དེ་རིང་སྤྱི་འཐུས་གྲོས་ཚོགས་ནང་སྦེལ་ཀོབ་འཚོ་བྱེད་སྨན་ཁང་གི་རྙོག་གླེང་ཐོག་འཕྲོད་བསྟེན་བཀའ་བློན་མཆོག་གི་ཕྱག་ལས་གནང་སྟངས་དང་འབྲེལ་ནས་མ་འོངས་པར་ཡིད་གཟབ་གནང་དགོས་པའི་འབོད་སྐུལ་ལམ་ཉེན་བརྡའི་གྲོས་ཆོད་ཅིག་བཞག་སོང་།
དེ་རིང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་བའི་ལས་ཉིན་བཅུ་གཉིས་པ་དང་ཉིན་མཐའ་མའི་ཞོགས་ཚོགས་སྟེང་། སྦེལ་ཀོབ་འཚོ་བྱེད་སྨན་ཁང་གི་རྙོག་གླེང་དང་། གནས་ཚུལ་དེའི་ཐོག་འཕྲོད་བསྟེན་བཀའ་བློན་མཆོག་གི་ཕྱག་ལས་གནང་སྟངས་བཅས་ཀྱི་ཐད་གྲོས་ཚོད་དོན་ཚན་གཉིས་བཞག་སོང་།
དོན་ཚན་དང་པོའི་ནང་། གྲོས་ཚོགས་ནང་བགྲོ་གླེང་དང་སྤྱི་འཐུས་རྒྱུན་ལས་ཀྱི་ཚོགས་ཆུང་གི་སྙན་ཐོའི་ནང་དོན། དཔལ་ལྡན་བཀའ་ཤག་གིས་བཀའ་བློན་མཆོག་ལ་ཉེན་བརྡ་གནང་དགོས་གྱུར་ཡོད་པ་བཅས་ལ་བརྟེན་ཏེ། དཔལ་ལྡན་འཕྲོད་བསྟེན་བཀའ་བློན་མཆོག་གིས་སླད་མར་མཚན་གནས་རྗེས་འབྲེལ་གྱི་ཕྱག་ལས་གང་ཅིར་ཐུགས་སྣང་ཡིད་གཟབ་གནང་དགོས་ཞེས་བཀོད་འདུག
དོན་ཚན་གཉིས་པའི་ནང་། སྦེལ་ཀོབ་འཚོ་བྱེད་སྨན་ཁང་གི་སྨན་པ་དང་ལས་བྱེད་བཅས་ཀྱི་ལས་དོན་རྣམས་ལས་གནས་མང་ཚོགས་ལ་ཕན་ཐོགས་ངེས་སུ་འགྱུར་བའི་གནང་པྱོགས་དགོས་རྒྱུ། ཞེས་བཀོད་འདུག
རྙོག་གླེང་འདི་ནི་ ༢༠༡༤ ཟླ་ ༢ པའི་ནང་སྦེལ་ཀོབ་འཚོ་བྱེད་སྨན་ཁང་གི་ལས་བྱེད་གཉིས་ཀྱིས་སྨན་ཁང་འགན་འཛིན་ལྷག་པ་ཚེ་རིང་གིས་སྨན་ཁང་གློག་གསོག་སྣོད་སོགས་ཅ་དངོས་ཁག་ཅིག་ཉོས་པའི་རིན་འབབ་ལས་སྡབ་གཅིག་གི་ལྷག་མ་སོང་ཡོད་སྐོར་དང་འབྲེལ་ནས་ལྐོག་ཟ་རུལ་སུངས་ཀྱི་གནས་ཚུལ་ཡོད་པའི་སྙན་ཞུ་ཞིག་བཀའ་ཤག་ལ་ཕུལ་ཡོད་འདུག གནད་དོན་དེར་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་ཞིབ་འཇུག་ཚོགས་ཆུང་ཞིག་བཙུགས་ཀྱང་། རྗེས་སུ་ཚོགས་ཆུང་གི་ཞིབ་འཇུག་སྙན་ཐོ་འབྱོར་སྐབས་འཕྲོད་བསྟེན་བཀའ་བློན་མཆོག་གིས་ངོས་ལེན་གནང་མེད།
དེའི་རྗེས་འཕྲོད་བསྟེན་བཀའ་བློན་མཆོག་ལྷོ་ཕྱོགས་ཁུལ་དུ་ཕྱོགས་སྐྱོད་ཅིག་དང་འབྲེལ་ཏེ། ལྷག་པ་ཚེ་རིང་གིས་ཅ་དངོས་ཉོ་སའི་རྒྱ་གར་ཚོང་བདག་སར་ཕེབས་ཏེ་འདྲི་བརྩད་གནང་སྐབས། ལྷག་པ་ཚེ་རིང་གིས་ཅ་དངོས་ཉོས་པའི་ཡིག་ཆ་རྫུན་བཟོ་བྱས་ཚུལ་བརྗོད་ཡོད་ཀྱང་། རྗེས་སུ་སྐད་ཆར་འགྱུར་བ་ཐེབས་ཏེ་ཉིན་དེར་བཀའ་བློན་མཆོག་གིས་འཇིགས་སྐུལ་བྱས་པར་བརྟེན་ཏེ་སྐད་ཆ་དེ་ལྟར་ལབ་ཚུལ་བརྗོད་ཡོད།
རྙོག་གླེང་དེ་ཐོག་མར་བྱུང་སྐབས། འཕྲོད་བསྟེན་བཀའ་བློན་མཆོག་གི་བཀའ་མངགས་ལྟར། འཕྲོད་བསྟེན་དྲུང་ཆེས་སྣེ་འཁྲིད་པའི་ཞིབ་འཇུག་ཚོགས་ཆུང་ཞིག་བཙུགས་པའི་གྲུབ་དོན་སྙན་ཐོའི་ནང་། སྦེལ་ཀོབ་འཚོ་བྱེད་སྨན་ཁང་གི་འགན་འཛིན་ལྷག་པ་ཚེ་རིང་ལ་ལྐོག་ཟ་རུལ་སུངས་ཀྱི་གནད་དོན་མེད་པར་ངོས་འཛིན་གནང་ཡོད་སྟབས། ཞིབ་འཇུག་གྲུབ་དོན་དེ་འཕྲོད་བསྟེན་བཀའ་བློན་མཆོག་གིས་རྩིས་མེད་བཏང་ཡོད།
དེའི་རྗེས་བསྐྱར་དུ་བཀའ་ཤག་གིས་ནང་སྲིད་དྲུང་ཆེས་སྣེ་འཁྲིད་པའི་ཞིབ་འཇུག་ཚོགས་ཆུང་ཞིག་བཙུགས་པའི་ཞིབ་འཇུག་སྙན་ཐོའི་ནང་། སྦེལ་ཀོབ་འཕྲོད་བསྟེན་སྨན་ཁང་གི་འགན་འཛིན་ལྷག་པ་ཚེ་རིང་གིས་སྤྱི་དངུལ་ཧིན་སྒོར་ ༣༠༤༨༣༠ ཙམ་གྱོང་གུན་བཏང་ཡོད་པ་ཕྱིར་སློག་དགོས་པ་དང་། འཚོ་བྱེད་སྨན་ཁང་གི་གནད་དོན་འདི་དང་འབྲེལ་བ་ཡོད་པའི་ལས་བྱེད་ཡོངས་རྫོགས་འཕོ་འགྱུར་འགྲོ་དགོས་པ། དེ་བཞིན། འཕྲོད་བསྟེན་བཀའ་བློན་མཆོག་གིས་ཀྱང་གནས་ཚུལ་དེའི་ཐོག་ཐད་ཀར་ཐེ་གཏོག་གནང་སྟེ། འབྲེལ་ཡོད་རྒྱ་གར་ཚོང་པར་འཇིགས་སྣང་སྐུལ་བའི་གནས་ཚུལ་ཡོད་པའི་ངོས་འཛིན་ཐོག་འཕྲོད་བསྟེན་བཀའ་བློན་ལའང་ཉེན་བརྡའི་ཚུལ་དུ་སློབ་གསོའི་ཕྱག་ཡིག་ཅིག་ཕུལ་ཡོད་འདུག
དེའི་རྗེས་ལྷག་པ་ཚེ་རིང་ལགས་ཀྱིས་བཀའ་ཤག་གི་ཐག་གཅོད་དེ་དྲང་མོ་བྱུང་མེད་པའི་སྙན་ཞུ་ཞིག་སྤྱི་འཐུས་རྒྱུན་ལས་ལ་འབྱོར་བ་དང་། སྤྱི་འཐུས་རྒྱུན་ལས་ངོས་ནས་ཀྱང་གནད་དོན་ཁག་ཅིག་གི་ཐོག་བཀའ་ཤག་ལ་འདྲི་བརྩད་བྱས་པར་དོགས་གཞི་བྱུང་སྟབས། སྤྱི་འཐུས་རྒྱུན་ལས་ཀྱིས་བསྐྱར་དུ་འཕྲོད་བསྟེན་བཀའ་བློན་མཆོག་གི་ཕྱག་ལས་གནང་སྟངས་ཐོག་ཞིབ་འཇུག་ཚོགས་ཆུང་བཙུགས་པའི་གྲུབ་དོན་སྙན་ཐོའི་ནང་། གནད་དོན་འདིའི་ཐད་འཕྲོད་བསྟེན་བཀའ་བློན་མཆོག་གི་ཕྱག་ལས་གནང་སྟངས་ལ་ནོར་འཁྲུལ་ཤོར་ཡོད་པ་མ་ཟད། དེ་མིན་གྱི་ལས་དོན་གནང་ཕྱོགས་ཁག་ཅིག་གི་ཐོག་ཏུའང་ནོར་འཁྲུལ་ཡོད་པའི་ངོས་འཛིན་བྱས་ཡོད།
སྤྱི་འཐུས་རྒྱུན་ལས་ཀྱི་ཞིབ་འཇུག་སྙན་ཐོ་ཟླ་འདིའི་ཚེས་ ༢༦ ཉིན་གྲོས་ཚོགས་ནང་སྙན་གསེང་ཞུས་སྐབས། སྤྱི་འཐུས་ཁག་ཅིག་གིས་དེ་སྔོན་བཀའ་ཤག་གིས་ཉེས་པ་ཞིག་བཏང་ཟིན་པ་དེའི་སྟེང་། ད་རེབ་གྲོས་ཚོགས་ནས་གྲོས་ཆོད་ཅིག་བཞག་སྟེ་འགྲིག་པ་བྱས་ན་ལེགས་ཚུལ་བརྗོད་པ་དང་། ཁག་ཅིག་གིས་དེ་ཙམ་གྱིས་འགྲིག་གི་མེད་སྟབས་བསྐྱར་དུ་ཞིབ་འཇུག་ཚོགས་ཆུང་བཙུགས་ཏེ་དཀར་པོ་ནག་པོ་འཁྲུན་ཐག་ཆོད་པ་ཞིག་གནང་རྗེས། ཉེས་པ་ཆད་པ་གང་འབབ་ལག་བསྟར་བྱེད་དགོས་ཚུལ་སོགས་བརྗོད་ཡོད།
སྦེལ་ཀོབ་འཚོ་བྱེད་སྨན་ཁང་གི་རྙོག་གླེང་དང་། གནད་དོན་དེའི་ཐོག་འཕྲོད་བསྟེན་བཀའ་བློན་མཆོག་གི་ཕྱག་ལས་གནང་ཕྱོགས་བཅས་ཀྱི་ཐོག་སྔ་ཕྱིར་ཞིབ་འཇུག་ཚོགས་ཆུང་ ༣ བཙུགས་ཡོད། དེ་རིང་ཞོགས་པར་སྤྱི་འཐུས་གྲོས་ཚོགས་ནང་གྲོས་ཆོད་དེ་སྙན་གསེང་ཞུས་སྐབས་སྤྱི་འཐུས་ཁག་ཅིག་གིས་དགག་པ་བརྒྱབ་ཡོད་ཀྱང་མཐའ་མར་མང་པོས་ཐོག་ནས་གཏན་འབེབས་གནང་སོང་།
སྤྱི་འཐུས་རྣམས་པའི་མང་པོས་ཐོག་ནས་གཏན་འབེབས་གནང་བ་དེ་འགྲིག་མེད་པ་ཤེས་དགོས། སྐབས་བཅུ་དྲུག་པའི་འོས་མི་སུ་བླུག་དགོས་མིན་གནས་ཚུལ་འདི་དག་ལ་རྟག་དཔྱོད་ལེགས་པ་བྱས་ན་གསལ་བོ་ཤེས་ཀྱི་རེད་ཞུ། དེང་སངས་འཚོ་བྱེད་སྨན་ཁང་ནང་དུ་་་་དྲང་པོའི་གསལ་བཤད་བྱེད་མཁན་དྲང་བདེན་ཅན་དང་ལྷག་བསམ་ཅན་མི་དེ་ཚོ་ད་ལྟ་ལས་དཀའ་སྤྲོད་མེད་པ། གཞུང་ལས་མ་རག་ནས་སྒེར་ལས་ལ་བརྩོན་གྱི་འདུག་དངོས་གནས་བློ་ཕམ་རེད། སྤྱི་འཐུས་རྣམས་པའི་ཞི་འཇུག་གནང་ས་དེ་ཚོ་མིན་ན་གང་ཡིན། དེ་ཚོ་ཡིན་ན་ཁོང་རྣམས་པ་ལ་གཟེངས་སྟོད་མེད་ཀྱང་། དེ་ཚོ་ལ་འགྲོ་སྟངས་མི་བཟོ་བ་གྲོས་ཆོད་དོན་ཚན་གཉིས་ག་རེ་ཡིན་ན། ཕྱོགས་ལྷུང་གི་སྐད་ཆ་མ་ཡོང་ན་ཁྱོད་རྣམས་ལ་བྱེད་ཡ་མེད་པ་ཡིན་ན། སྐབས་རྗེས་མའི་སྤྱི་འཐུས་གསར་པ་མ་ཡོང་ན་འགྲིག་གི་པ་འདིའི་སྟོན་ཡོད་
འདི་ཡོང་གཞི་ཡིན་པས་ཧ་ལས་རྒྱུ་ཅི་ཡང་མེད། ཡིནའང་བོད་པ་དངུལ་ལ་དགའ་པོ་དང་ རྡ་ཡང་གིས་བསླུས་ཡོད་པས་དེར་གཟབ་དགོས་པ་དང་ འདི་རིགས་འགོག་དགོས་པ་མ་ཟད་ལས་དོན་འདིའི་ཆེད་མང་ཚོགས་ནས་སྤྱི་འཐུས་གདམ་པ་རེད།
བདེན་པ་ཉིད་རྟག་ཏུ་རྒྱལ་གྱུར་ཅིག།།།
འཕྲོད་བསྟེན་བཀའ་བློན་གནས་དབྱུང་གཏོང་རོགས།
བཀའ་བློན་ཞིག་གྲོས་ཚོགས་ཀྱིས་ཐུགས་གཟབ་དགོས་པའི་ཉེན་བརྡ་སླེབས་པ་དེ། ལོ་རྒྱུས་ནང་སྡོད་དགོས་སྟབས། དེ་ལས་ལྷག་ཅིག་གི་ཉེས་པ་ཞིག་མེད། ང་ཡིན་ན་ངོ་ཚ་ནས་གདོང་སྟོན་ནུས་ས་མ་རེད།
འཇིག་རྟེན་འདིའི་སྟེང་ལ་ལྟད་མོ་མང་གི་ཡ། མི་ཆེན་ཚོས་ནོར་ན་ཐུགས་གཟབ་གནང་དགོས་ཀྱི་བསླབ་བྱ་སྙིང་རྗེ་མོ་རེ། འབངས་ཚོས་ནོར་ན་དཀར་ནག་གི་ཐག་གཅོད་ནན་མོ་རེ།