འཆར་སྣང་གསལ་བར་བྱེད་པའི་མེ་ལོང་།

རབ་འབྱམས་པས།

གངས་ཅན་ལྗོངས་ཀྱི་སྔོན་བྱོན་མཁས་དབང་དང་པཎ་ཊི་ཏ་དང་ལྷ་རམས་པ་སོགས་མཁན་པོ་དང་སློབ་དཔོན་དག་ལའང་ད་ལྟའི་དགེ་ལུགས་པའི་རྒྱུགས་ལྟ་བུའི་རྒྱུགས་སྤྲོད་བཏང་བའི་ལོ་རྒྱུས་མེད་ལ། ཆོས་བརྒྱུད་གཞན་ལའང་བྱུང་མྱོང་མེད་པ་ལོ་རྒྱུས་མཁས་པ་དག་གིས་ཤེས་གསལ་ཡིན། འོན་ཀྱང་དེང་སྐབས་སྙིགས་དུས་ཀྱི་སྟོན་པ་ཆེན་པོ་བདག་ཅག་གི་ལྷ་མིའི་རྣམ་འདྲེན་སྐྱབས་མཆོག་ཕྱག་ན་པདྨོའི་བཀའ་དྲིན་ཉག་གཅིག་ལས་འཕགས་ཡུལ་དུ་དགེ་ལུགས་རྒྱུགས་སྤྲོད་ཆེན་མོ་སྤུས་དག་འདི་འབུས་མགོ་བརྩམས་ཤིང་། ས་འཁྱག་རྟེན་མ་དང་རྡོ་འཁྱག་སྔས་འབོལ་བྱས་ནས་མི་ལོ་ཉེར་དྲུག་ལ་དཀའ་སྤྱད་འབད་བརྩོན་བྱས་ཏེ། གཟན་ཤམ་རྔུལ་ཆུས་སྦང་དགོས་པའི་ས་མཐའི་ཚ་རླབས་ཀྱི་ཁྲོད་དུ་རྒྱུགས་སྤྲོད་གྱི་གྲུབ་འབྲས་ཀྱང་གཡུར་དུ་ཟ་བ་ཐོན་བཞིན་པ་ལགས་ཤིང་། གདན་ས་ཁག་ཏུ་རྒྱུགས་སྤྲོད་དེར་འགྲོ་འདོད་འདོད་ཐམས་ཅད་འགྲོ་ཆོག་པ་ཞིག་དང་། སོང་སོང་ཐམས་ཅད་ཀྱིས་རྒྱུགས་འཕྲོད་པ་ཞིག་གཏན་ནས་མིན།

དཔེར་ན། བསྡུས་ཆུང་སྐབས་འཛིན་གྲྭ་དེར་མི་ཉིས་བརྒྱ་ཡོད་ན་འདུལ་མཛོད་རྩོད་སྐབས་བརྒྱ་ཙམ་ལས་ལྷག་གི་མེད་པ་དང་། དགེ་ལུགས་རྒྱུགས་སྤྲོད་འཚམས་སུ་བདུན་ཅུ་བརྒྱད་ཅུ་ཙམ་ལ་ཐུག་ནས་ཡོང་གི་ཡོད། དེའི་ནང་རྒྱུགས་སྤྲོད་དུ་འགྲོ་ཐུབ་མཁན་ཉི་ཤུ་སུམ་ཅུ་ཙམ་ཡིན་པ་དང་། དེ་ཡང་ལོ་རེར་གྲྭ་ཚང་ཆེ་ཁག་དྲུག་གིས་ལོ་ཉི་ཤུ་རྩ་ལྔ་གཏོང་གི་ཡོད་ཀྱང་། ལོ་དྲུག་གི་རྒྱུགས་ཡོངས་རྫོགས་འཕྲོད་དེ་ལྷ་རམས་དགེ་བཤེས་ལོན་པ་ལོ་རེར་བཅུ་བཅོ་ལྔ་ཙམ་ལས་གཏོང་ཐུབ་ཀྱི་མེད། གཞུང་ལུགས་མཁས་ཤིང་ཤེས་རབ་རྣོ་བས་ཀྱང་རྒྱུགས་འཕྲོད་ནས་ལྷ་རམས་ཆགས་ཐུབ་པའི་ངེས་པ་གཏན་ནས་མེད། མིག་སྐྱོན་ཅན་ཆགས་པ་གཉིད་བཀག་པའི་རྐྱེན་གྱིས་རླུང་དང་ཁྲག་ཤེད། སྙིང་ནད་པ་ཆགས་པ་སོགས་ཆོས་ཟབ་ས་བདུད་ཟབ་ཞེས་པའི་དཔེ་ལྟར་བར་ཆད་ཧ་ཅང་མང་བོ་ཡོད། ཉིས་སྟོང་བཅུ་བཞི་སྟེ་ད་ལོའི་རྒྱུགས་སྤྲོད་སྐབས་ནད་དགོངས་ཞུ་མཁན་ ༡༧ བྱུང་ཡོད།

དུས་ཡུན་རིང་ཞིང་དཀའ་ཁག་ཤིན་ཏུ་ཆེ་བའི་དགེ་ལུགས་རྒྱུགས་སྤྲོད་ཆེན་མོ་དང་། དགེ་བཤེས་ལྷ་རམས་པའི་སྙན་པའི་འབྲུག་གི་སྒྲ་གོ་ལའི་ཁྱོན་དུ་ལྡིར་བཞིན་པ་ནི། རང་གི་རིགས་གཞུང་གཏིང་ཟབ་ལ་དུང་བ་ཟབ་པའི་མི་བུ་དག་དགའ་འོས་པའི་དོན་དག་ཅིག་ཅི་ལ་མིན། ད་ལྟའི་བརྒྱུད་ལམ་ཁག་ཏུ་རེ་གཉིས་ཀྱིས་གཞན་གྱི་ཡོན་ཏན་ཉམས་དམའ་བར་འདོད་དེ་ཀུན་སློང་ངན་པའི་མེ་འོབས་ཀྱིས་འབད་འབད་དུང་དུང་གིས་ཉེས་སྐྱོན་ཁབ་ཀྱི་རྩེ་མོ་བཙལ་ཏེ། ཡིན་ལ་མིན་ལའི་དཔེ་མཚོན་ཆུང་ངུ་ཙམ་ལས་མ་རག་ཀྱང་། ཞིབ་ཆ་བདེན་དཔང་གང་ཡང་མེད་པར་བརྒྱུད་ལམ་དུ་སྒྲོག་ཅི་ཐུབ་བྱེད་པ་ལ་ཚོད་ཡེ་ནས་མི་འདུག

ཉེས་སྐྱོན་བཙལ་ན་རྒྱལ་ཁབ་དང་མི་རིགས་ཚོགས་སྡེ་གང་དུའང་མཚན་གཞི་ཙམ་རེ་རག་སྲིད་པ་རེད། རྩོམ་ཐུང་ཁག་ཅིག་གིས་ཚིག་གི་དངོས་བསྟན་ལྷག་བསམ་ཆེ་མདོག་དང་། སྤྱི་སེམས་ཡིན་རབས་ཀྱི་སྙན་མོ་དང་འཇམ་པོ་ཅི་མ་བདེན་སྙམ་པའི་ཐལ་བ་མཐུག་པོ་ཞིག་གིས་ཕྱོགས་ཀུན་ནས་གཡོགས་ཤིང་། ཤུགས་ལ་སྤྱི་དང་བྱེ་བྲག་ཐམས་ཅད་སྤྱི་ཚོགས་སུ་མཐོང་བརླག་ཐབས་བྱེད་བཞིན་པ་ནི་མཚན་ཉིད་རིགས་པ་སྨྲ་བ་ལྟ་ཅི། སློབ་གྲྭ་ཆེ་ཆུང་གི་སློབ་མ་ཚོས་ཀྱང་དངོས་ཤུགས་དེ་ཙམ་ཀྱི་གོ་བ་ལོན་གྱིན་ཡོད་པས་གངས་ཅན་པ་རྣམས་ཀྱིས་གཟུར་གནས་བློ་ཡིས་བཏགས་ཤིང་གཟབ་རྒྱུ་གལ་ཆེ་ཀུན་སྤྱོད་འདིའི་རིགས་ནི། ཤེས་ཡོན་པ་ཞིག་གི་ལས་ཀ་གཏན་ནས་མ་ཡིན་ནོ།།

གཞན་གྱི་ཕུན་ཚོགས་མི་བཟོད་ཕྲག་དོག་གི་མེ་དོང་།།

གཡོ་ཟོལ་ཚིག་གི་ཐལ་བ་མཐུག་པོ་ཡིས་གཡོགས་པར།།

སྤྱི་སེམས་བཅོས་མའི་སྟོན་གྱི་བ་མོ་ཡིས་བཀབ་པ།།

བདེན་ཚིག་ལྕགས་ཀྱི་ཁེམ་བུས་མ་སློག་ན་སྙམ་ཡང།།

 འདིའི་ཡན་ནི་ད་ལྟའི་བརྒྱུད་ལམ་ཁག་གི་གནས་ཚུལ་སྤྱི་བཤད་ཙམ་མོ།།

ད་ནི་སྐབས་བབ་རྒན་གུར་མགོན་སྐྱབས་ལགས་ཀྱི་དགེ་ལུགས་རྒྱུགས་སྤྲོད་ཆེན་མོའི་རྒྱུགས་ཤོག་༼འཆར་སྣང་།༽གི་དངོས་ཤུགས་ལ་ཅུང་ཟད་དཔྱད་པའི་སྒོ་ནས་རྒྱུས་མེད་ ༼འཆར་སྣང་གསལ་བར་བྱེད་པའི་མེ་ལོང་།༽འབྲི་བ་ལ་འཇུག་གོ ཉེ་སྔོན་བོད་ཀྱི་མཐོ་སློབ་དགེ་རྒན་ཞིག་གིས་དགེ་ལུགས་རྒྱུགས་སྤྲོད་ཆེན་མོར་དཔྱད་བརྗོད་སྤེལ་ཡོད་པ་ཐོས་པས་ཀློག་འདོད་བྱུང་ཞིང་། རྩོམ་པ་པོ་ཁོ་བོ་ཞིབ་འཇུག་པ་ཞིག་ཀྱང་ཡིན་རབས་ཐོས་པས། ལྷག་པར་མཐོང་འདོད་བྱུང་བ་ལྟར། ཉེ་ཆར་སྐད་འཕྲིན་བརྒྱུད་ལམ་ཞིག་ཏུ་ཁོང་གི་དཔྱད་རྩོམ་དེ་ལག་ཏུ་འབྱོར་སོང་། འདི་ནི་བོད་ནང་གི་མཐོ་སློབ་དགེ་རྒན་ཞིག་གིས་ལྷག་བསམ་གྱི་འབོད་སྐད་དོ།། འདི་ནི་ལོ་རྒྱུས་ཞིབ་འཇུག་པ་ཞིག་གི་འཆར་སྣང་དཔྱད་བརྗོད་དོ་སྙམ་སྟེ། ཡང་ནས་བསྐྱར་དུ་ཞིབ་ཙམ་བཀླགས་ཀྱང་ཁོང་གི་དཔྱད་བརྗོད་འཆར་སྣང་བྱུང་ས་དེ་ནི། བཀའ་རམས་གཉིས་པའི་དུས་ཚིགས་གཅིག་གིི་རྒྱུགས་ཤོག་ཤོག་ལྷེ་གཅིག་ཙམ་ཡིན་ཞིང་། དེ་ཡང་ཉེས་སྐྱོན་བརྗོད་པ་ཙམ་དུ་ཟད་དོ།། དགེ་ལུགས་རྒྱུགས་སྤྲོད་ཆེན་མོ་ལོ་རེ་ནས་སྤུས་ཇེ་དག་དང་འགྲིག་ཇེ་ཡག་དུ་འགྲོ་བཞིན་ཡོད་རུང་། ཡར་རྒྱས་ལ་མཐའ་མེད་པས་ད་དུང་ལེགས་བཅོས་གཏོང་དགོས་ས་མང་བ་ནི་སྨོས་མ་དགོས་སོ།།

༡༽ད་ལྟའི་བརྡ་འཕྲིན་ཤིན་ཏུ་མྱུར་བའི་དུས་འདིར་ཟུར་སྦྱོང་གི་རྒྱུགས་ཤོག་ཤོག་ལྷེ་གཅིག་ཙམ་ལས་ཁོང་གི་འདྲེན་བྱེད་དུ་མ་གྱུར་བ་བདེན་ན་ཉེས་པ་འབའ་ཞིག་བརྒྱུད་ལམ་དུ་བསྒྲགས་རྒྱུ་ཅུང་ཟད་སྔ་དྲགས་པ་དང་ཞིབ་འཇུག་དཔྱིས་ཕྱིན་པ་ཐོན་མེད་དེ།

རྒྱུགས་སྤྲོད་ཆེན་མོའི་རྒྱུགས་ཤོག་རྒྱ་མཚོ་ལྟ་བུ་ལས་བཀའ་རམས་གཉིས་པའི་དུས་ཚིགས་གཅིག་གི་རྒྱུགས་ཤོག་རྩྭ་རྩེའི་ཟིལ་བ་ཙམ་གྱི་ཤོག་ལྷེའི་ཞན་སྐྱོན་ཙམ་ལས་དཔྱད་ཞིབ་མ་ཐོན་པས་སོ།།

༢༽འཆར་སྣང་ཆུང་དྲགས་སྙམ་སྟེ།

ཆོས་འབྱུང་སློབ་ཚན་ལ་འཕགས་ཡུལ་གྱི་སློབ་གཉེར་བ་དག་གིས་ཟུར་སྦྱོང་སློབ་ཚན་ཞེས་འབོད་ཅིང་། ཁོང་ཉིད་ལ་རྒྱུགས་སྤྲོད་ཆེན་མོ་འདོགས་སའི་རྒྱུགས་ཤོག་དག་གི་དོན་སྤྱི་ཙམ་ཡང་འཆར་མ་མྱོང་བས་སོ།།

༣༽ཟུར་སྦྱོངས་རྒྱུགས་ཤོག་གཅིག་པུའི་འཆར་སྣང་ངོ་སྙམ་ན་དེ་ཡང་ཉམས་མྱོང་ཆ་རྒྱུས་མེད་པའི་བརྗོད་པ་འབའ་ཞིག་གིས་གྲུབ་འདུག་སྟེ། རྒྱ་ཆེ་ལ་གཏིང་ཟབ་པ་ཉིང་དགོས་གྱ་ནོམ་པ་ཡོད་པའི་པོད་ལྔའི་སློབ་གཉེར་ཉམ་པར་དོགས་ཏེ། སུམ་རྟགས་སྙན་ངག་སྦྱོང་བར་དགག་བྱ་བྱེད་པའི་ཁོར་ཡུག་འདི་ལས་སློབ་གྲྭ་ཁག་བཞིན་ཚིག་དང་སྡེབ་སྦྱོར་ཙམ་གཙོ་བོར་མི་བརྩི་སྟེ། ཚིག་ལ་མི་ལྟ་དོན་ལ་ལྟ་བ་དང་དྲང་དོན་ལ་མི་ལྟ་ངེས་དོན་ལ་ལྟ་བས་སོ།།

སྔོན་བོད་དུ་ལྷ་རམས་དགེ་བཤེས་ཨང་དང་པོ་དང་གཉིས་པའི་ནང་རང་གི་མིང་ཙམ་ཡང་དག་འཐོན་པ་ཞིག་ཞིག་འབྲི་མི་ཤེས་མཁན་དང་། ལྟུང་བཤགས་ཙམ་བློ་ལ་མི་འགྲོ་མཁན་ཡོད་པའང་ཐོས་མྱོང་ཡང་དེ་དག་རྩ་ཆེན་པོ་ཡིན་ཏེ། ལུང་སྡེ་སྣོད་གསུམ་གྱི་འཆད་ཉན་དང་ལམ་བསླབ་པ་གསུམ་གྱི་ཉམས་ལེན་ཡོད་པའི་གང་ཟག་ཡིན་པས་སོ།། དེ་དག་མཁས་པ་ཡིན་ཏེ་གཞུང་བཀའ་པོད་ལྔ་ཡི་སྐ་རགས་བཅིངས་ཤིང་། རྨོངས་པ་རྣམ་པ་གསུམ་ལྡོག་པའི་གང་ཟག་ཡིན་པས་སོ།།

༤༽མ་ཟད་སྐྱོན་དེ་དག་མི་འཇུག་སྙམ་སྟེ།

ཉིད་ཀྱིས་རྣམ་ཐར་བཞིན་འབྲི་དགོས་པས་གང་རྒྱས་འབྲི་ཐབས་མི་འདུག་གསུངས་ཡོད་ཀྱང་། དཔེར་ན། དྲི་བ་དང་པོར་དབུས་གཙང་དུ་གསན་བསམ་གནང་ཚུལ་གང་རྒྱས་བྲིས་ཞེས་པའི་དྲི་བ་གཅིག་པོར་རྗེས་བླ་མས་གསན་བསམ་གནང་ཚུལ་རྣམ་ཐར་བཞིན་གང་རྒྱས་བྲིས་ན་ཆུ་ཚོད་གསུམ་ཕར་ཟད། ཉི་མ་གསུམ་ལ་བྲིས་ཀྱང་མི་ཚར་བ་འབྲི་རྒྱུ་ཡོད་པས་སུན་པོ་འབྱུང་དོགས་ཀྱི་ཐུགས་ཁྲལ་གཏན་ནས་མི་དགོས་སོ།།

༥༽སྤྱིར་གཞུང་གང་དང་གང་རྒྱུགས་སྤྲོད་གཏོང་སྐབས། གཞུང་ཚན་ཇི་བཞིན་གཏོང་དགོས་སྙམ་སྟེ།

གཞུང་ཇི་བཞིན་མ་བཏང་ན་གཞུང་དེའི་རྒྱུགས་སྤྲོད་མ་ཡིན་པ་ཆགས་འགྲོ་བ་དང་རྒྱུགས་ལེན་པ་ནི། གཞུང་དེ་ཨེ་ངེས་ལྟ་ཆེད་ཅིག་ཡིན་པ་དང་། ལྷག་པར་རྣམ་ཐར་ནི་རྣམ་ཐར་ཇི་བཞིན་དགོས་པ་ལས་སྒྲོ་འདོགས་དང་སྐུར་འདེབས་བྱས་ན་ལྷ་སྒྲུང་ལྟ་བུ་ཆགས་འགྲོ་བས་སོ།།

སྔོན་བྱོན་སྟོན་པའི་རྣམ་ཐར་རྗེས་འཇུག་སློབ་མས་ཉམས་ལེན་ཞེས་པ་ལྟར། རྣམ་ཐར་ཇི་བཞིན་ངེས་ན་དམིགས་པ་གཏད་སའི་མ་འོངས་པའི་ལམ་ཁ་ཡང་དེ་ཀ་ཡིན་ནོ།། བསམ་གཞིག་གི་ནུས་པ་མཐོང་བྱེད་ཀྱི་དཔྱད་རྩོམ་དག་བཅོས་ཚིག་འགྲེལ་སྙན་ཞུ་འབྲི་སྟངས་སོགས་དྲི་ཤོག་གཞན་ལ་མང་དག་ཡོད་པས་དྲི་ཤོག་དེར་མེད་ཀྱང་འཐུས་སྙམ་པ་དང་རྣམ་དཔྱོད་ཀྱི་ནུས་པ་མཐོང་བྱེད་གཙོ་བོ་རྟགས་གསལ་དང་ལན་གྱི་སྐབས་ཡིན་པས་སོ།། མ་གཞི་གཞུང་ཇི་བཞིན་ཕྲིས་ཞེས་པའི་དྲི་བ་ནི་དྲི་བ་ཁག་ཤོས་ཡིན་པ། དཔེར་ན། མཚོ་ཊཱིཀ་ཇི་བཞིན་ཕྲིས། མཆིམས་མཛོད་ཇི་བཞིན་ཕྲིས། གསེར་ཕྲེང་ཇི་བཞིན་ཕྲིས། ཞེས་པ་ལྟ་བུ་ནི་གཞུང་ཆེན་དེ་དག་ལས་དྲི་བ་དེའི་སྐབས་ཀྱི་སྔོན་ཀྱི་སློབ་དཔོན་གཞན་དང་ཁ་ཅིག་དང་། རང་ལུགས་ཀྱི་འདོད་པ་སོགས་ཇི་བཞིན་ངེས་དགོས་པས་ཤིན་ཏུ་དཀའ་བ་གཞུང་ཆེན་རྒྱུགས་སྤྲོད་ནང་ཕེབས་མཁན་དག་གི་ཐུགས་ལ་གསལ་གསལ་ཐང་ཐང་ཡིན་ནོ།།

༦༽ དགེ་ལུགས་རྒྱུགས་སྤྲོད་ཆེན་མོའི་རྒྱུགས་ཤོག་ལས་དགེ་རྒན་ལགས་ཀྱིས་རྒྱུགས་ཤོག་འདོན་མཁན་དང་། ལན་འདེབས་མཁན་གཉིས་ཀྱི་ཤེས་རབ་ཀྱི་རྩལ་ཡོངས་རྫོགས་མཐོང་མི་ནུས་སྙམ་སྟེ། རི་བོའི་གཏོས་དང་མཉམ་པའི་རྒྱ་བོད་ཀྱི་གཞུང་ཆེན་རྩ་འགྲེལ་དེ་དག་བམ་ཀློག་ཙམ་ཡང་བྱེད་མ་མྱོང་བས་སོ།།

༧༽དགེ་མཚན་རི་རྒྱལ་ལྷུན་པོ་དང་འདྲ་པ་དེ་དག་མི་གླེང་བར་ཉེས་སྐྱོན་ཤིག་གི་སྒོ་ང་ཙམ་རེ་སྤྱི་ཚོགས་ལ་བསྒྲགས་པས་ཕན་ལས་གནོད་པ་ཆེ་བར་སྙམ་སྟེ། སྤྱི་ཚོགས་ཀྱིས་སྐྱོན་ཡོན་གཉིས་ཀ་མཐོང་དགོས་ཤིང་། སྐྱོན་བཏགས་ཀྱི་བློ་ནི་ཡོན་ཏན་མཐོང་བར་སྒྲིབ་བྱེད་ཀྱི་བཀག་རྡོ་ཡིན་ཞིང་། ཡོན་ཏན་དགེ་མཚན་མཐོང་བ་ནི་དགའ་དད་དྭངས་པ་འདྲེན་བྱེད་དང་། མ་འོངས་དམིགས་འདུན་ལེགས་པའི་ལམ་ཕྱོགས་དེར་སྤྲོ་བས་འཇུག་བྱེད་ཀྱི་གོམ་པ་དང་པོ་ཡིན་པ་ལོ་རྒྱུས་མཁས་པ་དག་གིས་མགྲིན་གཅིག་དབྱངས་གཅིག་ཡིན་པས་སོ།།

༨ ༽དགེ་ལུགས་པའི་ཟུར་སྦྱོང་སློབ་ཚན་དུ་ལོ་རྒྱུས་ལས་ཆོས་འབྱུང་འོས་ཤིང་འཚམ་སྙམ་སྟེ།

གྲྭ་ཚང་དུ་མི་ལོ་བཅོ་བརྒྱད་བཅུ་དགུའི་རིང་གང་མགྱོགས་དེད་ཀྱང་ཚར་དཀའ་བའི་གཞུང་ཆེན་སློབ་ཚན་དེ་དག་འདིར་རྒྱུགས་སྤྲོད་པས་རང་སྦྱོང་ཟླ་བ་གསུམ་བཞིའི་རང་བསྐྱར་ཀློག་ཚར་དགོས་ཤིང་། གཞན་ཟུར་སྦྱོང་ཡང་སྟོན་པའི་རྣམ་ཐར། རྗེའི་རྣམ་ཐར། སུམ་ཅུ་བ་དང་རྟགས་འཇུག རྟེན་འབྲེལ་བསྟོད་པ། འཕགས་བསྟོད་སོགས་ལ་ཚིག་འབྲེལ་དང་དག་བཅོས། སྙན་ཞུའི་རིགས་དང་དཔྱད་རྩོམ་གྱི་རིགས་སོགས་ཡོད་པ་མ་ཟད། སྔ་དགོང་དུ་སྡོམ་དང་རྩ་བ་བློ་འཛིན་སྐྱོར་སྦྱང་བྱེད་རྒྱུ་སོགས་ཤིན་ཏུ་མང་བས་ལོ་རྒྱུས་ཀྱི་ཚིག་ཉོག་མང་པོ་ལྟ་ཁོམ་ཡེ་ནས་མེད་པས་སོ།།

༩ ༽རི་བོ་དགེ་ལྡན་པའི་ལངས་ཕྱོགས་དང་རྒྱུགས་སྤྲོད་ཆེན་མོ་གཏོང་མཁན་དང་། ལེན་མཁན་རྒྱུགས་ལེན་སའི་གཞུང་གང་དུ་བལྟས་ཀྱང་ཕྱོགས་གཅིག་དུ་གཞོལ་ཆེ་བའི་ཉེས་སྐྱོན་མེད་པར་སྙམ་སྟེ། ཨ་མའི་བུ་ལ་འཇོན་ཐང་ཡོད་ན་དགའ་ལྡན་ཁྲི་ལ་བདག་པོ་མེད། ཅེས་ངག་རྒྱུན་ལ་གྲགས་པའི་སྔོན་གྱི་སྡོམ་ཚིག་གིས་འཇོན་ཐང་ཆ་རྐྱེན་ཡོད་ན་མི་རིགས་ཆོས་བརྒྱུད་དབྱེ་བ་མེད་པར་འཇམ་དབྱངས་བླ་མའི་གསེར་གྱི་ཁྲི་འཕང་མཐོན་པོའི་སྟེང་བཞུགས་ཆོག་པ་དང་། གདན་སའི་མཁན་ཁྲི་ཡང་ལོ་རྒྱུས་ནང་མི་རིགས་གཞན་པ་ཕེབས་མྱོང་ཡོད་པར་མ་ཟད། ད་ལྟའི་རྭ་སྟོད་གྲྭ་ཚང་གི་མཁན་པོ་ཨ་རི་བ་ཞིག་ཡིན་པ་འདིས་དགེ་ལྡན་པའི་ལངས་ཕྱོགས་མཚོན་ཡོད་ལ། འདིས་མ་འོངས་དམངས་གཙོའི་དབུ་ཁྲིད་འདེམས་ཕྱོགས་ཀྱི་མིག་དཔེ་བཟང་བོ་ཞིག་དང་། ཆོས་བརྒྱུད་གཞན་ལ་ཁ་མིག་ཡར་ལྟ་བྱེད་སའི་ལམ་ཁ་ཞིག་ཀྱང་སྟོན་གྱིན་འདུག་སྙམ། མ་གཞི་དེང་སྐབས་བོད་ཕྱི་ནང་གི་ཆོས་བརྒྱུད་ཁག་ཡོངས་རྫོགས་འཕགས་མཆོག་སྤྱན་རས་གཟིགས་ཀྱི་འོད་དཀར་བོའི་གཅིག་གི་ཐུ་འོག་ཏུ་མཐུན་ལམ་རྡོག་རྩ་གཅིག་སྒྲིལ་གྱིས་ཤར་བསྐྱོད་བྱེད་བཞིན་པ་ནི་གངས་ཅན་པའི་མ་འོངས་བདེ་སྐྱིད་ཀྱི་རྩ་བ་ཉག་གཅིག་ཡིན་ནོ།།

རིགས་རུས་མི་གཙོ་བསླབ་པ་གཙོ་བའི་སངས་རྒྱས་ཀྱི་ལམ་སྟོན་བཟང་བོའི་འོག་རྒྱུགས་སྤྲོད་ལེན་བྱེད་མཁན་ཡང་ད་ལྟ་སེ་འབྲས་དགའ་གསུམ་དུ་མི་རིགས་ཆོས་བརྒྱུད་དབྱེ་བ་མེད་པར་ཕེབས་བཞིན་པ་དང་། རྒྱུགས་ལེན་སའི་གཞུང་ལ་ཡང་པོད་ལྔའི་རྩ་འགྲེལ་རྒྱ་གཞུང་སྨོས་མེད་ཐོག རང་གཞུང་མཛོད་ཊཱིཀ་ཐར་ལམ་གསལ་བྱེད་དང་འདུལ་ཊཱིཀ་རིན་ཆེན་ཕྲེང་བ་སོགས་མཛོད་འདུལ་རྩ་འགྲེལ་ཡོད་བཞིན་དུ་བོད་ཀྱི་ཆོས་བརྒྱུད་གཞན་གྱི་ཡིག་ཆ་དཔལ་ས་སྐྱ་བའི་མཆིམས་མཛོད་མངོན་པའི་རྒྱན་དང་། བཀའ་གདམས་རྙིང་མ་བའི་མཚོ་ཊཱིཀ་ཉི་མའི་འོད་ཟེར་ལྟ་བུའི་བམ་ཁ་ཤིན་ཏུ་མཐུག་པའི་གཞུང་ཆེན་དེ་དག་དགེ་ལུགས་པའི་རྒྱུགས་སྤྲོད་དུ་གཏོང་བཞིན་པ་འདི་ནི། གཟུར་གནས་ཕྱོགས་ཞེན་བྲལ་བའི་གངས་ཅན་བོད་ཀྱི་རྒྱུགས་སྤྲོད་ཆེན་མོ་ཡིན་པའི་དན་རྟགས་ཡང་དག་ཡིན་པ་མ་ཟད། ས་ཆེན་གོ་ལའི་སྟེང་འདིའི་ནང་བ་སངས་རྒྱས་པའི་ཆེས་མཐོ་བའི་གཙུག་ལག་ཁང་གི་རྒྱུགས་སྤྲོད་ཆེན་མོར་བརྗོད་ན་ཐལ་དྲགས་མེད་པར་སྙམ་མོ།།

༡༠༽བོད་ཀྱི་རྒྱུགས་སྤྲོད་ཆེན་མོ་ཡིན་པས་སྐྱ་སེར་དབྱེར་མེད་ཡོད་ན་བསམ་མྱོང་གསུངས་པ་ནི་བསམ་ཆོག་པ་ཞིག་ལོས་ཡིན་མོད་དེ་ནི་རྒྱུས་མེད་སྟོང་བསམ་གྱི་རྨི་ལམ་སྟེ།

ཆ་རྐྱེན་ཚང་ན་ཆོག་རུང་ཆ་རྐྱེན་ཚང་ཐབས་མེད་དེ་དགེ་ལུགས་རྒྱུགས་སྤྲོད་དུ་ཕེབས་པའི་སྔོན་འགྲོའི་ཆ་རྐྱེན་ནི། གྲྭ་ཚང་སོ་སོར་མི་ལོ་བཅུ་བདུན་བཅོ་བརྒྱད་དུ་ཆགས་མེད་རྒྱུགས་འཕྲོད་ཡོད་པའི་བདེན་དཔང་མཁན་པོའི་མཚན་རྟགས་དགོས་ཤིང་། སེར་བྱེས་གྲྭ་ཚང་ལྟ་བུར་མཚོན་ན། བསྡུས་གྲྭ་ཁག་དང་གྲུབ་དོན་ས་གསུམ་ལོ་གསུམ་བརྩད་རྗེས་ཕར་ཕྱིན་ལོ་བདུན་ཆགས་མེད་དུ་རྒྱུགས་སྤྲོད་ཕེབས་ཤིང་། རྒྱུགས་ཡོང་རྫོགས་རྒྱུགས་ཚད་ལོང་ཡོད་ན་ཕར་ཕྱིན་རབ་འབྱམས་པའི་ཕྱག་ཁྱེར་རག་པ་དང་། དེ་ནས་དབུ་མ་ལོ་བཞིར་བརྩད་རྗེས་དབུ་མ་རབ་འབྱམས་པའི་ཕྱག་ཁྱེར་རག་པ་དང་། དེའི་རྗེས་འདུལ་བ་ལོ་གསུམ་དང་དེ་ནས་མཛོད་ལོ་གཉིས་བརྩད་མཚམས་དགེ་ལུགས་རྒྱུགས་སྤྲོད་དུ་ཕེབས་པའི་དུས་སུ་ཁེལ་ཞིང་། ད་དུང་དགེ་ལུགས་རྒྱུགས་སྤྲོད་དུ་ཕེབས་ན་ལོ་དེ་གའི་གྲྭ་ཚང་བློ་རྒྱུགས་ལས་གཞན་རྩོད་རྒྱུགས་འབྲི་རྒྱུགས་ཟུར་སྦྱོང་གསུམ་རྒྱུགས་ཚད་ལོང་ན། ད་གཟོད་གཞི་ནས་དགེ་ལུགས་རྒྱུགས་སྤྲོད་དུ་ཕེབས་ཆོག་པའི་ཆ་རྐྱེན་དང་པོ་ཙམ་ཚང་བ་ཡིན་ཡང་ལྷ་རམས་འཛིན་གྲྭར་ཞུགས་པའི་ཐོབ་ཐང་རག་མེད། དེ་ནས་དགེ་ལུགས་རྒྱུགས་སྤྲོད་ལོ་རིམ་དང་པོ་རྒྱུགས་ཚད་ལོང་ན་ལྷ་རམས་འཛིན་གྲྭར་ཞུགས་ཆོག་ཀྱང་ལྷ་རམས་དགེ་བཤེས་ཀྱི་ཆ་རྐྱེན་ནི། ལོ་དྲུག་ཏུ་དགེ་ལུགས་རྒྱགས་སྤྲོད་ཡོངས་རྫོགས་འཕྲོད་པ་དེ་ཡིན་སྟབས། མི་སྐྱ་ཕོ་མོ་ཞིག་གྲྭ་སར་དུས་ཡུན་དེ་འདྲར་རྒྱུགས་སྤྲོད་དུ་ཕེབས་ཐུབ་པ་ནི། ནམ་མཁའི་མེ་ཏོག་དང་རི་བོང་གི་རྭ་བཞིན་མི་སྲིད་པ་ལྟ་བུའོ།།

པོད་ལྔའི་སྙེ་མ་མཐོ་བའི་ནགས་མའི་ཚལ་དུ།།

ཉེས་སྐྱོན་ཚ་གདུང་དབེན་པའི་གྲིབ་བསིལ་སྣུམ་པོར།།

ཞི་བདེའི་གཉིད་དུ་ཡུར་བའི་རྒྱ་སྟག་དམར་བོ།།

ཤི་བར་འཁྲུལ་བའི་ཁྭ་ཏས་ཨག་སྐད་མཐོ་ཨང་།།

སྐྱོར་སྦྱོང་དཔེ་ཀློག་གི་གསེར་ལྟ་བུའི་དུས་ཚོད་ཀྱི་བར་གསེང་དུ་བྲེལ་ཟིང་ངང་བྲིས་ཤིང་། ཞུ་དག་ཀྱང་བྱེད་ཁོམ་ཆེར་མ་བྱུང་བས་སྡེབ་སྦྱོར་མི་ལགས་པ་དང་ཡིག་ནོར་མང་བར་ངེས་རུང་ཚིག་ཙམ་གཙོ་བོ་མ་ཡིན་ནོ།།

༢༠༡༤/༡༡/ ༡༢ བླ་གཟའ་ལྷག་དཀར་ཉིན་མཇུག་གྲུབ་པ་འདི་ཡང་རྨོངས་བ་སེལ་བྱེད་སྒྲོན་མེར་གྱུར་ཅིག་གུ