ཁ་སང་དྲག་སྤྱོད་པ་ཞིག་གིས་ཁེ་ན་ཌའི་རྒྱལ་ས་ཨོ་ཊ་ཝའི་གྲོས་ཚོགས་ཐོག་ཁང་དང་དྲན་རྟེན་རྡོ་རིང་མདུན་ཐང་སོགས་སུ་རྒྱག་བཞིན་གང་བྱུང་མེ་མདའ་བརྒྱབ་པའི་གནས་ཚུལ་ཞིག་ཐོན་འདུག
ཁ་སང་ཁེ་ན་ཌའི་སྔ་དྲོའི་ཆུ་ཚོད་ ༩།༥༠ ཐོག་ཁེ་ན་ཌའི་མི་སེར་མེ་གྷལ་ (Michael Zehaf-Bibeau) ཞུ་བ་ཞིག་གིས་དྲག་ཆས་སྤྲས་ཏེ། རྒྱལ་ས་ཨོ་ཊ་ཝའི་དམག་མིའི་དྲན་རྟེན་རྡོ་རིང་ཕྱོགས་སུ་རྒྱུག་ཡོང་ནས་གང་བྱུང་མེ་མདའ་བརྒྱབ་སྟེ་དམག་མི་ནཱ་ཋན་ (Cpl. Nathan Cirillo) ཞུ་བ་ཞིག་བསད་ཡོད་པ་དང་། གཞན་འགའ་ཞིག་ལ་རྨས་སྐྱོན་བཏང་ཡོད་པ་མ་ཟད། ཁེ་ན་ཌའི་གྲོས་ཚོགས་ཐོག་ཁང་ནང་རྒྱུག་སྟེ་གྲོས་ཚོགས་ཀྱི་སྐོར་སྲུང་བ་དང་ ཕན་ཚུན་མེ་མདའ་རྒྱག་རེས་བྱས་མཐར། སྐོར་སྲུང་བ་ཁེ་ཝུན་ (Kevin M. Vickers)ཞུ་བ་ཞིག་གིས་མེ་མདའ་བརྒྱབ་སྟེ་བསད་ཡོད་འདུག
གནད་དོན་དེའི་རྐྱེན་པས་ཁེ་ན་ཌའི་རྒྱལ་ས་ཨོ་ཊ་ཝའི་ནང་ཡོད་པའི་ཨ་རིའི་གཞུང་ཚབ་ཁང་གནས་སྐབས་རིང་སྒོ་བརྒྱབ་ཡོད་པ་མ་ཟད། ཁེ་ན་ཌའི་གྲོས་ཚོགས་ཀྱི་ཚོགས་དུས་ཀྱང་མཚམས་འཇོག་བྱ་དགོས་ཐུག་ཡོད་འདུག
འདིའི་ཐད་ཁེ་ན་ཌའི་སྲིད་བློན་སི་ཌེ་ཧྥན་ཧར་པར་ (Stephen Harper)ལགས་ཀྱིས། “ད་རེབ་ཀྱི་འཇབ་རྒོལ་འདི་ལས་ཉམས་མྱོང་བླངས་ཏེ། ང་ཚོས་མ་འོངས་པར་སྔར་ལྷག་བདེ་འཇགས་དོ་དམ་དང་སྲུང་སྐྱོབ་ནན་ཏན་བྱས་ཏེ་རྒྱལ་ཁབ་ཀྱི་ཞི་བདེ་སྲུང་སྐྱོབ་བྱ་རྒྱུ་ཡིན།”ཞེས་བརྗོད་འདུག
གནས་ཚུལ་དངོས་སུ་མཐོང་མཁན་ཊོ་ནི་ (Tony Zobl)ཞུ་བ་ཞིག་གིས། “ངས་སྒེའུ་ཁུང་ནས་བལྟ་དུས་གྱོན་གོས་ནག་པོ་གྱོན་ཞིང་གདོང་རས་ནག་པོ་དཀྲིས་པའི་མི་ཞིག་གིས་དམག་མིའི་དྲན་རྟེན་རྡོ་རིང་ཕྱོགས་སུ་གང་བྱུང་མེ་མདའ་བརྒྱབ་སྟེ། དམག་མི་ཞིག་བསད་པ་ང་རང་གིས་དངོས་སུ་མཐོང་སོང”ཞེས་དང་། གསར་འགོད་པ་པི་ཊར་ (Peter Henderson)ཞུ་བ་ཞིག་གིས། “ངས་ང་རང་གི་སྦག་སྦག་དམག་མིའི་དྲན་རྟེན་རྡོ་རིང་མདུན་དུ་འཇོག་པར་འགྲོ་སྐབས། གློ་བུར་དུ་མེ་མདའི་སྐད་སྒྲ་ཆེན་པོ་བཞི་ཙམ་གྲགས་པ་ཐོས་བྱུང་བས། ཕར་བལྟ་སྐབས་དམག་མི་ཞིག་ལ་མེ་མདའ་ཕོག་སྟེ་སར་འགྱེལ་ཡོད་པ་མཐོང་བྱུང་།”ཞེས་སོགས་བརྗོད་འདུག
ཟླ་འདིའི་ཚེས་ ༢༠ ཉིན་ཁེ་ན་ཌའི་རང་སྐྱོང་མངའ་ཁུལ་ཁེའུ་བྷེག་ (Quebec) ནང་ཁ་ཆེའི་ཆོས་ལུགས་རྗེས་འབྲང་པ་ཞིག་གིས་དམག་མི་ཞིག་བསད་ཡོད་པ་མ་ཟད། ཚེས་ ༢༢ ཉིན་ཁེ་ན་ཌའི་གྲོས་ཚོགས་ཐོག་ཁང་དུ་གློ་བུར་མེ་མདའ་བརྒྱབ་ནས་མི་བསད་པའི་དོན་རྐྱེན་ཞིག་ལྷག་ཡོད་སྟབས། ཁ་སང་ཨ་རིའི་སྲིད་འཛིན་ཨོ་བྷ་མས་ཁེ་ན་ཌའི་སྲིད་བློན་ལ་ཁ་པར་བཏང་སྟེ་གྲོས་མོལ་བྱས་ཡོད་པ་མ་ཟད། རྒྱལ་ཁབ་གཉིས་ཀྱི་མཁའ་དམག་གིས་རྒྱལ་ཁབ་ཕན་ཚུན་ནང་བརྟན་ལྷིང་ཡོང་ཐབས་ལ་སྔར་ལྷག་འབད་བརྩོན་བྱས་ཏེ། གནས་ཚུལ་དེ་རིགས་མ་ཐོན་པ་བྱ་རྒྱུ་ཡིན་སྐོར་བརྗོད་འདུག
ཁ་སང་བྱང་ཨ་མི་རི་ཀའི་དམག་དོན་བཀོད་དོམ་ལྷན་ཁང་གིས་གསར་ལམ་ཁག་ཏུ་བརྗོད་དོན། “ང་ཚོས་ཁེ་ན་ཌའི་ནང་ལྷག་པའི་གནས་ཚུལ་དེའི་ཐོག་ཞིབ་འཇུག་མཐིལ་ཕྱིན་བྱས་ཏེ། ཨ་རི་དང་ཁེ་ན་ཌའི་མངའ་ཁུལ་ནང་འཇིགས་སྐུལ་རིང་ལུགས་པའི་བྱ་སྤྱོད་དེ་རིགས་མི་འབྱུང་བ་བྱ་རྒྱུ་ཡིན།”ཞེས་བརྗོད་འདུག
སྲིད་དོན་དབྱེ་ཞིབ་པ་ཚོས། ཉེ་ལམ་ཁེ་ན་ཌའི་གཞུང་གིས་ཨ་རིར་རྒྱབ་རོགས་བྱས་ཏེ་ཨི་རག་དང་སི་རི་ཡའི་མཉམ་ འབྲེལ་དྲག་སྤྱོད་ཤོག་ཁག་ལ་ཁ་གཏད་གཅོག་རྒྱུ་ཡིན་པའི་གསལ་བསྒྲགས་བྱས་ཡོད་སྟབས། ད་རེབ་གནས་ཚུལ་འདི་ཐོན་པ་ཞིག་ཡིན་སྐོར་བརྗོད་འདུག
ཐེངས་འདིར་དྲག་སྤྱོད་ལས་འགུལ་སྤེལ་མཁན་རང་ལོ་ ༣༢ ཡིན་པའི་མེ་གྷལ་ (Michael Zehaf-Bibeau)ཟེར་བའི་ཨ་མའི་མིང་ལ་སུ་སན་ (Susan Bibeau)ཟེར་ཞིང་། ཁོ་མོ་ནི་ཁེ་ན་ཌའི་སྐྱབས་བཅོལ་ལྷན་ཚོགས་ཀྱི་ལས་བྱེད་རྒན་གྲས་ཤིག་ཡིན་པ་དང་། ཨ་ཕའི་མིང་ལ་བྷུལ་གྷ་སམ་ (Bulgasem Zehaf)ཟེར་ཞིང་ ༡༩༩༤ ནས་ ༢༠༠༢ ལོའི་བར་མོན་རོལ་འཐུང་ཇ་ཁང་ (Montreal café)ཞེས་པ་ཞིག་གཉེར་ཡོད་འདུག སྐབས་དེར་ཁོང་བཟའ་མི་གསུམ་མཉམ་དུ་བསྡད་ཡོད་ཀྱང་། འདས་པའི་ལོ་ཤས་གོང་ནས་བཟུང་ཁོ་རང་ཁེ་ན་ཌའི་རང་སྐྱོང་ས་ཁུལ་ཁེའུ་བྷེག་གི་མངའ་ཁུལ་ (Outaouais)དང་། གྲོང་རྡལ་ (Aylmer)། དེ་བཞིན་ཝན་ཁོ་ཝར་( Vancouver) སོགས་སུ་སྡོད་བཞིན་ཡོད་ཅིང་། ༢༠༡༡ ལོར་ཝན་ཁོ་ཝར་གྲོང་ཁྱེར་ཉེན་རྟོག་པས་ཁོས་འཕྲོག་བཅོམ་ཁྲིམས་འགལ་བྱ་སྤྱོད་ཐེངས་ ༡༡ ཙམ་བྱས་པའི་ཉེས་མིང་འོག་འཛིན་བཟུང་ཡང་བྱས་མྱོང་ཡོད་འདུག
གསར་འགོད་པ། དོན་གྲུབ།
