མཚོ་སྔོན་ཞིང་ཆེན་ཡ་རྫི་རྫོང་ཁོངས་ཀྱི་འཕྲལ་སེལ་དགེ་རྒན་གཡང་མོ་སྐྱིད་ལགས་ཀྱི་སྒེར་བཙུགས་སློབ་གྲྭར་སྲིད་གཞུང་གི་ཆོག་མཆན་ཐོབ་མེད་སྟབས་ཟླ་འདིའི་ཕྱི་ཚེས་ ༡༤ ཉིན་ནས་བཟུང་སྒོ་རྒྱག་དགོས་པའི་བཀའ་རྒྱ་བསྒྲགས་འདུག
ཁ་སང་ཀྲུང་གོའི་བོད་ལྗོངས་དྲ་བ་ཞེས་པའི་ཐོག་གནས་ཚུལ་སྤེལ་བ་ལྟར་ན། མཚོ་སྔོན་ཞིང་ཆེན་ཡ་རྫི་རྫོང་ཁོངས་ཀྱི་འཕྲལ་སེལ་དགེ་རྒན་གཡང་མོ་སྐྱིད་ཞུ་བ་ཞིག་གིས་སྒེར་གྱི་ཚོང་ཁང་ཆུང་ཆུང་ཞིག་གི་མ་དངུལ་ལ་བརྟེན་ཏེ། ཡ་རྫི་རྫོང་ཁྱུང་ཉིན་སྡེ་བ་རུ་སྒེར་གཉེར་སློབ་གྲྭ་ཞིག་བཙུགས་ཡོད་པ་དེར། ཡ་རྫི་ས་ལར་རང་སྐྱོང་རྫོང་སློབ་གསོ་ཁང་ཞེས་པས་ཞིབ་བཤེར་མ་བརྒྱུད་པར་རང་དགར་སློབ་གྲྭ་གཉེར་བའི་ཉེས་འཛུགས་བྱས་ཏེ། ཟླ་འདིའི་ཕྱི་ཚེས་ ༡༤ ཉིན་ནས་བཟུང་སློབ་མཚམས་འཇོག་དགོས་པའི་བཀའ་རྒྱ་བསྒྲགས་ཡོད་འདུག སྒེར་གཉེར་སློབ་གྲྭ་དེ་བཙུགས་ནས་ལོ་ངོ་ ༢ ལྷག་འགྲོ་བཞིན་ཡོད་པ་དང་། ཁྱོན་སློབ་ཕྲུག་ ༢༤ ཡོད་འདུག
ཟླ་འདིའི་ཕྱི་ཚེས་ ༡༤ ཉིན་ཡ་རྫི་ས་ལར་རང་སྐྱོང་རྫོང་སློབ་གསོ་ཁང་ཟེར་བས་བཀའ་རྒྱ་ཞིག་བསྒྲགས་པའི་ནང་། ཁོ་མོའི་སློབ་གྲྭ་དེར་འབྲེལ་ཡོད་ལས་ཁུངས་ནས་ཆོག་མཆན་ཐོབ་མེད་པས་ཁྲིམས་འགལ་གྱིས་སློབ་གསོ་སྤེལ་བའི་ཁོངས་སུ་ཚུད་ཡོད་སྟབས། བརྡ་ཁྱབ་བསྒྲགས་པའི་ཉིན་མོ་ནས་བཟུང་སྟེ་སློབ་མཚམས་འཇོག་དགོས་པ་མ་ཟད། སློབ་མ་ཡོངས་ཀྱི་མིང་གཞུང་ལ་འབྲེལ་ཡོད་ལས་ཁུངས་ནས་ལེགས་སྒྲིག་བྱས་པ་བརྒྱུད་ས་གནས་ཀྱི་ཞི་ཁྲང་སློབ་ཆུང་དུ་གནས་སྤོར་གཏོང་རྒྱུ་ཡིན་པས། སློབ་མའི་ཁྱིམ་བདག་ཚོས་དཔྱིད་དུས་སློབ་མགོ་འཛུགས་སྐབས་བྱིས་པ་རྣམས་ས་གནས་ཀྱི་ཞི་ཁྲང་སློབ་ཆུང་ལ་དུས་ཐོག་ཏུ་སྐྱེལ་དགོས། གལ་སྲིད་མ་བསྐྱལ་བ་ཡིན་ན་གནད་དོན་དེའི་མཇུག་འབྲས་ཡོད་ཚད་ལ་རང་ཉིད་ཀྱིས་འགན་ཁུར་དགོས་སྐོར་བརྗོད་འདུག
གོང་གི་གནས་ཚུལ་དེའི་ཐད་དཔྱད་བརྗོད་པ་ཞིག་གིས། དངོས་འབྲེལ་བྱས་ན་གནས་ཚུལ་འདི་འདྲ་བ་ཡོད་པའི་ས་ཁུལ་མི་ཉུང་བ་ཞིག་ཡོད། བསྡོམས་རྩིས་ལྟར་ན། ཕྱི་ལོ་ ༢༠༠༠ ནས་ ༢༠༡༠ བར་གྱི་ལོ་བཅུའི་རིང་རྒྱལ་ཡོངས་ཀྱི་གྲོང་གསེབ་སློབ་ཆུང་ཕྱེད་ཀ་ཇེ་ཉུང་དུ་ཕྱིན་ཏེ། མ་གཞིའི་སློབ་མ་གྲངས་ཁྲི་ ༥༥ ནས་ཁྲི་ ༢༦ ཏུ་གྱུར་ཅིང་། ཆ་སྙོམས་ཉིན་རེར་གྲོང་གསེབ་སློབ་ཆུང ༥༦ རེ་མེད་པ་ཆགས་པ་དང་། སློབ་འབྲིང་མ་གཞིའི་སློབ་མ་ཁྲི་ ༦.༤ ནས་ཁྲི་ ༥.༥ བར་ཇེ་ཉུང་དུ་ཕྱིན་ཡོད་པ་རེད། གནས་ཚུལ་འདི་སློབ་མས་སློབ་མཚམས་འཇོག་པའི་རྒྱུ་རྐྱེན་གསར་པ་ཞིག་ཆགས་ཡོད་ལ། གྲོང་གསེབ་ཀྱི་སློབ་གྲྭ་ཁག་ཟླ་སྒྲིལ་བཏང་བའམ་སྒོ་བརྒྱབ་པ་དེས། རྒྱང་རིང་ལུང་ཀྱོག་གི་ཕྲུ་གུ་ཚོ་སློབ་གྲྭ་དང་ཐག་རིང་དྲགས་ནས་སློབ་གྲྭར་འགྲོ་སྟབས་མི་བདེ་བ་བཟོས་ཡོད་པ་མ་ཟད། བདེ་འཇགས་ཐད་ཀྱང་གནད་དོན་མང་པོ་བྱུང་བཞིན་ཡོད་སྐོར་བརྗོད་འདུག
ཕྱི་ལོ་ ༢༠༡༢ ཟླ ༩ པའི་ནང་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་༼གྲོང་གསེབ་འོས་འགན་སློབ་གསོའི་སློབ་གྲྭའི་བཀོད་སྟངས་ལེགས་སྒྲིག་གི་བསམ་འཆར་༽ཞེས་པ་སྤེལ་ཏེ། གྲོང་གསེབ་འོས་འགན་སློབ་གསོའི་སློབ་གྲྭ་རྨོངས་ཚོད་ཀྱིས་མེད་པའམ་ཟླ་སྒྲིལ་བཟོ་བ་གཏན་འགོག་དགོས་པ་མ་ཟད། གྲོང་གསེབ་སློབ་གྲྭའི་ཆ་རྐྱེན་ཇེ་ལེགས་དང་སློབ་གསོའི་སྤུས་ཚད་མཐོར་འདེགས་གཏོང་དགོས་ཚུལ་བསྒྲགས་ཡོད་པ་ལྟར། གཡང་མོ་སྐྱིད་ཀྱི་སྒེར་གཉེར་སློབ་གྲྭའི་དཀའ་ངལ་སེལ་ཐབས་དགོས་པའི་སྐོར་ལ་གོང་གི་དཔྱད་བརྗོད་པ་དེས། ལོ་གཉིས་ཀྱི་དུས་ཚོད་ཕྱིན་པའི་ནང་རིམ་པ་དང་ས་ཁུལ་སོ་སོས་ངེས་པར་དགོས་པའི་སློབ་གྲྭའམ་སློབ་སྒྲུབ་ས་ཚིགས་ག་ཚོད་བསྐྱར་གསོ་བྱས་ཡོད་དམ། དེ་འབྲེལ་གཞི་གྲངས་མི་རྙེད་པས་དངོས་ཡོད་གནས་ཚུལ་གང་འདྲ་ཡིན་མིན་རྟོགས་མི་ཐུབ་ནའང་། དཀའ་ཚེགས་ཆེན་པོས་སློབ་སྒྲུབ་ས་ཚིགས་སྐྱོང་མཁན་དགེ་རྒན་གཡང་མོ་སྐྱིད་ལྟ་བུའི་དཀའ་ངལ་སེལ་ཅི་ཐུབ་བྱ་དགོས། རིམ་པ་སོ་སོའི་སློབ་གསོའི་གཙོ་འགན་སྡེ་ཁག་ཚང་མས་གནད་དོན་ཐག་ལེགས་པོར་གཅོད་རྒྱུ་དང་ཕྲུ་གུ་ཚང་མའི་སློབ་གསོ་མྱོང་དབང་ལ་བརྩི་བཀུར་གྱི་རྣམ་འགྱུར་ཡོད་ཆོག་ཆོག་ཡིན་ལ། དངོས་ཐོག་བདེན་འཚོལ་གྱིས་ངེས་པར་དགོས་པའི་སློབ་གྲྭའམ་སློབ་སྒྲུབ་ས་ཚིགས་བསྐྱར་གསོ་དགོས་པ་གལ་ཤིན་ཏུ་ཆེའོ། ཞེས་བརྗོད་འདུག
གསར་འགོད་པ། པདྨ་མཚོ།
དེང་སང་ཆབ་སྲིད་ལ་ཞེ་མེར་བ་དང་སྐད་ཡིག་རིག་གཞུང་གཅེས་ཉར་བྱེད་མདོག་མདོག་ཚོས་མ་གོ་མ་ཐོས་ཚུལ་གྱིས་ཁུ་སུམ་མེར་འདུག་བཟོད་ལ།
རེད། རྒྱ་ནག་གི་དམིགས་ཡུལ་གཙོ་བོ་ནི་ཞིང་འབྲོག་མང་ཚོགས་ཀྱི་ཕྲུ་གུ་ཚོར་ངེས་པར་དུ་མགྱོགས་མྱུར་དགོས་གྲོང་ཁྱེར་དང་། རྒྱ་ནག་གྱི་གོམས་གཤིས་འབྱོར་ཐབས་བྱེད་རྒྱུ་དེ་རེད། སྟོང་ལོ་གསར་བ་ནས་བཟུང་བོད་ཁུལ་གང་ས་གང་དུ་སློབ་ཆུང་སློབ་མ་མང་བོ་མཉམ་བསྡུ་བྱས་ནས་རྫོང་སློབ་ཆུང་ལ་སྐྱེལ་བཞིན་ཡོད་པ་རེད། དེས་བྱིས་པ་ཚོ་ཕ་མ་དང་། ཞིང་འབྲོག་གྱི་འཚོ་བ་དང་ཁ་ཐག་རིང་དུ་བཏང་ནས། ངེས་པར་དུ་རྒྱ་རིགས་ཧེ་རིགས་ཚོ་དང་མཉམ་བསྲེས་བྱས་ནས་ཚང་མ་རྒྱ་ལ་སྒྱུར་བར་བྱེད་འདོད་པ་དེ་རེད།
་་་་་་་་་ གྲོང་གསེབ་ཀྱི་སློབ་གྲྭ་ཁག་ཟླ་སྒྲིལ་བཏང་བའམ་སྒོ་བརྒྱབ་པ་དེས། རྒྱང་རིང་ལུང་ཀྱོག་གི་ཕྲུ་གུ་ཚོ་སློབ་གྲྭ་དང་ཐག་རིང་དྲགས་ནས་སློབ་གྲྭར་འགྲོ་སྟབས་མི་བདེ་བ་བཟོས་ཡོད་པ་མ་ཟད། བདེ་འཇགས་ཐད་ཀྱང་གནད་དོན་མང་པོ་བྱུང་བཞིན་ཡོད་སྐོར་བརྗོད་འདུག ་་་་་་་་་