བོད་པ་ནས་ནང་པར་གྱུར་བ།

བོད་མི་ཚོར་རྒྱུ་མཚན་ལོས་ཡོད། ལར་ནས་རྒྱ་ནག་གཞུང་དང་བོད་མིའི་བར་དུ་བསམ་བློའི་ལྟ་གྲུབ་ཀྱི་དམག་འཁྲུག་ཅིག་རྒྱག་གིན་ཡོད་ལ། གཅིག་གིས་གཅིག་ལ་མགོ་སྒུར་དང་མ་སྒུར་གྱི་བདེན་དཔང་ནི་རྩིགས་ངོས་ན་༧གོང་ས་མཆོག་གི་སྐུ་པར་ཡོད་མེད་དེ་ཡིན། ཁག་ཅིག་གིས་དམག་འཁྲུག་འདི་ནི་ཚར་གཅོད་རང་བཞིན་ཡིན་པར་བརྗོད་ལ། ཡང་། དམག་འཁྲུག་འདིའི་རྒྱབ་ནས་མི་རིགས་རིང་ལུགས་ཀྱི་དམག་འཁྲུག་གཞན་ཞིག་མཐོང་མཁན་ཡང་ཡོད། འོན་ཀྱང་། སྐབས་བབ་ཀྱི་གླེང་གཞི་ནི་ང་ཚོ་བོད་པ་ནས་ནང་པར་གྱུར་ཚུལ་དེ་ཡིན།
བོད་ནང་གི་ཡར་ལངས་ནི་ནམ་རྒྱུན་གྲྭ་བཙུན་དག་གིས་སྣེ་ཁྲིད་ནས་ཡོང་གི་ཡོད། རྣམ་པ་འདིས་ཐོག་མར་སྟོན་པ་ནི་བོད་ནང་དུ་ཆོས་དད་རང་དབང་མེད་པ་དང་། ཡང་ན། བོད་ཀྱི་གནད་དོན་ནི་ཐད་ཀར་ནང་བསྟན་ཆོས་ལུགས་དང་དེ་ཉམས་ལེན་བྱེད་མཁན་ལ་ལྷག་པར་དུ་འབྲེལ་བསྡད་པ་དེ་ཡིན།
འདས་པའི་ལོ་ ༣༠ རིང་བོད་ནས་རྒྱ་གར་དུ་བྲོས་བྱོལ་ལ་ཡོང་མཁན་ཚོར་དམིགས་ཡུལ་གཉིས་ཡོད་པའི་གཅིག་ནི་༧གོང་ས་མཆོག་ལ་མཇལ་ཁ་ཞུ་རྒྱུ་དང་། གཉིས་པ་ནི་ནང་ཆོས་གཙོ་བོར་གྱུར་པའི་བོད་ཀྱི་ཆོས་རིག་ལ་སློབ་གཉེར་བྱེད་རྒྱུ་དེ་ཡིན། འདི་ནི་བོད་མི་བྲོས་བྱོལ་བ་ཚོ་ཧི་མ་ལ་ཡ་བརྒལ་རྗེས་༸རྒྱལ་བ་རིིན་པོ་ཆེས་བཙན་བྱོལ་བོད་མིའི་སྤྱི་ཚོགས་ལ་ཡར་ཞུ་དང་། རྒྱལ་སྤྱིའི་སྟེང་གསལ་བཤད་བྱེད་ཀྱིན་པའི་དཀའ་ངལ་ཆེ་ཤོས་ཡིན། དགུ་བཅུ་གོ་གྲངས་ཀྱི་རྗེས་ནས་བཙན་བྱོལ་ལ་ཕེབས་པའི་མི་སྣ་གལ་ཆེ་ཤོས་གཉིས་ནི་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་དང་། སྐུ་འབུམ་བྱམས་པ་གླིང་གི་དགོན་བདག་ཨ་ཀྱཱ་རིན་པོ་ཆེ་རྣམ་གཉིས་ཡིན་ལ། ཁོང་རྣམ་གཉིས་བཙན་བྱོལ་དུ་ཕེབས་དོན་ཡང་ཆོས་ཕྱོགས་ཀྱི་བསླབ་པ་སློབ་གཉེར་དང་། ཡང་ན། ནང་ཆོས་ཀྱི་ཉམས་ལེན་ལ་འབྲེལ་ཡོད། དེ་བཞིན་བོད་ཀྱི་ཆོས་བརྒྱུད་ཆེན་མོ་དག་གི་དབུ་ཁྲིད་བླ་ཆེན་ཚང་མ་བཙན་བྱོལ་དུ་བཞུགས་ཡོད། འོན་ཀྱང་། བོད་ནས་ད་བར་ཆབ་སྲིད་ཀྱི་གོ་གནས་ཡོད་མཁན་བོད་རིགས་མགོ་ཁྲིད་དང་། ཤེས་ཡོན་གྱི་གནས་ཚད་མཐོན་པོ་ཡོད་པའི་མཁས་པ་བཙན་བྱོལ་དུ་ཡོང་མཁན་ཕལ་ཆེར་མེད། འདི་ནི་ལྐོག་གྱུར་གྱི་དྲི་བ་མིན་པར་མིག་ཐོག་ལ་ཤར་བའི་གསལ་བཤད་རིགས་ཤིག་ཏུ་འགྱུར་གྱིན་ཡོད། གཞི་རིམ་མང་ཚོགས་ཀྱི་རིམ་པ་ནས་བལྟས་ནའང་། སྟོང་ལོ་གསར་པ་འདི་ཤར་རྗེས་སུ་སྣང་ཚུལ་གསར་པ་རེ་ཟུང་བྱུང་བ་ནི། ༢༠༠༦ ལོར་བོད་མི་ཁྲི་ལྷག་བོད་ནས་རྒྱ་གར་ལྷོ་ཕྱོགས་སུ་༧གོང་ས་མཆོག་གི་དུས་དབང་ཞུ་བར་ཡོང་། སྐབས་དེའི་༧གོང་ས་མཆོག་གི་བཀའ་སློབ་ལ་བརྟེན་ནས་བོད་ས་ཁྱོན་ཡོངས་སུ་པགས་རིགས་མེར་བསྲེག་གི་ལས་འགུལ་དེ་འཕྱུར། ཟླ་ཤས་རྗེས་ནས་༧གོང་ས་མཆོག་སྐུ་འབུམ་དུ་ཆིབས་བསྒྱུར་གནང་གི་ཡོད་ཚུལ་ཐོས་ཏེ་བོད་མོ་འབུམ་གཅིག་ལྷག་ས་དེར་འཛོམས། བོད་མི་རིགས་ཀྱིས་༧གོང་ས་མཆོག་གི་ཞབས་རྗེས་སྙེག་བཞིན་དང་གསུང་ལ་ཉན་བཞིན་དུ་ཡོང་གིན་ཡོད་ལ། ཁོང་མ་ཕེབས་སར་ཡང་རྟོག་བཟོ་ལྟ་བུ་བྱས་ནས་འཛམས་ཀྱིན་ཡོདཉ བོད་མིའི་སྲོལ་རྒྱུན་དང་མཛེས་དཔྱོད་ཀྱི་ལྟ་བ་གང་ལ་འགལ་ཡང་། ༧གོང་ས་མཆོག་གིས་གང་གསུངས་པ་ནི་རྩ་བའི་བླ་མའི་བཀའ་ཡིན་པར་བརྩི་གིན་ཡོད། བཀའ་འདིའི་ཡན་གྱི་རིན་ཐང་ནི་གང་དུའང་མེད།
གནས་སྟངས་འདི་དག་ནི་སྤྱིར་བཏང་གི་བོད་མི་སྐྱབས་བཅོལ་བ་དང་། དམིགས་བསལ་གྱི་སྐྱབས་བཅོལ་བ། བཙན་བྱོལ་དུ་ཡོང་མ་ཐུབ་པའི་གཞིས་ལུས་བོད་མི་དང་ཆོས་ཞུ་བ་བཅས་ཀྱི་ཐུན་མོང་གི་དཀའ་ངལ་ཡིན་ལ། འདིས་བོད་དོན་ནི་བོད་མི་རིགས་དང་༧གོང་ས་མཆོག་གི་བར་གྱི་དད་པ་དམ་ཚིག་གི་གནད་དོན་ཞིག་ཏུ་བསྒྱུར་ཡོད་ལ། ད་བར་གྱི་ཡར་ལངས་དག་ཀྱང་དད་པ་དམ་ཚིག་ཅིག་གིས་བསླངས་པར་བསྟན་ཡོད།
བཙན་བྱོལ་སྤྱི་ཚོགས་ཀྱིས་གནས་སྟངས་འདི་ཇེ་གསལ་དུ་བཏང་། བཀའ་ཁྲི་ཟགདོང་རིན་པོ་ཆེ་མཆོག་གིས་ལོ་སྔོན་མར་བོད་ཀྱི་ནང་ཆོས་འདི་སྲུང་སྐྱོབ་ཐུབ་པ་ཡིན་ན་བོད་མི་རིགས་ཉམས་སོང་ནའང་འགྲིག་གི་ཡོད་ཚུལ་གསུངས་ཤིང་། རྒྱ་ནག་ལ་འདོན་བཞིན་པའི་དགོས་འདུན་ཡང་། བོད་ལ་ཆོས་དང་རིག་གཞུང་གི་རང་སྐྱོང་གི་སྤྲོད་དགོས་པ་དེ་ཡིན། བར་སྐབས་ཤིག་ནས་ཐ་ན་བཙན་བྱོལ་སྤྱི་ཚོགས་ནང་གི་ངོ་རྒོལ་ཁྲོམ་སྐོར་སོགས་ཀྱི་སྐབས་སུ། བོད་མིའི་བདག་དབང་དང་རང་དབང་གི་དོན་དུ་ཁ་གསལ་བའི་དགོས་འདུན་ཆེར་མི་འདོན་པར། བྱང་ཆུབ་སེམས་མཆོག་རིན་པོ་ཆེ། མ་སྐྱེ་བ་རྣམས་སྐ྄ེ་བར་ཤོག སྐྱེ་བ་ཉམས་པ་མེད་པར་ཡང་། གོང་ནས་གོང་དུ་འཕེལ་བར་ཤོག ཅེས་སྐྱོར་ནས་འགྲོ་གིན་ཡོད། བོད་ནང་ནས་ཀྱང་རྒྱ་ནག་གི་ཁ་གཏད་གཅོག་སྐབས་ཞ་འདོན་འདི་སྐྱོར་མགོ་བཙུགས་ཡོད། ཞལ་འདོན་འདི་ནི་ནང་པའི་བསྟན་པ་འདིས་འཇིག་རྟེན་གྱི་མི་སྡེ་སྤྱི་ཚོགས་ཡོངས་ལ་འཁྱེར་བའི་བསམ་བློ་དང་ཀུན་སྤྱོད་ཀྱི་འགན་ཁུར་དང་། ཆོས་ལུགས་རང་སྟེང་གི་ཕུགས་བསམ་རྨང་གཞིར་བྱས་པའི་གསོལ་བ་སྨོན་ལམ་ཙམ་མ་གཏོགས་བོད་མི་རིགས་ལ་ཐད་ཀར་དུ་འཁྲི་བའི་འབོད་ཚིག་ཅིག་མིན།
མུ་མཐུད་དུ་གླེང་ན། བཙན་བྱོལ་བོད་མིའི་དབུ་ཁྲིད་དག་གིས་རྩ་དོན་གྱི་ཁ་ཕྱོགས་འདིང་སྐབས། འཐབ་རྩོད་དང་འཐབ་བྱུས་གང་ཡིན་ཡང་ལོ་རྒྱུས་ལ་གཞི་འཇོག་གི་མེད། འདིའི་གོ་དོན་ནི། ལོ་རྒྱུས་ཐོག་བོད་ནི་རང་བཙན་གྱི་རྒྱལ་ཁབ་ཅིག་ཡིན་ལ། ལོ་ངོ་སྟོང་ཕྲག་གི་རིང་མི་རིགས་འདིན་ཁྱིམ་མཚེས་རྒྱལ་ཁབ་དག་ལ་དྲག་པོའི་སྟོབས་ཤུགས་ཀྱིས་དམག་འཐབ་བྱས་ཡོད། ཡིན་ནའང་། ད་ལྟ་བོད་མི་ཚོས་སྔོན་གྱི་བདག་དབང་མི་རྩོད་པའི་ཆ་རྐྱེན་འོག་ནས་རང་སྐྱོང་གི་གནས་བབ་གླེང་གིན་ཡོད། དེའི་ཁར། འཐབ་བྱུས་ཀྱང་འཚེ་མེད་ཞི་བ་སྟེ། ལས་དགེ་སྡུག་གི་འགྲེལ་བཤད་སྟེང་ནས་སྤེལ་གྱིན་ཡོད། གསུམ་བཅུའི་དུས་དྲན་གྱི་ངོ་རྒོལ་རྗེས་ནས་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གཞིས་བྱེས་བོད་མི་ཡོངས་ལ་གནས་སྟངས་གང་དུའང་དྲག་པོའི་ལས་འགུལ་མ་སྤེལ་ོགས། ད་ལྟའི་དུས་འདི་ནི་ང་ཚོས་འཛམ་གླིང་ལ་རང་ཉིད་ནང་པ་སངས་རྒྱས་པ་ཞིག་ཡིན་མིན་ཡིག་རྒྱུགས་འཕྲོད་མིན་གྱི་གནད་ལ་ཐུག་ཡོད་སྐོར་གསུངས་ཡོད། ང་ཚོ་བོད་པ་ནས་ནང་པར་གྱུར་ཡོད་ཀྱང་། ད་དུང་ཡིག་རྒྱུགས་སྤྲོད་དགོས།
༧གོང་ས་མཆོག་གིས་འཛམ་གླིང་མི་དམངས་ལ་བོད་མི་རིགས་ནི་ནང་ཆོས་ཀྱི་བྱམས་སྙིང་རྗེ་དང་ལས་རྒྱུ་འབྲས་གཉིས་ལ་འབྲེལ་ནས་ངོ་སྤྲོད་གནང་བ་བཞིན། བོད་མི་ཚོས་ཀྱང་རང་ཉིད་བོད་པ་ལས་ཀྱང་ནང་པ་ཞིག་ཡིན་པའི་དཔྲལ་བ་དེ་འཛམ་གླིང་ལ་སྟོན་བཞིན། རང་ཉིད་ལ་ཡོད་པའི་སྣུམ་ཐིག་དེ་འདི་ཡིན་ལུགསབརྗོད་ཀྱིན་ཡོད། རྒྱ་ནག་གིས་ཀྱང་བོད་གངས་ཅན་གྱི་ཡུལ་འདི་ནང་བསྟན་རིག་གནས་ཀྱི་འགྲེམས་སྟོན་ཁང་ལྟ་བུ་ཞིག་ལ་བསྒྱུར་རྩིས་ཡོད་ལུགས་བཤད་ཀྱིན་ཡོད། འཛམ་གླིང་གི་ཡུལ་སྐོར་བ་དག་ལ་སྟོན་གྱིན་པའི་འགྲེམས་སྟོན་ཁང་དང་པོ་ནི་ཕོ་བྲང་པོ་ཏ་ལ་དང་ནོར་བུ་གླིང་ཀ་གཉིས་ཡིན་ལ། རིག་བཞིན་སེར་འབྲསས་དགེ་གསུམ་གྱིས་གཙོས་པའི་བོད་ནང་གི་དགོན་པ་ཆེ་གྲས་ཁག་འགྲེམས་སྟོན་ཁང་ལ་བསྒྱུར་རྒྱུ་དང་། ལྷག་འཕྲོས་རྣམས་སྒོ་རྒྱག་རྩིས་རེད། འདི་ལྟར་བོད་ཀྱི་སྣོད་བཅུད་གཉིས་ཀ་ནང་བསྟན་རིག་གནས་ཀྱི་འགྲེམ་སྟོན་ཁང་དང་དེའི་ནང་གི་རིག་དངོས་ཙམ་ཞིག་ཏུ་འགྱུར་གྱིན་ཡོད།