དོན་དངོས་ཤེས་ཡོན་སྲིད་བྱུས་ལ་མོས་པ་ཡོད་དམ།

བསྟན་པ།

བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་དེ་ནི་ཕྱི་ལོ་ ༢༠༠༤ ལོར་བཀའ་ཤག་སྐབས་ ༡༢ པས་གསར་བཏོད་གནང་ནས་གྲོས་ཚོགས་ཚོགས་སྐབས་ ༡༦ ཐོག་གཏན་འབེབ་བྱུང་བའི་ལོ་རྒྱུས་རང་བཞིན་ལྡན་པའི་སྲིད་བྱུས་གལ་ཆེན་ཞིག་ཆགས་ཡོད། གང་ཡིན་ཞེ་ན། མི་ལོ་ལྔ་བཅུའི་རིང་བཙན་བྱོལ་སློབ་གྲྭ་ཁག་ནས་ཐོན་པའི་བོད་ཕྲུག་རྣམས་ནི་ནུབ་ཕྱོགས་ཀྱི་ཤེས་རིག་གཙོ་བོར་བྱེད་པའི་སློབ་གཞི་ཞིག་གི་འོག་ཚར་ལོངས་བྱུང་པ་རྐྱང་ལས། རང་གི་རིག་གཞུང་དང་སྐད་ཡིག་གཙོ་བོར་བྱེད་པའི་ཤེས་ཡོན་སྲིད་བྱུས་ཤིག་གི་འོག་ཤེས་རིག་སྦྱོང་རྒྱུའི་གོ་སྐབས་ཅུང་ཙམ་ཡང་བྱུང་མེད་པས་སོ།།

འོན་ཀྱང་ད་ལྟའི་བཀའ་ཤག་གིས་སྲིད་བྱུས་དེར་མཇུག་སྐྱོང་གནང་སྟངས་ཐད་གཟིགས་ཚུལ་འདྲ་མིན་བྱུང་དང་འབྱུང་བཞིན་ཡོད་པ་ནི་ཚང་མས་ཧ་གོ་གསལ་རེད། སྐབས་བབ་གྲོས་ཚོགས་ལ་མཚོན་ན་བཀའ་ཤག་གིས་སྤྱི་འཐུས་ལྷན་ཁང་གི་ཞིབ་དཔྱོད་ཚོགས་ཆུང་ལོགས་སུ་བཙུགས་པར་དོགས་འདྲི་དང་། གྲོས་ཚོགས་མ་ཚུགས་གོང་བྲེལ་བྲེལ་ཚུབ་ཚུབ་ཀྱིས་ཤེས་ཡོན་སྲིད་བྱུས་དང་འབྲེལ་བའི་ཚོགས་འདུ་རབ་དང་རིམ་པ་ཞིག་སྐོང་སྟངས་སོགས་ལ་བལྟས་ན། ཤེས་ཡོན་སྲིད་བྱུས་དེ་དོན་དངོས་སུ་ཆབ་སྲིད་ཀྱི་ལག་ཆ་ཞིག་དང་། དེ་ལ་ངོ་རྒྱབ་ཀྱི་རྣམ་པ་སྟོན་སྟངས་སོ་སོར་ཞིག་མེད་དམ་སྙམ་པའི་དོགས་པ་དང་སེམས་ཚོར་རང་བཞིན་གྱིས་ཡོང་གི་འདུག

ད་ལྟའི་སྲིད་སྐྱོང་གིས་ཤེས་ཡོན་གཙོ་བོ་ཡིན་གསུང་གི་ཡོད་པ་ནི་ཚང་མས་མཁྱེན་གསལ་རེད། འོན་ཀྱང་ཁོང་གིས་ཤེས་ཡོན་ཞེས་པའི་ཐ་སྙད་དེར་ངོས་འཛིན་ཅི་འདྲ་ཞིག་ལ་གནང་གི་ཡོད་པ་དང་། ཤེས་ཡོན་སྲིད་བྱུས་ཀྱི་དགོངས་དོན་དང་སྲིད་སྐྱོང་གི་ཤེས་ཡོན་གཉིས་མཐུན་མིན་ཐད་དོགས་པ་མང་པོ་ཞིག་ངང་ངམ་ཤུགས་ཀྱིས་ཡོང་གི་འདུག དཔེར་ན། སྲིད་སྐྱོང་ནས་འཛིན་རིམ་བཅུ་པ་དང་བཅུ་གཉིས་ཀྱི་ཨང་རིམ་བརྒྱ་ཆ་དེ་དག སྟེགས་བུ་ཡོད་ཚད་ཐོག་ནས་བསྟོད་སྔགས་གནང་སྟངས་ལ་གཞིགས་ན་ད་ལྟའི་བཀའ་ཤག་གི་ཤེས་ཡོན་དང་ཤེས་ཡོན་སྲིད་བྱུས་ཀྱི་ཤེས་ཡོན་གཉིས་བར་ཁྱད་པར་ཆེན་པོ་ཞིག་ཤོར་ནས་འགྲོ་བཞིན་མེད་དམ་སྙམ་པའི་སེམས་འཚབ་ཅིག་ཡོང་གི་འདུག

གལ་ཏེ་སྲིད་སྐྱོང་ནས་གཞི་རིམ་ཤེས་ཡོན་སྲིད་བྱུས་ལ་མོས་མཐུན་མེད་ན། རང་ཉིད་ནས་སྲིད་བྱུས་གསར་པ་སྟོན་རྒྱུའི་རང་དབང་དང་དབང་ཚད་ཆ་ཚང་ཡོད་ཡོད་པ་རེད། འོན་ཀྱང་ཁོང་ལ་དེ་འདྲའི་དགོངས་འཆར་མེད་པ་ནི་ཤེས་ཡོན་ལྷན་ཚོགས་ཀྱི་འགན་འཛིན་བསྐོ་འདེམས་བྱེད་སྟངས་ལས་དཔོག་ཐུབ་ཀྱང་། དོན་དངོས་ཐག་སྲིད་སྐྱོང་ཤེས་ཡོན་སྲིད་བྱུས་ལ་མོས་པ་ཡོད་ན་ཤེས་རིག་ལས་ཁུངས་ལ་བཞུགས་འཕྲལ་སྐུ་ཉིད་ནས་སྲིད་བྱུས་དེ་ལག་བསྟར་ཅི་གནང་དང་དོན་འབྲས་ཅི་བྱུང་ཐད་ལ་ཞིབ་དཔྱོད་སྐབས་དེ་དུས་བྱ་དགོས་པ་ཞིག་ཆགས་ཡོད།

ད་ཆ་ལོ་གསུམ་ལྷག་འདས་མཚམས་སྲིད་བྱུས་དེ་དོན་འཁྱོལ་དང་ཕན་འབྲས་བྱུང་མིན་གྱི་ཚོགས་ཆུང་གོ་སྒྲིག་གནང་རྒྱུ་ཡིན་པ་དེ་ནི་ཡ་མཚན་དང་། ལྷག་པར་གྲོས་ཚོགས་ཀྱི་ཚོགས་ཆུང་བཙུགས་པ་ལ་བཀའ་ཤག་གིས་བློ་ཁ་མི་བདེ་ཚུལ་བྱེད་སྟངས་སོགས་ལས་གཞི་རིམ་ཤེས་ཡོན་སྲིད་བྱུས་དེར་ཡང་སྙིང་མོས་པ་དེ་ཙམ་ཨེ་ཡོད་ན་སྙམ་པའི་དོགས་པ་དང་ཐེ་ཚོམ་སྔར་ལྷག་ཆེ་རུ་འགྲོ་བའི་རྐྱེན་རྩར་འགྱུར་སོང་།

ཤེས་རིག་བཀའ་བློན་ད་ཆ་གཞི་ནས་ལོགས་སུ་འདེམས་པ་དེ་ནི་ཡག་ས་ནས་བཤད་ན་ཤེས་ཡོན་ལ་ཐུགས་འཁུར་ཆེ་ཤེས་ཡིན་རྒྱུ་རེད་ཏེ། སྡུག་ས་ནས་བཤད་ན་སྲིད་སྐྱོང་གི་ཤེས་ཡོན་སྲིད་བྱུས་ཀྱི་དཀའ་རྙོག་དང་དྲི་བ་ཁག་ལས་གཡོལ་ཐབས་དང་། དེ་སྔའི་ལོ་གསུམ་རིང་ཤེས་ཡོན་སྲིད་བྱུས་ཁ་བཤད་ཙམ་ལས་དོན་དམ་དུ་འཐུས་ཤོར་ཆེན་པོ་བཏང་བའི་རྟགས་མཚན་ཞིག་མིན་པའི་རེ་བ་ཡོད།

ད་དུང་བཀའ་ཤག་གིས་བོད་སློབ་ཁག་རྩིས་སྤྲོད་སྐོར་གསུངས་སྐབས། འཐུས་ཤོར་ནི་འགྲོ་ངེས་རེད་གསུངས་པ་མ་གཏོགས་འཐུས་ཤོར་དེ་དག་གང་ནས་འོང་སྲིད་པ་དང་། དེ་དག་ལ་གདོང་ལེན་གྱི་ཐབས་ལམ་ཅི་ཞིག་གསར་གཏོད་གྲ་སྒྲིག་ཡོད་པ་གསུང་རྒྱུ་མི་འདུག་སྟབས། ཡང་སྙིང་ད་ལྟའི་བཀའ་ཤག་གིས་དེ་སྔ་ཤེས་ཡོན་གལ་གནད་ཆེ་ཤོས་ཡིན་ཞེས་གསུངས་པ་དེ་ཅི་འདྲ་ཞིག་ལ་གོ་དགོས་མིན་ནི་ངས་བཤད་ཚོད་ཐུབ་མ་སོང་ངོ་།།