དེ་རིང་སྔ་དྲོར་བོད་ཀྱི་དཔེ་མཛོད་ཁང་དུ་ཉེ་ལམ་སྐུ་གཤེགས་པའི་བཀྲ་ཤིས་ཚེ་རིང་ལགས་སུ་རྗེས་དྲན་གྱི་བགྲོ་གླེང་ཚོགས་པའི་སྟེང་། ཁོང་གི་མི་ཚེའི་ལོ་རྒྱུས་དང་བོད་ནང་གི་ཤེས་ཡོན་སློབ་གསོའི་ཐོག་བྱས་རྗེས་བཞག་པ། དེ་བཞིན་ཁོང་གིས་རྩོམ་སྒྲིག་གནང་བའི་ཚིག་མཛོད་བཅས་ཀྱི་ཐོག་བགྲོ་གླེང་གནང་སོང་།
དེ་རིང་སྔ་དྲོའི་ཆུ་ཚོད་ ༡༡ ཐོག་བོད་ཀྱི་དཔེ་མཛོད་ཚོགས་ཁང་དུ། བོད་ཀྱི་དཔེ་མཛོད་ཁང་དང་རྩོམ་པ་པོའི་མཐུན་ཚོགས་གཉིས་ཀྱི་གོ་སྒྲིག་འོག མཁས་དབང་བཀྲ་ཤིས་ཚེ་རིང་ལགས་རྗེས་དྲན་བགྲོ་གླེང་ཞིག་ཚོགས་ཡོད་ཅིང་། སྐུ་མགྲོན་གཙོ་བོར་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་ཤེས་རིག་ལས་ཁུངས་བརྡ་ཆད་རྩོམ་སྒྲིག་ཚོགས་ཆུང་གི་འགན་འཛིན་ཀརྨ་སྨོན་ལམ་ལགས། ཐའེ་ཝན་སྐུ་ཚབ་དོན་གཅོད་ཁང་གི་དྲུང་ཆེ་ཟུར་པ་བསོད་ནམས་རྡོ་རྗེ་ལགས། གཞན་ཡང་། བོད་ཀྱི་དཔེ་མཛོད་ཁང་གི་ལས་བྱེད་ཁག་ཅིག་དང་། བོད་ཀྱི་རྩོམ་པ་མཐུན་ཚོགས་ཀྱི་རྒྱུན་ལས་རྣམ་པ། ཚོགས་པ་ཁག་གི་མི་སྣ་བཅས་འཛོམས་སོང་།
བགྲོ་གླེང་གི་ཐོག་མར་རྩོམ་པ་པོའི་མཐུན་ཚོགས་ཀྱི་ཚོགས་གཞོན་གྱིས་བགྲོ་གླེང་གི་དམིགས་ཡུལ་ངོ་སྤྲོད་གནང་རྗེས། བསོད་ནམས་རྡོ་རྗེ་ལགས་ཀྱིས་བཀྲ་ཤིས་ཚེ་རིང་ལགས་ཀྱི་སྐུ་ཚེའི་ལོ་རྒྱུས་སྐོར་ངོ་སྤྲོད་གནང་སྐབས། ཁོང་དང་མཁས་དབང་བཀྲ་ཤིས་ཚེ་རིང་ལགས་གཉིས་གྲོང་པ་གཅིག་པ་དང་། ཁོང་གིས་བོད་ལྗོངས་སློབ་གྲྭ་ཆེན་མོའི་བོད་ཡིག་སྡེ་ཁག་ཏུ་སློབ་སྦྱོང་གནང་སྐབས། བཀྲ་ཤིས་ཚེ་རིང་ལགས་ཀྱིས་སློབ་ཆེན་དེར་དབྱིན་ཡིག་དགེ་རྒན་གྱི་ཕྱག་ལས་གནང་གི་ཡོད་པ་དང་། ཁོང་སློབ་ཆེན་གྱི་དགེ་རྒན་ཆེན་མོ་དང་ལྷག་པར་དུ་དབྱིན་ཡིག་མཁས་པ་ཡིན་སྟབས། མི་ཚང་མས་ཁོང་ལ་དཔལ་འབྱོར་ཡག་པོ་ཡོད་པ་རེད་བསམ་གྱི་ཡོད་ཀྱང་། ཁོང་གི་སྐུ་ཟླ་ཨ་ཅག་སངས་རྒྱས་ལགས་ཀྱིས་ལྷ་སའི་ནང་ཆང་བཙོང་སྟེ་ཡོང་སྒོ་འཚོལ་གྱིན་ཡོད་པས་མི་རྣམས་ལ་མཐོང་སྣང་མི་ལེགས་པ་ཡོང་ཡོད་ཀྱང་། ཕྱིས་སུ་ཁོང་གིས་བརྩམས་པའི་༼ཕ་ཡུལ་གྱི་ཕན་བདེའི་ཆེད་དུ༽ཞེས་པའི་དཔེ་དེབ་འགྲེམས་སྤེལ་གནང་རྗེས། ཁོང་ལ་དཔལ་འབྱོར་ཐད་དཀའ་ངལ་ཡོད་པ་དང་ཁོང་གི་སྐུ་ཟླས་ཆང་བཙོང་བའི་དངུལ་རྣམས་ཀྱང་བོད་ཀྱི་ཤེས་ཡོན་སློབ་གསོའི་ཆེད་གཏོང་གི་ཡོད་པའི་གནས་ཚུལ་ར་འཕྲོད་བྱུང་ཡོད། བཀྲ་ཤིས་ཚེ་རིང་ལགས་ཀྱིས་བརྩམས་པའི་༼ཕ་ཡུལ་གྱི་ཕན་བདེའི་ཆེད་དུ༽ཞེས་པའི་དེབ་དེ། རྒྱ་ནག་བོད་རིག་པ་ཞིབ་འཇུག་ཁང་དང་ཧོང་ཀོང་ནས་རྒྱ་ཡིག་ཐོག་པར་སྐྲུན་བྱས་ཡོད་ཀྱང་། རྒྱ་ནག་གིས་པར་སྐྲུན་བྱས་པ་དེའི་ནང་བོད་ལོ་རྒྱུས་ཐོག་རང་བཙན་ཡིན་པ་དང་། རིག་གནས་གསར་བརྗེ་སྐབས་ཀྱི་གནས་སྟངས་དང་བཙོན་ཁང་གི་དཀའ་སྡུག་སོགས་ཀྱི་གནས་ཚུལ་རྣམས་མེད་པ་བཟོས་ཡོད་པ་དང་། དེ་བཞིན། ཁོང་གིས་ཕྱི་ལོ་ ༡༩༨༧ ལོར་རྒྱ་ནག་གྲངས་ཉུང་མི་རིགས་ལས་དོན་ཨུ་ཡོན་ལྷན་ཁང་ལ་ཕུལ་བའི་མི་རིགས་ས་གནས་རང་སྐྱོང་སྐོར་གྱི་སྙན་ཞུ་དོན་ཚན་ ༡༩ ཅན་དེ་ལའང་རྒྱ་གཞུང་གིས་བཅད་གཏུབ་དང་བཟོ་བཅོས་མང་པོ་བྱས་ཡོད་སྐོར་སོགས་བརྗོད་སོང་།
ཀརྨ་སྨོན་ལམ་ལགས་ཀྱིས་བཀྲ་ཤིས་ཚེ་རིང་ལགས་ཀྱི་ཚིག་མཛོད་རྩོམ་སྒྲིག་དང་སྐད་ཡིག་གི་མཛད་རྗེས་སྐོར་བརྗོད་སྐབས། བཀྲ་ཤིས་ཚེ་རིང་ལགས་ཀྱི་ཚིག་མཛོད་དང་པོ་ཐོན་པ་དེས་བྱ་བ་རླབས་པོ་ཆེ་ཞིག་བྱུང་ཡོད་པ་རེད། གང་ཡིན་ཟེར་ན། སྐབས་དེ་དུས་བོད་ནང་དུ་དབྱིན་ཡིག་ཤེས་མཁན་ཉུང་ཉུང་ཞེ་དྲག་རེད། རྒྱ་ནག་དང་བོད་ནང་དུ་སྐབས་དེར་དེང་སང་ལྟར་དབྱིན་ཡིག་ལ་སྤྲོ་སྣང་འཕེལ་མེད་པ་དང་། ཕྱི་ལོགས་ཀྱི་གནས་ཚུལ་མང་པོ་ཞིག་ཀྱང་ཤེས་ཀྱི་མེད་སྟབས། སྐབས་དེར་བོད་ནང་དོ་སྣང་བྱུང་མེད་ཀྱང་། ལོ་འགའི་རྗེས་སུ་གཞི་ནས་དབྱིན་ཡིག་ལ་སྤྲོ་སྣང་འཕེལ་ཏེ་ཕྱི་ལོགས་ཀྱི་གནས་ཚུལ་ལ་ཏོག་ཙམ་མིག་ཕྱེ་སྐབས། སློབ་སྦྱོང་བྱེད་མཁན་དང་ཕྱག་ལས་གནང་མཁན་ཚོས་ཚིག་མཛོད་དེ་བེད་སྤྱོད་
གཏོང་གི་ཡོད་པ་དཔོག་ཐུབ་པ་ཞིག་རེད། ཡིན་ནའང་། སྐུ་ཞབས་གདོང་ཐོག་གི་ཚིག་མཛོད་དང་བཀྲ་ཤིས་ཚེ་རིང་གི་ཚིག་མཛོད་སོགས་ཀྱི་ནང་དཀའ་ངལ་ཏོག་ཙམ་ཡོད་པ་དེ་གཅིག་གྱུར་རེད། དེ་ག་རེ་རེད་ཟེར་ན། བཀྲ་ཤིས་ཚེ་རིང་གིས་བོད་ཡིག་དང་རྒྱ་ཡིག་བྱས་ནས་སྐབས་ཐོག་གི་ཚིག་མ་འདྲ་བ་མ་འདྲ་བ་དུམ་བུ་བྱས་ནས་ཡོད་སྟབས། དབྱིན་ཡིག་ཞེ་དྲག་མི་ཤེས་མཁན་དང་བོད་ཡིག་ཚད་མཐོ་མེད་མཁན་ཚོར་ཏོག་ཙམ་ལྟ་བདེ་བོ་ཡོད་པ་རེད། སྐུ་ཞབས་གདོང་ཐོག་གི་ཚིག་མཛོད་ལྟ་བུ་ཡིན་ན། རིན་པོ་ཆེ་མཁྱེན་པ་རྒྱས་པོ་ཞེ་དྲག་རེད། བོད་པའི་ཐ་སྙད་དང་བཀའ་བསྟན་བཅོས་སོགས་ག་འདྲ་ཞིག་སྣམ་ཕེབས་པ་ཡིན་ནའང་འཕྱུག་པ་མེད་ཀྱང་། འབྲི་སྟངས་དེ་དབྱིན་ཡིག་གི་མ་གཟུགས་གཅིག་ཡིན་པ་དང་མིང་གི་རྣམ་གྲངས་མིན་ནམ་བསམ་པའི་མར་ནར་ནར་བྲིས་ཡོད་སྟབས། བོད་ཡིག་གི་ཆུ་ཚད་མཐོ་བོ་མེད་པ་དང་རིག་གནས་ཀྱི་རྒྱབ་ལྗོངས་ཕྱུག་པོ་ཞེ་དྲག་མེད་པའི་གཞོན་སྐྱེས་ཚོ་ཡིན་ན། ཁོ་རང་ལ་དགོས་པའི་ཚིག་དེ་སྒྲུག་མི་ཐུབ་པ་དེ་དཀའ་ངལ་རེད་འདུག དཀའ་ངལ་དེ་ཚོ་མཐོང་ཡོང་དུས་ད་ལྟ་ང་ཚོ་ཤེས་རིག་གི་ཚིག་མཛོད་ལྟ་བུ་ཡིན་ན། གཞན་པ་མེད་ནའང་དོན་དག་དང་པོ་དང་གཉིས་པ། གསུམ་པ་བཞི་པ་ཟེར་ནས་བྲིས་ཡོད་པ་དང་། ཡང་མཚམས་རེར་དེ་སྨན་གྱི་སྐད་ཆ་རེད། དེ་རྫས་འགྱུར་གྱི་སྐད་ཆ་རེད་ཟེར་ནས་ཁ་གསལ་ཅི་ཐུབ་བྱས་ཏེ། ཚིག་མང་པོ་ཡིན་ནའང་སྐབས་ཐོག་དགོས་པའི་ཚིག་དེ་སྒྲུག་ཐུབ་ན། ཚིག་དེ་བེད་སྤྱོད་བཏང་བ་བརྒྱུད་ནས་ཐ་སྙད་ཁྱབ་སྤེལ་དང་གཅིག་གྱུར་ཡོང་བར་ཕན་ཐོགས་ཡོད་པ་རེད། ཅེས་བརྗོད་སོང་།
མཇུག་ཏུ་ཤེས་རིག་བཀའ་བློན་མཆོག་ནས་བཀྲ་ཤིས་ཚེ་རིང་ལགས་ཀྱིས་བོད་ཀྱི་ཤེས་ཡོན་སློབ་གསོའི་མཛད་རྗེས་དང་འབྲེལ་བའི་གསུང་བཤད་གནང་དོན། ང་ཁོང་ལ་དེ་ཙམ་རྒྱུས་ཆེན་པོ་མེད། ཡིན་ནའང་། དྲ་ཐོག་ཏུ་བརྙན་པར་ཞིག་གི་ནང་མཁས་དབང་བཀྲ་ཤིས་ཚེ་རིང་མཆོག་གི་ལོ་རྒྱུས་སྙིང་བསྡུས་ཤིག་བཀོད་འདུག དེའི་ནང་༼གངས་རིའི་འདབས་ཀྱི་སྣང་གསལ་སྒྲོན་མེ།༽ཞེས་མིང་དེ་ཁོང་ལ་གོ་དགོས་ཀྱི་ཡོད་ས་རེད། ངས་དེ་ལ་བསམ་བློ་ཞིག་བཏང་བ་ཡིན་ཏེ་མ་འོས་པ་མི་འདུག་བསམ་བྱུང་། གང་ཡིན་ཟེར་ན། བོད་ནང་གི་གནས་ཚུལ་ཚང་མ་ང་ཚོས་ཤེས་ཀྱི་ཡོད་པ་རེད། བཙན་བྱོལ་ནང་༧གོང་ས་མཆོག་གིས་དབུ་ཁྲིད་དེ་བོད་མིའི་སྒྲིག་འཛུགས་ཀྱི་ངོས་ནས་ཤེས་ཡོན་ཐོག་ལ་ཉི་མ་ཤར་བ་ལྟ་བུའི་གོ་སྐབས་ཤིག་བྱུང་བསྡད་ཡོད་པ་རེད། གོ་སྐབས་དེ་ང་ཚོས་ག་ཚོད་ཅིག་བེད་སྤྱོད་གཏོང་ཐུབ་ཡོད་དང་མེད་གནས་ཚུལ་ལོགས་ཀ་རེད་མ་གཏོགས། ང་ཚོ་བཙན་བྱོལ་ནང་ནར་སོན་པ་སློབ་གྲྭ་མ་ཐོན་པ་ཧ་ལམ་ལུས་ཡོད་པ་མ་རེད་ཅེས་ལབ་ ཐུབ་ཀྱི་འདུག བོད་ནང་ལྟ་བུ་ཡིན་ན། གོ་ཐོས་སུ་བཀྲ་ཤིས་ཚེ་རིང་ལགས་ཀྱིས་སློབ་གྲྭ་ ༡༠༠ བཙུགས་པ་རེད་ཟེར་གྱི་འདུག་ཀྱང་། གོང་དུ་ཞུས་པའི་བརྙན་པར་དེའི་ནང་དུ་གཟིགས་ན། སློབ་གྲྭ་ ༧༧ བཙུགས་པ་དང་འཛིན་སྐྱོང་། འགྲོ་གྲོན་ཚང་མ་ཁོང་གིས་གནང་བའི་ལོ་རྒྱུས་ཆ་ཚང་འདུག སློབ་གྲྭ་དེ་ཚོར་ལྟ་ཡོང་སྐབས་གྲོང་གསེབ་པའི་སློབ་གྲྭ་ལྟ་བུ་རེད་མི་འདུག ཁང་པ་སོགས་མཐུན་རྐྱེན་གང་ཐད་ནས་དངོས་གནས་དྲང་གནས་སློབ་གྲྭ་ཚད་ལྡན་བརྒྱབ་འདུག ང་ཚོས་དངོས་གནས་མིག་དཔེ་ལྟ་དགོས་པ་ཞིག་རེད། ཅེས་གསུངས་སོང་།
ཁོང་གིས་བཙན་བྱོལ་དུ་ཡོད་པ་ཚོས་བོད་ཀྱི་སྐད་ཡིག་རིག་གཞུང་གཙོ་བོར་བཟུང་སྟེ་ཤེས་ཡོན་ཐོག་དོ་ཁུར་དགོས་པ་དེ་དམིགས་བསལ་གྱི་འགན་འཁུར་ཞིག་ཆགས་ཀྱི་ཡོད་སྐོར་གསུངས་དོན། བོད་མིའི་ངོ་བོ་སྟོན་ཐུབ་པ་དང་ཆིག་སྒྲིལ་གྱི་ནུས་པ་འདོན་ཐུབ་མཁན་དེ་ཁག་འདྲ་བོ་བཞི་ཆགས་ཀྱི་འདུག ༧གོང་ས་མཆོག་དང་བོད་མིའི་སྒྲིག་འཛུགས། བོད་ཀྱི་ནང་ཆོས་དང་སྐད་ཡིག་བཅས་རེད། དེའི་ནང་ནས་༧གོང་ས་མཆོག་དང་བོད་མིའི་སྒྲིག་འཛུགས་རྒྱ་གར་ནང་བཙན་བྱོལ་དུ་ཡོད་པ་དང་། བོད་ཀྱི་སྐད་ཡིག་དང་ནང་ཆོས་བོད་ཕྱི་ནང་གཉིས་སུ་ཡོད་པ་རེད། ཡིན་ནའང་། བོད་ནང་ལ་ཡོད་པའི་ནང་ཆོས་དང་སྐད་ཡིག་གཉིས་ཀྱི་ཐོག་རྒྱ་ནག་གཞུང་གིས་རྡུང་རྡེག་གཏོང་གི་འདུག ཁོ་ཚོས་བོད་རྒྱ་ཡུལ་དུ་བསྒྱུར་ཐབས་དང་བོད་མི་རིགས་འདི་རྒྱ་རིགས་ལ་བསྒྱུར་རྒྱུ། བོད་ཀྱི་རིག་གནས་དེ་རྒྱ་མི་རིགས་ཀྱི་རིག་གནས་ནང་བཅུག་པའི་དམིགས་ཡུལ་བཟུང་འདུག་གཱ། དེར་བརྟེན་རྒྱ་གཞུང་གི་དབང་བསྒྱུར་འོག་བོད་ནང་རང་དབང་མེད་ཀྱང་མཁས་དབང་བཀྲ་ཤིས་ཚེ་རིང་ལྟ་བུ་ཡིས་འགན་འཁུར་བླངས་ཏེ་ཧུར་ཐག་གིས་ཕྱག་ལས་དེ་འདྲ་ཞིག་གནང་ཡོད་པ་རེད། ང་ཚོ་བཙན་བྱོལ་དུ་ཡོད་མཁན་ཚོའི་ངོས་ནས་ཀྱང་བོད་ཀྱི་སྐད་ཡིག་དང་རིག་གཞུང་གཙོ་བོར་བྱས་པའི་ཐོག་ནས་ཤེས་ཡོན་ཐོག་དོ་སྣང་བྱེད་དགོས་པ་དེ་ང་ཚོའི་དམིགས་བསལ་གྱི་འགན་འཁུར་ཞིག་ཆགས་ཀྱི་འདུག ཅེས་དང་།
ཡང་ཁོང་གིས་མུ་མཐུད་དུ། བར་ལམ་ནས་ཕྱོགས་སྐྱོད་དུ་འགྲོ་སྐབས་ང་ཚོ་བོད་པའི་སྐད་ཡིག་འཐུས་ཤོར་དུ་འགྲོ་རུ་མི་འཇུག་པར་མི་ཉམས་གོང་འཕེལ་ཡོང་ཐབས་དགོས་ཀྱི་འདུག་ཟེར་ནས་ངས་གང་སར་ཤོད་ཀྱི་ཡོད། རྣམ་པ་ཚོ་ཡིན་ནའང་དེ་འདྲའི་ཐུགས་འཁུར་བཞེས་ཏེ་འདི་འདྲའི་བགྲོ་གླེང་ཚོགས་ཀྱི་ཡོད་པ་རེད་ལ། ཚོགས་པ་གཞན་ཁ་ཤས་ཀྱིས་ཀྱང་དེ་འདྲ་གནང་གི་འདུག་པས་ཞེ་དྲག་ཡག་པོ་འདུག ང་ཚོས་འདི་འདྲ་མ་བྱས་པ་ཡིན་ན། སངས་རྒྱས་པའི་ཆོས་དེ་༧གོང་ས་མཆོག་གི་དབུས་སྐྱེས་ཆེན་དམ་པ་དང་བླ་ཆེན་མང་པོའི་ཐུགས་རྗེ་བཀའ་དྲིན་ལ་བརྟེན་ནས་འཛམ་གླིང་འདིའི་ཐོག་སྔར་ལྷག་དར་ཁྱབ་འགྲོ་གི་འདུག་མ་གཏོགས་མེད་པར་འགྲོ་གི་མི་འདུག ཡིན་ནའང་། ག་རེ་མེད་པར་འགྲོ་ཉེན་འདུག་ཟེར་ན། བོད་ཀྱི་སྐད་ཡིག་མེད་པར་འགྲོ་ས་རེད། ཕྱི་རྒྱལ་ཁག་ནས་ནང་ཆོས་ལ་དོ་སྣང་བྱེད་མཁན་མང་དུ་འགྲོ་བཞིན་ཡོད་ཀྱང་། སོ་སོའི་སྐད་ཡིག་ཐོག་ནང་ཆོས་སྦྱོང་གི་འདུག་མ་གཏོགས་བོད་སྐད་ཡིག་ཐོག་སྦྱོང་གི་མི་འདུག དེའི་ཕྱིར་བོད་ཀྱི་སྐད་ཡིག་སྦྱོང་མཁན་དེ་བོད་པ་རང་གཙོ་བོ་བྱེད་དགོས་ཀྱི་འདུག ཅེས་སོགས་གསུངས་སོང་།
གསར་འགོད་པ། པདྨ་མཚོ།
