གཟའ་སྤེན་པའི་ཉིན་སུད་སིའི་ནང་རྟེན་གཞི་བྱས་པའི་བོད་ཀྱི་མི་རབས་གསར་པའི་མཐུན་ཚོགས་ཀྱི་གོ་སྒྲིག་འོག སུད་སིའི་གྲོང་ཁྱེར་ཛུ་རིག་མེ་འཁོར་འབབ་ཚིགས་ཀྱི་ཉེ་འཁོར་ནས་རྒྱ་ནག་གཞུང་ཚབ་མདུན་བར་རྔམ་སྟོན་ཁྲོམ་སྐོར་ལས་འགུལ་ཞིག་སྤེལ་ཡོད་ཅིང་། ལས་འགུལ་དེའི་ནང་སུད་སིའི་མི་མང་གི་ཚོགས་གཞོན་བསམ་པ་དོན་གྲུབ་གཙོས་ཚོགས་སྡེ་ཁག་གི་སྐུ་ཞབ་དང་། མི་མང་ ༢༠༠ མ་ཟིན་ཙམ་མཉམ་ཞུགས་གནང་ཡོད་འདུག
ལས་འགུལ་འདིའི་དམིགས་ཡུལ་གཙོ་བོ་ཉེ་ལམ་ཉེ་ལམ་བོད་ཨ་མདོ་རྔ་པའི་བུད་མེད་ཚེ་པེ་དང་རྟའུ་ཉ་མཚོ་དགོན་པའི་གྲྭ་སྐལ་བཟང་ཡེ་ཤེས་རྣམ་གཉིས་གཙོས་པའི་བོད་མི་ ༡༣༥ ལྷག་གིས་བོད་དོན་ཆེད་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་བའི་རྒྱལ་གཅེས་དཔའ་བོ་དཔ་མོ་རྣམས་ལ་གདུང་སེམས་མཉམ་སྐྱེད་དང་། ཁོང་ཅག་གི་ཞལ་ཆེམས་འཛམ་གླིང་མི་མང་ལ་བརྒྱུད་སྒྲོག་བྱེད་ཆེད་བཅས་ཡིན་འདུག
ལས་འགུལ་དེ་དང་བསྟུན་ཏེ་བོད་དོན་དང་འབྲེལ་བའི་ཡིག་ཆ་སྣ་ཚོགས་འགྲེམ་སྤེལ་དང་། རྒྱ་ནག་གཞུང་ཚབ་མདུན་དུ་སུད་སིའི་མི་མང་ཚོགས་གཞོན་བསམ་པ་དོན་གྲུབ་ལགས་ཀྱིས་གཏམ་བཤད་སྤེལ་རྗེས། མི་རབས་གསར་པའི་མཐུན་ཚོགས་ཀྱི་ཚོགས་གཙོ་དཔའ་བོ་ལགས་ཀྱིས་ལས་འགུལ་ངོ་སྤྲོད་གཏམ་བཤད་གནང་དོན། ལས་འགུལ་འདི་སྔ་ས་ནས་སྤེལ་འཆར་ཡོད་ཀྱང་སྤྱི་ལོའི་ལོ་སར་དང་ཡེ་ཤུ་འཁྲུངས་སྐར་སོགས་དང་སྟབས་ཁེལ་སྟབས། ད་ལྟའི་བར་ཆོག་མཆན་རག་ཐབས་མ་བྱུང་ཚུལ་དང་། དེ་རིང་གི་ལས་འགུལ་འདི་ནི་ཉེ་བའི་ཆར་སྐུ་ལུས་མེར་བསྲེགས་གནང་རྣམ་པ་གཉིས་ཀྱིས་གཙོས་རྒྱལ་གཅེས་དཔའ་བོ་རྣམས་དང་། བོད་དོན་ཆེད་དཀའ་བ་བརྒྱ་ཕྲག་སྤྱོད་བཞིན་པའི་གཞིས་ལུས་བོད་མི་ཡོངས་ལ་གདུང་སེམས་མཉམ་བསྐྱེད་ཆེད་དང་། འཛམ་གླིང་མི་མང་ལ་བོད་ཀྱི་ཛ་དྲག་གི་གནས་བབ་ངོ་སྤྲོད་དང་། གཞིས་ལུས་རྒྱ་ཆེའི་མི་མང་གི་རེ་བའི་འབོད་སྒྲ་ང་ཚོས་ཅིས་ཀྱང་བསྒྲུབ་དགོས་པའི་འགན་འཁྲི་ཞིག་གི་ཐོག་ནས་སྤེལ་བ་ཡིན་། ཞེས་སོགས་བརྗོད་ཡོད་འདུག
ཚོགས་གཞོན་མཁར་འཕགས་ལགས་ཀྱིས་ལས་འགུལ་མཇུག་སྡོམ་གཏམ་བཤད་ནང་བརྗོད་དོན། ང་ཚོ་བོད་པ་སུ་ཡིན་ཡང་སོ་སོ་བོད་མི་རིགས་ཤིག་གི་གྲས་སུ་སྐྱེས་པར་སྤོབས་པ་དང་གཟི་བརྗིད་ཡིན་བསམ་པ་ཞིག་དང་། བོད་མིའི་བདེ་སྡུག་དེ་ང་ཚོ་དང་འབྲེལ་ཡོད་པའི་གནད་དོན་ཞིག་ལ་བསམ་བློ་གཏོང་རྒྱུ་གལ་ཆེན་ཡིན་པ་དང་། དེ་རིང་ང་ཚོས་གཞིས་ལུས་མི་མང་གི་སྐུ་ཚབ་བྱས་ནས་དེ་རིང་རྒྱ་ནག་དམར་གཞུང་སྐུ་ཚབ་ཀྱི་སྒོ་རྡུང་གིན་ཡོད་པ་རེད། རྒྱ་གཞུང་གིས་བོད་ལ་རང་དབང་ཚད་ལྡན་ཞིག་མ་སྤྲད་བར་ཏུ་ང་ཚོས་རྒྱ་གཞུང་གི་སྒོ་རྡུང་མཚམས་མི་འཇོག་པའི་སྤོབས་པ་དང་དམ་བཅའ་དགོས་པ་རེད། སྤོབས་པ་འདི་བོད་མི་སུ་འདྲ་ཞིག་ཡིན་ནའང་སེམས་ལ་ཉར་དགོས་རྒྱུ་གལ་ཆེན་ཡིན་ཚུལ་སོགས་བརྗོད་ཡོད་འདུག
གཞན་རྒྱ་ནག་གཞུང་ཚབ་མདུན་དུ་ལས་འགུལ་བའི་ཁྲོད་ནས་རྒྱ་གཞུང་ལ་བརྡ་ལན་ཤུགས་ཆེན་འདོན་མཁན་ཁ་ཤས་བྱུང་སོང་ལ། དེ་བཞིན་མི་མང་ཚོས་མིག་ཆུ་དང་ངུ་ངག་འདོན་བཞིན་སེམས་ཚོར་དྲག་པོས་སྐད་འབོད་ ཤུགས་ཆེན་གནང་སོང་།
གནས་ཚུལ་མཁོ་གཏོང་བ། ཙ་ཡུས་ཕུན་ཚོགས།
