ཤེས་ཡོན་ཐོག་གང་ཐུབ་ཅི་ཐུབ་བྱེད་ཀྱིན་ཡོད།

དེ་རིང་གྲོས་ཚོགས་ནང་བཙན་བྱོལ་བོད་མིའི་ཤེས་ཡོན་དང་འབྲེལ་བའི་དྲི་བ་དྲིས་ལན་སྐབས་སྲིད་སྐྱོང་མཆོག་གིས་རྩོམ་ཡིག་འགྲན་བསྡུར་སོགས་ཀྱི་བྱ་འགུལ་སྤེལ་ཡང་འཛུལ་ཞུགས་བྱེད་མཁན་མི་འདུག་གསུངས་སོང་།

དེ་རིང་སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༩ པའི་ཉིན་གཉིས་པའི་སྔ་དྲོར། སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས། སྲིད་སྐྱོང་བློ་བཟང་སེང་གེ་མཆོག་ལ་སྐར་རྟགས་ཅན་གྱི་དྲི་བ་ཞིག་བཏོན་པ་དང་འབྲེལ་ཏེ། ཤེས་རིག་དང་ཆོས་རིག་ཀྱི་ངོས་ནས་སློབ་ཡོན་དང་དགེ་རྒན་གྱི་གླ་ཕོགས་ཕུད་བོད་ཀྱི་མཐོ་སློབ་ཁག་ཡར་རྒྱས་ཡོང་སླད་ལས་གཞི་གཞན་ག་རེ་བརྩམས་ཡོད་མེད། དེ་བཞིན། བོད་ཀྱི་སྐད་ཡིག་རིག་གཞུང་རྒྱུན་འཛིན་གོང་སྤེལ་ཆེད་རྩོམ་ཡིག་འགྲན་བསྡུར་དང་བགྲོ་གླེང་སོགས་ལ་དགོངས་པ་བཞེས་ཡོད་མེད་བཀའ་འདྲི་ཞུས་པའི་ལན་དུ་སྲིད་སྐྱོང་མཆོག་གིས། མཐོ་སློབ་ཁག་གི་དགེ་རྒན་ཚོའི་ཕོགས་ཀྱི་རྩོད་གཞི་དེར། བོད་མིའི་སྒྲིག་འཛུགས་ཀྱི་ངོས་ནས་གནང་འགན་ཡོད་པ་དེ་ཚོ་གནང་གི་ཡོད་ཀྱང་། མཐོ་སློབ་ཁག་བཙུགས་སྐབས་ཁོ་རང་ཚོ་རང་དབང་ཅན་ཆགས་ཏེ་འགྲོ་སྟངས་འགྲོ་ལུགས་དང་། དངུལ་འཚོལ་ཐབས་ཡང་སོ་སོས་གནང་གི་ཡོད་ལ། ཁོ་རང་ཚོའི་ངོས་ནས་དགེ་རྒན་གྱི་ཕོགས་འོས་འཚམ་ཞིག་སྤར་ཐུབ་པར་འབད་བརྩོན་གནང་གི་ཡོད་ཤག་ཏུ་རྩི་བཞིན་ཡོད། དཔེར་ན། བོད་མིའི་སྒྲིག་འཛུགས་ཀྱིས་བར་བརྒལ་ནས་བོད་ཁྱིམ་གཙོས་པའི་སློབ་གྲྭ་གཞན་ཁག་ལའང་དགེ་རྒན་གྱི་ཕོགས་ཡོད་པ་རེད། ཡིན་ནའང་། དེ་སོ་སོའི་གནས་སྟངས་ལ་གཟིགས་ན་ཡག་གི་རེད་མ་གཏོགས་ང་ཚོས་བཀོད་ཁྱབ་བཏང་སྟེ། དགེ་རྒན་གྱི་ཕོགས་སྤར་དགོས་རེད་ཅེས་ལབ་པ་ཡིན་ན། ཡང་སོ་སོའི་གནས་སྟངས་ལ་མེད་ན་རང་བཞིན་གྱིས་དཀའ་ངལ་ཞིག་འཕྲད་སྲིད་པ་རེད། ཅེས་གསུངས་སོང་།

ཁོང་གིས་མུ་མཐུད་དུ། མཐོ་སློབ་ཁག་ནང་དུ་རྩོམ་ཡིག་འགྲན་བསྡུར་སོགས་བྱས་ཏེ་བོད་ཡིག་ལ་དོ་སྣང་ཆེ་རུ་གཏོང་ཐབས་ཐོག་གཏན་གཏན་དགོངས་པ་བཞེས་ཀྱི་ཡོད། དཔེར་ན། ཤེས་རིག་ལས་ཁུངས་ནས་ཧྥ་རན་སི་ལ་ཡོད་པའི་རོགས་ཚོགས་(AED)དང་མཉམ་འབྲེལ་ཐོག ༢༠༡༤ ལོ་དེ་༧གོང་ས་མཆོག་གི་བཀའ་དྲིན་རྗེས་དྲན་གྱི་ལོ་དང་བསྟུན་ཏེ། ༼བོད་འདིས་ང་ལ་ཁྱད་པར་ག་རེ་བཟོ་ཡི་འདུག༽ཟེར་བའི་རྩོམ་ཡིག་འགྲན་བསྡུར་གསལ་བསྒྲགས་གནང་ཡོད་པ་དང་། རོགས་ཚོགས་དེས་རོགས་དངུལ་ཡང་ཕོན་ཆེན་པོ་གནང་འདུག རྩོམ་ཡིག་ ༢༠ ལ་སྒོར་ཁྲི་ ༢ རེ་ཡི་བྱ་དགའ་སྤྲོད་རྒྱུ་བྱས་ཀྱང་། མཐོ་སློབ་ཁག་ཏུ་ཡོད་པའི་སློབ་ཕྲུག་ནས་རྩོམ་འབྲི་མཁན་ ༢༠ མ་བྱུང་བ་རེད། རྗེས་ལ་བསྐྱར་དུ་གསལ་བསྒྲགས་སྤེལ་བ་རེད། དེ་བཞིན་ཆོས་རིག་ལས་ཁུངས་ངོས་ནས་ཀྱང་མཐོ་སློབ་ཁག་ཏུ་ཡོད་པའི་སློབ་ཕྲུག་ཚོར་དམིགས་བསལ་གྱིས་ཟླ་ ༦ རིང་རྒྱུད་སྨད་གྲྭ་ཚང་དུ་རིན་མེད་ཀྱི་ཐོག་ནས་སྦྱོང་བརྡར་སྤྲད་པ་རེད། ཅེས་སོགས་གསུངས་སོང་།

སྤྱི་འཐུས་སྒྲོལ་མ་ཚེ་རིང་ལགས་ཀྱིས་འཕྲོས་དོན་དྲི་བར། སློབ་གྲྭ་ཁང་གི་སློབ་དེབ་བོད་སྒྱུར་བྱེད་པའི་ལས་ཀ་དེ་དགེ་རྒན་ཚོས་ལས་ཞོར་དུ་བྱེད་ཀྱི་ཡོད་པ་དང་། ཆོས་སྡེ་ཁག་མ་ཡིན་པའི་མཐོ་སློབ་རྣམས་ཡར་རྒྱས་གཏོང་ཐབས་དང་དེ་དག་གི་སྤུས་ཚད་ལ་ཉམས་ཞིབ་བྱེད་ཀྱི་ཡོད་མེད་དྲིས་པའི་ལན་དུ། སློབ་དེབ་བོད་སྒྱུར་བྱེད་པ་དེ་དགེ་རྒན་ཚོས་ཞོར་ལས་གནང་གི་འདུག་གསུངས་པ་དེ་དངོས་ཡོད་གནས་ཚུལ་ཆགས་ཡོད། གང་ཡིན་ཟེར་ན། བསླབ་གཞི་རྩ་འཛིན་ལྷན་ཚོགས་ཀྱི་ཚན་རིག་སློབ་དེབ་ཅིག་བོད་ཡིག་ཏུ་བསྒྱུར་དགོས་ཀྱི་ཡོད་ན། ཚན་རིག་གི་དགེ་རྒན་ཚད་མཐོ་བོ་ཞིག་དགོས་ཀྱི་ཡོད་ཀྱང་། ང་ཚོའི་སློབ་གྲྭ་ཁག་ནང་ཚན་རིག་དགེ་རྒན་དང་ཨང་རྩིས་དགེ་རྒན་དཀོན་པོ་ཡིན་པ་དེ་ཚང་མས་མཁྱེན་གྱི་ཡོད་པ་རེད། དེ་བཞིན། ཤེས་རིག་ལས་ཁུངས་ནང་ཤེས་ཡོན་ལྷན་ཚོགས་ཀྱི་ལས་བྱེད་ཡོད་པ་དང་། ཁོ་རང་ཚོས་གཞི་རྩའི་སློབ་དེབ་ཁག་བོད་ཡིག་ཏུ་བསྒྱུར་གྱི་ཡོད་ཀྱང་། ཞུ་དག་བྱེད་པར་ངེས་པར་དུ་དགེ་རྒན་ཞིག་དགོས་ཀྱི་ཡོད་པ་རེད། དགུན་ཁའི་གུང་གསེང་སྐབས་དགེ་རྒན་དེས་འགན་ཐོལ་བ་འཁུར་ནས་ཞོར་དུ་ཞུ་དག་བྱེད་དགོས་ཀྱི་ཡོད་སྟབས། རང་བཞིན་གྱིས་དུས་ཚོད་ཀྱིས་བསྐོར་བ་མ་ཐེབས་པ་ཞིག་ཆགས་ཡོང་གི་ཡོད་པ་རེད། ཅེས་གསུངས་སོང་།

སྲིད་སྐྱོང་མཆོག་གིས་མུ་མཐུད་དུ། མཐོ་སློབ་ཀྱི་སྤུས་ཚད་གལ་ཆེན་པོ་ཞེ་དྲག་ཡིན་ལ་དེར་ཐུགས་སྣང་གནང་དགོས་ཀྱི་ཡོད་པ་རེད། ད་ལྟ་སཱ་ར་མཐོ་སློབ་དང་ནོར་གླིང་མཐོ་སློབ། སྒྲོལ་མ་གླིང་། ཏཱ་ལའི་བླ་མ་མཐོ་སློབ་སོགས་ཁོ་ཚོ་རང་གིས་དེབ་སྐྱེལ་བྱས་པའི་ཚོགས་པ་དང་། འགན་འཁུར་གནང་མཁན་ཡིན་དུས་སྤུས་ཚད་ཐད་ཐུགས་སྣང་གནང་གི་ཡོད་ཤག་ཡིན། ༢༠༠༢ ལོ་ཙམ་ལ་སྔོན་མའི་བཀའ་ཤག་གིས་ཚོགས་ཆུང་བཙུགས་པའི་ཐོག་ནས་སློབ་ཚན་ཁྲིད་སྟངས་དང་སྤུས་ཚད་ག་འདྲ་དགོས་ཀྱི་ཡོད་མེད། དེ་བཞིན་དགེ་རྒན་ག་ཚོད་དགོས་ཀྱི་ཡོད་མེད་སོགས་ལ་ཞིབ་འཇུག་གནང་བའི་སྙན་ཐོ་ཞིག་འདུག་ལ། བཀའ་ཤག་ནས་མཐོ་སློབ་ཁག་ནང་དེ་ལག་བསྟར་བྱེད་པར་འབད་བརྩོན་གནང་དགོས་པའི་རེ་སྐུལ་ཡང་ཞུས་འདུག ཡིན་ནའང་། གོང་དུ་ཞུས་པ་ལྟར་མཐོ་སློབ་ཁག་གིས་འགྲོ་སོང་སོགས་སོ་སོར་རག་ལས་ཡོད་སྟབས། ང་ཚོས་ཞེ་དྲག་ཞུ་རྒྱུར་སྟབས་བདེ་ཡོད་པ་མ་རེད། ཅེས་གསུངས་སོང་།