སྲིད་འཛིན་ཟུར་པར་འདྲི་གཅོད།

ཁ་སང་ཨི་ཇིབ་གཞུང་གིས་སྲིད་འཛིན་ཟུར་པ་མོར་སི་ཡིས་རྒྱལ་ཁབ་ཀྱི་དམག་དོན་གསང་བ་ཕྱི་གྱར་བྱས་པའི་ཉེས་མིང་འོག་འདྲི་གཅོད་བྱ་རྒྱུ་ཡིན་སྐོར་བསྒྲགས་འདུག

ཁ་སང་ཨི་ཇིབ་གཞུང་གིས་འདས་ལོའི་ཟླ་ ༧ ཚེས་ ༣ ཉིན་གནས་དབྱུང་བཏང་བའི་ཨི་ཇིབ་སྲིད་འཛིན་མོར་སི་ (Mohamed Morsi ) ཡིས་དེ་སྔོན་དབང་ཆ་འཛིན་སྐབས་ཁཱ་ཌར་ (Qatar)རྒྱལ་ས་ཌོ་ཧཱ་ (Doha) ནང་རྟེན་གཞི་བྱས་པའི་ཨལ་ཇཱ་ཛེ་ར་ (al-Jazeera TV) བརྙན་འཕྲིན་བརྒྱུད་རྒྱལ་ཁབ་ཀྱི་དམག་དོན་གསང་བ་ཕྱིར་གྱར་བྱས་པའི་དོགས་གཞིར་རྩད་གཅོད་རྟོག་ཞིབ་བྱ་རྒྱུ་ཡིན་སྐོར་བསྒྲགས་འདུག

འདིའི་ཐད་ཨི་ཇིབ་རྒྱལ་སྲུང་བདེ་འཇགས་ལྷན་ཁང་གི་འབྲེལ་ཡོད་ལས་བྱེད་ཅིག་གིས་རོའུ་ཊར་གསར་ཁང་ཐོག་བརྗོད་དོན། ང་ཚོས་མོར་སི་ཡི་དྲུང་ཡིག་བུ་མོ་དང་ཨལ་ཇཱ་ཛེ་ར་གསར་ཁང་གི་ཨི་ཇིབ་གསར་འགོད་པའི་བར་གྱི་སྐད་ཆར་ལྐོག་ཉན་བྱས་སྐབས། ཁོ་མོས་གསར་འགོད་པར་ཨི་ཇིབ་ཀྱི་རྒྱལ་སྲུང་དང་འབྲེལ་བའི་ཡིག་ཆ་གལ་ཆེན་ཞིག་ མཁོ་སྤྲོད་བྱ་རྒྱུ་ཡོད་སྐོར་ལབ་ཡོད་སྟབས། ད་ལྟ་ང་ཚོས་མོར་སི་ལ་ཁོའི་དྲུང་ཡིག་བུ་མོ་དེའི་སྐད་ཆའི་ནང་དོན་གང་ཡིན་དང་ཡིག་ཆ་དེ་དག་དྲུང་ཡིག་བརྒྱུད་ཕྱི་ཕྱོགས་སུ་གྱར་ཡོད་མེད་བཅས་ཀྱི་ཐོག་རྟོག་ཞིབ་བྱེད་བཞིན་ཡོད། ང་ཚོས་བུད་མེད་དེས་ཨི་ཇིབ་ཀྱི་གསང་བའི་ཡིག་ཆ་དག་ཁཱོ་ཌར་གསང་བའི་ལས་ཁུངས་ལ་གཏོང་རྒྱུའི་ཐབས་ཤེས་བྱས་པ་ཤེས་ཀྱི་ཡོད། ཅེས་སོགས་བརྗོད་འདུག

ཨལ་ཇཱ་ཛེ་ར་གསར་ཁང་གིས་རོའུ་ཊར་གསར་ཁང་ལ་བརྗོད་པར། “ང་ཚོས་གསར་འགོད་ཀུན་སྤྱོད་དང་མཐུན་པའི་གནས་ཚུལ་བསྡུ་རུབ་དང་འགོད་སྤེལ་བྱེད་ཀྱི་ཡོད་ཡོད་སྟབས། གནས་ཚུལ་དེའི་སྐོར་ལ་འགྲེལ་བཤད་རྒྱག་དགོས་པ་གང་ཡང་མེད” ཅེས་བརྗོད་འདུག

༢༠༡༢ ལོའི་ཟླ་ ༦ ཚེས་ ༣༠ ཉིན་ནས་མོར་སི་ཡིས་ཨི་ཇིབ་ཀྱི་དབང་ཆ་བཟུང་པ་ནས་བཟུང་ཁོས་འཇིགས་སྐུལ་རིང་ལུགས་པ་དང་མཉམ་ལས་བྱས་པ་མ་ཟད། ཁོ་རང་ལ་ཁ་གཏད་གཅོག་མཁན་ཁག་ལྐོག་གསོད་དང་འབྲེལ་བཙོན་འཇུག་བྱས་པའི་བཙོན་པ་དག་ཀློད་གྲོལ་བཏང་སྟེ། ཨི་ཇིབ་ནང་ཟིང་འཁྲུག་བརྒྱུད་སྐུལ་བྱས་ཏེ་སྲིད་འཛིན་མོ་བྷ་རག་ (Hosni Mubarak) གི་དབང་ཆ་བཙན་འཕྲོག་བྱས་པ་སོགས་ཀྱི་ནག་ཉེས་བསགས་ཡོད་སྟབས། ༢༠༡༣ ལོའི་ཟླ་ ༧ ཚེས་ ༣ ཉིན་ཨི་ཇིབ་དམག་མིས་མོར་སི་ཡི་སྲིད་དབང་མགོ་རྟིང་བསློགས་པ་མ་ཟད། ཁོར་རྒྱབ་སྐྱོར་བྱེད་མཁན་ཁ་ཆེ་གྲོགས་པོ་མཐུན་ཚོགས་ཀྱི་མགོ་ཁྲིད་ཁག་ཅིག་བཀག་བསྐྱིལ་བྱས་པ་དང་། མང་པོ་ཞིག་ལ་ཚེ་བཙོན་གྱི་ཁྲིམས་ཐག་བཅད་ཡོད་སྟབས། གཞུང་འཛིན་ཤོག་ཁག་དང་ཁ་ཆེ་གྲོགས་པོ་མཐུན་ཚོགས་ལ་རྒྱབ་སྐྱོར་བྱེད་མཁན་བར་ནང་འཁྲུག་ཤོར་ཏེ། ལོ་གཅིག་ནང་མི་ ༡༤༠༠ ལྷག་རྐྱེན་འདས་དང་གཞན་མི་ ༡༦༠༠ ཙམ་བཀག་ཉར་བྱས་ཡོད་འདུག

༢༠༡༤ ལོའི་ཟླ་ ༣ ནང་ཨི་ཇིབ་ནང་སྲིད་བློན་ཆེན་གྱིས་མོར་སི་ཡི་དྲུང་ཡིག་ཨ་མེན་ཨལ་སེ་ཧྥ་ཧྥེ་ (Amin al-Sefafi) ཡིས་ཨལ་ཇཱ་ཛེ་ར་གསར་ཁང་གི་རྩོམ་སྒྲིག་པ་དང་ཁ་ཆེ་གྲོགས་པོ་མཐུན་ཚོགས་ཀྱི་ཚོགས་མི་གཅིག་ལྕོགས་ལ་རྒྱལ་ཁབ་ཀྱི་དམག་དོན་གསང་བ་ཕྱི་གྱར་བྱས་ཡོད་སྐོར་བརྗོད་ཡོད་པ་མ་ཟད། ༢༠༡༣ ལོའི་ ༦ ནང་ཨལ་ཇཱ་ཛེ་ར་གསར་ཁང་གི་གསར་འགོད་པས་གསར་འགྱུར་རྫུན་མ་ཁྱབ་སྤེལ་དང་འབྲེལ། ཨི་ཇིབ་གཞུང་གིས་འཇིགས་སྐུལ་རིང་ལུགས་པར་ངོས་འཛིན་བྱེད་བཞིན་ཡོད་པའི་ཁ་ཆེ་གྲོགས་པོ་མཐུན་ཚོགས་ལ་རྒྱབ་སྐྱོར་བྱེད་བཞིན་ཡོད་པའི་ཉེས་མིང་བཀལ་ཏེ། གསར་འགོད་པ་ཧྥ་མི་ (Mohamed Fahmy) དང་པི་ཊར་ (Peter Greste)། བྷ་ཧར་(Baher Mohamed) བཅས་འཛིན་བཟུང་གིས་ལོ་ ༧ ནས་ ༡༠ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་པ་སོགས་ཁཱ་ཌར་གཞུང་ལ་ཁོང་ཁྲོ་སློང་གཞིའི་བྱ་སྤྱོད་མང་པོ་ཞིག་སྤེལ་ཡོད་སྟབས། ད་ལྟ་ཨི་ཇིབ་དང་ཁཱ་ཌར་བར་གྱི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་འདུག

ཨི་ཇིབ་གནད་དོན་ཆེད་མཁས་པ་མཱོ་མཱ་ཋ་གྷ་རེག་ལགས་ཀྱིས། “མོར་སི་འཛིན་བཟུང་བྱས་པར་བརྟེན་ཨི་ཇིབ་ནང་སྔར་ལྷག་ནང་འཁྲུག་ལངས་བཞིན་ཡོད་སྟབས། ད་ལྟ་ང་ཚོས་ནང་ཁུལ་གྱི་དཀའ་རྙོག་སེལ་དགོས་པ་ལས་གཅིག་གིས་གཅིག་ལ་ཁ་གཏད་གཅག་ཚེ། མ་འོངས་པར་ཕན་ལས་གནོད་ཆེ་བ་ཡོང་རྒྱུ་ཡིན” ཞེས་བརྗོད་འདུག

ཆབ་སྲིད་དབྱེ་ཞིབ་པ་ཚོས། ཁ་སང་ཨི་ཇིབ་གཞུང་གིས་མོར་སི་ཡིས་རྒྱལ་ཁབ་ཀྱི་དམག་དོན་གསང་བ་ཕྱི་གྱར་བྱས་ པའི་ཉེས་མིང་འོག་འདྲི་གཅོད་བྱ་རྒྱུ་ཐག་གཅོད་བྱས་ཡོད་སྟབས། ཁོར་རྒྱབ་སྐྱོར་བྱེད་མཁན་གྱི་ཁ་ཆེ་གྲོགས་པོ་མཐུན་ཚོགས་ཀྱིས་གཞུང་ལ་འཁོན་ལན་སློག་སྲིད་པ་མ་ཟད། གནད་དོན་དེས་ཁཱ་ཌར་རྒྱལ་ཁབ་ལའང་ཕོག་ཐུག་ཕྱིན་ཡོད་པར་བརྟེན། མ་འོངས་པར་ཁྱིམ་མཚེས་རྒྱལ་ཁབ་གཉིས་ཀྱི་འབྲེལ་ལམ་ལ་འགོག་རྐྱེན་དང་། རྒྱལ་ཁབ་ཀྱི་བརྟན་ལྷིང་སྲུང་སྐྱོབ་ལའང་དཀའ་ངལ་འཕྲད་རྒྱུ་ཡིན་སྐོར་བརྗོད་འདུག

གསར་འགོད་པ། དོན་གྲུབ།