དེ་རིང་དྷ་སྟེང་བོད་ཁྱིམ་ཚོགས་ཁང་དུ་ཚན་རིག་པ་དང་ནང་པའི་མཁས་པའི་བར་ཉམས་མྱོང་བརྗེ་རེས་དང་ལེགས་ཆ་སྤེལ་རེས་ཀྱི་བགྲོ་གླེང་ཞིག་ཚོགས་སོང་། ཐེངས་འདིའི་ཉིན་གསུམ་རིང་གི་བགྲོ་གླེང་སྟེང་དྷ་ས་ཉེ་འཁོར་གྱི་སློབ་ཕྲུག་མང་པོ་ཞིག་ཀྱང་མཉམ་ཞུགས་གནང་འདུག
དེ་རིང་སྔ་དྲོའི་ཆུ་ཚོད་ ༩།༠༠ ཐོག་དྷ་སྟེང་བོད་ཁྱིམ་ཚོགས་ཁང་དུ། དྷ་ས་བོད་ཀྱི་དཔེ་མཛོད་ཁང་གི་གོ་སྒྲིག་འོག ཚན་རིག་པ་དང་ནང་པའི་མཁས་དབང་བར་གྱི་བགྲོ་གླེང་ཚོགས་འདུ་འཇིག་རྟེན་ཁམས་ཀྱི་རིག་པ་དང་རྣམ་པར་ཤེས་པ་ཐེངས་གསུམ་པ་༼མཐུན་འགྲིག་དང་བདེ་སྐྱིད།༽ཅེས་པ་ཞིག་མགོ་འཛུགས་གནང་ཡོད་ཅིང་། སྐུ་མགྲོན་གཙོ་བོ་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་སྤྱི་འཐུས་ཁག་ཅིག བགྲོ་གླེང་ནང་གཏམ་བཤད་གནང་མཁན་ནུབ་ཕྱོགས་རྒྱལ་ཁག་དང་རྒྱ་གར་གྱི་ཚན་རིག་པ་ཁག་ཅིག དེ་བཞིན་བོད་པའི་མཁས་དབང་སེ་སྨད་གྲྭ་ཚང་གི་ཟི་ལིང་སྟོང་འཁོར་རིན་པོ་ཆེ་མཆོག་དང་། དགའ་ལྡན་བྱང་རྩེ་གྲྭ་ཚང་གི་བློ་གྲོས་བཟང་པོ་ལགས། དེ་བཞིན། ཕྱོགས་མཐའ་ཁག་ནས་ཕེབས་པའི་དགེ་བཙུན་དང་དོན་གཉེར་ཅན། དྷ་སྟེང་བོད་ཁྱིམ་དང་དྷ་ཤོད་བོད་ཁྱིམ། ཤེས་རབ་དགའ་ཚལ་སློབ་གླིང་དང་སྨན་རྩིས་ཁང་བཅས་ཀྱི་སློབ་ཕྲུག་སོགས་ཁྱོན་མི་ ༣༠༠ ཙམ་འདུ་འཛོམས་གནང་སོང་།
བགྲོ་གླེང་ཚོགས་འདུ་འདིའི་ལས་རིམ་གསལ་བསྒྲགས་ནང་འཁོད་པ་ལྟར་ན། ༼མཐུན་འགྲིག་དང་བདེ་སྐྱིད།༽ཀྱི་བརྗོད་གཞི་འདི་བརྒྱུད་ནས་ནང་པའི་གལ་ཆེའི་རྟེན་འབྱུང་གི་ལྟ་བ་དང་། དངོས་ཁམས་དང་སྐྱེ་དངོས་རིག་པའི་ཕྱི་ནང་གི་མ་ལག་ཆ་མཉམ་དང་མི་མཉམ་པའི་སྦྲེལ་མཚམས་དེ་དག་ལ་དཔྱད་ཞིབ་བྱ་རྒྱུ་དང་། ང་ཚོས་དངོས་ཁམས་དང་སྐྱེ་དངོས་ཚན་རིག་ནས་དུས་ཀྱི་རིམ་འགྲོས་ཐོག་ཐོན་པའི་གལ་ཆེའི་འགྱུར་བ་དང་། ཤུགས་ནུས་དེ་དག་ལ་དོ་མཉམ་གྱི་ཐབས་ལམ་འཚོལ་ཞིབ་བྱ་རྒྱུ་ཡིན། ཚོགས་འདུའི་གཏམ་བཤད་ཁག་གིས་ད་དུང་ཤེས་སྦྱོང་དང་སློབ་ཁྲིད་བཅོས་ཐབས་དང་བསམ་སྒོམ་ཉམས་ལེན་སོགས་ཀྱི་ལྟ་ཚུལ་ནས་དགེ་སེམས་དང་བདེ་ཐབས་ཀྱི་འཚར་ལོངས་ལ་དམིགས་རྒྱུ་ཡིན་པ་སོགས་འཁོད་འདུག
མཛད་སྒོའི་ཐོག་མར་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་ཚོགས་འདུའི་ངོ་སྤྲོད་གཏམ་བཤད་གནང་དོན། འགྲོ་བ་མིའི་མི་ཚེའི་དོན་སྙིང་ནི་བདེ་བ་འདོད་པ་དང་སྡུག་བསྔལ་མི་འདོད་པ་སྟེ་བདེ་སྐྱིད་ཐོབ་འདོད་ཀྱི་བློ་དེ་ཡིན་སྟབས། མཐུན་འགྲིག་ (harmony) དང་བདེ་སྐྱིད་ཟེར་བ་དེ་གང་ཟག་མི་སྒེར་སོ་སོའི་ཕྱི་ནང་གཉིས་ཀྱི་མཛའ་བཤེས་དང་འབྲེལ་འདྲིས་གང་འདྲ་ཡོད་མིན་ལ་བལྟས་ཏེ་ཡོང་གི་ཡོད་པར་བརྟེན། བདེ་སྐྱིད་ཅེས་པ་ནི་སོ་སོས་གང་བརྗོད་པ་དང་གང་བསམ་པ། གང་བྱས་པ་དག་མཐུན་འགྲིག་ལྡན་པའི་ཐོག་བསྒྲུབ་པ་ཡིན་ན་དེ་ལ་བདེ་སྐྱིད་ཟེར། མཐུན་འགྲིག་ཡོད་ན་ཆུང་ངུ་ཞིག་ཆེན་པོའི་བར་སྐྱེད་སྲིང་བྱེད་ཐུབ་ཀྱི་ཡོད་པ་དང་། མཐུན་འགྲིག་མེད་ན་ཆེན་པོ་ཞིག་ཉམས་རྒུད་དུ་འགྲོ་བཞིན་ཡོད། ང་ཚོས་འཛམ་གླིང་འདིའི་ཐོག་ཞི་བདེ་བག་ཕེབས་ངང་འཚོ་གནས་བྱས་ཚེ། སོ་སོ་རང་ཉིད་ཙམ་མ་ཟད་འཛམ་གླིང་ལའང་ཕན་ཐོགས་ཡོད་སྟབས། ང་ཚོས་བསམ་སྤྱོད་དང་བྱ་བ་གང་བྱས་ཀྱང་མཐུན་འགྲིག་དང་ཞི་བདེ་ལྡན་པའི་ཐོག་བྱ་དགོས་པ་མ་ཟད། སེམས་ཀྱི་རྙོག་མ་གཙང་བཟོ་བྱས་ཏེ་བསམ་སྤྱོད་དང་བྱ་བ་གང་བསྒྲུབ་ཀྱང་ཞི་བདེ་ལྡན་པའི་ཐོག་བྱ་རྒྱུ་གལ་ཆེན་ཆགས་ཡོད། དེ་ཡང་ང་ཚོས་ཡུལ་དངོས་དང་མཐུན་འགྲིག་བྱ་རྒྱུ་དེ་ནི་སོ་སོའི་མཐུན་གྲོགས་དང་མཐུན་འགྲིག་བྱས་པ་ལྟ་བུ་ཞིག་ཡིན་སྟབས། དེར་བརྟེན། ཁྱེད་རང་གིས་གྲོགས་པོའི་ལག་པ་གཡས་པར་བདག་སྐྱོང་བྱས་ནས་ལག་པ་གཡོན་མ་བཏུབ་མི་རུང་། ངས་ནང་ཆོས་དང་ཚན་རིག་གཉིས་ཀའི་དམིགས་ཡུལ་དེ་ཚེ་སྲོག་གི་ནུས་པ་གོང་མཐོར་གཏོང་བ་དང་ཆ་ཚང་བ་ཡོང་བ་བྱེད་རྒྱུ་ཡིན་པའི་ཡིད་ཆེས་བྱེད་ཀྱི་ཡོད། ཅེས་བརྗོད་སོང་།
ཁོང་གིས་མུ་མཐུད་བརྗོད་དོན། ཕྱི་དངོས་པོའི་གཞི་རྩའི་འགྲོ་སྟངས་ལ་བལྟས་ན་གང་ལ་གང་འཚམ་གྱིས་ཁོ་རང་ལ་འགྲོ་སྟངས་དང་སྒྲིག་ཁྲིམས་ཡོད་མཁན་ཞིག་ཆགས་ཡོད་ཀྱང་། ང་ཚོ་འགྲོ་བ་མིའི་རིགས་ཀྱི་རིག་པ་གྲུང་དྲག་ནས་ང་ཚོས་ཕྱི་དངོས་པོའི་སྒྲིག་ཁྲིམས་མ་འཁུར་ནས་རྣམ་རྟོག་གིས་དྲན་རྒྱུ་འབལ་པོ་བྱས་ཏེ། ང་ཚོས་ཧ་ལམ་རིག་རྩལ་ཐོག་ནས་འཇིག་རྟེན་ཁམས་ཡོངས་རྫོགས་དབང་སྒྱུར་བྱེད་དགོས་བསམ་ནས་བྱ་བ་མང་པོ་ཞིག་བསྒྲུབས་སྒྲུབ་བཞིན་ཡོད་སྟབས། ད་ལྟ་ཁོར་ཡུག་ཉམས་ཉེས་ཀྱི་དབང་གིས་འཛམ་གླིང་ཐོག་དཀའ་ངལ་ཆེན་པོ་ཞིག་ཕྲད་དང་འཕྲད་མུས་ཡིན་སྟབས། ཚན་རིག་གིས་ཕྱི་དངོས་པོའི་ཐོག་ནས་ཁོ་རང་འགྲོ་སྟངས་ཤིག་དང་མཐུན་འགྲིག་ཡོད་པ་དེ་གསལ་པོ་བཤད་ཀྱི་ཡོད་པ་ལྟར། ང་ཚོ་ནང་ཆོས་ཀྱིས་ཀྱང་གཞི་བདེན་པ་གཉིས་ཟེར་ནས་བཤད་དུས་ཕར་ཕྱོགས་དེར་ག་རེ་ཡོད་མེད་གཞིར་བཞག་ནས་ལམ་ཐབས་ཤེས་གཉིས་ཉམས་ལེན་བྱས་ཏེ། སངས་རྒྱས་ཀྱི་གོ་འཕང་ཐོབ་རྒྱུ་ཞིག་བཤད་ཡོང་དུས་ཁོ་རང་འགྲོ་སྟངས་ཤིག་ཏག་ཏག་ཡོད་སྟབས། དེ་གཉིས་གོ་བསྡུར་བྱས་ཏེ་ཁ་གསལ་དུ་བཏང་ནས་མང་ཚོགས་ཚོར་འགྲེལ་བཤད་རྒྱག་ཐུབ་ན་དེ་ལ་བརྟེན་ནས་གཏན་གྱི་བདེ་སྐྱིད་དམ་ཡང་ན་བདེ་སྐྱིད་གང་འཚམ་ཞིག་ཐོབ་ཆེད་ཕན་ཐོགས་ཆེན་པོ་ཡོང་རྒྱུ་རེད། ཅེས་སོགས་བརྗོད་སོང་།
དེའི་རྗེས་སྐུ་མགྲོན་གཙོ་བོ་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་གསུང་བཤད་གནང་དོན། ཕྲན་ཚན་རིག་པ་དང་ནང་དོན་རིག་པའི་མཁས་དང་ཞིག་མིན་སྟབས། ཚན་རིག་པ་དང་ནང་དོན་རིག་པའི་མཁས་དབང་གི་འདུ་འཛོམས་སར་གཏམ་བཤད་བྱ་རྒྱུ་དེ་ཁག་པོ་འདྲ་པོ་ཞིག་ཆགས་ཡོད་ཀྱང་ལས་དོན་འདི་ལ་རྒྱབ་སྐྱོར་གྱི་ཚུལ་དུ་བཅར་བ་ཡིན། གནད་དོན་གཅིག་གི་ཐོག་ཞུ་འདོད་པ་ནི། ༡༩༥༩ ལོ་མཇུག་དང་ ༡༩༦༠ ལོའི་ལོ་སྟོད་དུ་༧གོང་ས་མཆོག་གིས་འཕྲལ་ཕུགས་རྒྱང་གསུམ་ཐོག་ཐུགས་བསམ་བཞེས་ཏེ་བོད་པའི་སློབ་གྲྭ་གསར་འཛུགས་གནང་སྟེ་ད་ལྟ་སློབ་གྲྭ་ཁག་ ༧༦ ཡོད་པ་མ་ཟད། སློབ་གྲྭ་དེ་དག་ནང་ཁྱོན་བསྡོམས་སློབ་མ་ ༢༤༠༠༠ ལྷག་སློབ་སྦྱོང་བྱེད་བཞིན་ཡོད། སྐབས་དེར་༧གོང་ས་མཆོག་གིས་བོད་ཕྲུག་དག་གནའ་དེང་གི་ཤེས་ཡོན་ཕྱུག་པའི་འདབ་གཤོག་གཉིས་ལྡན་གྱི་བོད་མི་ཞིག་ཆགས་རྒྱུའི་རེ་བ་བཅངས་ཏེ་སློབ་གྲྭ་གསར་འཛུགས་གནང་བ་ནས་བཟུང་། ད་ལྟ་ང་ཚོས་ཤེས་ཡོན་ཐོག་གྲུབ་འབྲས་ཆེན་པོ་བླངས་ཡོད་ཀྱང་། ད་ལྟ་བགྲོ་གླེང་གཏམ་བཤད་གནང་མཁན་ལྷན་རྒྱས་ཁྲོད། བོད་པའི་ཚན་རིག་པ་དང་ཚན་རིག་ཞིབ་འཇུག་པ་ཡོང་སྟེ་གཏམ་བཤད་གནང་མཁན་ཞིག་མེད་སྟབས། མ་འོངས་པར་དེ་འདྲ་ཡོང་ཐུབ་ལ་འབད་བརྩོན་བྱ་དགོས། ང་ཚོས་འདས་ལོའི་ནང་བོད་པའི་སློབ་གྲྭ་ ༡༢ ཁྲོད་ནས་འཛིན་གྲྭ་ ༡༡ ཚན་རིག་སྡེ་ཚན་ནང་ཞུགས་མཁན་ག་ཚོད་ཡོད་མེད་དཔྱད་ཞིབ་བྱེད་སྐབས། སློབ་ཐོན་སློབ་མ་ ༡༥༠༠ ནས་བརྒྱ་ཆ་ ༢༠ ཙམ་གྱིས་མ་གཏོགས་ཚན་རིག་སྡེ་ཚན་ནང་འཛུལ་བཞུགས་བྱས་མེད་སྟབས། མ་འོངས་པར་བོད་ཕྲུག་མང་དག་ཅིག་ཚན་རིག་སྡེ་ཚན་ཁོངས་འཛུལ་བཞུགས་བྱེད་ཐུབ་པའི་རེ་བ་རྒྱག་གི་ཡོད། ཅེས་དང་བརྗོད་བྱུང་།
ཁོང་གིས་ཚན་རིག་གི་གལ་འགངས་དང་ནང་ཆོས་དང་ཚན་རིག་བར་མཐུན་འགྲིག་དགོས་སྐོར་གསུངས་དོན། ང་ཚོ་ཞོགས་པ་ཡར་ལངས་པ་ནས་དགོང་དྲོ་མ་ཉལ་བར་ཚན་རིག་དང་མ་འདྲེས་པ་མེད་པ་ལྟ་བུ་ཞིག་ཆགས་ཡོད་པ་མ་ཟད། ང་ཚོའི་ཉིན་རེའི་བྱ་གཞག་དང་དགོས་མཁོ་མང་ཆེ་བ་ཞིག་ཚན་རིག་གིས་བསྐྲུན་ཏེ་བདེ་སྐྱིད་ཐོབ་ཡོད་ཀྱང་། ཚན་རིག་བཀོལ་སྤྱོད་ལེགས་པོ་མ་བཏང་བར་ན་འཛམ་གླིང་ཐོག་གི་དཀའ་ངལ་དང་གནོད་འཚེ་ བཟོ་མཁན་གྱི་གདོན་འདྲེ་ཞིག་ཆགས་རྒྱུ་དང་། ཆོས་བེད་སྤྱོད་ལེགས་པོ་མ་བཏང་ཚེ་འཁྲུག་རྩོད་ཀྱི་གཞི་མ་ཞིག་ཏུ་འགྱུར་རྒྱུ་ཡིན་སྟབས། གནད་དོན་མང་པོ་ཞིག་གི་ཐོག་ཚན་རིག་དང་ཆོས་ཟུང་འབྲེལ་བྱས་ནས་བྱ་བ་སྒྲུབ་དགོས་པ་ཞིག་ཆགས་ཡོད། ང་ཚོས་འདས་པའི་འཛམ་གླིང་གི་བྱུང་རབས་ལོ་རྒྱུས་ཁག་ལ་གཟིགས་ན། རྒྱལ་ཁབ་དང་ས་ཁུལ་ཁག་ཅིག་ནང་ཚན་རིག་དང་ཆོས་གཉིས་གཅིག་ལ་གཅིག་རྟེན་བྱས་ནས་ཕན་ཚུན་ཕན་ཐོགས་སྐྲུན་རེས་བྱས་ཡོད་ཀྱང་། ཡང་ས་ཁུལ་ཁ་ཤས་ཤིག་ནང་ཚན་རིག་དང་ཆོས་མ་མཐུན་ནས་འཁྲུག་རྩོད་དང་དཀའ་ངལ་མང་པོ་ཞིག་ཕྲད་དང་འཕྲད་བཞིན་ཡོད་སྟབས། ༧གོང་ས་མཆོག་གིས་འདས་པའི་བཅུ་ཕྲག་གསུམ་ལྷག་རིང་ཆོས་དང་ཚན་རིག་གཉིས་ཟུང་འབྲེལ་བྱས་ནས་འཛམ་གླིང་སྤྱི་ལ་ཕན་པའི་བྱ་གཞག་སྒྲུབ་དགོས་པའི་བཀའ་སློབ་གནང་བ་མ་ཟད། མགོན་པོ་གང་ཉིད་ཀྱིས་ཀྱང་ཐུགས་འགན་བཞེས་ནས་མཛད་འཕྲིན་བསྐྱངས་ཡོད་སྟབས། ད་ཆ་ཚན་རིག་དང་ཆོས་ཟུང་འབྲེལ་བྱས་ནས་གཅིག་ཕན་གཅིག་གྲོགས་ལྟ་བུ་ཆགས་ཀྱིན་ཡོད། ཚན་རིག་གིས་ཕྱི་དངོས་པོའི་བདེ་བ་བསྐྲུན་གྱི་ཡོད་པ་དང་། ཆོས་ཀྱིས་ནང་སེམས་ཀྱི་བདེ་བ་བསྐྲུན་གྱི་ཡོད་སྟབས། ནང་ཆོས་དང་ཚན་རིག་གཉིས་མཐུན་འགྲིག་བྱས་ནས་འགྲོ་བ་མིའི་རིགས་ལ་བདེ་སྐྱིད་ཡོང་བ་བྱ་རྒྱུ་གལ་ཆེན་ཆགས་ཡོད། ཅེས་སོགས་གསུངས་སོང་།
ཟླ་འདིའི་ཚེས་ ༣ ནས་ ༥ བར་གྱི་ནང་པའི་མཁས་དབང་དང་ཚན་རིག་དབར་གྱི་བགྲོ་གླེང་ཚོགས་འདུ་འདིར། དགའ་ལྡན་བྱང་རྩེ་གྲྭ་ཚང་གི་དགེ་འདུན་པ་བློ་གྲོས་བཟང་པོ་ལགས་ཀྱིས་༼མཐུན་འགྲིག་དང་བདེ་སྐྱིད། ལྟོས་གྲུབ་དང་སྙིང་རྗེའི་ཐོག་ནང་པའི་ལྟ་ཚུལ།༽ཞེས་པའི་ཐོག་གཏམ་བཤད་གནང་རྒྱུ་དང་། བྷེང་ལོར་རྒྱལ་ནང་ཆེས་མཐོའི་ཉམས་ཞིབ་བསྟི་གནས་ཁང་གི་སློབ་དཔོན་སཱང་གྷི་ཐ་མེ་ནོན་ལགས་ཀྱིས་ ༼ཀླད་པ་དང་ཕན་ཚུན་གཅིག་ཏུ་སྦྲེལ་བའི་བདག ཚན་རིག་དང་ཤེས་པའི་བརྡ་རྟགས།༽ ཨ་རིའི་སྦར་ཀེ་ལིའི་རླབས་ཆེན་བཟང་པོའི་ཚན་རིག་ལྟེ་གནས་ཁང་གི་ངེས་སྟོན་པ་ཨི་མི་ལི་ཡ་ན་ཐོ་མ་སི་ལགས་ཀྱིས་༼བདེ་སྐྱིད་ཀྱི་དོན་དུ་འགྲོ་བ་མིའི་འབྲེལ་བ་དང་། བྱམས་བརྩེ། མཐུན་འགྱུར་གྱི་གལ་གནད་ཆེ་ཚུལ།༽ ནེ་རུ་ཚན་རིག་ལྟེ་གནས་ཁང་གི་ཚན་རིག་པ་སཱ་ཀེ་ཌ་སིང་ཀོ་རབ་ལགས་ཀྱིས་༼མཐུན་འགྲིག་དང་བདེ་འཚོབ། ནམ་མཁར་ཡོད་པའི་མིག་ཆེ་ཤོས།༽ རྒྱ་གར་རྒྱལ་ཡོངས་ཚན་རིག་ལྡེ་གནས་ཁང་གི་ཚན་རིག་པ་ཨེ་ཀེ་མུ་ཁོ་པ་དྷེ་ལགས་ཀྱིས་༼དགེ་འདུན་པའི་ཆེད་དུ་ཚན་རིག་སྐྲུན་ཐབས་ཀྱི་གོམ་པ་ལྔ།༽སེར་སྨད་གྲྭ་ཚང་གི་ཟི་ལིང་སྟོང་འཁོར་རིན་པོ་ཆེ་ལགས་ཀྱིས་༼བདེ་སྐྱིད།༽ཅེས་སོགས་ཀྱི་བརྗོད་གཞིའི་སྐོར་ལ་གཏམ་བཤད་གནང་རྒྱུ་ཡིན་འདུག
༢༠༡༡ ལོའི་ཟླ་ ༡༡ ནང་འཇིག་རྟེན་ཁམས་ཀྱི་རིག་པ་དང་རྣམ་པར་ཤེས་པའི་ཚོགས་འདུ་ཐེངས་དང་པོ་བེམ་ཤེས་ཀྱི་བརྗོད་གཞིའི་ཐོག་ནང་པའི་མཁས་པ་དང་ཚན་རིག་པའི་བར་གྱི་བགྲོ་གླེང་དེ་དྷ་རམ་ས་ལར་ཚོགས་ཡོད་པ་དང་། ཚོགས་འདུ་ཐེངས་གཉིས་པ་དེ་ ༢༠༡༣ ལོའི་ཟླ་ ༡༡ ནང་ལྡེ་ར་རྡུན་སྲོང་བཙན་དཔེ་མཛོད་ཁང་དུ་ཤེས་རྟོགས་དང་ལག་ལེན་གྱི་བརྗོད་གཞིའི་ཐོག་ཚོགས་ཡོད་འདུག
གསར་འགོད་པ། དོན་གྲུབ།
