ད་ལྟ་རང་སྤྱི་འཐུས་གྲོས་ཚོགས་ནང་ད་ལྟའི་ཤེས་རིག་དྲུང་ཆེ་ལས་ཐོག་དངོས་གྲུབ་ཚེ་རིང་ལགས་ཤེས་རིག་བཀའ་བློན་དུ་སྤྱི་མོས་བདམས་ཐོན་བྱུང་སོང་།
དེ་རིང་སྔ་དྲོའི་ཆུ་ཚོད་ ༩།༣༠ སྟེང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་བཞི་པའི་ཞོགས་པའི་ལས་རིམ་གྱི་ཐོག་མར། བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་ ༢༢ པའི་དགོངས་དོན་ལྟར། སྲིད་སྐྱོང་བློ་བཟང་སེང་གེ་མཆོག་གིས་གྲོས་ཚོགས་ནང་ད་ལྟའི་ཤེས་རིག་དྲུང་ཆེ་ལས་ཐོག་དངོས་གྲུབ་ཚེ་རིང་ལགས་ཤེས་རིག་བཀའ་བློན་གྱི་འོས་གཞིར་མཚན་འདོན་གནང་བ་ལྟར། སྤྱི་འཐུས་ཡོངས་ཀྱིས་རྒྱབ་སྐྱོར་གནང་སྟེ་སྤྱི་མོས་ཐོག་དངོས་གྲུབ་ཚེ་རིང་ལགས་ཤེས་རིག་བཀའ་བློན་དུ་བསྐོ་བཞག་གནང་སོང་།
དངོས་གྲུབ་ཚེ་རིང་ལགས་ནི། ཕྱི་ལོ་ ༡༩༥༣ ཟླ་ ༧ ཚེས་ ༡ ཉིན་བོད་སྐྱིད་གྲོང་དུ་འཁྲུངས་ཤིང་། བཙན་བྱོལ་དུ་ཕེབས་རྗེས་སིམ་ལ་གཏན་སློབ་ཏུ་སློབ་སྦྱོང་གནང་སྟེ་ ༡༩༧༣ ལོར་གཞི་རིམ་འཛིན་གྲྭ་ ༡༡ ཐོན་སྐབས་གྲུབ་འབྲས་རྩེར་སོན་བྱུང༌། བོད་སློབ་འཛིན་ཚོགས་ཀྱི་སློབ་ཡོན་ཐོབ་སྟེ་ ༡༩༧༧ ལོར་ཅན་དྷི་གྷར་ནས་ཉེ་བའི་གཙུག་ལག་རབ་འབྱམས་པ་དང་ ༡༩༧༩ ལོར་གཙུག་ལག་རབ་འབྱམས་པ་ལོ་དང་པོ་ཐོན། ༡༩༧༦ ནས་ ༡༩༧༩ དུས་ཡུན་རིང་ཅན་དྷི་གྷར་ས་གནས་གཞོན་ལྷན་གྱི་དྲུང་ཆེ་དང་ས་གནས་རང་བདེན་ཚོགས་ ཆུང་གི་ཚོགས་གཙོ་ཡང་གནང༌།
དེ་ནས་སྐབས་བདུན་པའི་བོད་མི་མང་སྤྱི་འཐུས་ཁོངས་དབུས་གཙང་སྤྱི་འཐུས་སུ་འདེམས་ཐོན་ལྟར་སྤྱི་འཐུས་གནང་རྗེས་ ༡༩༨༣ ཟླ་ ༢ ཚེས་ ༡ ནས་ཤེས་རིག་ལས་ཁུངས་ཀྱི་དྲུང་གཞོན་དུ་ཐད་བསྐོས་གནང༌། ༡༩༨༧ ཟླ་ ༤ ཚེས་ ༡༥ ནས་ནང་སྲིད་ལས་ཁུངས་ཀྱི་དྲུང་གཞོན་གནང༌། ༡༩༩༠ ཟླ་ ༡༢ ཚེས་ ༡༠ ཉིན་གནས་དྲུག་པར་གནས་སྤར་གྱིས་བོད་གཞུང་ཟློས་གར་གྱི་འགན་འཛིན་དུ་བསྐོས། ༡༩༩༣ ཟླ་ ༡༠ ཚེས་ ༡ ནས་དྲུང་ཆེ་ལས་འཕར་དུ་གནས་སྤར་བྱས། ཟློས་གར་འགན་འཛིན་གནང་རིང་ལས་དོན་གྲུབ་འབྲས་གཟེངས་སུ་ཐོན་པར་བརྟེན་སུད་སི་ བོད་མིའི་གཟེངས་རྟགས་ཀྱང་ཐོབ། ༡༩༩༥ ཟླ་ ༡༠ ཚེས་ ༡༨ ཉིན་གནས་རིམ་རང་འཇགས་ཐོག་ཤེས་རིག་དྲུང་ཆེའི་ལས་འགན་བཀོད་སྒྲིག་གནང༌། ༡༩༩༦ ཟླ་ ༥ ཚེས་ ༤ ཉིན་ལས་འགན་རང་འཇགས་ཐོག་དྲུང་ཡིག་ཆེ་མོར་གནས་སྤར་བྱས། ༡༩༩༩ ཟླ་ ༡༠ ཚེས་ ༡༥ ནས་ནང་སྲིད་དྲུང་ཆེར་གནས་སྤོས་གནང༌། ༢༠༠༠ ཟླ་ ༥ ཚེས་ ༡ ནས་ལོ་གཉིས་རིང་ཕོགས་མེད་གུང་གསེང་དུ་གནས་མུར་དགོངས་ཞུ་ཕུལ་བ་ལྟར་ ༢༠༠༢ ཟླ་ ༢ ཚེས་ ༡༨ ནས་རྩ་དགོངས་ཐོབ་སྟེ་ཨ་རིར་བཞུགས།
སྐབས་བཅུ་བཞི་པའི་བཀའ་ཤག་གིས་བཀོད་ཁྱབ་གནང་བ་ལྟར་དབུས་བོད་མིའི་སྒྲིག་འཛུགས་ཀྱི་གྲོས་འདྲི་བྱ་ཡུལ་དང་། ཕྱི་ལོ་ ༢༠༡༢ ཟླ་ ༤ ཚེས་ ༢ ཉིན་ཤེས་རིག་དྲུང་ཆེའི་ལས་འགན་བསྐྱར་བསྐོ་གནང་བ་བཞིན་ཟླ་ ༤ ཚེས་ ༥ ཉིན་མཛད་འགན་དངོས་བཞེས་གནང་། དེ་རིང་ཕྱི་ལོ་ ༢༠༡༤ ཟླ་ ༩ ཚེས་ ༡༦ ཉིན་ཏེ་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་སྟེང་སྤྱི་མོས་ཐོག་ཤེས་རིག་བཀའ་བློན་དུ་བསྐོ་བཞག་གནང་ཡོད།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཡང་ཡང་ཙི་ཙི་ཁ་ཤས་སླེབས་འདུག གྲོས་ཚོགས་ཀྱི་སྤྱི་མོས་བྱུང་ཞིང་། ཡུན་རིང་གཞུང་གི་སྲིད་ཞུ་སྒྲུབ་མྱོང་བའི་ཤེས་འབྱོན་ལྡན་པ་ཞིག་བསྐོས་པ་ཡག་པོ་བྱུང་འདུག བཀྲ་ཤིས་བདེ་ལེགས་དང་ལས་དོན་ལམ་ལྷོང་ཡོང་བའི་སྨོན་འདུན་ཡོད།
ད་ནི་རེ་བ་ཉག་ཅིག་ཡོད་པ་ནི་ཤེས་རིག་དྲུང་ཆེ་ལ་མི་སུ་ཞིག་བསྐོ་མིན་དེ་རེད། མགོ་སྲིད་སྐྱོང་ནས་ཤེས་རིག་བཀའ་བློན་ནས། བོད་ཁྱིམ་གྱི་ངེས་སྟོན་པ་དང་འགན་འཛིན་ནས་བཟུང་ཤེས་ཡོན་སྲིད་བྱུས་གླེང་སྐབས་མགོ་ན་མཁན་རྐྱང་ཆགས་སོང་། བཙན་བྱོལ་ནང་གི་བོད་ཡིག་བོད་སྐད་རྦད་དེ་ཚར་སོང་། ཡང་སྒོས་ཤེས་ཡོན་སྲིད་བྱུས་ཀྱི་རེ་བ་རྩ་ནས་བརླགས་སོང་། ཆེས་མཐའ་མཇུག་གི་རེ་བ་ཉག་ཅིག་ཡོད་པ་ནི་ཤེས་རིག་ལས་ཁུངས་ཀྱི་དྲུང་ཆེར་མི་སུ་འདྲ་ཞིག་བསྐོ་བཞག་གནང་མིན་དེ་རེད། ང་ཚོས་འདི་ལ་རེ་བ་བརྒྱབ་ནས་ལག་པ་འཇུ་ས་ཙམ་ཨཻ་ཉན་ལ་བལྟ་རྒྱུ་དེ་རེད།
མི་འདི་བཟང་པོ་ཞིག་དང་ཤེས་ཡོན་ཅན་ཞིག་ཡིན་པའི་ཚུགས་ཀ་རིམ་པར་བྱུང་། ད་ལས་གནས་གཅིག་གི་འགན་འཁྲི་ཐོག་ལ་བབས་དུས་འགན་ཁུར་ཆེན་པོ་ཡོད། བོད་རིགས་ཆེད་སེམས་ཤུགས་མི་ཆགས་པར་འབད་བརྩོན་གནོངས་དང་། དྲང་བདེན་ལ་དགའ་མཁན་ཚོས་རྒྱབ་སྐྱོར་བྱེད་ངེས། སློབ་གྲྭ་ཁག་གི་འགན་འཛིན་བསྐོ་འཇོག་སོགས་ལ་ཞིབ་ཏུ་བརྟག་དགོས།
ང་ནི་མི་འདི་ལ་རྒྱུས་མངའ་གང་ཡང་མེད་མོད། བཀུར་འོས་སྤྱི་མཐུས་རྣམས་ཀྱིས་སྤྱི་མོས་ཐོག་ནས་འདེམས་གནང་བ་ཡིན་དུས་ཡག་པོ་ཞིག་ཡོད་པའི་རེ་བ་ཡོད། དེ་མིན་དྲྭ་འབུ་འདི་ཚོས་འུར་རྒྱག་མི་དགོས་ས་མེད་དུས་ལེགས་གང་ཞིག་བཤད་རུང་ཡིད་ཆེས་གང་ཡང་མེད། མདོར་ན་བཀའ་བློན་འདི་བོད་པའི་སྐད་ཡིག་དང་། རིག་གནས་ཀྱི་རིན་མཐོང་ཤེས་མཁན། དེ་ལ་དགའ་མོས་དང་གལ་ཆེར་ངོས་འཛིན་གནང་མཁན་ཞིག་ཡིན་པའི་རེ་བ་ཡོད།
ང་ནི་མི་འདི་ལ་རྒྱུས་མངའ་གང་ཡང་མེད་མོད། བཀུར་འོས་སྤྱི་མཐུས་རྣམས་ཀྱིས་སྤྱི་མོས་ཐོག་ནས་འདེམས་གནང་བ་ཡིན་དུས་ཡག་པོ་ཞིག་ཡོད་པའི་རེ་བ་ཡོད། དེ་མིན་དྲྭ་འབུ་འདི་ཚོས་འུར་རྒྱག་མི་དགོས་ས་མེད་དུས་ལེགས་གང་ཞིག་བཤད་རུང་ཡིད་ཆེས་གང་ཡང་མེད། མདོར་ན་བཀའ་བློན་འདི་བོད་པའི་སྐད་ཡིག་དང་། རིག་གནས་ཀྱི་རིན་མཐོང་ཤེས་མཁན། དེ་ལ་དགའ་མོས་དང་གལ་ཆེར་ངོས་འཛིན་གནང་མཁན་ཞིག་ཡིན་པའི་རེ་བ་ཡོད།
དངོས་གྲུབ་ཚེ་རིང་ཞེས་པ་དེ་ཨ་རི་ནས་སྐད་བཏང་ཡོང་ནས་ཤེས་རིག་ལས་ཁུངས་སུ་བཞག ལོ་མང་རིང་ཤེས་རིག་ལས་ཁུངས་སུ་ཕྱག་ལས་ཀྱི་ཉམས་མྱོང་ཡོད་པ་དང་། ལྷག་པར་ཤེས་ཡོན་སྲིད་བྱུས་ཀྱི་ལྟ་གྲུབ་ལ་རྒྱུས་མངའ་དང་ཡིད་ཆེས་ཡོད་པའི་མི་སྣ་དག་གཙང་སེལ་བཟོས། དེ་ནས་ཤེས་རིག་བཀའ་བློན་དུ་བསྐོ་བཞག་བྱུང་བ་རེད། འདི་ལྐོག་གསོད་ཀྱི་ཁྱད་ཆོས་ལྡན་པའི་སྲིད་བྱུས་ཤིག་གི་འཕེལ་རིམ་རེད།
མ་གཞི་ལྟ་གྲུབ་དང་ལམ་ལུགས་གང་ཞིག་ལ་རྒྱུས་མངའ་དང་ཡིད་ཆེས་མེད་པའི་མི་ཞིག་གིས་ལྟ་གྲུབ་དེ་རྒྱུན་སྐྱོང་དང་ལམ་ལུགས་དེ་ལག་བསྟར་བྱེད་ཐུབ་ཀྱི་མ་རེད། མི་འདི་ཤེས་རིག་སྲིད་བྱུས་དང་རྒྱུས་མངའ་དང་ཡིད་ཆེས་གཉིས་ཀ་ཡོད་མཁན་གྱི་མི་སྣ་ཞིག་ཡིན་མིན་དང་། དེའི་ཕྱོགས་ཀྱི་གདེང་ཚོད་དང་སྙིང་སྟོབས་ཡོད་མཁན་ཞིག་ཡིན་མིན་སོགས་སྤྱི་འཐུས་དག་གི་བློ་ལ་འཁོར་ཡོད་པ་རེད་དམ།
ད་དུང་སྲིད་སྐྱོང་གིས་ཤེས་རིག་གི་གནད་དོན་གལ་ཆེན་ཡིན་པས་ང་རང་གིས་ཤེས་རིག་བཀའ་བློན་བྱེད་ཀྱི་ཡིན་ལབ་པ་རེད། འོ་ན་ད་སྲིད་སྐྱོང་གི་ཤེས་རིག་གི་གནད་དོན་ལ་ལྟ་སྟངས་འགྱུར་བ་སོང་བ་རེད་དམ།
བཀའ་བློན་གཞན་དག་ལོ་གཅིག་གཉིས་ནང་འགྱུར་བ་མ་སོང་བར་ཤེས་རིག་བཀའ་བློན་འགྱུར་བ་འགྲོ་དགོས་པའི་རྒྱུ་མཚན་གང་ལ་ཐུག་པ་རེད་དམ།
གནད་དོན་འདི་དག་སྤྱི་འཐུས་ཚོས་གླེང་མ་ཤེས་པ་རེད་དམ། གླེང་མ་ཕོད་པ་རེད།
དྲུང་ཆེ་ལས་འཕར་དུ་གནས་སྤར་བྱས། ཟློས་གར་འགན་འཛིན་གནང་རིང་ལས་དོན་གྲུབ་འབྲས་གཟེངས་སུ་ཐོན་པར་བརྟེན་སུད་སི་ བོད་མིའི་གཟེངས་རྟགས་ཀྱང་ཐོབ།
ཟློས་གར་ཁང་ལ་ལོ་ངོ་ལྔ་བཅུའི་ནང་གྲུབ་འབྲས་གཟེངས་ཐོན་གང་ཡང་མེད་པ་མ་ཟད། བཙན་བྱོལ་ནང་གི་གྲུབ་འབྲས་དང་འགྱུར་ལྡོག་གང་ཡང་མེད་པའི་མཚོན་རྟགས་རང་བཞིན་གྱི་ཚོགས་པ་དེ་ཡིན་པས་ན། དངོས་གྲུབ་ཚེ་རིང་གི་དེའི་འགན་འཛིན་ནས་གྲུབ་འབྲས་གཟེངས་ཐོན་ག་རེ་བླངས་པ་ཡོད་དམ།
ད་ཐེངས་ཀྱི་ཤེས་རིག་བཀའ་བློན་ལ་སྤྱི་མོས་བྱུང་ཡོད་ན། དེ་ནི་སྤྱི་འཐུས་ཚོའི་ཞབས་འདྲེན་ཆེན་པོ་ཞིག་རེད། ཁོའི་ཤེས་ཡོན་གྱི་ལྟ་གྲུབ་དང་། འཛིན་སྐྱོང་གི་གཏན་ཚིགས། འཕེལ་རྒྱས་ཀྱི་དམིགས་ཚད་གང་ཞིག་གསལ་འདོན་གང་གནང་བ་རེད་དམ། སྤྱི་འཐུས་ཚོའི་སྤྱི་མོས་འབྱུང་བ་མ་མཐའ་རྩ་བའི་ཆ་རྐྱེན་ཞིག་ཀྱང་དགོས་ཀྱི་མེད་པ་འདྲ།
ད་ལྟ་དཀའ་ངལ་ཆེ་ཤོས་བོད་ནང་དམ་དྲག་གིས་འཇིགས་སྣང་དེ་ཡིན་ནུས་ཤུགས་འདོན་ཐུབ་ན་དགེ་མཚན་ཡོད་ན་མི་ཤེས་མ་གཏོགས་རྒྱ་གར་ནང་གཞིས་ཆགས་མང་ཆེ་བ་ད་ཆ་རྩ་རྩི་ཤིང་དང་ཙི་ཙི་གཉིས་ཀྱི་རྩིས་བླངས་ཚར་སོང་།སྲིད་སྐྱོང་སོགས་ལས་བྱེད་རྣམས་བྱེད་བྲལ་ཡིན་དང།་མགོ་གཡེང་སོང་ཡིན་ཧ་གོ་གི་མི་འདུག་
དངོས་གྲུབ་ཚེ་རིང་ལགས་ཤེས་རིག་བཀའ་བློན་དུ་བསྐོ་བཞག་གནང་བར་བཀྲ་ཤིས་བདེ་ལེགས་ཞུ།