ཟླ་འདིའི་ཕྱི་ཚེས་ ༢༡ཉིན་གྱི་ཞོགས་པའི་ཆུ་ཚོད་ ༥།༣༠ ཡས་ཡས་སུ། རྒྱ་གཞུང་ཉེན་རྟོག་པས་རྭ་རྒྱ་དགོན་པའི་དགེ་བསྐོས་གྲྭ་དཔལ་ལྡན་རྒྱ་མཚོ་ལགས་གསང་སྟབས་ཀྱིས་རང་ཁྱིམ་དུ་བསྐྱལ་ཡོད་འདུག
འདི་གར་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༢༡ ཉིན་གྱི་བོད་ནང་གི་ཞོགས་པའི་ཆུ་ཚོད་ ༥།༣༠ ཡས་མས་ཙམ་ལ། རྒྱ་གཞུང་ཉེན་རྟོག་པས་རྭ་རྒྱ་དགོན་གྱི་དགེ་བསྐོས་གྲྭ་དཔལ་ལྡན་རྒྱ་མཚོ་ལགས་གསང་སྟབས་ཀྱིས་རང་ཁྱིམ་དུ་བསྐྱལ་ཡོད་པ་དང་། ཉིན་དེར་ཪྭ་རྒྱ་དགོན་པའི་གྲྭ་མང་དང་ས་གནས་མང་ཚོགས། ད་དུང་ཉེ་འཁྲིས་ཀྱི་ཡུལ་གྲོང་ཁག་གི་མི་མང་བཅས་ཀྱིས་གྲྭ་དཔལ་ལྡན་རྒྱ་མཚོ་ལགས་སུ་ཕེབས་བསུ་རྒྱ་ཆེན་པོ་ཞུ་རྒྱུའི་གྲ་སྒྲིག་བྱས་ཡོད་ཀྱང་། རྫོང་དང་ས་གནས་ཉེན་རྟོག་པས་ཤེས་རྟོགས་བྱུང་སྟེ་ཉེན་རྟོག་པ་ཆེད་དུ་དགོན་པར་ཡོང་སྟེ། གལ་སྲིད་ངོ་རྒོལ་སྐད་འབོད་དང་ཡིག་ཆ་གཏོར་འགྲེམས་སོགས་ཀྱི་གནས་ཚུལ་བྱུང་ན། དགོན་པའི་ལས་ཀྱི་སྣེ་མོ་བ་ཚོས་འགན་འཁུར་དགོས་པ་ལས་ཕེབས་བསུ་ཞུས་ཆོག་པ་དང་ཕེབས་བསུ་བ་རྣམས་རྭ་རྒྱ་དགོན་དང་འབའ་གད་པ་སུམ་མདོ་རྫོང་གཉིས་ཀྱི་ས་མཚམས་བར་འགྲོ་ཆོག་ལུགས་བཤད་ཡོད་ཀྱང་། དེ་རྗེས་ཡང་བསྐྱར་འགྱུར་བ་ཐེབས་ནས་གང་སར་ཉེན་རྟོག་པ་འགྲེམས་འཇོག་གིས་དམ་དྲག་ཤུགས་ཆེན་བྱས་ཤིང་། ཕེབས་བསུ་བ་དག་དགོན་པའི་ཉེ་འཁྲིས་སུ་སྡོད་པ་ལས་ཐག་རིང་བོར་འགྲོ་མི་ཆོག་པའི་བཙན་བཀའ་བཏང་བ་མ་ཟད་པར་རིས་དང་བརྙན་སོགས་གཅིག་ཀྱང་ལེན་མི་ཆོག་པ་དང་། གལ་སྲིད་པར་དང་བརྙན་རིས་རྣམས་ཕྱི་ཕྱོགས་སུ་གཏོང་མཁན་ཡོད་ཚེ་ཉེས་ཆད་དྲག་པོ་གཏོང་རྒྱུ་ཡིན་པའི་ཉེན་བརྡ་བཏང་ཞིང་། འབྲེལ་ཡོད་མི་སྣ་དག་གི་ལག་ཁྱེར་ཁ་པར་དང་དྲྭ་འཕྲིན་སོགས་ཐོ་འགོད་བྱས་ཏེ་བཀག་བསྡོམས་ནན་མོ་བྱས་ཡོད་འདུག
གྲྭ་དཔལ་ལྡན་རྒྱ་མཚོ་ལགས་ནི་ཪྭ་རྒྱ་དགོན་གྱི་ཕྱི་ལོ་ ༢༠༠༩ ལོའི་དགེ་བསྐོས་ལས་ཐོག་པ་ཡིན་ལ། ལོ་དེའི་ཕྱི་ཟླ་ ༣ ཚེས་ ༢༡ ཉིན་གྱི་ཉིན་གུང་བོད་ནང་གི་ཆུ་ཚོད་ ༢ པ་ཙམ་ལ། སྔར་ལོའི་གསུམ་བཅུའི་དུས་དྲན་དང་སྟབས་བསྟུན་རྭ་རྒྱ་དགོན་དུ་བོད་ཀྱི་རྒྱལ་དར་བསྒྲེངས་འཛུགས་དང་ཡིག་ཆ་གཏོར་བཀྲམས་བྱས་པའི་ཉེས་མིང་འོག ཕྱི་ཟླ ༣ཚེས་༢༡ཉིན་གྱི་ཉིན་གུང་བོད་ནང་གི་ཆུ་ཚོད་ ༢ པ་ཙམ་ལ་དགེ་འདུན་པ་བཀྲ་ཤིས་བཟང་པོ་ས་གནས་ཉེན་རྟོག་པས་འཛིན་བཟུང་བྱས་ཏེ། འདྲི་རྩད་མནར་གཅོད་གཏོང་སྐབས་གྲྭ་བཀྲ་ཤིས་བཟང་པོ་རྨ་ཆུ་ལ་ལྕེབས་ཏེ་རང་ཤི་བརྒྱབ་པའི་གནས་ཚུལ་སོགས་བྱུང་ཡོད་སྟབས། རྭ་རྒྱ་དགོན་གྲོང་གཉིས་ཀྱི་བོད་རིགས་སེར་སྐྱ་མི་དམངས་༡༠༠༠ ལྷག་འདུ་འཛོམས་ཀྱིས་རྭ་རྒྱ་གྲོང་བརྡལ་སྲིད་གཞུང་དང་ཉེན་རྟོག་ལས་ཁུངས་གཉིས་སུ་ཕྱིན་ཏེ། རྔམ་སྟོན་ཁྲོམ་སྐོར་དང་ངོ་རྒོལ་སྐད་འབོད་ཤུགས་ཆེན་བྱས་ཡོད་པ་མ་ཟད། ཕྱི་ལོ་༢༠༠༩ ལོའི་སྤྱི་ཟླ་༣ པའི་ཚེས་༢༢ཉིན་རྭ་རྒྱ་དགོན་པའི་དགེ་བསྐོས་དཔལ་ལྡན་རྒྱ་མཚོ་ལགས་གཙོ་བྱས་པའི་དགེ་འདུན་པ་ ༩ ལྷག་ངོ་རྒོལ་གྱི་སྣེ་ཁྲིད་པ་ཡིན་པའི་ཉེས་འཛུགས་འོག་འཛིན་བཟུང་བྱས་ཡོད་ཅིང་། དེའི་ཁྲོད་དགེ་བསྐོས་དཔལ་ལྡན་རྒྱ་མཚོ་ལགས་སུ་ལོ་བདུན་གྱི་ཁྲིམས་ཐག་བཅད་ཀྱང་། རྗེས་སུ་ལོ་གཅིག་ཆག་ཡང་བཏང་སྟེ་ད་བར་ལོ་ངོ་ཧྲིལ་བོ་ ༦ རིང་བཙོན་ཁང་དུ་བཞུགས་དགོས་བྱུང་ཡོད་འདུག
གསར་འགོད་པ། པདྨ་མཚོ།
