རྒྱ་རིགས་ཕྱུག་བདག་ཅིག་གིས་ཡི་དམ་གཤིན་རྗེ་གཤེད་དམར་གྱི་བོད་པའི་སྐུ་ཐང་རྙིང་པ་ཞིག་ལ་ཨ་སྒོར་ས་ཡ་བཞི་བཅུ་ཞེ་ལྔ་སྤྲད་ནས་ཉོས་འདུག
ཁ་སང་རྒྱ་གར་ཧིན་རྡུ་སི་ཐན་དུས་བབ་ཐོག་གནས་ཚུལ་སྤེལ་བ་ལྟར་ན། གཟའ་ལྷག་པའི་ཉིན་ཧོང་དུ་དབྱིན་ཡུལ་རྒྱལ་ས་ལོན་ཌོན་ནང་རྟེན་གཞི་བྱས་པའི་རིན་སྤར་ཚོང་སྒྱུར་ཚན་པ་ (Christie’s auction house) ཞེས་པས་གོ་སྒྲིག་འོག རྒྱ་ནག་རྒྱལ་ཡོངས་ནས་ཕྱོགས་བསྡུས་བྱས་པའི་རི་མོའི་བརྩམས་ཆོས་སྒྱུ་རྩལ་གྱི་རིན་སྤར་ཚོང་སྒྱུར་ཁྲོམ་ར་ཚོགས་པའི་སྟེང་། དར་གོས་ཚེམ་དྲུབ་ཅན་གྱི་ཡི་དམ་གཤིན་རྗེ་གཤེད་དམར་གྱི་བོད་པའི་སྐུ་ཐང་རྙིང་པ་ཞིག་ལ་ཧོང་ཀོང་གི་སྒོར་མོ་ས་ཡ་ ༦༠ ནས་མགོ་འཛུགས་ཀྱིས་རིན་སྤར་ཚོང་སྒྱུར་བྱེད་སྐབས། རྒྱལ་སྤྱི་དང་རྒྱ་ནག་གི་གནའ་རྫས་བསྡུ་རུབ་བྱེད་མཁན་མང་པོ་འགྲན་བསྡུར་ནང་བཞུགས་ཏེ། སྐུ་ཐང་གི་རིན་གོང་ཧོང་ཀོང་གི་སྒོར་མོ་ས་ཡ་ ༡༦༠ ཙམ་ལ་སླེབ་སྐབས་འགྲན་སྡུར་ནང་མི་གཉིས་ལས་ལྷག་མེད་ཅིང་། སྐབས་དེར་རྒྱ་རིཊ་ལེའུ་ཡེ་ཆན་ (Liu Yiqian) ཞུ་བ་ཞིག་གིས་ཨ་སྒོར་ས་ཡ་ ༤༥ སྤྲད་དེ་སྐུ་ཐང་དེ་ཉོས་ཡོད་འདུག
འདིའི་ཐད་ལེའུ་ཡེ་ཆན་གྱིས། “ངས་རྒྱ་ནག་ནང་ལོ་རྒྱུས་ལྡན་ཞིང་གལ་འགངས་ཆེ་བའི་དུས་རབས་བཅོ་ལྔའི་སྐབས་ཀྱི་ཐང་ག་ཞིག་འཁྱེར་ཐུབ་པ་དེ་ནི་སྤོབས་པ་སྐྱེ་འོས་པ་ཞིག་ཆགས་ཡོད་སྟབས། མ་འོངས་པར་ཐང་ག་དེ་ ༢༠༡༢ ལོར་ང་དང་བཟའ་ཟླས་གསར་འཛུགས་བྱས་པའི་ཧྲང་ཧེ་ལེའུ་ལུང་ ( Liu’s Long)གནའ་རྫས་འགྲེམ་སྟོན་ཁང་དུ་བཤམ་སྟོན་བྱ་རྒྱུ་ཡིན།”ཞེས་བརྗོད་འདུག རིན་སྤར་ཚོང་སྒྱུར་ཚན་པ་དེས། “ད་སྔའི་རྒྱལ་སྤྱིའི་རིན་སྤར་ཚོང་སྒྱུར་རི་མོ་གོང་མཐོ་ཤོས་དེ་བོད་པའི་སྐུ་ཐང་རྙིང་པ་དེ་ཆགས་ཡོད་ཅིང་། ཐེངས་འདིའི་སྐུ་ཐད་དེ་ནི་ལྷ་སའི་གཙུག་ལག་ཁང་ནང་ཡོད་པའི་ཡི་དམ་གཤིན་རྗེ་གཤེད་དམར་གྱི་སྐུ་ཐང་གསུམ་ཡོད་ཁོངས་ནས་གཅིག་ཆགས་ཡོད།”ཅེས་བརྗོད་འདུག
གནས་ཚུལ་དེའི་ནང་འཁོད་དོན། “ཧོང་ཀོང་གཙོས་པའི་རྒྱ་ནག་གི་གྲོང་ཁྱེར་ཁག་ཅིག་ཨ་རིའི་ནེའུ་ཡོག་གྲོང་ཁྱེར་དང་དབྱིན་ཡུལ་གྱི་རྒྱལ་ས་ལོན་ཌོན་ལྟར། རྒྱལ་སྤྱིའི་རིན་སྤར་ཚོང་སྒྱུར་བྱེད་ཡུལ་ལྟེ་གནས་སུ་འགྱུར་བཞིན་ཡོད་པ་དང་། འདི་ལོའི་ཕྱི་ཟླ་ ༤ ཚེས་ ༨ ཉིན་རྒྱ་ནག་ཧྲང་ཧེ་གྲོང་ཁྱེར་གྱི་རིན་སྤར་ཚོང་སྒྱུར་འཛུ་ཚོགས་ཤིག་ཏུ། རྒྱ་རིགས་ཕྱུག་བདག་ལེའུ་ཡེ་ཆན་གྱིས་རྒྱ་ནག་མིང་རྒྱལ་རབས་ཀྱི་རྒྱལ་བོ་ཆིན་ཧོ་ (cheng hua)སྐབས་བཟོས་པའི་ཞེང་ཚད་ལ་མི་ཊར་ ༨ དང་། མདུན་ངོས་སུ་ཁྱིམ་བྱ་བཟའ་ཚོ་གཉིས་ཀྱིས་བྱ་ཕྲུག་སྐྱོང་གི་ཡོད་པའི་རི་མོ་ཅན་གྱི་དཀར་ཡོལ་ཞིག་ལ་ཨ་སྒོར་ས་ཡ་ ༣༦།༠༥ སྤྲད་དེ་ཉོས་ཡོད་པ་དང་། ཟླ་འདིའི་ཚེས་ ༢༦ ཉིན་ཁོས་ཧོང་ཧོང་གི་རིན་སྤར་ཚོང་སྒྱུར་སྟེང་༡༤༠༢ ནས་ ༡༤༢༤ སྐབས་ཀྱི་རྒྱ་ནག་མིང་རྒྱལ་རབས་སྐབས་ཚེམ་དྲུབ་བརྒྱབ་པའི་ཡི་དམ་གཤིན་རྗེ་གཤེད་དམར་གྱི་བོད་པའི་སྐུ་ཐང་ཞིག་ལ་ཨ་སྒོར་ས་ཡ་ ༤༥ སྤྲད་དེ་ཉོས་ཡོད།” ཅེས་སོགས་འཁོད་འདུག
གནད་དོན་དབྱེ་ཞིབ་པ་ཚོས། ༢༠༡༠ ལོར་རྒྱ་རིགས་ཕྱུག་བདག་ཅིག་གིས་ཨ་སྒོར་ས་ཡ་ ༣༢།༤ སྤྲད་དེ་གནའ་རྫས་ཤེལ་བུམ་ཞིག་ཉོས་པ་ནས་བཟུང་། རྒྱ་རིགས་ཕྱུག་བདག་ཚོས་རང་ཉིད་ཀྱི་རྒྱུ་ནོར་ངོམ་ཆེད་རིན་གོང་མཐོན་པོ་སྤྲད་དེ་གནའ་རྫས་ཉོ་བཞིན་ཡོད་སྐོར་བརྗོད་འདུག ལེའུ་ཡེ་ཆན་ནི། དེ་སྔོན་གླ་གཏོང་རླངས་འཁོར་ཁ་ལོ་བ་ཞིག་ཡིན་ཞིང་། ཕྱིས་སུ་ཁོས་ཚོང་ལས་ནང་ཞུགས་ཏེ་ད་ཆ་རྒྱལ་སྤྱིའི་ཐོག་ཨ་སྒོར་ཐེར་འབུམ་ ༡ དང་དུང་ཕྱུར་ ༦ ཅན་གྱི་ཕྱུག་བདག་ཨང་ ༢༠༠ པ་དང་རྒྱ་ནག་གི་ཕྱུག་བདག་ཨང་ ༡༣༤ དེ་ཆགས་ཡོད་ཅིང་། ༢༠༡༢ ལོར་ཁོ་དང་བཟའ་ཟླས་ཧྲང་ཧེ་ནང་ལེའུ་ལུང་ ( Liu’s Long) ཞེས་པའི་གནའ་རྫས་འགྲེམས་སྟོན་ཁང་ཞིག་བཙུགས་ཏེ། རྒྱལ་སྤྱི་རྒྱ་ནག་གི་གནའ་རྫས་ཉོ་སྒྲུབ་ཀྱིས་འགྲེམས་སྟོན་བྱེད་བཞིན་ཡོད་འདུག
གསར་འགོད་པ། དོན་གྲུབ།
ཐང་ག་དེ་བོད་ནང་ནས་ཕྱི་རོལ་དུ་ཤོར་སྟངས་ལ་དཔྱད་དགོས།