འདོད་བློ་ཁེངས་པ་ཞིག་རྩ་བ་ཉིད་ནས་བྱུང་མ་སོང་།

སྤྱི་འཐུས་གྲོས་ཚོགས་ནང་ཇོ་ནང་ཆོས་བརྒྱུད་ལ་སྤྱི་འཐུས་ཀྱི་ཐོབ་ཐང་སྤྲད་མེད་པའི་ཐོག་ཇོ་ནང་བ་མང་པོ་ཞིག་གིས་སྤྱི་འཐུས་ཚོགས་ཁང་སྒོ་ཁར་ཞི་འབོད་གནང་བ་དེ་གནས་སྐབས་རིང་མཚམས་འཇོག་གནང་ཡོད་འདུག

ཁ་སང་བོད་མི་མང་སྤྱི་འཐུས་གྲོས་ཚོགས་མཇུག་བསྡོམས་ཉིན། རྒྱ་གར་དང་བལ་ཡུལ་གྱི་ཇོ་ནང་ཆོས་བརྒྱུད་རྗེས་འཇུག་སློབ་རྒྱུན་བརྒྱད་ཅུ་ལྷག་གངས་སྐྱིད་སྤྱི་འཐུས་ཚོགས་ཁང་སྒོ་ཁར་འཛོམས་ཏེ། ཚེས་ ༢༦ ཉིན་གྲོས་ཚོགས་ནང་ཇོ་ནང་ལ་བོད་པའི་ཆོས་བརྒྱུད་སྤྱི་མཚུངས་ལྟར། སྤྱི་འཐུས་གཉིས་ཀྱི་ས་མིག་མ་སྤྲད་པའི་ཐད་ཞི་འབོད་ལས་འགུལ་ཞིག་སྤེལ་ཡོད་ཅིང་། གྲོས་ཚོགས་མཇུག་བསྡོམས་སྟེང་སྤྱི་འཐུས་ཚོགས་གཙོ་མཆོག་གིས་གནས་ཚུལ་དེའི་སྐོར་ལ་གསལ་བཤད་ཅིག་ཀྱང་གནང་ཡོད།

ཉིན་གུང་ཆུ་ཚོད་ ༡༢།༣༠ སྟེང་སྐབས་བཅོ་ལྔ་པའི་གྲོས་ཚོགས་ཚོགས་དུས་དགུ་བ་ཡོངས་སུ་མཇུག་བསྒྲིལ་ཡོད་སྟབས། ཉིན་རྒྱབ་ཆུ་ཚོད་ ༡།༠༠ ཙམ་ལ་སྤྱི་འཐུས་ཚོགས་གཙོ་དང་ཚོགས་གཞོན་རྣམ་གཉིས་ཀྱིས། ཞུ་འབོད་ལས་འགུལ་སྣེ་འཁྲིད་པ་འཕགས་ཡུལ་སིམ་ལ་ཇོ་ནང་མ་དགོན་གྱི་མཁན་པོ་ཀུན་དགའ་འཚམས་ཆུང་ལགས་དང་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་རྣམ་གཉིས་སྤྱི་འཐུས་ཚོགས་དྲུང་ལས་ཁུངས་སུ་འབོད་འགུག་གནང་ཡོད་པ་དང་། ཉིན་རྒྱབ་ཆུ་ཚོད་ ༢།༠༠ ཙམ་ལ་ཞུ་འབོད་ལས་འགུལ་མཚམས་འཇོག་གནང་ཡོད་པ་རེད།

འདི་གའི་གསར་འགོད་པས་མཁན་པོ་ཀུན་དགའ་མཚམས་ཆུང་ལགས་སུ། སྤྱི་འཐུས་ཚོགས་གཙོ་མཆོག་གིས་གྲོས་ཚོགས་ཀྱི་མཇུག་བསྡོམས་སྟེང་ཁྱེད་རྣམ་པའི་དགོས་ཞུ་འབོད་སྐོར་ལ་གསལ་བཤད་གནང་བའི་ཐད་དགོངས་ཚུལ་གང་འདྲ་བྱུང་ཡོད་མེད་དྲིས་པར་ཁོང་གིས། ང་ཚོས་དགོས་འདུན་དོན་ཚན་བཞི་བཏོན་པ་དེར། སྤྱི་འཐུས་ཚོགས་གཙོ་མཆོག་གིས་གྲོས་ཚོགས་ཀྱི་མཇུག་བསྡོམས་གཏམ་བཤད་གནང་སྐབས་དེ་ཚོའི་སྐོར་ལ་གསུང་བཤད་ཅིག་གནང་ཡོད་ས་རེད། ང་ཚོས་དེར་འདོད་བློ་ཁེངས་པ་ཞིག་རྩ་བ་ཉིད་ནས་བྱུང་མ་སོང་། ད་ལྟའི་དུས་ཚོད་འདིར་བོད་ནང་གི་དགོན་པ་བརྒྱ་ཕྲག་དང་ཇོ་ནང་བ་འབུམ་ཕྲག་གིས་ཉིན་མཚན་ཀུན་ཏུ་བསང་བཏང་བ་དང་རླུང་རྟ་བཙུགས་པ་སོགས་བྱས་ཏེ། ང་ཚོས་ལོ་ངོ་ ༡༨ རིང་ཞུ་འབོད་བྱས་པ་དག་ལ་གྲོས་ཚོགས་ཚོགས་དུས་འདིའི་སྐབས་ཐག་གཅོད་ཡོང་རྒྱུ་རེད་བསམ་ནས་རེ་སྒུག་བྱས་ནས་བསྡད་ཡོད་ཀྱང་། ད་ཐེངས་གྲོས་ཚོགས་སྐབས་རྒྱབ་སྐྱོར་གྱིས་མ་འདང་བའི་དབང་གིས་གྲོས་ཆོད་འདི་འགྲོ་ཐུབ་མེད་པ་མ་ཟད། བོད་ནང་གི་ཛ་དྲག་གནས་སྟངས་དེ་ཟློག་མ་ཐུབ་པར་ལྷག་བསྡད་ཡོད་སྟབས། འདོད་བློ་ཁེངས་པ་ཞིག་བྱུང་མ་སོང་ཞེས་ཞུ་རྒྱུ་ཡིན། ཞེས་བརྗོད་བྱུང་།

ཁོང་ལ་ཉིན་རྒྱབ་སྤྱི་འཐུས་ཚོགས་གཙོ་མཆོག་གིས་ཁྱེད་རང་ཚོགས་དྲུང་ལས་ཁུངས་ལ་འབོད་འགུག་གནང་སྟེ་ག་རེ་གསུངས་ཡོད་མེད་དྲིས་པར། ཁོང་གིས། ཚོགས་གཙོ་མཆོག་གིས་ཚོགས་གཙོ་གཞོན་གཉིས་ཀྱིས་དམིགས་བསལ་ཐག་གཅོད་བྱེད་དབང་གང་ཡང་ཡོད་པ་མ་རེད། ཚོགས་གཙོ་གཞོན་གཉིས་ཀྱིས་ལས་འགན་བྱེད་དགོས་པ་ཚང་མ་བྱས་ཚར་ཡིན། ཐག་གཅོད་དེ་སྤྱི་འཐུས་གྲོས་ཚོགས་ནང་བྱེད་དགོས་པ་ཞིག་ཆགས་ཡོད་པ་དང་། གྲོས་ཚོགས་ནང་སྤྱི་འཐུས་ཀྱི་རྒྱབ་སྐྱོར་གྱིས་འདང་མེད་སྟབས། དེར་ཚོགས་གཙོ་གཞོན་གཉིས་ཀྱིས་དམིགས་བསལ་གཏོང་རྒྱུ་གང་ཡང་མེད་ཀྱང་། མ་འོངས་པར་གནད་དོན་ཐག་གཅོད་ཡོང་སྲིད་པ་ཞིག་རེད། ད་ཐེངས་ཁྱེད་རང་ཚོ་སྒོ་འགྲམ་ལ་ཞི་རྒོལ་ཡོང་བ་དེ་དམངས་གཙོའི་ལམ་ལུགས་དང་མཐུན་པ་ཞིག་ཡིན་སྟབས། དེར་དམིགས་བསལ་འགག་བྱ་གང་ཡང་མེད་ཅེས་གསུངས་བྱུང་། ཡིན་ནའང་ཚོགས་གཙོ་གཞོན་གཉིས་ཀྱིས་གསུངས་པ་དེར་ང་རང་འདོད་བློ་ཁེངས་པ་ཞིག་བྱུང་མ་སོང་ཡང་། ཁོང་རྣམ་གཉིས་ཀྱིས་དམིགས་བསལ་འགན་ཆེན་པོ་ཞིག་འཁུར་དགོས་སྟབས། གནས་སྐབས་རིང་ཐག་གཅོད་དེ་རང་མི་བྱེད་ཀ་མེད་ཆགས་ཡོད་པ་རེད་བསམ་པ་ཞིག་ལས་འདོད་བློ་ཁེངས་པ་ཞིག་བྱུང་མ་སོང་། ཞེས་བརྗོད་བྱུང་།

མཁན་པོ་ཀུན་དགའ་མཚམས་ཆུང་ལགས་སུ་གྲོས་ཚོགས་མཇུག་རྫོགས་ཡོད་པ་དང་། ཁྱེད་རྣམ་པའི་ཞུ་འབོད་ལས་འགུལ་ཡང་ཕྱིར་བསྡུ་གནང་ཡོད་སྟབས། མ་འོངས་པར་འཆར་གཞི་གང་འདྲ་ཡོད་མེད་དྲིས་པར། ཁོང་གིས། དེ་རིང་གི་ལས་འགུལ་འདི་གནས་སྐབས་རིང་མཚམས་འཇོག་བྱས་པ་རེད་མ་གཏོགས། ང་ཚོའི་ལས་འགུལ་རྦད་དེ་མཚམས་འཇོག་བྱས་པ་དེ་འདྲ་མ་རེད། སང་ཉིན་འདིར་འཛོམས་ཡོད་པའི་རྒྱ་བལ་འབྲུག་གསུམ་གྱི་ཇོ་ནང་བ་ཚོས་གྲོས་མོལ་བྱས་ཏེ་ཐག་གཅོད་བྱ་རྒྱུ་ཡིན་སྟབས། ད་ཆར་ངས་ཐབས་ལམ་འདིའི་ཐོག་འགྲོ་དགོས་པ་རེད་ཅེས་ལབ་རྒྱུ་གང་ཡང་མེད། ཡིན་ཡང་ངས་གཙོ་བོ་༧གོང་ས་མཆོག་གི་དགོངས་གཞི་དང་མ་འགལ་བ་དང་དམངས་གཙོའི་ལམ་ལུགས་དང་མཐུན་པར་ལས་འགུལ་སྤེལ་དགོས་པ་དེ་ཧ་ཅང་གལ་ཆེན་པོ་རེད་བསམ་གྱི་འདུག ཅེས་བརྗོད་བྱུང་།

ཁོང་ལ་དེ་རིང་སྤྱི་འཐུས་ལས་ཁུངས་སྒོ་ཁར་ཞི་འབོད་གནང་བ་དེར་གྲུབ་འབྲས་གང་འདྲ་ཞིག་འཐོན་པར་རེ་བ་གནང་གི་ཡོད་མེད་དྲིས་པར་ཁོང་གིས། ཕྱོགས་གཅིག་ནས་ང་ཚོས་མི་ལོ་ ༡༨ རིང་ལ་བཙན་བྱོལ་སྒྲིག་འཛུགས་ལ་ཧ་ལམ་སྙན་ཞུ་པོ་ཏི་གཅིག་མན་ཙམ་ཞིག་བཏང་ཡོད་ཀྱང་གྲུབ་འབྲས་མ་ཐོན་སྟབས། ཇོ་ནང་གཞིས་བྱེས་གཉིས་དང་ལྷག་པར་དུ་གཞིས་ལུས་ཇོ་ནང་བ་ཚོའི་ངོ་ཚབ་བྱས་ཏེ། དེ་རིང་འདིར་ཞུ་འབོད་བྱེད་བར་ཡོང་བ་ཡིན་ཡང་མང་ཚོགས་ཁྲོད་ཆབ་སྲིད་གོ་རྟོགས་དེ་ཙམ་མེད་སྟབས། ང་ཚོས་བཙན་བྱོལ་སྒྲིག་འཛུགས་ལ་ངོ་རྒོལ་བྱེད་བར་ཡོང་བ་རེད་བསམ་པའི་སེམས་ཚོར་ཞིག་ཡོང་གི་ཡོད་ས་རེད། གཉིས་ནས་བོད་མི་ཞིག་གིས་བཙན་བྱོལ་སྒྲིག་འཛུགས་ཀྱི་སྒོ་འགྲམ་དུ་ཡོང་ནས་ཞུ་འབོད་བྱེད་དགོས་པའི་གནས་སྟངས་ཤིག་ཆགས་ཡོད་སྟབས། ང་ཪང་ཚོ་ལ་མཚོན་ནའང་བློ་ཕམ་གྱི་རང་བཞིན་ཞིག་རེད། ཡིན་ནའང་ང་ཚོར་ཐབས་ལམ་གཞན་མེད་སོང་བ་རེད། མི་མང་ལ་གསལ་བོ་བཟོ་དགོས་པ་ཞིག་ལ། ང་ཚོས་དེ་རིང་བོད་མི་མང་གི་སྐུ་ཚབ་སྤྱི་འཐུས་རྣམ་པར་ཞུ་འབོད་བྱེད་ཀྱི་ཡོད་པ་ལས། བོད་མིའི་སྒྲིག་འཛུགས་དང་སྤྱི་འཐུས་ལྷན་ཚོགས་ལ་ངོ་རྒོལ་བྱེད་པ་ཞིག་རྩ་བ་ནས་མ་རེད། ཅེས་བརྗོད་བྱུང་།