གསང་བ་ཕྱི་ལ་ཤོར་བ་སྔོན་འགོག་བྱེད་དགོས།

གཟའ་ཟླ་བའི་ཉིན་རྒྱ་ནག་རྒྱལ་སྲིད་སྤྱི་ཁྱབ་གཞུང་ལས་ཁང་གིས་གསར་འགོད་ལས་རིགས་དང་འབྲེལ་བའི་སྒྲིག་གཞི་དོན་ཚན་ ༡༠ ཅན་ཞིག་ཁྱབ་བསྒྲགས་བྱས་ཏེ། གཞུང་གི་སྲིད་བྱུས་རིགས་ཁྱབ་བསྒྲགས་ཤུགས་ཆེ་རུ་གཏོང་དགོས་པ་དང་རྒྱལ་ཁབ་ཀྱི་གསང་རྒྱའི་རིགས་ཕྱི་ལ་མ་ཤོར་བ་བྱེད་དགོས་ཚུལ་སོགས་འཁོད་འདུག སྒྲིག་གཞི་དེ་དག་བོད་ཡིག་ཏུ་བསྒྱུར་ཡོད་པ་འདིར་བཀོད་ཡོད།

གཅིག  ཡུན་རིང་གསར་བསྒྱུར་བྱས་མེད་པའི་ལེ་ཚན་སྒོ་གཏན་པ།

སྲིད་གཞུང་དྲ་བའི་ཆ་འཕྲིན་གསར་བསྒྱུར་གྱི་སྒྲིག་འཛུགས་འཐུས་ཚང་དུ་བཏང་ནས། ནང་དོན་ཕྱི་བསྒྲགས་ཀྱི་དུས་ཚོད་དང་།  ས་གནས་རང་དང་སྡེ་ཚན་རང་གི་སྲིད་གཞུང་དྲ་བའི་ནང་དོན་གསར་བསྒྱུར་གནས་ཚུལ་ལ་ལྟ་སྐུལ་བྱེད་པ།   ནང་དོན་གསར་བསྒྱུར་ལ་ཁག་ཐེག་བྱེད་མི་ཐུབ་པའི་ལེ་ཚན་དག་དུས་ཐོག་ཏུ་གཅིག་སྡུད་བྱེད་པའམ་སྒོ་གཏན་དགོས།

གཉིས།  དོན་རྐྱེན་ཆེན་པོ་བྱུང་ཚེ་དུས་ཐོག་ཏུ་གསལ་བསྒྲགས་བྱེད་དགོས།

ས་གནས་རང་དང་སྡེ་ཚན་རང་དུ་གཏོགས་པའི་གློ་བུར་བའི་དོན་རྐྱེན་དང་།  མྱུར་བར་ཐག་གཅོད་དགོས་པའི་དོན་རྐྱེན་བྱུང་པར།  ཁྲིམས་ལྟར་གོ་རིམ་ལྡན་པའི་ངང་དུས་ཐོག་ཏུ་སྲིད་གཞུང་དྲ་བ་བརྒྱུད་ནས་ཆ་འཕྲིན་གསལ་ བསྒྲགས་གནང་དགོས་ཤིང་། ནང་དོན་བསྒྲགས་པ་དྲང་བདེན་དོན་དངོས་ཡིན་དགོས་པ་མ་ཟད།  དོན་དག་འཕེལ་རིམ་དང་ལས་ཀའི་མྱུར་ཚད་དང་བསྟུན་དུས་ཐོག་ཏུ་ལས་རིམ་ཆ་འཕྲིན་དང་།  སྲིད་གཞུང་གི་ལངས་ཕྱོགས་གསལ་བསྒྲགས་གནང་དགོས།

གསུམ།   མང་ཚོགས་ཀྱི་སྲིད་ཇུས་ལོ་ཙཱ་བ་བྱེད་པ།

སྲིད་གཞུང་གིས་སྲིད་ཇུས་གལ་ཆེན་ཞིབ་འཇུག་གཏན་ཁེལ་གནང་དུས། དྲ་བས་དུས་མཉམ་དུ་སྲིད་ཇུས་འགྲེལ་བཤད་བྱེད་ཐབས་ལེགས་པོར་སྒྲུབ་པ།  དཔལ་འབྱོར་འཕེལ་རྒྱས་དང་སྤྱི་ཚོགས་དམངས་འཚོ་སོགས་ཀྱི་སྲིད་ཇུས་འདོན་དུས།  སྲིད་གཞུང་དྲ་བའི་སྟེང་དེར་བསྟུན་གྱི་སྲིད་ཇུས་གཏན་ཁེལ་གནང་མཁན་དང་།  ཆེད་ལས་སྡེ་ཚན།  ཆེད་མཁས་སོགས་ཀྱི་རྩོམ་གནང་མཛད་པའི་དཔྱད་བརྗོད་རྩོམ་ཡིག་དང་བཅར་འདྲི་སོགས་ཀྱི་ནང་དོན་སྤེལ་ཏེ།  གོ་བདེ་བའི་སྒོ་ནས་ནང་དོན་ལ་འགྲེལ་བཤད་རྒྱག་དགོས།

བཞི།  མང་ཚོགས་ཀྱི་བསམ་འཆར་བཏོན་པར་ཉིན་བདུན་རིང་ལན་བསྐྱོན་དགོས།

ས་གནས་སོ་སོ་དང་།  སྡེ་ཚན་སོ་སོས་སྲིད་གཞུང་དྲ་བ་བརྒྱུད་སྐུད་ཐོག་བཅར་འདྲི་དང་།  བསམ་འཆར་འཚོལ་སྡུད།  དྲ་ངོས་བརྟག་དཔྱད་སོགས་ཀྱི་ནང་དོན་སྤེལ་དགོས་ལ།  མང་ཚོགས་བར་གྱི་འབྲེལ་འདྲིས་ལ་ཤུགས་སྣོན་བྱེད་པ།   མང་ཚོགས་ཀྱི་བསམ་འཆར་གཏིང་ལོན་པ།  སྤྱི་ཚོགས་ཀྱི་སྐྱོན་བརྗོད་དང་ལྟ་སྐུལ་དང་ལེན་བྱས་ངོར། མང་ཚོགས་དང་སྲིད་གཞུང་གི་བར་ཐད་ཀའི་སྦྲེལ་ཟམ་བསྐྲུན་དགོས།  དྲ་བ་ནས་མི་རྣམས་ཀྱི་བསམ་འཆར་འབྱོར་རྗེས།  ཕྱོགས་བསྡུས་སྒོས་དཔྱད་ཞིབ་གནང་དགོས་པ་དང་།   རིན་ཐང་དང་དོན་སྙིང་ལྡན་པ་དག་ལ་ཉིན ༧ གྱི་ནང་ཐག་གཅོད་བྱས་ཏེ་ཕྱིར་ལན་བསྐྱོན་དགོས་ཤིང་།  གནས་ཚུལ་རྙོག་འཛིང་ཆེ་བའི་རིགས་དུས་ཡུན་ཉིན ༡༥ ཡི་རྒྱུན་བསྲིངས་ཆོག་པ།  ཐག་གཅོད་བྱེད་མི་ཐུབ་པ་དག་ལ་གསལ་བཤད་བྱེད་དགོས།

ལྔ། མཐའ་སྣེ་དང་བྱེད་ཐབས་མང་པོ།  ལག་རྩལ་གསར་པའི་ལམ་ནས་དྲིལ་སྒྲོག་ནུས་པ་ཇེ་མཐོར་གཏོང་དགོས།

སྲིད་གཞུང་དྲ་བས་སྤྱི་ཚོགས་འབྲེལ་དྲ་གཙོ་བོར་ཆ་འཕྲིན་མཉམ་སྤྱོད་བྱེད་རྒྱུ་མཁོ་སྤྲོད་གནང་དགོས་པ་དང་།  ཁ་པར་དང་།   ལག་ཐོགས་གློག་ཀླད་སོགས་སྒུལ་སྐྱོད་མཐའ་སྣེའི་ཞབས་ཞུར་ཤུགས་སྣོན་བྱེད་པ།  ཧུར་ཐག་སྒོས་སྐད་འཕྲིན་དང་པོད་ཕྲན་སོགས་ལག་རྩལ་གསར་པ་སྤྱད་ནས་སྲིད་གཞུང་དྲ་བའི་ནང་དོན་བརྒྱུད་སྒྲོག་བྱས་ནས།  མང་ཚོགས་ཀྱིས་དུས་ཐོག་ཏུ་སྲིད་གཞུང་གི་ཆ་འཕྲིན་རྟོགས་པར་སྟབས་བདེ་བསྐྲུན་དགོས།  ཆ་རྐྱེན་ལྡན་པའི་སྲིད་གཞུང་གི་དྲ་བས་ཞིབ་འཇུག་བགྲོ་གླེང་སྤེལ་རྒྱུ་དང་།  སྲིད་གཞུང་དྲ་བའི་མིང་རྟགས་བརྒྱུད་སྒྲོག་སོགས་ཀྱི་བྱེད་སྒོ་སྤེལ་དགོས།

དྲུག    རིམ་པ་སོ་སོའི་སྲིད་གཞུང་དྲ་བས་སྟོབས་ཤུགས་གཅིག་སྡུད་བྱེད་པ།

རིམ་པ་སོ་སོའི་སྲིད་གཞུང་དྲ་བའི་བར་མཐུན་སྦྱོར་མཉམ་ལས་ལ་ཤུགས་སྣོན་བྱས་ནས།  སྲིད་གཞུང་དྲ་བའི་གཅིག་སྡུད་ནུས་པ་འབུར་དུ་ཐོན་དགོས།  རྒྱལ་སྲིད་སྤྱི་ཁྱབ་ཁང་གིས་ཁྱོན་ཡོངས་ཀྱི་ལས་དོན་སྤེལ་བར་མཛུབ་སྟོན་རང་བཞིན་གྱི་དོན་སྙིང་ལྡན་པ་དང་།  སྤྱི་ཚོགས་ཡོངས་ཀྱི་ཤེས་དགོས་པའི་སྲིད་ཇུས་ཆ་འཕྲིན་བསྒྲགས་དུས།   རིམ་པ་སོ་སོའི་སྲིད་གཞུང་དྲ་བས་དུས་ཐོག་ཏུ་བརྒྱུད་འགོད་དང་།  འབྲེལ་མཐུད་གནང་དགོས།  ལས་རིགས་གང་དང་ས་ཁུལ་གང་གི་སྲིད་ཇུས་ཆ་འཕྲིན་བསྒྲགས་དུས།  དེར་འབྲེལ་གྱི་སྡེ་ཚན་དང་ས་གནས་སྲིད་གཞུང་གིས་དུས་ཐོག་ཏུ་བརྒྱུད་འགོད་དང་འབྲེལ་མཐུད་གནང་དགོས།

བདུན།  སྨྱན་སྦྱོར་དང་མཉམ་འབྲེལ་སྒོས་སྲིད་གཞུང་གི་ཆ་འཕྲིན་ཤུགས་རྐྱེན་ཇེ་མཐོར་གཏོང་དགོས།

སྲིད་གཞུང་དྲ་བ་དང་དུས་དེབ།  ཚགས་པར།  རྒྱང་སྒྲོག  བརྙན་འཕྲིན་སོགས་སྨྱན་སྦྱོར་དང་མཉམ་འབྲེལ་བརྒྱུད། སྲིད་གཞུང་དྲ་བས་གསར་འགྱུར་དྲ་བ་དང་གསར་འགྱུར་ལས་རིགས་ཀྱི་ལས་སྒྲུབ་མཉམ་མྱོང་ལྡན་པའི་ཚོང་དོན་དྲ་བ་དང་མཉམ་འབྲེལ་བྱས་ནས།  སྲིད་གཞུང་དྲ་བའི་ཤུགས་རྐྱེན་ཇེ་མཐོར་གཏོང་དགོས་ཤིང་།  སྲིད་གཞུང་གི་སྐད་ཆ་དུས་ཐོག་ཏུ་ནོར་འཆུག་མེད་པར་མང་ཚོགས་ལ་བརྒྱུད་སྒྲོག་གནང་དགོས། དེ་དང་ཆབས་ཅིག སྲིད་གཞུང་དྲ་བས་སྲོལ་རྒྱུན་སྨྱན་སྦྱོར་དང་དྲ་བ་གཞན་དག་གི་ཆ་འཕྲིན་གཙོ་བོ་དང་། ལྟ་ཚུལ་བདམས་ནས་དྲ་བའི་ནང་དོན་འཐུས་ཚང་དུ་གཏོང་དགོས།

བརྒྱད།  གཞུང་སྒྲུབ་ཁང་གིས་མི་སྣ་ཆེད་བསྐོས་ཀྱིས་དྲ་བའི་ཆ་འཕྲིན་ལ་འགན་འཁུར་དུ་འཇུག་དགོས།

ས་གནས་སོ་སོ་དང་།  སྡེ་ཚན་སོ་སོའི་གཞུང་སྒྲུབ་ཁང་གིས་དོན་དངོས་དགོས་མཁོར་དམིགས་ནས།  ལས་འགན་པ་གཅིག་བཀོད་སྒྲིག་བྱས་ནས་སྒྲིག་འཛུགས་མཐུན་སྦྱོར་ལ་འགན་འཁུར་དགོས། གཟའ་རེར་དུས་གཏན་ངང་སྲིད་གཞུང་དྲ་བའི་ཆ་འཕྲིན་ནང་དོན་འཛུགས་སྐྲུན་ལས་དོན་ལ་ཞིབ་འཇུག་གནང་དགོས་ཤིང་།  “གཙོ་འགན་པ་སུ་ཡིན་ན་དེས་འགན་འཁུར་པ”དང”སུས་བསྒྲགས་ན་དེས་འགན་འཁུར་དགོས་པ།” འོས་འགན་སོ་སོར་དགར་བ་ལྟར་འབྲེལ་ཡོད་ཕྱོགས་ནས་ཆ་འཕྲིན་མཁོ་སྤྲོད་གནང་པའི་འགན་ཁུར་ལ་བཀོད་སྒྲིག་གནང་དགོས།  གཞུང་སྒྲུང་ཁང་གིས་སྲིད་གཞུང་དྲ་བའི་ཆ་འཕྲིན་སྤྱི་བསྒྲགས་གནང་པའམ་ལས་ཁུངས་གཏན་འཁེལ་པས་ཉིན་རྒྱུན་གྱི་མཐུན་སྦྱོར་ལས་དོན་ལ་འགན་འཁུར་དགོས།

དགུ  ནང་དོན་ལ་ཚོད་འཛིན་བྱེད་དགོས་པ་དང་གསང་པ་ཕྱི་ལ་ཤོར་བ་སྔོན་འགོག་བྱེད་དགོས།

བྱེད་ནུས་སྡེ་ཚན་གྱིས་ནང་དོན་དང་ངོ་བོ་མི་འདྲ་བར་དམིགས་ནས་རིམ་པ་དང་རིགས་དགར་ནས་ཐག་གཅོད་དགོས་པ།  ཆ་འཕྲིན་ཕྱིར་སྒྲོག་བྱེད་ཐབས་བདམས་ནས་ཆ་འཕྲིན་གྱི་ནང་དོན་ལ་ཚོད་འཛིན་བྱས་པ་བརྒྱུད་གཙོ་གནད་འབུར་དུ་ཐོན་པར་བྱ་དགོས་པ། ཆ་འཕྲིན་གྱི་ནང་དོན་མཁོ་སྤྲོད་ཀྱི་འགན་ཁུར་གསལ་བོ་བྱེད་པ། ནན་ཏན་སྒོས་འཚོལ་སྡུད་དང་དཔྱད་ཞིབ། ཡར་ཞུ།  བསྐྱར་བཅོས། བརྒྱུད་སྒྲོག་བཅས་ཀྱི་གོ་རིམ་ནན་ཏན་གྱིས་ལག་བསྟར་བྱས་ནས།  ཆ་འཕྲིན་སྤྱི་སྒྲོག་སྔོན་གྱི་གསང་རྒྱའི་ཞིབ་བཤེར་ལས་དོན་ལེགས་པོ་སྒྲུབ་ནས་གསང་བ་ཕྱི་ལ་ཤོར་བ་སྔོན་འགོག་བྱེད་དགོས།

བཅུ།   སྲིད་གཞུང་དྲ་བ་ཚད་ལྡན་མིན་ཚེ་འགན་ཁུར་པར་རྩད་གཅོད་བྱེད་དགོས།

དཔྱད་ཞིབ་ཚད་ལྡན་ཡིན་ཞིང་སྤྱི་ཚོགས་དཔྱད་བརྗོད་འབུར་དུ་ཐོན་པའི་སྲིད་གཞུང་དྲ་བར།  འབྲེལ་ཡོད་ལས་ཁུངས་དང་མི་སྣར་བསྔགས་བརྗོད་གནང་རྒྱུ་མ་ཟད།  སྔོན་ཐོན་ཉམས་མྱོང་ཁྱབ་བརྡལ་གཏོང་དགོས།   ཚད་ལྡན་མིན་པའི་རིགས་ལ་འབྲེལ་ཡོད་གཙོ་འགན་སྡེ་ཚན་དང་ལས་ཁུངས་ལ་དུས་ཚད་ནང་བཅོས་སྒྱུར་བྱ་དགོས་པའི་བླང་བྱ་འདོན་པ། བྱེ་བྲག་འགན་ཁུར་པ་དང་ལས་བྱེད་མི་སྣར་འགན་འཁྲི་རྩད་གཅོད་དང་སློབ་གསོ་གཏོང་དགོས་པ། ཆེད་ལས་སྡེ་ཚན་དང་། སྨྱན་སྦྱོར། མང་ཚོགས་ཟུང་འབྲེལ་གྱི་སྤྱི་ཚོགས་དཔྱད་ཞིབ་སྒྲིག་འཛུགས་འཐུས་ཚང་དུ་གཏོང་པ། སྲིད་གཞུང་དྲ་བས་སྤྱི་ཚོགས་དཔྱད་འཇོག་དང་ལྟ་སྐུལ་སྤེལ་བ། དཔྱད་འཇོག་གི་གོ་རིམ་དང་མཇུག་འབྲས་སྤྱི་ཚོགས་ལ་ཁྱབ་སྒྲོག་བྱེད་དགོས། (ཀྲུང་གོའི་བོད་ལྗོངས་དྲ་ཚིགས་ཟེར་བ་ལས་འདྲེན་བཀོད་བྱས།)