བོད་རང་སྐྱོང་ལྗོངས་ཟེར་བའི་མགོ་ཁྲིད་བློ་བཟང་རྒྱ་མཚན་ཉེ་ལམ་བལ་ཡུལ་ནང་སྐོར་སྐྱོད་དང་འབྲེལ་ཏེ་བལ་ཡུལ་གཞུང་གིས་བོད་མི་ཚོར་སྐྱབས་བཅོལ་ངོས་ལེན་བྱ་རྒྱུ་མིན་སྐོར་བསྒྲགས་འདུག
ཟླ་འདིའི་ཚེས་ ༢༧ དང་ ༢༨ ཉིན་གཉིས་རིང་བོད་རང་སྐྱོང་ལྗོངས་ཀྱི་མགོ་གཙོ་བློ་བཟང་རྒྱལ་མཚན་གྱིས་སྣེ་འཁྲིད་པའི་སྐུ་ཚབ་ཚོགས་ཆུང་ཞིག་བལ་ཡུལ་ནང་གཟིགས་སྐོར་དང་འབྲེལ། བལ་ཡུལ་གྱི་སྲིད་བློན་སོ་ཤེལ་ཀོ་རེ་ལཱ་( Susshil Koirala) དང་སྲིད་བློན་གཞོན་པ། ཕྱི་སྲིད་བློན་ཆེན་སོགས་ལ་ཐུག་འཕྲད་བྱས་ཏེ། རྒྱ་ནག་གིས་བལ་ཡུལ་ལ་ལོ་ལྔ་རིང་རོགས་དངུལ་སྤྲོད་ཕྱོགས་དང་། བལ་ཡུལ་གྱིས་རྒྱ་ནག་གཅིག་གི་སྲིད་ཇུས་ལ་རྒྱབ་སྐྱོར་བྱས་ཏེ་བལ་ཡུལ་ནང་བོད་མི་ཚོས་རྒྱ་ནག་ལ་ངོ་རྒོལ་རིགས་བྱེད་པར་དམ་དྲག་ཆེ་རུ་གཏོང་རྒྱུ། བལ་བོད་ས་མཚམས་བརྒྱུད་ནས་རྒྱ་གར་ནང་སྐྱབས་བཅོལ་ཡོང་མཁན་རིགས་ལ་བཀག་སྡོམ། རྒྱལ་ཁབ་གཉིས་བར་ཡུལ་སྐོར་སྤྲོ་འཆམ་དང་ཚོང་དོན་འབྲེལ་ལམ་གོང་མཐོར་གཏོང་ཐབས་བཅས་ལ་གྲོས་མོལ་བྱས་ཡོད་སྟབས། ཁ་སང་བལ་ཡུལ་གཞུང་གིས་བོད་མི་སྐྱབས་བཅོལ་བར་སྐྱབས་བཅོལ་ལག་འཁྱེར་དང་བོད་ནས་བལ་ཡུལ་བརྒྱུད་རྒྱ་གར་ནང་སྐྱབས་བཅོལ་དུ་འགྲོ་མཁན་ཚོར་སྐྱབས་བཅོལ་གནས་བབ་སོགས་སྤྲོད་རྒྱུ་མིན་སྐོར་སོགས་བསྒྲགས་ཡོད་འདུག
འདིའི་ཐད་བལ་ཡུལ་བོད་མི་སྐྱབས་བཅོལ་ལྷན་ཚོགས་ཀྱི་འགན་འཛིན་ནཱ་ར་ཡན་པུ་ཌལ་ (Shesh Narayan Poudel) གྱིས། “ད་ནས་བཟུང་བལ་ཡུལ་གཞུང་གིས་བོད་ནས་བལ་ཡུལ་ནང་ཡོང་མཁན་གྱི་སྐྱབས་བཅོལ་བོད་མི་ཚོར་སྐྱབས་བཅོལ་ལག་འཁྱེར་སྤྲོད་རྒྱུ་མིན་པའི་ཐག་གཅོད་བྱས་ཡོད་པ་རེད། གལ་ཏེ་ང་ཚོས་མུ་མཐུད་ཁོ་ཚོ་སྐྱབས་བཅོལ་ལ་ངོས་འཛིན་དང་འབྲེལ་སྐྱབས་བཅོལ་ལག་འཁྱེར་སྤྲད་ཚེ། ཁོ་ཚོས་ང་ཚོར་དཀའ་ངལ་སྤྲོད་རྒྱུ་ཡིན་སྟབས། བལ་ཡུལ་གཞུང་གིས་ཆོག་མཆན་མ་སྤྲད་པ་ཡིན་ན་སྐྱབས་བཅོལ་བོད་མི་ཚོ་བལ་ཡུལ་བརྒྱུད་དེ་རྒྱལ་ཁབ་གཞན་ནང་གང་བྱུང་འགྲོ་འོང་བྱེད་མི་ཆོག” ཅེས་བརྗོད་འདུག
མིང་བརྗོད་འདོད་མེད་པའི་བལ་ཡུལ་གཞུང་གི་ལས་བྱེད་ཅིག་གིས་བརྗོད་དོན། “རྒྱ་གཞུང་གིས་བལ་ཡུལ་གཞུང་ལ་གནོན་ཤུགས་ཆེན་པོ་སྤྲད་དེ། བལ་ཡུལ་གཞུང་གིས་བོད་ནས་བོད་མི་སྐྱབས་བཅོལ་ཡོང་མཁན་དག་ལ་ཆབ་སྲིད་ཀྱི་སྐྱབས་བཅོལ་གནས་བབས་སྤྲོད་རྒྱུ་མིན་པའི་ཐག་གཅོད་བྱས་ཡོད། རྒྱ་གཞུང་གིས་བོད་ནང་ཆོས་དད་དང་སྨྲ་བརྗོད་རང་དབང་སྤྲོད་བཞིན་ཡོད་སྟབས། བལ་ཡུལ་གཞུང་གིས་བོད་མི་ཚོར་སྐྱབས་བཅོལ་ངོས་ལེན་བྱེད་མི་ཆོག་པ་དང་། དེ་ལས་ལྡོག་སྟེ་སྐྱབས་བཅོལ་ཞུ་མཁན་བོད་མི་ཚོ་རྒྱ་གཞུང་ལ་ཕྱིར་རྩིས་སྤྲོད་དགོས་པ་སོགས་ཀྱི་གནོན་ཤུགས་སྤྲད་ཡོད་པ་རེད།”ཅེས་བརྗོད་འདུག
འགྲོ་བ་མིའི་ཐབ་ཐང་རྩོད་ལེན་པ་སུ་བྷེ་ཌ་ (Subidh Pykurel) ལགས་ཀྱིས། “བལ་ཡུལ་གཞུང་གིས་བོད་མི་ཚོར་མི་རིགས་དང་མི་སེར་གཞན་ལྟར་གཅིག་མཚུངས་ལྟ་སྐྱོང་བྱེད་དགོས། གལ་ཏེ་བལ་ཡུལ་གཞུང་གིས་བོད་མི་ཚོར་སྐྱབས་བཅོལ་ལག་འཁྱེར་མ་སྤྲད་ཚེ་བཟང་བཙོན་ལ་བཅུག་པ་ལྟར་ཆགས་རྒྱུ་ཡིན་སྟབས། དེ་ནི་འགྲོ་བ་མིའི་སྤྱོད་ཚུལ་དང་འགལ་ཡོད། ”ཅེས་དང་། བལ་ཡུལ་གཙུག་ལག་སློབ་ཆེན་གྱི་སློབ་དཔོན་ཀཱ་པིལ་ (Kapil Shresth ) ལགས་ཀྱིས། “བལ་ཡུལ་གྱི་སྐྱབས་བཅོལ་བོད་མིར་འཛིན་པའི་སྲིད་ཇུས་དེ་ནི་ཕ་མར་སྐྱབས་བཅོལ་ལག་འཁྱེར་ཡོད་ཀྱང་། བུ་ཕྲུག་ལ་མེད་པའི་གནས་སྟངས་ཤིག་ཆགས་ཡོད་པ་མ་ཟད། རྒྱལ་སྤྱིའི་ཁྲིམས་ལུགས་དང་འགལ་བའི་བྱ་སྤྱོད་ཅིག་ཀྱང་ཡིན་སྟབས། གནད་དོན་དེར་བལ་ཡུལ་གཞུང་གིས་ངེས་པར་དུ་བསྐྱར་ཞིབ་བྱེད་དགོས།”ཞེས་བརྗོད་འདུག
༢༠༠༨ ལོར་ས་བྱི་ཞི་རྒོལ་ཆེན་མོ་བྱུང་བ་ནས་བཟུང་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་སྔར་ལས་ཇེ་དམ་དང་། སྐབས་དེའི་བལ་ཡུལ་དམར་ཤོག་སྲིད་གཞུང་དང་ཚོང་དོན་འབྲེལ་ལམ་ཤུགས་ཆེ་རུ་བཏང་བ་སོགས་ལ་བརྟེན་ཏེ། བལ་ཡུལ་གཞུང་གིས་རྒྱ་ནག་གཅིག་གི་སྲིད་ཇུས་ལ་རྒྱབ་སྐྱོར་དང་བལ་ཡུལ་ནང་རྒྱ་གཞུང་ལ་ངོ་རྒོལ་བྱེད་མཁན་གྱི་བོད་མིར་དམ་དྲག བོད་ནས་བལ་ཡུལ་བརྒྱུད་རྒྱ་གར་ལ་སྐྱབས་བཅོལ་འགྲོ་མཁན་ཚོ་བཀག་འགོག་དང་བོད་ནང་ཕྱིར་སློག་སོགས་བཏང་ཡོད།
གཞན། བལ་ཡུལ་ནང་བོད་མིའི་སྡོད་སྒར་ ༢༡ ཙམ་ཡོད་པར་ནང་བོད་མི་སྐྱབས་བཅོལ་བ་ཁྲི་གཉིས་ལྷག་ཡོད་པའི་ཁྲོད་མང་པོ་ཞིག་ལ་སྐྱབས་བཅོལ་ལག་འཁྱེར་སྤྲད་མེད་པ་མ་ཟད། ལོ་བཅུ་གྲངས་གོང་ནས་བལ་ཡུལ་ནང་གི་བོད་མིའི་སྐུ་ཚབ་དོན་གཅོད་སྒོ་རྒྱག་བཅུག་པ་དང་། བལ་ཡུལ་ནང་གསུམ་བཅུའི་དུས་དྲན་དང་༧གོང་ས་མཆོག་གི་སྐུའི་འཁྲུངས་སྐར། དེ་བཞིན་འོས་བསྡུ་སོགས་བྱེད་འཇུག་གི་མེད་པ་མ་ཟད། ནམ་རྒྱུན་བོད་མིའི་འདུ་འཛོམས་ཁག་ལའང་དམ་དྲག་ཆེན་པོ་བྱེད་བཞིན་ཡོད།
གསར་འགོད་པ། དོན་གྲུབ།
