དེ་རིང་བོད་ཁྱིམ་དབུ་བརྙེས་ཏེ་ལོ་ངོ་ ༥༤ འཁོར་བའི་མཛད་སྒོའི་ཐོག སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དེང་སྐབས་སློབ་མ་ཚོར་མཐུན་རྐྱེན་འཛོམས་པོ་ཡོད་པ་ལྟར་སྔར་ལས་ནུས་འཇོན་གཉིས་ལྡན་གྱི་མི་རབས་ཤིག་ཆགས་པར་འབད་བརྩོན་བྱེད་རྒྱུ་གལ་ཆེན་པོ་ཡིན་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༩ པ་ཐོག དྷ་སྟེང་བོད་ཁྱིམ་དུ་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༥༤ འཁོར་བའི་དུས་དྲན་མཛད་སྒོ་ཚོགས་སོང་བ་དང་། མཛད་སྒོའི་ཐོག་དཔལ་རྒྱལ་བ་ཀརྨ་པ་མཆོག་གིས་དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་དང་སྲིད་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་ཕྱག་རོགས་བཀའ་བློན་རྣམ་པ། དེ་བཞིན། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གཙོས་སྤྱི་འཐུས་ཁག་ཅིག་དང་། ཕྱི་རྒྱལ་ཡུལ་གྲུ་ཁག་ནས་ཕེབས་པའི་བོད་ཁྱིམ་གྱི་སྦྱིན་བདག་རྣམ་པ། གཞན་ཡང་། གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་རྣམ་པ་དང་། དྷ་སྟེང་བོད་ཁྱིམ་གྱི་དགེ་ལས་སློབ་ཟུར་པ་རྣམ་པ། དེ་བཞིན་དྷ་ས་ཁུལ་གྱི་སེར་སྐྱ་མི་མང་བཅས་འདུ་འཛོམས་གནང་འདུག
མཛད་སྒོའི་ཐོག་བོད་ཁྱིམ་སྤྱི་ཁྱབ་འགན་འཛིན་ཚེ་དབང་ཡེ་ཤེས་ལགས་ཀྱིས་ལས་བསྡོམས་སྙན་སྒྲོན་ཞུ་སྐབས། སློབ་ཕྲུག་ཁྱིམ་སྡེ་ཕྱི་ལོ་ ༡༩༦༠ ལོར་གསར་དུ་བཙུགས་ཡོད་པ་དང་། ད་ལྟའི་ཆར་བོད་ཁྱིམ་ཡན་ལག་ཆེ་ཆུང་ཁག་ ༣༥ དང་སློབ་མ་ཁྱོན་ ༥༦༦༤ ཙམ་ཡོད་པ་དང་། འདི་ལོར་ཁྱོན་སློབ་མ་ ༨༡༠ སློབ་འཇུག་བྱས་པ་དང་། སློབ་མ་ ༦༦༥ སློབ་མཐར་ཕྱིན་ཡོད་སྐོར་སོགས་ངོ་སྤྲོད་གནང་སོང་།
འདི་ལོའི་རྒྱུགས་འབྲས་སྐོར་ལ། འཛིན་རིམ་བཅུ་པའི་སློབ་གྲྭ་ཁག་ ༨ ཡོད་པའི་ནང་སློབ་མ་ཁྱོན་ ༨༠༢ ཙམ་ཡིག་ཚད་ནང་འཛུལ་ཞུགས་བྱས་ཏེ། ཡིག་ཚད་ལོན་པ་ ༨༠༡ དང་། ཡིག་རྒྱུགས་བསྐྱར་དུ་གཏོང་དགོས་པ་ ༡། ཡིག་ཚད་ལོན་པ་བརྒྱ་ཆ་ ༩༩།༩ ཡིན་པ་དང་། འཛིན་རིམ་བཅུ་གཉིས་ཀྱི་ཡིག་རྒྱུགས་ནང་བོད་ཁྱིམ་གྱི་སློབ་གྲྭ་ཁག་ ༤ ཡི་སློབ་མ་ཁྱོན་ ༦༦༥ འཛུལ་ཞུགས་བྱས་ཏེ། ཡིག་ཚད་ལོན་པ་ ༦༡༤ དང་། བསྐྱར་དུ་གཏོང་དགོས་པ་ ༣༨། ཡིག་ཚད་མ་ལོན་པ་ ༡༦། ཡིག་ཚད་ལོན་པའི་བརྒྱ་ཆ་ ༩༢།༣ ཡིན། དེ་བཞིན། རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་རྒྱུགས་འབྲས་ལས་འབྱུང་རིག་སྡེ་ཚན་ནས་དྷ་སྟེང་བོད་ཁྱིམ་གྱི་སློབ་མ་བསོད་ནམས་དབྱངས་ཅན་ལགས་ཀྱིས་བརྒྱ་ཆ་ ༩༡།༨ བླངས་ཡོད་པ་དང་། ཚོང་རྩིས་སྡེ་ཚན་ནས་སྦེལ་ཀོབ་བོད་ཁྱིམ་གྱི་སློབ་མ་ཚེ་རིང་སྒྲོལ་མ་ལགས་ཀྱིས་བརྒྱ་ཆ་ ༩༣།༢ བླངས་ཡོད་པ། དེ་བཞིན། ཚན་རིག་སྡེ་ཚན་ནས་སེ་ལ་ཀུ་བོད་ཁྱིམ་གྱི་སློབ་མ་བསོད་ནམས་བཟང་མོ་ལགས་ཀྱིས་བརྒྱ་ཆ་ ༩༣།༢ བཅས་བླངས་ཡོད་འདུག
སྒྲིག་ལམ་སྐོར་ལ་ད་ལོའི་ཕྱི་ཟླ་ ༨ པ་དང་ ༩ བཅས་སུ་ཞིབ་འཇུག་བྱས་པ་ལྟར་ན། ཐ་མག་ནག་པོའི་རིགས་བེད་སྤྱོད་བྱེད་མཁན་མེད་ཀྱང༌། ཁེ་ནི་ལོངས་སུ་སྤྱད་པ་མཁན་ ༤ དང་། དཀར་སུབ་རྔུབ་མཁན་ ༧ བཅས་ཁྱོན་བསྡོམས་བུ་ཕྲུག་ ༡༡ བྱུང་འདུག་པ་རྣམས་ལ་ངན་གོམས་ཡོང་བའི་ནད་ལྟ་བུར་རྩིས་ཏེ་སློབ་གསོའི་ལས་རིམ་སྤེལ་ཆེད་ཉེན་བརྡ་དང་འབྲེལ་འགོག་ཐབས་ཇི་དགོས་ཁོངས་སོ་སོ་ནས་ལམ་སྟོན་ཞུ་མུས་ཡིན། གཞན། སློབ་མའི་འཕྲོད་བསྟེན་ཐད་གློ་ནད་སྨན་བཅོས་འགྲོ་བཞིན་པའི་བུ་ཕྲུག་ ༢༦ ཡོད་པའི་ཁྲོད་འགོས་ནད་ཅན་གྱི་ནད་པ་གཅིག་ཀྱང་མེད། ཞེས་སོགས་འཁོད་འདུག
ད་ལྟ་མཐོ་རིམ་སློབ་གཉེར་གནང་བཞིན་པ་ཁྱོན་ ༡༨༧༦ ཙམ་ཡོད་པ་དག་ནི། བོད་མི་རིགས་ཀྱི་རིག་གཞུང་དང་འབྲེལ་བའི་སློབ་གཉེར་བ་ ༡༤༣ དང་། ཉེ་བའི་གཙུག་ལག་རབ་འབྱམས་པ་གནང་མཁན་དག་ལས་འབྱུང་རིག་སློབ་གཉེར་བ་ ༣༥༣ དང་། ཚོང་རྩིས་སློབ་གཉེར་བ་ ༡༨༡ ཚན་རིག་སློབ་གཉེར་བ་ ༡༡༥ བཅས་དང་། གཙུག་ལག་རབ་འབྱམས་པ་གནང་མཁན། འབྱུང་རིག་སློབ་གཉེར་བ་ ༥༣ ། ཚོང་རྩིས་སློབ་གཉེར་བ་ ༥༢ ཚན་རིག་སློབ་གཉེར་བ་ ༣༡ བཅས་ཡོད་འདུག དེ་བཞིན། འབུམ་རམས་པ་ ༡༣ དང་ཆེད་ལས་སློབ་གཉེར་བ་ ༡༨༦ ཙམ་ཡོད་པ་དག་ནི། འཕྲོད་ལས་སློབ་སྦྱོང་ཁག་ནང༌སློབ་མ་ ༤༡༣ དང་། ཤེས་ཡོན་སློབ་ཚན་ཁག་ནང་སློབ་གཉེར་བ་ ༡༡ ། ལས་རིགས་སློབ་སྦྱོང་ཁག་ནང་སློབ་གཉེར་བ་ ༣༢༥ བཅས་ཡོད། ཅེས་སོགས་ངོ་སྤྲོད་གནང་སོང་།
འགྲོ་གྲོན་ཐད་ཕྱི་ལོ་ ༢༠༡༣ ནས་ ༢༠༡༤ བར་ཁྱོན་བསྡོམས་བྱུང་ཧིན་སྒོར་། ༥༧༥༩༠༢༧༥༡་༨༩ དང་། སོང་ཧིན་སྒོར་ ༦༠༤༢༤༦༦༨༠་༣༧ ཙམ་ཆགས་ཡོད་པ་ལས་རྒྱུན་གྲོན་ཐོག་ ༤༩༩༠༦༦༩༤༨་༤༢ དང་། ལས་འཆར་ཐོག་ ༡༠༥༡༨༢༤༨༣་༨༤ ཙམ་བཏང་ཡོད། ཅེས་སོགས་ངོ་སྤྲོད་གནང་སོང་།
དེ་རྗེས་སྲིད་ཚབ་མཆོག་གིས་བཀའ་ཤག་སྐབས་ ༡༤ པས་བོད་ཕྲུག་ཚོའི་ཤེས་ཡོན་ཡར་རྒྱས་གཏོང་ཐབས་ལ་འབད་བརྩོན་གནང་གི་ཡོད་པ་ལྟར། རིམ་པ་དང་པོ་བོད་ཕྲུག་ཚོར་བོད་ཡིག་བོད་སྐད་དང་རིག་གནས་ཁག་ལ་སློབ་སྦྱོང་སྤྲད་དེ། བོད་མིའི་སྤྱི་ཚོགས་ནང་ཞབས་འདེགས་ཞུ་ཐུབ་པའི་གོ་སྐབས་སྤྲོད་རྒྱུ་དང་། རིམ་པ་གཉིས་པ་རིགས་གཅིག་རྐང་འཛིན་དང་སློབ་སྦྱོང་ཚད་མཐོ་བོ་ཐོན་པར་ཆ་རྐྱེན་བསྐྲུན་རྒྱུ་དེ་ཧ་ཅང་གལ་ཆེན་པོ་ཆགས་ཡོད་སྐོར་གསུངས་བ་དང་འབྲེལ། སློབ་ཕྲུག་ཚོས་བོད་ཁྱིམ་དུ་སློབ་སྦྱོང་བྱས་ཏེ་འཛིན་གྲྭ་མཐོ་བོར་བསླེབ་ཡོང་ དུས། མ་འོངས་པར་སོ་སོ་ག་འདྲ་ཞིག་ཆགས་དགོས་མིན་ལ་བསམ་བློ་གཏོང་བའི་དུས་སྐབས་ཤིག་ལ་སླེབ་ཀྱི་ཡོད་པ་དང་། དེ་སྔོན་སྲིད་སྐྱོང་གིས་ཁྱེད་རང་ཚོས་ཡིག་རྒྱུགས་གྲུབ་འབྲས་ཡག་པོ་ཞིག་ལེན་དགོས་པ་ཡིན་ན། ཉིན་རེར་ཆུ་ཚོད་ ༡༠ རིང་སློབ་སྦྱོང་བྱེད་དགོས་སྐོར་ལམ་སྟོན་གནང་ཡོད་པ་ལྟར། སློབ་ཕྲུག་ཚོས་སོ་སོའི་དམིགས་ཡུལ་བཟུང་བ་ལྟར་སློབ་སྦྱོང་ལ་འབད་བརྩོན་བྱེད་དགོས་པ་རེད། ལས་<ཀ་ག་རེ་བྱས་པ་ཡིན་ནའང་དཀའ་ལས་མ་བརྒྱབ་ན་གྲུབ་འབྲས་བཟང་པོ་ཐོན་རྒྱུ་མེད་པ་འཇིག་རྟེན་གྱི་ཆོས་ཉིད་རེད། དེར་བརྟེན་སློབ་ཕྲུག་ཚོས་ཉིན་རེར་ཆུ་ཚོད་ ༡༠ རིང་སློབ་སྦྱོང་བྱས་པ་ཡིན་ན། གྲུབ་འབྲས་ཡག་པོ་འཐོན་ཐུབ་པས་དེ་ལྟར་གནང་རོགས་ཞུ། ཞེས་གསུངས་སོང་།
དེའི་རྗེས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། སློབ་མ་ཚོས་སློབ་སྦྱོང་གི་དུས་སྐབས་བཟང་པོ་དམ་འཛིན་བྱས་ཏེ། སྔ་ལས་ཤེས་ཡོན་གཉིས་ལྡན་གྱི་མི་རབས་ཤིག་ཆགས་པར་འབད་བརྩོན་དགོས་སྐོར་གསུངས་ དོན། བོད་ཕྲུག་ཁྱིམ་སྡེའི་ཁྱབ་ཁོངས་ཀྱི་སློབ་ཕྲུག་མང་པོ་ཞིག་བོད་ནས་སློབ་སྦྱོང་གི་གོ་སྐབས་མ་རག་པར་རྒྱ་གར་དུ་ཡོང་བ་དང་། བོད་ནས་བྲོས་བྱོལ་དུ་ཡོང་སྐབས་སོ་སོའི་སྲོག་ཡན་ཆད་འབེན་ལ་བཙུགས་ནས་ཡོང་གི་ ཡོད་སྟབས། འདིར་སློབ་སྦྱོང་བྱེད་པའི་གོ་སྐབས་རག་པའི་སྐབས་སུ་གོ་སྐབས་དེ་ལེན་མ་ཐུབ་པ་ཡིན་ན། མ་འོངས་པར་སོ་སོ་འགྱོད་པ་ཤུགས་ཆེན་པོ་སྐྱེ་དགོས་པའི་གནས་སྟངས་ཤིག་རང་བཞིན་གྱིས་ཆགས་ཀྱི་ཡོད་པས། ཁྱེད་རང་ཚོས་སློབ་སྦྱོང་བྱེད་པའི་གོ་སྐབས་དེ་ཆུད་ཟོས་སུ་མི་གཏོང་བར་སོ་སོའི་ལས་འགན་དང་དུ་བླངས་ཏེ། རང་ཉིད་ཀྱི་ཁེ་ཕན་ཙམ་གྱི་ཆེད་དུ་མ་ཡིན་པར་སྤྱི་ཚོགས་ཀྱི་ཁེ་ཕན་ཆེད་ཞབས་ འདེགས་ཞུ་དགོས་སྙམ་པའི་བསམ་བློ་ཞིག་འཁུར་དགོས་པ་དེ་གལ་ཆེན་པོ་རེད་དྲན་གྱི་འདུག ང་ཚོ་ཚང་མ་བོད་རིགས་ཡིན་པའི་ཆ་ནས་དམིགས་བསལ་གྱི་ལས་འགན་ཞིག་ཡོད་པ་རེད། ང་ཚོ་སོ་སོའི་ལུང་པ་མེད་པའི་ཡུལ་གྱར་བ་ཞིག་ཆགས་ཡོད་པ་དང་། བོད་ནང་རྒྱ་གཞུང་གིས་བཙན་འཛུལ་བྱེད་བཞིན་ཡོད་པ་རེད། ད་ལྟ་ང་ཚོའི་མི་རབས་འདི་མཚམས་སྦྱོར་བྱེད་མཁན་མི་རབས་འདྲ་བོ་རེད། སྔ་མོ་བོད་ནས་ཡོང་མཁན་གྱི་མི་རབས་དེ་གང་ལ་གང་འཚམ་རྫོགས་འགྲོ་བཞིན་ཡོད་པས། ང་ཚོ་སྔོན་མའི་མི་རབས་དང་ཁྱེད་རང་ཚོ་མི་རབས་གསར་པ་གཉིས་བར་གྱི་འབྲེལ་བ་འཛུགས་མཁན་དང་མཚམས་སྦྱོར་བྱེད་མཁན་ལྟ་བུ་ཡིན་པའི་གནས་སྟངས་ཤིག་ཆགས་ཡོད་པ་རེད། ད་ལྟའི་ཆར་ང་ཚོས་འགན་འཁུར་གྱི་ཡོད་པ་རེད། ལོ་ཤས་རྗེས་ཁྱེད་རང་ཚོས་འགན་འཁུར་དགོས་པ་རེད། དེང་སང་དང་བསྡུར་ན་ང་ཚོ་སྔོན་མ་སློབ་གྲྭར་ཡོད་སྐབས་ཀྱི་མཐུན་རྐྱེན་ལྡབ་མང་པོས་ཞན་པ་རེད། ཁྱེད་རང་ཚོ་༧གོང་ས་མཆོག་དང་གནས་ཡུལ་རྒྱལ་ཁབ་ཀྱི་བཀའ་དྲིན། དེ་བཞིན་གཏོང་ཕོད་ཅན་གྱི་སྦྱིན་བདག་རྣམ་པའི་བཀའ་དྲིན་གྱིས་གོ་སྐབས་ཡག་པོ་ཞེ་དྲག་རག་གི་ཡོད་སྟབས། ང་ཚོའི་མི་རབས་ལས་ལྷག་པའི་ཤེས་འཇོན་གཉིས་ལྡན་དང་ཡ་རབས་བཟང་སྤྱོད་ལྡན་པའི་མི་རབས་ཤིག་ཆགས་སུ་བཅུག་སྟེ། བོད་ཀྱི་བདེན་པའི་འཐབ་རྩོད་ལ་འགན་འཁུར་<ནས་ང་ཚོ་ལས་ལྷག་པའི་ནུས་པ་འདོན་ཐུབ་དགོས་དེ་གལ་ཆེན་པོ་རེད། ཅེས་གསུངས་སོང་།
དེ་རྗེས་༧རྒྱལ་བ་ཀརྨ་པ་མཆོག་ནས་བོད་ཁྱིམ་དུ་ཞབས་ལོ་ ༢༠ སོན་པའི་ལས་བྱེད་རྣམས་ལ་གཟེངས་བསྟོད་ཀྱི་གསོལ་རས་དང་། འདི་ལོའི་ཡིག་རྒྱུགས་གྲུབ་འབྲས་རྩེར་སོན་གྱི་སློབ་ཕྲུག་ཁག་ཅིག་ལ་ཤེས་ཡོན་བྱ་དགའ་དང་། སློབ་ཕྲུག་རྩེ་ཕུད་གཉིས་ལ་ཤེས་རིག་ལས་ཁུངས་ཀྱི་བྱ་དགའ་བཅས་གནང་གྲུབ་རྗེས། སློབ་ཕྲུག་ཚོས་སློབ་གྲྭའི་གཞས་དང་༧གོང་ས་མཆོག་གི་བཀའ་དྲིན་རྗེས་དྲན་གྱི་བསྟོད་གླུ་སོགས་ཕུལ་བ་དང་། དེ་ནས་ལུས་རྩལ་གཟིགས་འབུལ་བཅས་ཞུས་སོང་ལ། དེ་རིང་ཕྱི་དྲོར་འཛིན་གྲྭ་ཁག་གིས་རིག་གཞུང་འཁྲབ་སྟོན་དང་རིགས་ལམ་འགྲན་སྡུར་བྱེད་བཞིན་ཡོད་པ་དང་། སང་ཉིན་ཁང་ཚན་ནང་ཁུལ་རྩེད་རིགས་དང་རིགས་ལམ་འགྲན་སྡུར། གནངས་ཉིན་བསང་གསོལ་དང་བོད་ཁྱིམ་གྱི་སློབ་ཟུར་འདུ་འཛོམས་བཅས་གནང་རྒྱུ་ཡིན་འདུག
གསར་འགོད་པ། པདྨ་མཚོ།
ཕྱི་ལྟ་ན་བཟང་དོག་མངོན་བཞིན་འདུག ནང་གི་གནས་ཚུལ་དེ་་་་་་་ཨཱ་ཁ་་་་་།
འདི་ཟླའི་ཚེས་༢༣ཉིན་རྡ་སྟེང་བོད་ཁྱིམ་དབུ་བརྙེས་ནས་མི་ལོ་ཧྲིལ་པོ་༥༤འཁོར་བའི་དུས་དྲན་གྱི་མཛད་སྒོ་ཞིག་གནང་སོང།
ཚོགས་པ་འདི་ཐོག་མར་འཛུགས་སྐབས་སྐུ་ངལ་དུ་མ་ཞིག་འཕྲད་པའི་སྐོར་རྒན་རབས་ཀྱིས་ང་ཚོར་མ་ནི་བཞིན་བསྐྱོར་མྱོང། འོན་ཀྱང་ད་ལྟའི་དུས་འདིར་སྐུའི་གཅུང་མོས་དབང་ཆ་ཡོངས་རྫོགས་དབུ་འཛིན་ཚེ་དབང་ཡེ་ཤེས་ལ་ཕུལ་ནས་མི་ལོ་དུ་མ་ཞིག་ཕྱིན་ཀྱང་ད་དུང་དབུ་འཛིན་ལ་བསྒྱུར་བ་མེད་པ་གནས་ན་མ་འོངས་པའི་གཞོན་སྐྱེས་ལས་བྱེད་ཚོས་ཚོགས་པ་འདི་འཛིན་སྐྱོང་ཇི་ལྟར་ཐུབ་བམ་སྙམ་པའི་ཐེ་ཚོམ་དང་རྣམ་རྟོག་དུ་མ་ཞིག་ངའི་མིག་ཟུང་དུ་འཆར་བཞིན་འདུག
འབུམ་རམས་པ་༡༣་ཙམ་ལས་མེད་པ་དེ་གནད་འགག་གང་ལ་ཐུག་པ་ཡིན་ནམ། ངོ་མ་སེམས་སྐྱོ་བ་ཞིག་རེད།
སྤྱི་བཏང་སློབ་གྲྭ་ཧ་ཅང་ཡག་པོ་འདུག ཡར་རྒྱས་ཆེན་པོ་སོང་ཡོད་པ་མ་ཟད་བཙན་བྱོལ་སྤྱི་ཚོགས་ཁྱོན་ཡོངས་ལ་ཞབས་ཞུ་ཆེན་པོ་ཞུས་ཡོད་པ་རེད། འོན་ཀྱང་ཤེས་ཡོན་སྲིད་བྱུས་ཐོག་ཤུགས་ཅིག་སྐྱོན་གནང་ཐུབ་པ་ཡིན་ན། བོད་པའི་བྱུང་རབས་ལོ་རྒྱུས་དང་རིག་གཞུང་ཐོག་ཞབས་རྗེ་ཆེན་པོ་ཆགས་ཡོད་པ་རེད། དེ་ཐུགས་ལ་བཞག་ནང་རོགས།
བཙན་བྱོལ་བོད་མིའི་སློབ་གྲྭ་ཁག་ནང་བོད་ནས་ཡོང་བའི་སློབ་ཕྲུག་ཇེ་ཉུང་དུ་འགྲོ་བཞིན་ཡོད་པ་ས་རིས་ཐང་གསལ་རེད། ཡིན་ནའང་སློབ་གྲྭ་ཁག་ཁ་ཤས་ནང་སློབ་ཕྲུག་སྤྱིའི་གྲངས་འབོར་དེ་ཙམ་ཉུང་དུ་འགྲོ་གི་མེད་པའི་རྒྱུ་མཚན་གསལ་བོ་གསུངས་རོགས། དེ་ནས་ད་ལོ་བོད་ཁྱིམ་ནང་མྱོས་རྫས་ངན་གོམས་སོང་བ་ག་ཚོད་ཡོད་མེད་གསལ་མི་འདུག དེ་ད་ལོ་མྱོས་རྫས་ངན་གོམ་སོང་བའི་ཕྲུ་གུ་གཅིག་ཀྱང་མེད་པ་རེད་དམ།