འཇིགས་སྐུལ་པས་སློབ་མ་ ༡༣༢ བསད་འདུག

ཁ་སང་པ་ཀི་སི་ཐན་གྱི་དམག་མིའི་སློབ་གྲྭ་ཞིག་ནང་འཇིགས་སྐུལ་པ་འགས་འཇབ་རྒོལ་བྱས་ཏེ་སློབ་ཕྲུག་ ༡༣༢ དམར་གསོད་བཏང་ཡོད་འདུག  

ཁ་སང་ཕྱི་ཚེས་ ༡༦ ཉིན་གྱི་སྔ་དྲོའི་ཆུ་ཚོད་ ༡༠ ཡས་མས་ལ་པ་ཀི་སི་ཐན་ནང་རྟེན་གཞིས་བྱས་པའི་ཐ་ལི་བྷན་འཇིགས་སྐུལ་ཚོགས་པའི་ཚོགས་མི་དགུ་ཡིས་ལུས་སྟེང་དུ་འབར་རྫས་དང་ལག་ཏུ་མཚོན་ཆ་བཟུང་སྟེ་པ་ཀི་སི་ཐན་པེ་ཞཱ་ཝ་ (Peshawar) མངའ་སྡེའི་ནང་གི་སློབ་ཕྲུག་ ༡༡༠༠ ལྷག་ཡོད་པའི་དམག་མིའི་སློབ་གྲྭ་ཞིག་ལ་འཇབ་རྒོལ་བྱས་ཏེ། སློབ་ཕྲུག་ ༡༣༢ དང་ལས་བྱེད་ ༡༠། དམག་མི་ ༣ བཅས་ཁྱོན་མི་ ༡༤༥ དམར་གསོད་དང་། སློབ་ཕྲུག་ ༡༠༠ ལྷག་ལ་རྨས་སྐྱོན་འཚབ་ཆེན་བཟོས་ཡོད་འདུག་ལ། སྐབས་དེར་པ་ཀི་སི་ཐན་གྱི་བདེ་འཇགས་དམག་མི་དང་ཉེན་རྟོག་པས་ཆུ་ཚོད་བརྒྱད་རིང་འཇིགས་སྐུལ་བ་ཚོར་རྒོལ་ལན་བསླགས་མཐར་ཚང་མ་བསད་ཡོད་འདུག

དོན་རྐྱེན་བྱུང་རྗེས་ཀྱི་དགོང་མོ་དེར། པ་ཀི་སི་ཐན་གྱི་སྲིད་བློན་ནཱ་ཝ་ཤཱ་རེ་ཧྥི་ (Nawaz Sharif) ལགས་ས་གནས་ས་ཐོག་ཏུ་འབྱོར་ཏེ་འཇིགས་སྐུལ་པའི་བྱ་སྤྱོད་ལ་སྐྱོན་བརྗོད་དང་མི་མང་ལ་སེམས་གསོ་བྱས་ཏེ་སློབ་ཕྲུག་ཚོའི་ཆེད་དུ་པ་ཀི་སི་ཐན་རྒྱལ་ཡོངས་ཀྱིས་ཉིན་གསུམ་རིང་མྱ་ངན་བྱེད་དགོས་པའི་བཀའ་བཏང་ཡོད་པ་དང་། སྲིད་གཞུང་གི་ངོས་ནས་མུ་མཐུད་དུ་རྒྱལ་ཁབ་ནང་འཇིགས་སྐུལ་པ་རྩ་མེད་བཟོ་ཐབས་ལ་འབད་བརྩོན་བྱེད་རྒྱུ་ཡིན་པ། པ་ཀི་སི་ཐན་གཞུང་གིས་ངེས་པར་དུ་ཨབ་གྷན་གཞུང་ལ་འབྲེལ་བ་བྱས་ཏེ་དམར་གསོད་བྱས་པའི་བྱིས་པ་རེ་རེའི་ཁྲག་ཐིགས་ལ་དགྲ་ཤ་ལེན་ཐུབ་བྱ་རྒྱུ་ཡིན་ཚུལ་སོགས་བརྗོད་འདུག  

པ་ཀི་སི་ཐན་གྱི་དམག་སྤྱི་ཆེན་མོ་ར་ཧེལ་ (Raheel Sharif) གྱིས་བསྒྲགས་གཏམ་སྤེལ་ཏེ། འཇིགས་སྐུལ་པ་ཚོས་རྒྱལ་ཁབ་ཀྱི་བླ་སྲོག་ལ་འཇབ་རྒོལ་བྱས་ཡོད་སྟབས། ང་ཚོས་སྡུག་སེམས་ཅན་གྱི་འཇིགས་སྐུལ་པ་ཚོ་དང་མཐུན་སྦྱོར་ངན་འབྲེལ་བྱེད་མཁན་ཚོ་རྩ་མེད་གཏོང་བར་དྲག་ཤུགས་བེད་སྤྱོད་ཀྱིས་རྗེས་འདེད་བྱ་ངེས་ཡིན་ཞེས་བརྗོད་འདུག

སྲིད་འཛིན་ཨོ་བྷ་མས་ཨ་རིའི་ཕོ་བྲང་དཀར་པོའི་ནང་བསྒྲགས་གཏམ་སྤེལ་ཏེ། འཇིགས་སྐུལ་པས་དམར་གསོད་བྱས་པའི་སློབ་ཕྲུག་ཚོའི་ཕ་མ་སྤུན་མཆེད་ཚོར་གདུང་ཤུགས་དྲག་པོས་སེམས་གསོ་བྱེད་ཀྱིན་ཡོད་ལ། ཨ་རིའི་གཞུང་གིས་པ་ཀི་སི་ཐན་གྱིས་འཇིགས་སྐུལ་པ་ཚོར་ཁ་གཏད་གཅོག་པར་སྔར་ལྷག་རྒྱབ་སྐྱོར་བྱས་ཏེ། མངའ་ཁུལ་དེར་ཞི་བདེ་དང་བརྟན་བརླིང་ཡོང་ཐུབ་བྱ་རྒྱུ་ཡིན་ཞེས་བརྗོད་འདུག

གཞན། རྒྱ་གར་གྱི་སྲིད་བློན་མུ་དྷི་ཡིས་ཀྱང་འཇིགས་སྐུལ་པའི་དོན་རྐྱེན་དེས་ཁོ་རང་ཧང་སངས་བཅུག་ཡོད་སྟབས། ཨབ་གྷན་གྱི་ཐ་ལི་བྷན་ཚོགས་པ་ནས་ཁ་ཁ་ཆགས་པའི་པ་ཀི་སི་ཐན་གྱི་ཐ་ལི་བྷན་འཇིགས་སྐུལ་བ་ཚོར་ཁ་གཏད་གཅོག་པ་དང་། ཐེངས་འདིར་འཇིགས་སྐུལ་པས་ཁ་ཆེ་ཆོས་ལུགས་ཀྱི་རྩ་བའི་ལྟ་གྲུབ་ལ་ལོག་འགྲེལ་བྱས་ཏེ་སློབ་ཕྲུག་ཚོ་དམར་གསོད་བྱས་པ་ནི་ཀླ་ཀློའི་བྱེད་སྟངས་ཤིག་ཡིན་པར་སྐྱོན་བརྗོད་བྱས་ཡོད་འདུག

ད་ལོའི་ནོ་བྷེལ་ཞི་བདེ་གཟེངས་རྟགས་ཐོབ་མཁན་པ་ཀི་སི་ཐན་གྱི་བུད་མེད་ཀྱི་ཤེས་ཡོན་ཐོབ་ཐང་རྩོད་ལེན་པ་མཱ་ལཱ་ལཱ་ (Malala Yousafzai)མཆོག་གིས་དབྱིན་ཡུལ་རྒྱལ་ས་ནས་དོན་རྐྱེན་འདིའི་ཐད་བསྒྲགས་གཏམ་སྤེལ་བའི་ནང་། གདུག་རྩུབ་དང་སྙིང་རྗེ་མེད་པའི་འཇིགས་སྐུལ་པ་ཚོས་སློབ་ཕྲུག་དམར་གསོད་བྱས་པའི་བྱ་སྤྱོད་ཀྱིས་ང་རང་ཧ་ཅང་སེམས་པ་སྐྱོ་རུ་བཅུག་སོང་ལ། འཛམ་གླིང་མི་མང་ཡོངས་ཀྱིས་འཇིགས་སྐུལ་དོན་རྐྱེན་ཁྲོད་ཤི་བའི་སློབ་ཕྲུག་ཚོར་མྱ་ངན་བྱེད་ཀྱིན་ཡོད་པ་དང་། ང་ཚོ་ནམ་ཡང་འཇིགས་སྐུལ་པའི་བྱ་སྤྱོད་ཀྱིས་ཕམ་མི་སྲིད་ཅེས་བརྗོད་ཡོད་པ་དང་། རྒྱ་གར་གྱི་བྱིས་པའི་ཐོབ་ཐང་ལས་འགུལ་བ་སྐུ་ཞབས་སཱ་ཊི་ཡཱར་ཐི་ (Kailash Satyarthi)མཆོག་གིས་ཀྱང་། གལ་སྲིད་འཇིགས་སྐུལ་པ་ཚོས་ངས་བཤད་པ་གོ་ཡི་ཡོད་ན། ང་རང་འཛིན་བཟུང་བྱས་ཏེ་གཏའ་མ་ཉར་བ་དང་ཐ་ན་ང་རང་གསོད་ཆོག གང་ཡིན་ཟེར་ན། ཁོ་ཚོ་ངའི་བྱིས་པ་ཡིན། ཐེངས་འདིར་འཇིགས་སྐུལ་པས་བྱིས་པ་དམར་གསོད་བྱས་པ་དེ་ནི་འགྲོ་བ་མིའི་ཆེས་མུན་ནག་གི་ཉིན་མོ་ཡིན་པར་བརྟེན། སྲིད་གཞུང་གིས་ངེས་པར་དུ་བྱིས་པ་ཚོ་འཚེ་བའི་ནང་ནས་སྲུང་སྐྱོབ་བྱེད་དགོས་ཞེས་བརྗོད་ཡོད་འདུག

འདིའི་ཐད་པ་ཀི་སི་ཐན་གྱི་ཐ་ལི་བྷན་འཇིགས་སྐུལ་ཚོགས་པའི་མགྲིན་ཚབ་པ་ཀོ་ར་སཱ་ནེ་ (Muhammad Khurasani)ཡིས་དམག་མིའི་སློབ་གྲྭ་དེའི་ནང་སློབ་ཕྲུག་ཚོར་དམག་མིར་ཞབས་འདེགས་ཞུ་དགོས་པའི་སློབ་སྦྱོང་སྤྲོད་ཀྱིན་ཡོད་སྟབས། འཇིགས་སྐུལ་ཚོགས་པས་འཇབ་རྒོལ་བྱས་པ་ཞིག་ཡིན་པ་དང་། ལྷག་པར་དུ་ཁ་ཆེ་ཆོས་ལུགས་ཀྱི་ལྟ་གྲུབ་ལ་དགག་པ་རྒྱག་མཁན་དགྲ་བོ་ཚོས་རང་ཉིད་ཀྱི་བུ་ཕྲུག་གསོད་པ་མཐོང་བཅུག་ནས་སེམས་པ་སྐྱོ་གདུང་བཟོས་དགོས་པ་དེ་ང་ཚོས་ཐག་གཅོད་བྱས་པ་ཞིག་ཡིན་ཞེས་བརྗོད་འདུག

ཐེངས་འདིའི་དོན་རྐྱེན་ཐད་ཨ་རི་དང་རྒྱ་གར། མཉམ་འབྲེལ་རྒྱལ་ཚོགས་དང་ཨ་ཧྥེ་རི་ཀའི་མཐུན་ཚོགས། ཡུ་རོབ་མཐུན་ཚོགས། འཛམ་གླིང་རྒྱལ་ཁབ་སོ་སོའི་སྲིད་འཛིན་དང་སྲིད་བློན་ཚོས་འཇིགས་སྐུལ་པའི་བྱ་སྤྱོད་ནི་ཆེས་ཀླ་ཀློ་དང་ཆེས་གདུག་རྩུབ་ཆེ་བའི་བྱ་སྤྱོད་ཅིག་ཡིན་པའི་སྐྱོན་བརྗོད་ཤུགས་ཆེན་བྱས་འདུག

ཉེ་ལམ་པ་ཀི་སི་ཐན་གྱི་དམག་སྤྱི་ཆེན་པོ་ཨ་རིའི་ནང་སྐོར་སྐྱོད་བྱས་ཏེ། ཨ་རིས་པ་ཀི་སི་ཐན་གྱི་དམག་དཔུང་ལ་མཚོན་ཆ་དང་དམག་ཐབས། རོགས་དངུལ་བཅས་ལ་རྒྱབ་སྐྱོར་བྱས་པའི་འོག པ་ཀི་སི་ཐན་གྱི་དམག་དཔུང་གིས་ཨབ་གྷན་དང་པ་ཀི་སི་ཐན་གྱི་ས་མཚམས་སུ་རྟེན་སྡོད་བྱེད་པའི་ཐ་ལི་བྷན་འཇིགས་སྐུལ་ཚོགས་པ་རྩ་མེད་བཟོ་སྟངས་སྐོར་ལ་གྲོས་མོལ་བྱས་ཡོད་པ་དང་། ལྷག་པར་དུ་ཨ་རིའི་མཁའ་དམག་གིས་པ་ཀི་སི་ཐན་གྱི་བྱང་ཝ་ཛེ་རེ་སི་ཐན་ (North Waziristan) ས་ཁུལ་ནང་ཡོད་པའི་འཇིགས་སྐུལ་པ་ཚོར་མཁའ་ཐོག་ནས་འཇབ་རྒོལ་བྱས་ཏེ་འཇིགས་སྐུལ་པ་མང་པོ་བསད་ཡོད་འདུག

དམག་དོན་དབྱེ་ཞིབ་པ་ཚོས། ཟླ་འགའི་གོང་པ་ཀི་སི་ཐན་གཞུང་གིས་ཐ་ལི་བྷན་འཇིགས་སྐུལ་ཚོགས་པ་མཉམ་དུ་ཞི་བའི་གྲོས་མོལ་ཐེངས་འགའ་བྱས་ཀྱང་གྲུབ་འབྲས་ཐོན་མེད་སྟབས། པ་ཀི་སི་ཐན་དམག་དཔུང་གིས་ཐ་ལི་བྷན་ཚོགས་པར་འཇབ་རྒོལ་ཡང་ཡང་བྱས་ཏེ་འཇིགས་སྐུལ་པ་ཚོ་བསད་བཟུང་བྱས་པར། འཇིགས་སྐུལ་པས་དགྲ་ཤ་ལེན་ཆེད་དམག་མིའི་སློབ་གྲྭར་འཇབ་རྒོལ་བྱས་པ་ཡིན་ཚུལ་རྗོད་བཞིན་ཡོད་འདུག