལ་སྒོར་ ༡༨༠༠༠ བཅས་སྤྲོད་རྒྱུའི་ཐག་གཅོད་གནང་ཡོད་འདུག

ཟླ་འདིའི་ཚེས་ ༢༥ ཉིན་འདི་གའི་གསར་འགོད་པ་ཆོས་རིག་ལས་ཁུངས་སུ་བཅར་ཏེ། འབྲེལ་ཡོད་ལས་བྱེད་ཟུང་དྲུང་ཐུབ་བསྟན་ཚེ་རིང་ལགས་སུ། སྐབས་གཉིས་པའི་གཞུང་ཆེན་རིགས་གཅིག་རྐང་འཛིན་པའི་ནང་འཛུལ་བཞུགས་བྱེད་མཁན་ག་ཚོད་བྱུང་ཡོད་མེད་དྲིས་པར་ཁོང་གིས། ད་ལྟ་བར་དུ་སྙན་ཞུ་ཕུལ་མཁན་གཅིག་ཀྱང་འབྱོར་མ་སོང་། ང་ཚོས་གསལ་བསྒྲགས་བྱས་པའི་སློབ་བསྡུའི་མཐའ་མའི་དུས་བཀག་ཕྱི་ཟླ་ ༡༠ ཚེས་ ༣༡ བར་ཡིན་སྟབས། རིམ་པས་སྙན་ཞུ་ཕུལ་མཁན་ཏོག་ཙམ་འབྱོར་མི་ཡོང་ངམ་བསམ་གྱི་ཡོད། སློབ་གཉེར་བ་གྲངས་ཀ་ཏག་ཏག་ཚང་མ་ཐུབ་ཀྱང་། མ་མཐར་ཉི་ཤུ་རྩ་གྲངས་ཤིག་འཛུལ་བཞུགས་བྱེད་ཐུབ་པའི་རེ་བ་རྒྱག་བཞིན་ཡོད། ཅེས་བརྗོད་བྱུང་།

གསར་འགོད་པས་གཞུང་ཆེན་རིགས་གཅིག་རྐང་འཛིན་ནང་འཛུལ་བཞུགས་བྱེད་པར་ཆ་རྐྱེན་གང་དག་ཚང་དགོས་པ་དང་ཆོས་རིག་ལས་ཁུངས་ཀྱིས་སྟངས་འཛིན་ཞིབ་འཇུག་བྱེད་སྟངས་གང་འདྲ་ཡོད་མེད་དྲིས་པར་ཁོང་གིས། ཆོས་སྡེ་སོ་སོའི་ལམ་སྲོལ་ལྟར་དགེ་བཤེས་དང་། ཡང་ན་སློབ་དཔོན་གྱི་ཚད་མཉམ་པའི་བསླབ་པ་མཐར་སོན་གྱི་ལག་འཁྱེར་ཡོད་པ་དང་། དེ་ལའང་མཐའ་མའི་རྒྱུགས་འཕྲོད་ནང་ཉུང་མཐར་བརྒྱ་ཆ་ ༦༠ ལོན་པ། དེ་ལ་དགོན་པ་སོ་སོའི་རྒྱབ་གཉེར་ཡོད་པ་ཞིག་ཡིན་དགོས། འཛུལ་བཞུགས་གནང་མཁན་ཚོར་ཆ་རྐྱེན་དེ་དག་ཚང་མིན་ཆོས་རིག་ལས་ཁུངས་ཀྱིས་ཆེད་ འཛུགས་གནང་བའི་མཁས་པའི་ཚོགས་ཆུང་གིས་ཞིབ་འཇུག་གནང་སྟེ་ཐག་གཅོད་གནང་གི་ཡོད་རེད། གཞུང་ཆེན་རིགས་གཅིག་རྐང་འཛིན་ནང་འཛུལ་བཞུགས་བྱེད་མཁན་དག་བོད་པ་ཡིན་དགོས་པ་ཆགས་ཀྱི་མེད། ད་ལྟ་འགྲོ་བཞིན་པའི་རིགས་གཅིག་རྐང་འཛིན་པ་མི་ ༢༡ ཁྲོད་ནས་ཧི་མ་ལ་ཡའི་རི་རྒྱུད་ཀྱི་མི་མང་པོ་ཡོད་པ་རེད། ཅེས་བརྗོད་བྱུང་།

གསར་འགོད་པས་སྐབས་སྔོན་མའི་གཞུང་ཆེན་རིགས་གཅིག་རྐང་འཛིན་པ་ཚོས་གཞུང་ཆེན་གང་དག་ཐོག་ཉམས་ཞིབ་གནང་གི་ཡོད་མེད་དྲིས་པར་ཁོང་གིས། གཞུང་ཆེན་འདྲ་མིན་ཐོག་ཉམས་ཞིབ་གནང་གི་ཡོད་ཀྱང་། དེ་དག་ཁྲོད་ནས་དབུ་མར་ཉམས་ཞིབ་གནང་མཁན་ ༧ དང་། ཕར་ཕྱིན་ལ་ ༡། འདུལ་བ་ལ་ ༣། སྔགས་ལ་ ༩། ཚད་མ་ལ་ ༡ བཅས་འདུག ཅེས་བརྗོད་བྱུང་།

ཐུབ་བསྟན་ལགས་སུ་སྐབས་དང་པོའི་གསལ་བསྒྲགས་ནང་ཆོས་བརྒྱུད་ཆེ་ཁག་ཏུ་རིགས་གཅིག་རྐང་འཛིན་པ་ ༡༠ རེ་དང་ཇོ་ནང་ནས་ ༥ བཅས་བསྡུ་རྒྱུ་ཡིན་སྐོར་འཁོད་ཡོད་ཀྱང་། དངོས་གཞིར་སློབ་གཉེར་བ་ ༢༡ ལས་བྱུང་མེད་པའི་རྒྱུ་མཚན་གང་ཡིན་དྲིས་པར་ཁོང་གིས། ང་ཚོས་གསར་འགྱུར་བརྒྱུད་ལམ་དང་། ཆོས་སྡེ་དང་དགོན་སྡེའི་སྒྲིག་འཛུགས་ཁག་ལ་གསལ་བསྒྲགས་སྔ་རྗེས་སྤེལ་ཏེ། མཐར་སློབ་གཉེར་བ་ ༢༥ ཡིས་སྙན་ཞུ་ཕུལ་ཡོད་ཀྱང་། མི་ ༣ ཆ་རྐྱེན་འདང་མིན་གྱི་དབང་གིས་ཕྱིར་འཐེན་བྱེད་དགོས་བྱུང་བ་རེད། གཞན་མི་གཅིག་ཆ་རྐྱེན་ཚང་ཡང་དགོངས་པ་ཞུས་པ་སོགས་ལ་བརྟེན་ཏེ། སྐབས་དང་པོར་རིགས་གཅིག་རྐང་འཛིན་པ་མི་ ༢༡ ལས་ཡོད་པ་མ་རེད། ཅེས་བརྗོད་བྱུང་།

ཁྱེད་ཅག་གི་གསལ་བསྒྲགས་ནང་རིགས་གཅིག་རྐང་འཛིན་པ་གཅིག་ལ་ཟླ་གཅིག་ལ་སློབ་ཡོན་ཧིན་སྒོར་ ༡༥༠༠ དང་ལོ་གཅིག་ལ་ ༡༨༠༠༠ འཁོད་འདུག་ན། དེང་སྐབས་ཕྱོགས་ཡོངས་ནས་འགྲོ་སོང་ཆེན་པོ་ཡིན་སྟབས་དངུལ་དེ་ཙམ་གྱིས་འདང་གི་ཡོད་མེད་དྲིས་པར་ཁོང་གིས། སློབ་ཡོན་འདི་སློབ་དེབ་ཉོ་ཆེད་ཀྱི་དོད་ཙམ་ཞིག་རེད། ད་ལྟ་གཞུང་ཆེན་རིགས་གཅིག་རྐང་འཛིན་འདིའི་ནང་འཛུལ་བཞུགས་བྱེད་མཁན་ཆ་ཚང་དགོན་པ་སོ་སོར་ཁུངས་ཡོད་མཁན་རྐྱང་ཆགས་ཡོད་སྟབས། ཁོང་ཚོའི་བཞུགས་ས་དང་ཞལ་ལག་སོགས་མཐུན་རྐྱེན་ག་རེ་ཡིན་ཡང་དགོན་པ་སོ་སོས་སྦྱོར་གྱི་ཡོད་པ་རེད། སློབ་ཡོན་འདི་ཁོང་ཚོ་ས་ཆ་གཞན་དུ་སློབ་སྦྱོང་ཆེད་འགྲོ་སྐྱོད་ཀྱི་ལམ་གྲོན་ལྟ་བུར་ཕུལ་བ་རེད། མང་པོ་ཞིག་འབུལ་རྒྱུར་ཆོས་རིག་ལས་ཁུངས་ལ་ལས་གཞི་འདིར་རོགས་རམ་བྱེད་མཁན་མེད་པ་མ་ཟད། སློབ་གཉེར་བ་ ༥༥ ལ་སློབ་ཡོན་གཅིག་མཚུངས་སྤྲོད་དགོས་སྟབས་འབོར་ཆེན་པོ་ཞིག་ཆགས་ཀྱི་ཡོད་པ་རེད། ཅེས་བརྗོད་བྱུང་།

གསར་འགོད་པ། དོན་གྲུབ།