ཆོས་བརྒྱུད་ཁག་གིས་ཕན་ཚུན་གྱི་གཞུང་ལུགས་ལ་སློབ་སྦྱོང་གནང་རོགས།

དེ་རིང་༧གོང་ས་མཆོག་གིས་རྒྱུད་སྟོད་གྲྭ་ཚང་དུ་བཀའ་ཆོས་དབུ་འཛུགས་གནང་བའི་ཐོག བོད་གངས་ཅན་ལྗོངས་ཀྱི་ཆོས་བརྒྱུད་ཚོའི་འབྱུང་ཁུངས་གཅིག་ཡིན་བསམ་པའི་ཐོག་ནས་ཕན་ཚུན་གཅིག་གིས་གཅིག་གི་གཞུང་ལ་གོ་བསྡུར་དང་གཞུང་ཕན་ཚུན་སློབ་སྦྱོང་བྱས་ན་ཞེ་དྲགས་ཡག་པོ་རེད་ཅེས་ཞེན་སྐུལ་གནང་འདུག

དེ་རིང་སྔ་དྲོའི་ཆུ་ཚོད་ ༡༠ པའི་སྟེང་། ༧གོང་ས་མཆོག་དྷ་རམ་ས་ལའི་ཉེ་འཁྲིས་རྒྱུད་སྟོད་གྲྭ་ཚང་དུ་ཕེབས་ཏེ། ཉིན་བཞིའི་རིང་གི་གསུང་ཆོས་དེ་དབུ་འཛུགས་གནང་ཡོད་པ་དང་། ད་རེབ་ཀྱི་གསུང་ཆོས་སྟེང་རྒྱལ་ཁབ་འདྲ་མིན་ ༤༧ ནས་ཕེབས་པའི་ཆོས་ཞུ་བ་དང་། བོད་པའི་གྲྭ་བཙུན་སྔགས་གསུམ་དང་དྷ་རམ་ས་ལ་ཁུལ་གྱི་མི་མང་བཅས་མི་ ༥༠༠༠ ལྷག་མཛོམས་འདུག

༧གོང་ས་མཆོག་གིས་ཐོག་མར་རྒྱུད་སྟོད་རྭ་མོ་ཆེ་གཙུག་ལག་ཁང་དུ་གནས་གཟིགས་མཛད་རྗེས། རྒྱུད་སྟོད་གྲྭ་ཚང་གིས་ཡུལ་གྲུ་འདྲ་མིན་ནས་ཕེབས་པའི་ཆོས་ཞུ་རྣམས་ལ་ཉིན་གུང་གསོལ་ཚིགས་འདེགས་འབུལ་ཞུས་སོང་། ཉིན་གུང་ཆུ་ཚོད་ ༡༢།༣༠ སྟེང་༧གོང་ས་མཆོག་གིས་གསུང་ཆོས་དངོས་སུ་དབུ་འཛུགས་གནང་སོང་ལ། ཐེངས་འདིའི་གསུང་ཆོས་ནི་ཙོང་ཁ་པ་ཆེན་པོས་མཛད་པའི་བྱང་ཆུབ་ལམ་རིམ་བསྡུས་དོན་དང་། རྟེན་འབྲེལ་བསྟོད་པ། ལམ་གཙོ་རྣམ་གསུམ་སོགས་ཡིན་འདུག

༧གོང་ས་མཆོག་གིས་གསུང་ཆོས་ཀྱི་སྔོན་འགྲོར་བཀའ་སློབ་གནང་དོན། བར་སྐབས་ཤིག་ནས་སྟོད་རྒྱུད་གྲྭ་ཚང་གིས་བཀའ་ཆོས་ཁག་ཁ་ཤས་ཤིག་བྱུང་ཐུབ་ན་ཟེར་ནས་རེ་སྐུལ་གནང་སོང་། བཀའ་ཆོས་མང་པོ་ཞིག་ཉི་མ་མང་པོ་འབྲེལ་ནས་སོང་ན་ཐང་ཆད་གི་རེད། ད་ལྟའི་བར་སྐབས་བོད་མིར་དཀའ་ངལ་ཏོག་ཙམ་ཡོད་དུས་ངས་ད་ལྟ་ཨེམ་ཆི་རིགས་གཅིག་རྐང་འཛིན་དེ་འདྲ་བསྟན་བསྡད་ཡོད་རེད། ཁ་སང་མཇར་མིན་གྱི་ཨེམ་ཆི་ཞིག་ཡོད། དམིགས་བསལ་གྱིས་མཁས་པ་དེ་འདྲ་རེད། ཁོ་རང་གིས་ཞིབ་འཇུག་བྱས་དེ་མུད་པའི་གནས་སྟངས་ལ་བལྟས་ཏེ་ཚུར་ཡག་པོ་ཞེ་དྲགས་འདུག་ཟེར། དེ་ནས་ཁོ་རང་གིས་རྩེད་མོ་འདྲ་གཅིག་རེད་ལ་དངོས་གནས་འདྲ་གཅིག་ཀྱང་རེད། དབྱིན་ཇིའི་ཚིག་ལས་ eighteen ཟེར་པ་དང་ eighty ཟེར་བ་གཉིས་འདྲ་བོ་ཡོད། ཁོས་ང་ལ་ཁྱེད་རང་ལོ་ eighteen མ་རེད། ལོ་བཅོ་བརྒྱད་མ་རེད། eighty ། ཁྱེད་རང་ལོ་བརྒྱད་ཅུ་རེད། ཞེ་དྲགས་གཞོན་གཞོན་རེད་བསམ་རྒྱུ་ཡོད་པ་མ་རེད། ལུས་པོ་ག་ལེར་མར་བཀུག་འགྲོ་གི་ཡོད་རེད་ཟེར། དེ་དངོས་གནས་བདེན་པ་རེད། དེས་ངའི་སེམས་ལ་ཞེ་དྲགས་ཕན་སོང་། དེར་བརྟེན། དེ་འདྲ་ཡིན་དུས་ཡུན་རིང་པོ་འདྲ་ཞིག་བྱེད་དགོས་བྱུང་ན་ཏོག་ཙམ་ཐང་ཆད་ཀི་འདུག ཅེས་གསུངས་སོང་།

ཁོང་གིས་མུ་མཐུད་དུ། རྒྱུད་སྟོད་སྨད་ཀྱི་མཁན་པོ་དང་དགེ་མདུན་པ་ཁྱེད་རང་ཚོ་གཙོ་བོར་གྱུར་བའི་ང་ཚོའི་བོད་རིགས་ཚོ་དང་། ཕ་མེས་ནས་སངས་རྒྱས་པའི་ཆོས་ལ་འཆད་རྩོད་གནང་མཁན་རྒྱ་ཡི་ཆོས་གྲོགས། བོད་ལ་སངས་རྒྱས་ཆོས་མ་དར་གོང་ནས་རྒྱ་ནག་ལ་སངས་རྒྱས་པའི་ཆོས་དར་ཡོད་པ་དང་། དེའི་འབྱུང་ཁུངས་དེ་ཐང་བཙུན་བླ་མ་རྒྱ་གར་ལ་ཕེབས་ནས་དཔལ་ནལེནྡ་ལ་ཞུགས་ནས་ནལེནྡ་ཡི་སྐབས་དེར་ཡོངས་སུ་གྲགས་བསྡད་མཁན་ཞིག་དེ་གནས་བརྟན་ཆོས་སྐྱོང་ཡིན་པ་རེད། དེ་ནས་གཙོ་བོ་མར་བརྒྱུད་པ་ཞིག་ཡིན་ས་རེད། དེ་བྱས་ནས་གང་ལྟར་སློབ་ཕྲུག་གི་རྗེས་འབྲང་ཆགས་བསྡད་ཡོད་པ་རེད་། དེ་ནས་ནལེནྡ་ཡི་ཆོས་བརྒྱུད་ཆགས་ཡོད་པ་རེད། གང་ལྟར་ང་ཚོ་གཅིག་པ་ཆགས་འདུག རྒྱ་ནག་ནས་མར་ཀོ་རི་ཡ་དང་ཝེ་ཐི་ནམ། ཉི་ཧོང་སོགས་ཡུལ་གྲུ་དེ་དག་ཚང་མར་ནལེནྡ་ཡི་ཆོས་བརྒྱུད་གཅིག་གྱུར་ཆགས་འདུག ང་རང་ཚོ་ཚོང་མ་སངས་རྒྱས་པའི་ཆོས་པ་ཡིན་ཟེར་བསྡད་ཡོད་པ་རེད། སངས་རྒྱས་ཀྱི་ཆོས་ག་འདྲ་ཞིག་རེད་ལབ་ན་མགོ་ཕུར་ཕུར་བྱས་ནས་སྡོད་རྒྱུ་རེད། ང་ཧི་མ་ལ་ཡའི་རི་རྒྱུད་དེ་འདྲར་ཕྱིན་པའི་སྐབས་ལ། རླངས་འཁོར་འཁྱུག་ཙམ་འཁྱུག་ཙམ་བཀག་སྟེ། སངས་རྒྱས་པའི་ཆོས་ག་རེ་རེད་ལབ་ན། མང་ཆེ་བས་སངས་རྒྱས་ཆོས་དགེ་འདུན་ལ་སྐྱབས་སུ་མཆི་བོ་ཟེར་བ་དེ་རེད་ཟེར། ད་སངས་རྒྱས་ཆོས་དགེ་འདུན་ཟེར་བ་དེ་ག་འདྲ་ཞིག་རེད་ཅེས་དྲིས་ན། བཤད་ཤེས་མཁན་མི་འདུག དེ་ནས་སྐབས་རེར་ངས་ང་ཚོའི་སངས་རྒྱས་དང་ཚང་པ་དང་ཁྱབ་འཇུག དབང་ཕྱུག་དེ་ཚོ་གཅིག་པ་རེད་དམ་ཞེས་དྲིས་ན་གཅིག་པ་རེད་ཟེར་གྱིན་འདུག དེ་གང་ལྟར་མ་ཤེས་པའི་རྟགས་རེད། ཆོས་སློབ་སྦྱོང་ཞེ་དྲགས་མི་བྱེད་པར་དད་པ་རང་གི་ཐོག་ནས་འགྲོ་སྡོད་མཁན་རེད། ངས་ནམ་རྒྱུན་འདི་ལྟར་ཤོད་བསྡད་ཡོད། ང་ཚོའི་སངས་རྒྱས་པའི་ཆོས་བྱེད་མཁན་ཚོ་དུས་རབས་ཉེར་གཅིག་པའི་སངས་རྒྱས་པའི་ཆོས་པ་ཞིག་བྱ་དགོས་པ་རེད་ཟེར་གྱིན་ཡོད། ཅེས་གསུངས་སོང་།

ཁོང་གིས་མུ་མཐུད་དུ། དེ་རིང་ཁ་སང་འཛམ་གླིང་འདི་གང་ཅིའི་ཐད་ནས་ཡར་རྒྱས་འགྲོ་བཞིན་པའི་སྐབས་འདིར་སོ་སོའི་ཕ་མེས་ཀྱི་ཆོས་དེ་ཡང་དད་པ་གཅིག་པའི་ཐོག་ནས་འགྲོ་བ་མ་ཡིན་པར། སངས་རྒྱས་པའི་ཆོས་ཀྱི་འགྲོ་སྟངས་ག་རེ་ཡིན་པ་ཤེས་པ་བྱས་ཏེ། སངས་རྒྱས་པའི་ཆོས་ཉམས་ལེན་དུས་རབས་ཉི་ཤུ་རྩ་གཅིག་པའི་སངས་རྒྱས་པའི་ཆོས་པ་ཞིག་ཆགས་ཀྱི་ཡོད་པ་རེད། གཞན། ང་རང་ཚོའི་སྔ་མའི་ལུགས་སྲོལ་བཞིན་ཕྱིན་པ་ཡིན་ན་གནད་འགག་ལ་ཐུག་ན་ཞེ་དྲགས་རང་མེད་པའི་བཟོ་འདྲ་ཞིག་འདུག དེ་འདྲ་ཡིན་དུས་ང་རང་ཚོས་བསླབས་པ་སློབ་གཉེར་བྱ་རྒྱུ་དེ་ཞེ་དྲགས་གལ་ཆེན་པོ་རེད།

རྒྱ་ཡི་ཆོས་གྲགས་མང་པོ་ཞིག་ཡོད་པ་རེད། ད་ཁྱེད་རང་ཚོ་ཡིན་ན་སྦྱོང་བརྩོན་བྱེད་རྒྱུ་དཔེ་གལ་ཆེན་པོ་རེད། སོ་སོ་རང་ཉིད་ཀྱི་ཉམས་ལེན་བྱེད་པར་ཆ་བཞག་ན་ཡང་། སངས་རྒྱས་པའི་ཆོས་ཀྱི་ཐབས་དང་ཤེས་རབ་ཀྱི་འགྲོ་སྟངས་ཤེས་པའི་ཐོག་ནས་ཉམས་ལེན་བྱས་པ་ཡིན་ན། དད་པ་དེ་ཡང་རྒྱུ་མཚན་ལྡན་པའི་དད་པ་ཞིག་ཆགས་ཀྱི་ཡོད་སྟབས། ཤེས་ནས་དད་པ་ཐོབ་པ་ཡིན་དུས་དད་པ་བརྟན་པོ་ཡོང་གི་རེད། ཅེས་གསུངས་སོང་།

བོད་གངས་ཅན་ལྗོངས་ཀྱི་ས་དགེ་བཀའ་རྙིང་ཇོ་ནང་ཚང་མ་དཔལ་ནལེནྡ་ནའི་ཆོས་བརྒྱུད་གཅིག་པ་ཡིན་སྟབས། བོད་གངས་ཅན་ལྗོངས་ཀྱི་ཆོས་བརྒྱུད་ཚོའི་འབྱུང་ཁུངས་གཅིག་ཡིན་བསམ་པའི་ཐོག་ནས་ཕན་ཚུན་གཅིག་གིས་གཅིག་གི་གཞུང་གོ་བསྡུར་དང་། གཞུང་ཕན་ཚུན་བལྟས་ན་ཞེ་དྲགས་ཡག་པོ་རེད། ལུང་རིག་གིས་གཏན་ལ་ཕབ་པ་མ་ཡིན་པར་སོ་སོའི་ཉམས་ལེན་གྱིས་ཡར་བགྲིང་ནས་བློ་གཟུ་བོར་གནས་པ་གལ་ཆེན་པོ་རེད། ཆོས་ལུགས་དད་པ་རང་དབང་རེད། གལ་སྲིད་ཆོས་བྱས་པ་ཡིན་ན་དོ་སྣང་ཡག་པོ་བྱས་ཏེ་གནད་འགག་ག་རེ་ཡིན་མིན་ཤེས་དགོས། ཞེས་སོགས་གསུངས་སོང་།  

ང་ཚོ་བཙན་བྱོལ་པ་ཆགས་ནས་ལོ་ངོ་ལྔ་བཅུ་ལྷག་རེད། ཕྱོགས་གཅིག་ནས་ང་ཚོ་བཙན་བྱོལ་བ་བྱེད་པ་ཐབས་སྐྱོ་བོ་ཡིན་ཡང་། སྔོན་མ་སྨད་རྒྱུད་པ་ཚོ་རྒྱ་གར་ལྷོ་ཕྱོགས་ལ་ཕེབས་པ་རེད། སྟོད་རྒྱུད་པ་ཚོར་རྐང་པ་འཛུགས་ས་མེད་པར་ཕར་ཕྱིན་ཚུར་ཕྱིན་བྱས་ཏེ་བསྡད་ཀྱང་། རྗེས་སུ་ས་ཆ་འདི་རག་སྟེ་ད་ལྟ་ཡག་པོ་ཞེ་བོ་ཆགས་འདུག གང་ལྟར་ལྷ་སའི་ར་མོ་ཆེ་ལས་འདི་ཡག་པོ་ཆགས་འདུག ལྷ་སའི་ར་མོ་ཆེ་འདི་འདྲ་རང་ཡོད་པ་རེད། ཅེས་བཞད་མོ་དང་ཅེས་གསུངས་སོང་།

ཡང་ཁོང་གིས། ང་ཚོའི་བོད་པ་ཡོད་པ་དེ་ཚོ་བཙན་བྱོལ་བ་ཆགས་ནས་མཐུད་རྐྱེན་འཛོམས་པ་ཞིག་དང་། སོ་སོས་སློབ་སྦྱོང་མ་བྱས་ན་མ་གཏོགས་སློབ་སྦྱོང་བྱས་ན་དངོས་ནས་མཐུད་རྐྱེན་ཡག་ཐག་གཅོད་ཡོད་པའི་བཟོ་འདྲ་བོ་ཞིག་རེད། དེ་ནས་རིམ་མཞིན་ཚན་རིག་པ་དང་ང་ཚོས་ཕན་ཚུན་ངོ་ཤེས་ནས་བགྲོ་གླེང་མང་པོ་བྱས་ཡོང་སྐབས། རྣམ་དཔྱོད་ལྡན་པ་ཚོ་སངས་རྒྱས་པའི་ཆོས་དང་ལྟ་གྲུབ་ལ་ཡིད་འཕྲོག་འགྲོ་བཞིན་འདུག དེ་ནས་རིམ་བཞིན་དངོས་ཡོད་གནས་ཚུལ་གཤིབ་བསྡུར་བྱས་ཡོང་དུས་སངས་རྒྱས་པའི་ཆོས་ལུགས་ཟེར་བ་འདི་འདྲ་འདྲའི་ནང་ནས་མི་འདྲ་བ་ཞིག་ཡིན་པ་མཐོང་འདུག རིག་པས་དཔྱད་ཡོང་དུས་དངོས་དོན་བཞག་ཐུབ་པ་ཞིག་ཆགས་ཡོད་སྟབས། ཆོས་མཁས་མི་ལེན་མཁན་ཞིག་ཡིན་ནའང་རྣམ་དཔྱོད་འཕེལ་བར་ཕན་ཐོགས་ཡོད་པ་ཞིག་རེད། སྤྱིར་འཛམ་གླིང་ན་ལྟ་གྲུབ་ཡོད་པའི་ཆོས་བརྒྱུད་ཚང་མར་བྱམས་བརྩེ་བསླབ་བྱ་རྒྱག་མཁན་གཅིག་པ་རེད། བྱམས་བརྩེ་ཡར་རྒྱས་གཏོང་བའི་ཐབས་ལམ་དེ་ལྟ་གྲུབ་ཀྱི་སྟེང་ནས་ཡོང་གི་ཡོད་པ་རེད། ལྟ་གྲུབ་ཀྱི་ཆ་ནས་འཇིག་རྟེན་བཀོད་པ་པོ་འདོད་མཁན་དང་། འཇིག་རྟེན་བཀོད་པ་པོ་མི་འདོད་མཁན། ལྟ་གྲུབ་ཀྱི་ཐོག་ནས་མི་འདྲ་བ་ཤུགས་ཆེན་པོ་ཆགས་ཡོད་ཀྱང་། འཇིག་རྟེན་བཀོད་པོ་ཚོར་ལྟ་གྲུབ་ཀྱི་ཆ་ནས་འགྲེལ་བཤད་རྒྱག་རྒྱུ་ཞེ་དྲགས་མེད་པ་ཆགས་ཡོད། ཅེས་གསུངས་སོང་།

གསར་འགོད་པ། འཇིགས་མེད་རྒྱ་མཚོ།