༧གོང་ས་ཏཱ་ལའི་བླ་མ་ནི་ངའི་ཡིད་སྨོན་བྱེད་ཡུལ་ཡིན།

ཉེ་ལམ་དབྱིན་ཡུལ་གྱི་ཁེ་ལས་ཤིག་གིས་དྲ་ཐོག་ནས་བསམ་ཤོག་བསྡུས་པ་བརྒྱུད་༧གོང་ས་མཆོག་འཛམ་གླིང་ཐོག་ཡིད་སྨོན་བྱེད་ཡུལ་ཆེ་ཤོས་ཀྱི་མི་སྣ་ཨང་བདུན་པའི་མཚན་སྙན་ཐོབ་ཡོད་འདུག

ཁ་སང་ཨུ་རུ་སུའི་མཱོ་སོ་ཁོ་དུས་བབ་ཐོག་གནས་ཚུལ་སྤེལ་བ་ལྟར་ན། འདས་ལོའི་ཟླ་ ༡༢ ནང་དབྱིན་ཡུལ་ནང་རྟེན་གཞི་བྱས་པའི་ཁྲོམ་རྭའི་གནས་སྟངས་རྟོག་ཞིབ་བྱེད་མཁན་གྱི་དྲ་ཐོག་ཁེ་ལས་ (YouGov) ཞེས་པས་རྒྱལ་སྤྱིའི་རྒྱལ་ཁབ་ ༢༣ གྱི་མང་ཚོགས་གཉིས་ཁྲི་ལྔ་སྟོང་ལ། འདི་ལོར་འཛམ་གླིང་ཐོག་ཁྱོད་ཀྱི་ཡིད་སྨོན་ཆེ་ཤོས་ཀྱི་མི་དེ་སུ་ཡིན་ཞེས་དྲ་ཐོག་བསམ་ཤོག་ཅིག་བསྡུས་ཡོད་པ་དང་། དེ་དག་ལས་འོས་གྲངས་མཐོ་ཤོས་ཐོབ་མཁན་གྱི་སྐྱེས་པ་ ༢༠ དང་བུད་མེད་ ༢༠ བདམས་ནས་ཟླ་སྔོན་མའི་ཚེས་ ༢༣ ཉིན་སླར་ཡང་འོས་བླུགས་ཏེ། ཟླ་སྔོན་མའི་ཚེས་ ༣༠ ཉིན་མཐའ་བསྡོམས་གྲུབ་འབྲས་ཕྱིར་བསྒྲགས་བྱས་པའི་ནང་། ཨང་རིམ་སྤྱི་བསྡོམས་ནང་བོད་མིའི་འདི་ཕྱིའི་སྐྱབས་གནས་༧གོང་ས་མཆོག་ལ་ཨང་བདུན་ཐོབ་ཡོད་པ་དང་། རྒྱལ་ཁབ་བྱེ་བྲག་པ་སོ་སོ་ལས་སུད་ཌན་དང་ཧྥ་རན་སིའི་ནང་ཨང་དང་པོ་དང་། ནོར་ཝེ་དང་འཇར་མན་ནང་ཨང་གཉིས་པ། ཌན་མག་ནང་ཨང་གསུམ་པ་བཅས་ཐོབ་ཡོད་འདུག

འདིའི་ཐད་དྲ་ཐོག་ཁེ་ལས་ཀྱི་དྲ་ཚིགས་ཐོག “ང་ཚོས་རྒྱ་དཀར་ནག་གཉིས་དང་། ཨིན་དྷུ་ཎི་ཤི་ཡ། པ་ཀི་སི་ཐན། ནེ་ཇི་རི་ཡ། ཨེ་ཇབ། ཐའེ་ལན་ཌི། སོ་ཌི་ཨ་རབ་བྷེ་ཡ། མ་ལེ་ཞི་ཡ། ཨ་རབ་ཨེ་མེ་ར་ཌི། ཧོང་ཀོང་། སིང་གྷ་པུར་བཅས་ནང་དྲ་ཐོག་བརྒྱུད་བསམ་ཤོག་བསྡུས་ཡོད། དེ་མིན་གྱི་རྒྱལ་ཁབ་གཞན་ནང་རྒྱལ་ཁབ་དེའི་ངོ་ཚབ་ཀྱིས་བསམ་ཤོག་བསྡུས་པ་ལྟར་ཐག་གཅོད་བྱས་པ་ཡིན། རྒྱལ་ཁབ་ཁ་ཤས་ནང་རྒྱལ་ཁབ་གཞན་ལས་ལྷག་པ་མང་ཚོགས་ཀྱིས་མཉམ་ཤུགས་བྱས་ཡོད་སྟབས། ང་ཚོས་མཐའ་བསྡོམས་ཐག་གཅོད་བྱེད་སྐབས་རྒྱལ་ཁབ་བྱེ་བྲག་པའི་ནང་མི་སྣ་དེར་འོས་གྲངས་ག་ཚོད་ཐོབ་ཡོད་མེད་ལ་གཞིགས་ནས་ཐག་གཅོད་བྱས་པ་ཡིན”ཞེས་བཀོད་འདུག

འདི་ལོར་མང་ཚོགས་ཚོས་འཛམ་གླིང་ཐོག་ཡིད་སྨོན་ཆེ་ཤོས་བྱེད་ཡུལ་གྱི་སྐྱེས་པའི་མཚན་སྙན་དེ་མེ་ཁཱོར་སོབ་ཌི་ (Microsoft founder) ཁེ་ལས་གསར་འཛུགས་གནང་མཁན་བྷེལ་གྷེ་ཌི་(Bill Gates) ལ་ཐོབ་པ་ཡོད་པ་དང་། གཉིས་པ། ཨོ་བྷ་མ་དང་། གསུམ་པ། ཞི་ཅིན་ཕིན། བཞི་པ། རྒྱ་མིའི་གློག་བརྙན་འཁྲབ་སྟོན་པ་ཇར་ཀི་ཅཱན། ལྔ་པ། ནཱ་རེན་ཌ་མུ་དྷེ། དྲུག་པ། ཡེ་ཤུའི་བླ་ཆེན་པོབ་ཧྥན་སི་སི། བདུན་པ། ༧གོང་ས་མཆོག བརྒྱད་པ། རྒྱ་རིགས་ཁེ་ལས་པ་ཇཱག་མཱ་(Jack Ma)། དགུ་པ། དངོས་ཁམས་ཚན་རིག་པ་སི་ཌི་ཧྥིན་ཧཱོ་ཀིང་ (Stephen Hawking)དང་རྐང་རྩེད་སྤོ་ལོ་བ་ཌཱ་ཝུ་ཌི་བྷེག་གྷམ་ (David Beckham)བཅས་ཡིན་འདུག

བུད་མེད་ཁྲོད་ཀྱི་མཚན་སྙན་དང་པོ་ཐོབ་མཁན་ནི་ཨ་རིའི་གློག་བརྙན་འཁྲབ་སྟོན་པ་དང་མཉམ་འབྲེལ་རྒྱལ་ཚོགས་སྐྱབས་བཅོལ་ལྷན་ཚོགས་ཀྱི་དམིགས་བསལ་སྐུ་ཚབ་ཨན་ཇི་ལི་ཎཱ་ཇོ་ལེ་ (Angelina Jolie) དང་། གཉིས་པ། པ་ཀི་སི་ཐན་གྱི་འདས་ལོའི་ནོ་བྷེལ་ཞི་བདེའི་གཟེངས་རྟགས་ཐོབ་མཁན་མཱ་ལཱ་ལཱ་(Malala Yousafzai)། གསུམ་པ། ཨ་རིའི་ཕྱི་སྲིད་དྲུང་ཆེ་ཟུར་པ་ཧི་ལཱ་རི་ཁེ་ལིན་ཌོན་ (Hillary Clinton)། བཞི་པ། དབྱིན་ཡུལ་རྒྱལ་མོ་ཨི་ལཱ་ཛི་བྷ་ཋ་གཉིས་པ་ (Elizabeth II)། ལྔ་པ། མེ་ཤལ་ཨོ་བྷ་མ། དྲུག་པ། གཞས་མ་གྲགས་ཅན་སི་ལི་ཎེ་(Celine Dion)། བདུན་པ། མདོ་འཛིན་མ་ཨོབ་ར་ (Oprah Winfrey)། བརྒྱད་པ། གློག་བརྙན་འཁྲབ་སྟོན་ཇོ་ལི་ཡ་རོ་བྷར་ཌི་(Julia Roberts)། དགུ་པ། འབར་མའི་དམངས་གཙོ་དོན་གཉེར་བ་དང་ནོ་བྷེལ་ཞི་བདེའི་གཟེངས་རྟགས་བཞེས་མཁན་ལྕམ་ཨང་སང་སུ་ཀི (Aung San Suu Kyi)། བཅུ་པ། འཇར་མན་གྱི་སྲིད་བློན་ལྕམ་ཨང་གྷེ་ལཱ་མེར་གྷལ་ (Angela Merkel) བཅས་ཡིན་འདུག

ཁ་སང་ཁེ་ལས་དྲ་ཚིགས་དེའི་ཐོག “ཨ་རིའི་སྲིད་འཛིན་ཨོ་བྷ་མ་རྒྱལ་སྤྱིའི་རྒྱལ་ཁབ་མང་ཆེ་བའི་ཁྲོད་ནས་བསམ་ཤོག་མང་ཤོས་ཐོབ་མཁན་ཨང་བཅུ་པའི་ཁོངས་སུ་ཐོན་ཡོད་ཀྱང་། རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་ནག་རྒྱལ་ནང་མ་གཏོགས་རྒྱལ་ཁབ་གཞན་གྱི་བསམ་ཤོག་ནང་གྲངས་འབོར་མང་པོ་ཐོན་མི་འདུག ལྷག་པར་དུ་ད་རེབ་འོས་ཤོག་འདི་བརྒྱུད་ད་ལྟ་རྒྱལ་སྤྱིའི་མང་ཚོགས་མང་ཆེ་བས་མི་གཞན་ལ་ཕན་ཐོགས་སྐྲུན་མཁན་གྱི་གཏོང་ཕོད་ཅན་དང་སེམས་བཟང་ཅན་ཚོར་གུས་བཀུར་བྱེད་པ་ལས་ཆབ་སྲིད་ཀྱི་མགོ་ཁྲིད་ཚོར་དེ་ཙམ་ཡིད་སྨོན་བྱེད་ཀྱི་མེད་པ་གསལ་སྟོན་བྱས་འདུག”ཅེས་སོགས་བཀོད་འདུག

གསར་འགོད་པ། དོན་གྲུབ།