འདྲེ་ཤར་སྒོར་བཞག་ནས་གླུད་ནུབ་སྒོར་མ་འཁྱེར།

འཕན་པོ་སྐལ་ལྡན།

༄༅།། བོད་རྗེ་ཐོག་མ་གཉའ་ཁྲི་བཙན་པོ་ནས་དབུ་ཚུགས་ཏེ། བོད་རྗེ་དར་མའི་བར་བོད་འདི་བཞིན་ཤར་གླིང་དབུས་མའི་ནང་དཔུང་སྟོབས་དང་མངའ་ཐང་ཆེ་གྲས་སུ་འགྱུར་ཏེ། བོད་ཀྱི་སྐད་ཡིག་དང་བརྡ་སྤྲོད་ཆོས་རིག་སྤྱི་ཚོགས་བཅས་ཀྱི་གནས་བབ་རང་བཙན་རྒྱལ་ཁབ་ཅིག་ཡིན། བོད་རྗེ་དར་མས་བོད་ནང་གསར་རྗེའི་རིང་ལུགས་སྤེལ་བའི་རྗེས་ལ་བོད་ཀྱི་བཙན་པོའི་རྒྱལ་རབས་མཇུག་རྫོགས་པ་དང་། བོད་སིལ་བུར་འཐོར་རྗེས་སླར་ཡང་རང་ཅག་རྣམས་ལ་བཀའ་དྲིན་བླ་ན་མེད་པ་༸གོང་ས་སྐུ་ཕྲེང་ལྔ་པ་ཆེན་པོ་མཆོག་གིས་ཆབ་སྲིད་ལུགས་གཉིས་ཀྱི་ཐུགས་འགན་བཞེས་ཏེ། བོད་འདི་བཞིན་འཛམ་གླིང་ནང་གི་རིགས་གནས་ཀྱིས་ཕྱུགས་པའི་རང་བཙན་གཙང་མའི་རྒྱལ་ཁབ་ཅིག་ཏུ་གྱུར་ཡོད།

རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ཏེ་རིང་པོར་མ་སོང་བར། བོད་ས་ཡོངས་རྫོགས་ཟ་ཧམ་གྱིས་བཙན་དབང་འོག་གྲོས་འཆར་དོན་ཚན་བཅུ་བདུན་ལ་མིང་རྟགས་བཀོད་དགོས་བྱུང་ཡང་། རྗེས་སུ་རྒྱ་ནག་ཁོ་རང་ཚོ་རང་གིས་གྲོས་འཆར་དོན་ཚན་བཅུ་བདུན་རྩིས་མེད་རྡོག་རོལ་བཏང་སྟེ། བོད་ཞི་བས་བཅིངས་བཀྲོལ་བཏང་རྒྱུའི་ཁྱབ་བསྒྲགས་དང་བཅས་བོད་ནང་ཟིང་འཁྲུག་དམག་འཐབ་ཆེན་པོ་བྱུང་སྟེ། བོད་ས་ཡོངས་རྫོགས་རྒྱ་ནག་གི་མངའ་འོག་དུ་བཙན་འཇུག་བྱས།

༸གོང་ས་སྐུ་ཕྲེང་བཅུ་བཞི་བ་ཆེན་པོ་མཆོག་དང་བོད་མི་སྟོང་ཕྲག་མང་པོ་བཙན་བྱོལ་དུ་འབྱོར་རྗེས། ༸གོང་ས་མཆོག་གི་དབུ་ཁྲིད་ལམ་སྟོན་དང་ལྷད་མེད་བྱམས་བརྩེའི་འོག བཙན་བྱོལ་བོད་ཕྲུག་རྣམས་ལ་ཕྱིའི་ཡུལ་གྲུ་ཁག་དང་མཉམ་པའི་སློབ་སྦྱོང་གི་གོ་སྐབས་ཐོབ་པ་དང་། བཙན་བྱོལ་བོད་མི་རྣམས་ཀྱང་ཀ་བ་གསུམ་ལྡན་གྱི་ཡང་དག་པའི་མང་གཙོའི་ལམ་དུ་འཁྲིད་གནང་བ། མི་མང་གི་འོས་འདེམས་གནང་བའི་བཀའ་ཁྲི་ལ་ཡང་ཐུགས་བརྩེ་བ་ཆེན་པོས་༸གོང་ས་སྐུ་ཕྲེང་ལྔ་པའི་སྐབས་ལ་བཞེས་གནང་མཛད་པའི་བོད་ཀྱི་ཆབ་སྲིད་སྐུ་དབང་ཡོངས་རྫོགས་རྩིས་སྤྲོད་དང་ཆབས་གཅིག་བཀའ་ཁྲི་ནས་སྲིད་སྐྱོང་སུ་མཚན་བསྒྱུར་གནང་མཛད་པ་ནི། ༸གོས་ས་མཆོག་གི་ཡི་ཤེས་དབྱིངས་དཔྱད་ཀྱི་གཟིགས་པ་རྒྱ་ཆེན་ཞིག་ཡིན།

༸གོང་ས་མཆོག་ནི་འཛམ་གླིང་ཐོག་ཆེས་བརྙན་གྲགས་ཆེ་བའི་ནོ་བྷལ་ཞི་བདེའི་གཟེངས་རྟགས་བཞེས་གནང་མཁན་དང་། ཚེ་བ་སྤོང་བའི་ཞི་བདེ་དེད་དཔོན། ཆོས་ལུགས་མཐུན་ལམ་གནང་མཁན་གྱི་དབུ་ཁྲིད་ཅིག་ཡིན་སྟབས། བོད་ཀྱི་གནད་དོན་དེ་ཡང་འཚེ་བ་མེད་པར་གཉིས་སྨན་དབུ་མའི་ལམ་དུ་བསྐྱོད་དགོས་པ་ནི། ༸གོང་ས་མཆོག་གི་རང་ཆས་སུ་ཡོད་པའི་རླབས་ཆེན་གྱི་མཛད་པ་ཞིག་དང་། བཙན་བྱོལ་བོད་མི་མང་ཆེ་བའི་མངོན་འདོད་ཀྱང་ཡིན་ལ། བོད་ནང་གི་རྒྱལ་གཅེས་དཔའ་བོ་དཔའ་མོ་རྣམས་ཀྱིས་གཅིག་རྗེས་གཉིས་མཐུད་དུ་བོད་རྒྱལ་ཁབ་དང་བོད་མི་རིགས་ཀྱི་ཆེད་དུ་རང་གི་གཅེས་པའི་ལུས་སྲོག་ལོངས་སྤྱོད་ཕངས་མེད་མཆོད་འབུལ་གནང་གི་ཡོད་པའང་གནས་ཚུལ་འདི་དག་གི་ཆེད་དུ་ཡིན།

བཙན་བྱོལ་སྤྱི་ཚོགས་ནང་གཞུང་དང་གཞུང་འབྲེལ་མ་ཡིན་པའི་ཚོགས་པ་ཚོས་ཆོ་ག་ཕྱག་ལེན་ལྟ་བུར་གདུང་སེམས་མཉམ་སྐྱེད་དང་མཆོད་འབུལ་སྨོན་ལམ། མར་མེ་ཁྲོམ་སྐོར་སོགས་བྱས་ཏེ་དུས་ཚོད་སྐྱེལ་བཞིན་ཡོད་པ་དང་། ལྷག་པར་དུ་བཙན་བྱོལ་སྒྲིག་འཛུགས་ཀྱི་ཆེས་མཐོའི་དབུ་ཁྲིད་རྣམ་པས་ཀྱང་དབུ་མའི་ལམ་གྱི་སྲིད་བྱུས་བཞིར་བཟུང་བོད་རྒྱ་ཞི་སྒྲིག་གི་ཐབས་ལམ་མི་འཚོལ་བར། ནུབ་ཕྱོགས་ཡུལ་གྲུ་ཁག་ཏུ་ཕྱོགས་སྐྱོད་དུ་བྲེལ་ཚབས་བྱེད་པ། དམིགས་གསལ་ཚོགས་ཆེན་ཐེངས་གཉིས་དང་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་བཅས་ཀྱི་གྲོས་ཆོད་ཁག་ཏུའང་ཡིག་ཉོག་མང་པ་ལས་བོད་ནང་གི་ཛ་དྲག་གནས་སྟངས་ལ་ནུས་པ་གང་ཡང་འཐོན་གྱི་མེད་པ། བཙན་བྱོལ་སྒྲིག་འཛུགས་ཀྱི་དབུ་ཁྲིད་རྣམ་པ་ཕྱི་རྒྱལ་ཁག་ཏུ་ཕེབས་ཏེ་མི་སྒེར་རེ་ཟུང་དང་། ཚོགས་པ་བྱེ་བྲག་པ་རེ་ཟུང་གི་རྒྱབ་སྐྱོར་རེ་བ་བྱེད་པ་འདི་དག་གིས་བོད་རྒྱ་ཞི་འགྲིག་ཡོང་ཐབས་མེད་པ་ཟུར་ལྟས་ལེབ་མཐོང་ཡིན།

བཙན་བྱོལ་སྒྲིག་འཛུགས་ཀྱི་དབུ་ཁྲིད་རྣམ་པས་༸གོང་ས་མཆོག་བོད་ནང་གདན་འདྲེན་ཞུ་རྒྱུ་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་གྱི་རྩ་ཁྲིམས་ཀྱི་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་མི་རིགས་ས་གནས་རང་སྐྱོང་ཚད་ལྡན་ཞིག་འཐོབ་དགོས་ན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆེས་མཐོའི་མགོ་ཁྲིད་རྣམས་དང་གྲོས་མོལ་ཡོང་ཐུབ་ལ་འབད་བརྩོན་གནང་དགོས་པ་དང་། རྒྱ་ནག་ནང་གི་རྒྱ་རིགས་མི་མང་ལ་འབྲེལ་ལམ་འཛུགས་རྒྱུ། དེ་བཞིན། ༸གོང་ས་མཆོག་དང་བོད་མི་ཚོས་དབུ་མའི་ལམ་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་གྱི་རྩ་ཁྲིམས་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་རྩོད་ཀྱི་ཡོད་པ་ལས་ཁ་བྲལ་རྩོད་ཀྱི་མེད་པ་རྒྱ་རིགས་ཡོངས་ལ་གསལ་བཤད་གནང་དགོས་པ་འདི་དག་གལ་ཆེ་བ་ལས། འདྲེ་ཤར་སྒོར་གནས་པ་ལ་གླུད་ནུབ་སྒོར་གཡུག་ན་དོན་དག་གང་ཡང་འགྲུབ་ཐུབ་མེད།

རང་རེའི་དབུ་ཁྲིད་རྣམ་པས་ཤར་ཕྱོགས་རྒྱ་ནག་ནང་ཁ་ཕྱོགས་དགོས་པ་ལས་ནུབ་ཕྱོགས་ཨ་རི་སོགས་ལ་ཁ་ཕྱོགས་པ་ནི་དོན་མེད་ཡིན་སྟབས། བཙན་བྱོལ་སྒྲིག་འཛུགས་ཀྱི་དབུ་ཁྲིད་རྣམ་པས་ཕྱིའི་ཡུལ་གྲུ་ཁག་ཏུ་ཕྱོགས་ཕེབས་ཉུང་ཙམ་གནང་རྒྱུ་དང་། རང་ཉིད་ཀྱི་དབང་ཆ་སྲ་བརྟན་བཟོ་ཐབས་དང་སྒེར་མཁོན་སྤྱི་དོན་དུ་སྤུང་བ་སོགས་མ་གནང་བར། བོད་ནང་གི་ཛ་དྲག་གནས་སྟངས་ལ་གཟིགས་ཏེ། དབུ་མའི་ལམ་གྱི་སྲིད་བྱུས་གཞིར་བཟུང་བོད་རྒྱ་ཞི་འགྲིག་ཡོང་ཐབས་ལ་འབད་བརྩོན་ལྷོད་མེད་གནང་དགོས་སོ།།