བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༦༠ སྟེང་གི་རྩོམ་སྒྲིག་པའི་གཏམ།
ཟླ་བ་འདིའི་ནང་བོད་དུ་རང་ལུས་མེར་བསྲེགས་གནང་མཁན་གཉིས་བྱུང་སོང་། གཅིག་ཁམས་དཀར་མཛེས་བྲག་མགོའི་བཙུན་མ་ཡེ་ཤེས་མཁའ་འགྲོ་ལགས་དང་། གཞན་དེ་ཨ་མདོ་རྔ་པ་ཨ་འདུས་ཀྱི་གནས་སྐྱབས་ལགས་གཉིས་རེད། ང་ཚོ་བཙན་བྱོལ་ནང་གི་བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་སྡེ་ཁག་གིས་རང་སྲེག་གི་གྲངས་ཀ་རྩིས་ཏེ་འདུག་མི་རུང་ལ། མཆོད་འབུལ་སྨོན་ལམ་དང་མར་མེ་ཁྲོམ་སྐོར་ཙམ་གྱིས་འདོད་པ་ཁེངས་ཏེ། བབ་བསྟུན་གྱི་ལས་འགན་ཡོངས་སུ་འགྲུབ་ཡོད་བསམ་ནས་སྡོད་མི་རུང་།
སྤྱིར་བཏང་བོད་ནང་གི་རང་ལུས་མེར་བསྲེགས་དེ་བོད་མི་ཚོའི་རང་རྟོགས་ཀྱི་ལས་འགུལ་ཞིག་ཡིན་ལ། བཀོད་བྱུས་དང་ཚོད་འཛིན་བྱེད་པའི་དབང་ཚད་སུ་ལའང་མེད་སྐོར་གླེང་གི་ཡོད་མོད། ཁོང་ཚོ་དང་ང་ཚོ་ཤ་ཁྲག་གཅིག་པའི་བོད་མི་ཞིག་ཡིན་པ་དང་། ཁོང་ཚོའི་ལས་འགུལ་དེའང་ང་ཚོ་ཐུན་མོང་གིས་རྩོད་བཞིན་པའི་རྩ་དོན་དེ་ཡིན་པའི་ངོས་ཐད་ནས། ཕྱི་ཕྱོགས་ཀྱི་བོད་མིའི་སྒྲིག་འཛུགས་དང་ཚོགས་སྡེ་ཁག་ལ་བོད་ནང་གི་རང་སྲེག་ལ་ཐེ་གཏོགས་བྱེད་དགོས་པའི་བཟང་སྤྱོད་ཀྱི་འགན་དབང་ཡོད་ལ། སེམས་འཁུར་ལེན་དགོས་པའི་སྐྱིད་སྡུག་མཉམ་མྱོང་གི་ཐོབ་ཐང་ཡང་ཆ་ཚང་ཡོད།
བཙུན་མ་ཡེ་ཤེས་མཁའ་འགྲོ་ལགས་ཀྱིས་རང་ལུས་མེར་བསྲེགས་གནང་པའི་ཉི་མ་དེ་ཕྱི་ཟླ་ ༤ ཚེས་ ༨ ཉིན་ཡིན་ཡང་། གནས་ཚུལ་གསར་ལམ་ཁག་ཏུ་ཚེས་ ༡༠ ལས་ཐོན་ཐུབ་མེད། དེ་བཞིན། རྔ་པའི་ཕོ་གསར་གནས་སྐྱབས་ལགས་ཀྱིས་ཚེས་ ༡༦ ཉིན་རང་ལུས་མེར་བསྲེགས་གནང་ཡང་གནས་ཚུལ་ཕྱི་ལོགས་སུ་ཐོན་པ་ཚེས་ ༡༧ ཉིན་རེད། རང་སྲེག་གི་གནས་ཚུལ་ཁ་ཤས་ཟླ་བ་འགའ་རེའི་རྗེས་སུ་མ་གཏོགས་ཕྱི་ཕྱོགས་སུ་ཐོན་ཐུབ་མེད། ཁོར་ཡུག་གི་ཐད་ནས་ཀྱང་ཐེངས་འདིར་གནས་སྐྱབས་ལགས་ཀྱིས་རང་ལུས་མེར་བསྲེགས་གནང་ཡུལ་དེ་རང་ཁྱིམ་ར་བ་ཆགས་འདུག
བོད་མིའི་རང་སྲེག་ལས་འགུལ་ཆེན་མོ་འདི་ཐོག་མ་བྱུང་སྐབས། རྒྱལ་སྤྱིའི་ཐོག་ཁྱབ་བསྒྲགས་གང་འཚམ་བྱུང་ཡོད་ལ། བོད་པའི་སྤྱི་ཚོགས་ཀྱིས་ཀྱང་ཧང་སང་སང་དང་ཧ་ལས་ལས་བྱས་ཡོད། ཨ་རིའི་གྲོས་ཚོགས་སོགས་འཛམ་གླིང་རྒྱལ་ཁབ་ཁག་གི་གནད་ཡོད་མི་སྣ་རེ་ཟུང་དང་ཚོགས་སྡེ་འགའ་རེས་རྒྱབ་སྐྱོར་གྱི་རྣམ་པའི་བསྒྲགས་གཏམ་སྤེལ་ཡོད་ཀྱང་། ད་ལྟ་རྒྱལ་སྤྱིའི་དོ་སྣང་ཆུང་དུ་སོང་ཡོད་པ་དངོས་ཡོད་ཡིན་ལ། བོད་རང་གི་སྤྱི་ཚོགས་ནང་དུའང་དོ་དབྱིངས་བརླགས་ཏེ་གནས་ཚུལ་ཁྱབ་བརྡལ་གྱི་འགྲོས་ཀྱང་ཇེ་དལ་དུ་སོང་འདུག
ད་སྔ་བོད་ནང་རང་ལུས་མེར་བསྲེགས་རེ་བྱུང་སྐབས། ཉེ་འཁོར་གྱི་གྲོང་བ་ཁྱིམ་མཚེས་ཡོངས་རྫོགས་ཀྱིས་འདས་པོའི་ནང་མིར་སྐྱིད་སྡུག་མཉམ་མྱོང་དང་། ཚོང་ཁང་ཟ་ཁང་གི་སྒོ་བརྒྱབ་ནས་མྱ་ངན་དང་རྒྱ་གཞུང་ལ་ངོ་རྒོལ་གྱི་རྣམ་པ་ཤུགས་ཆེན་སྟོན་གྱིན་ཡོད་ཀྱང་། རྒྱ་ནག་གཞུང་གི་གནོན་ཤུགས་དང་གཡོ་བྱུས་སྣ་ཚོགས་འོག ནམ་ཞིག་བོད་ནང་དུའང་གྲངས་ཀའི་ངོ་བོར་གྱུར་ཏེ་གྲངས་འདྲེན་སྣ་ཚོཊ་འབྱུང་སྲིད་ལ། རང་སྲེག་གི་རྣམ་པ་ཡང་འདྲ་མིན་འཐོན་སྲིད། བོད་མིའི་རང་སྲེག་ལས་འགུལ་ཆེན་མོ་འདིའི་ཐད། ང་ཚོ་བཙན་བྱོལ་བོད་པ་ཚོས་བཟང་སྤྱོད་ཀྱི་འགན་དབང་དང་། སྐྱིད་སྡུག་མཉམ་མྱོང་གི་ཐོབ་ཐང་སྤྱད་དེ་བསྒྲུབ་འོས་པ་དང་། ངེས་པར་དུ་བསྒྲུབ་དགོས་པའི་ལས་འགན་མང་དག་ཅིག་ཡོད་པ་ལས། བོད་ནང་གི་རང་ལུས་མེར་བསྲེགས་དེ་གང་མགྱོགས་མཚམས་འཇོག་དགོས་པའི་ཞུ་སྐུལ་ནན་པོ་ཁ་གསལ་གོ་བདེ་ཞིག་གནང་རྒྱུ་དང་། ཡང་ན། བོད་ནང་གི་བློས་གཏོང་དེ་དང་མཐུན་པར་ཕྱི་ཕྱོགས་ནས་ཀྱང་གཞུང་དམངས་མཉམ་རུབ་ཀྱི་འགུལ་སྐྱོད་ཆེན་པོ་ཞིག་རྒྱག་དགོས་པ་ཁ་ཚ་དགོས་གཏུགས་ཆགས་ཡོད།
